Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • yb07 matl. 43-64
  • Xiviko Xa Misava Hinkwayo

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Xiviko Xa Misava Hinkwayo
  • Buku Ya Lembe Ya Timbhoni Ta Yehovha Ya 2007
Buku Ya Lembe Ya Timbhoni Ta Yehovha Ya 2007
yb07 matl. 43-64

Xiviko Xa Misava Hinkwayo

ASIA NI LE MIDDLE EAST

MATIKO 47

VAAKA-TIKO 3 930 343 401

VAHUWELERI 591 750

TIDYONDZO TA BIBELE 477 609

Japani

Loko nkarhi wa leswaku Miho a veleka wu tshinerile, a swi nga ha n’wi oloveli ku chumayela hilaha a a tolovele hakona. Kambe leswi a a nga swi lavi ku tshika vuphayona, u kombele mulanguteri wa ntirho leswaku a n’wi nyika tiadirese ta miti leyi a swi tika ku chumayela eka yona, yo tanihi miako leyi sirheleriweke ngopfu. Mulanguteri wa ntirho u n’wi nyike tiadirese ta kwalomu ka dzana. Hiloko a ringeta ku ba tinqingho eka yo tala ya yona hilaha a nga kotaka hakona. Eku sunguleni, a nga kona loyi a a lava ku yingisela kutani u hete ku chumayela hi timinete ta 30. Hiloko a engetela nkarhi wa yena wo chumayela hi ku tlhela a va rhumela ni mapapila. U tirhise xin’wana ni xin’wana lexi a xi twaka emutini lowu a wu beleke riqingho, xo kota n’wana la rilaka leswaku a kota ku tsala papila ro koma a boxa na swona. Loko a tiva leswaku papila ra yena ri ta va se ri fikile emutini wolowo, a a ba riqingho kutani a bula hi mpfuno wa ku tirhisa nkongomiso wa Bibele lowu a vulavuleke ha wona epapileni. Eka van’wana lava a va beleke riqingho, manana un’wana u ale ku vulavula na yena eriqinghweni, hiloko Miho a n’wi rhumela papila. Loko a tlhela a n’wi bela riqingho, ku hlamule n’wana wa nhwanyana wa manana yoloye hikuva mana wa yena a a nga ri kona, naswona n’wana loyi a a ri hlayile papila ra Miho. Miho u n’wi chumayerile kutani a n’wi tshembisa ku n’wi rhumelela papila leri tameleke ndzayo ya Matsalwa hi ta leswi endlekaka exikolweni. U n’wi byele leswaku u ta tlhela a n’wi bela riqingho. Loko a ri ba, mana wa yena se a a ri kona kutani a vula leswaku n’wana wa yena a a ri ni swiphiqo exikolweni nileswaku leswi Miho a swi vuleke epapileni ra yena swi n’wi pfunile. Endzhaku ko n’wi bela riqingho ko hlayanyana ni ku n’wi tsalela mapapila, manana loyi ni n’wana wa yena va sungule ku dyondzeriwa.

Nepal

Mudyondzisi la vuriwaka Prem, u hete nkarhi wo leha a ri karhi a lavana ni ntiyiso. U hlaye Bibele a tlhela a ya ekerekeni leyi nga le kusuhi ni xikolo lexi a a dyondzisa eka xona. Nilokoswiritano, a nga ti kumanga tinhlamulo ta swivutiso swa yena naswona u hlundzukisiwe hileswi mufundhisi a a tshamela ku koxa mali ya munyikelo. Prem u khongele Xikwembu a kombela leswaku xi n’wi pfuna a kuma kereke leyi nga ta n’wi pfuna a dyondza ntiyiso. Loko Prem a rhurhele exikolweni xin’wana, u vutise vaakelani va yena lomu a nga yi kumaka kona kereke. A ku ri ni mufana un’wana la nghenaka xikolo, loyi a a tshama emuakweni lowu Prem a tshamaka eka wona, loyi mana wa yena a yeke ko hlayanyana eminhlanganweni eHolweni ya Mfumo, kutani mufana loyi u n’wi yise eholweni. Nkulumo ya le rivaleni leyi Prem a yi yingiseke a yi vulavula hi Mfumo wa Xikwembu, ku nga yona mhaka leyi Prem a a ri ni torha lerikulu ra yona. Ku hleriwe leswaku a fambiseriwa dyondzo. Yena ni ndyangu wa yena se va va kona eminhlanganweni hikuva Prem u kuma tinhlamulo leti ku nga khale a ri karhi a ti lava. Va rhumele papila ra leswaku ku suriwa mavito ya vona ekerekeni hikuva va lava ku va Timbhoni ta Yehovha.

Taiwan

Swichudeni exikolweni xa le hansi swi komberiwe ku tsala xitsalwana eka mphikizano lowu vaka kona lembe ni lembe. Nhloko-mhaka ya kona a yi ku “Buku Leyi Ndzi Yi Rhandzaka.” Weizhen, la nga ni malembe ya khume hi vukhale u tsale leswaku buku leyi a yi rhandzaka ngopfu i Bibele. Handle ko hlamusela ndlela leyi vuprofeta bya Bibele byi pakanisaka ha yona ni nkongomiso lowunene lowu nga eRitweni ra Xikwembu, u hlamusele leswaku Bibele yi hlamule swivutiso swa yena leswi tsandzeke vadyondzisi ni swichudeni-kulobye. U tsale leswi: “Mudyondzisi wa hina u hi byele leswaku vanhu va huma eka mfenhe. Ndzi tivutise leswi: ‘Loko munhu a huma eka mfenhe, a hi fanele hi ti xixima naswona hi ti rhandza. Kambe, ha yini hi ti pfalela emintangeni ya swiharhi? Phela, sweswo a swi fanele swi endla leswaku hi titwa hi ri ni nandzu lowukulu!’ Kambe, Bibele yi swi veka erivaleni hikuva yi ri: A hi humi eka mfenhe. Ematshan’weni ya sweswo vatswari va hina va vumbiwe hi ntshuri wa misava hi xifaniso xa Xikwembu.” U gimete xitsalwana xa yena hi ku tsala a ku: “Vanhu va khale va te: ‘Ku hlaya buku swi fana ni ku pfula bokisi leri nga ni xuma.’ Hi ku ya hi mina, Bibele i ya risima ngopfu ku tlula nsuku. Buku leyi hi yona ndzi rhandzaka ku yi hlaya ngopfu.” Hambileswi Weizhen a nga eka ntanga mune, xitsalwana xa yena xi kume sagwadi ro sungula hambiloko xi nghene emphikizanweni ni switsalwana swa swichudeni swa xikolo xa le henhla. Loko a rungula ntokoto wa yena, u tshahe Vaheveru 4:12 kutani a ku: “Ku dzuneka hinkwako ndzi ku yisa eka Yehovha Xikwembu.”

Mongolia

Loko Bolortsetseg, loyi a a ha ku khuvuriwa eMongolia, a twa leswaku xaka rin’wana ra yena ri lovile nileswaku nsati wa rona u ni gome lerikulu, u ri rhumele minkandziyiso ya hina hinkwayo leyi kandziyisiweke hi ririmi ra le Mongolia. Evsanaa, nsati wa xaka leri loveke, u yi hlaye hi vusiku byin’we. Hi xamundzuku xa kona, u bele Bolortsetseg riqingho a kombela leswaku a namba a ku milenge mimbirhi va ta vulavula. Bolortsetseg u kombele makwerhu un’wana wa xisati leswaku a n’wi heleketa, kutani va fika va kuma leswaku Evsanaa u ni swivutiso swo tala leswi a swi tsaleke. U rhiye ndleve loko va ri karhi va n’wi hlamula hi Bibele. Endzhaku ka bulo ro leha, vamakwerhu lava va byele Evsanaa leswaku a nga vuyeriwa loko ko tlhuvutsiwa xivutiso ha xin’we hi vuenti. Va n’wi byele hi ta dyondzo ya le kaya ya Bibele. Evsanaa a nga kalanga a tipfinyinga, u nambe a pfumela ku fambiseriwa yona kanharhu hi vhiki. Ku nga si hela ni n’hweti, se a a cukumete swifaniso swa yena swa hava naswona se a a va kona eminhlanganweni. Endzhaku ka tin’hweti timbirhi loko se a ri muhuweleri, a a lava ku va phayona ra nkarhinyana kambe a swi nga ta koteka hikuva a a fanele a rhanga a khuvuriwa. Sweswo a swi n’wi hetanga matimba naswona u tiyimisele ku heta tiawara ta 50 hi n’hweti entirhweni wo chumayela loko a ha rindzele ntsombano lowu a nga ta khuvuriwa eka wona.

Kazakhstan

Edorobeni ra Rudny, phayona rin’wana ri hlangane ni jaha leri vuriwaka Nikolay, leri vuleke leswaku ri nga swi tsakela ku fambiseriwa dyondzo ya le kaya ya Bibele. Hambiswiritano, a ku ri ni xiphiqo. Nikolay ni ndyangu wa yena a va tshama eximutanini xin’wana xa le kule naswona a a ta hi xiwelo edorobeni ra Rudny a ta endzela maxaka ya yena. Makwerhu u vutisile loko a nga endzela Nikolay eximutanini lexi a tshamaka eka xona, kambe Nikolay u vule leswaku xi le kule hi tikhilomitara ta 200 naswona munhu u famba a kala a swi twa a nga si fika eka xona.

Nilokoswiritano, makwerhu u tsale adirese ya jaha leri a ri tshembisa leswaku va ta tlhela va vonana. U hlele ku endzela eximutanini lexi kutani a rhamba makwerhu un’wana wa xinuna ni van’wana vambirhi va xisati va le vandlheni. Endzhaku ka mavhiki mambirhi va khandziye xitimela va ya kona. Loko va fika exitichini xa le kusuhi na kona, va kume leswaku a ka ha sele tikhilomitara tin’wana ta 18 leswaku va fika eximutanini lexi Nikolay a tshamaka eka xona naswona a ku nga ha ri na swo famba leswi yaka kona. A ku nga ri na ndlela yin’wana handle ko ba hi nenge. Kambe sweswo a swi nga ta olova hikuva a ku ri xixika naswona a ku ba moya wun’wana wo tlhava. Va te va nga si ya kule, ku fika teretere leyi kokaka thangi ra ntswamba. Hiloko yi yima kutani muchayeri a vula leswaku va nghena endzeni ka thangi ra ntswamba! Vamakwerhu va ehlekete leswaku wo va vungunya kambe a a tiyisile hikuva thangi ra kona a ri nga ri na nchumu, hiloko va nghena. Hambileswi a ku titimela endzeni ka thangi rero, kambe a swi antswa hikuva a va nga biwi hi moya wo titimela. Muchayeri u va byele leswaku u ta va siya laha va nga ta va va saleriwe ntsena hi tikhilomitara ta nkombo leswaku va fika laha va yaka kona. Kutani va ta hetisa mpfhuka wolowo hi milenge. Swi va teke tiawara tin’wana timbirhi ku hetisa mpfhuka lowu saleke wa tikhilomitara ta nkombo leswaku va fika eximutanini lexi Nikolay a tshamaka eka xona.

Nikolay ni nsati wakwe Valya, va hlamarile va tlhela va tsaka loko va vona vamakwerhu va gongondza ekaya ra vona. Va tshivelele vaendzi va vona ndzilo leswaku va ta kufumela va tlhela va va lunghisela swakudya. Ivi va sungula ku bula hi Bibele. Endzhaku ka mavhiki mambirhi, vamakwerhu va le dorobeni ra Rudny va vuyele eximutanini lexi. Makwerhu la nga phayona u ri: “Nikolay u hi hlanganisile exitichini. Vanhu vo tala va le ximutanini a va lava ku bula ni ‘vanhu lava teke hi thangi ra ntswamba,’ kutani Nikolay a hlela leswaku hi vonana ni hinkwavo lava tsakelaka. Hinkwavo lava tsariseke a va byeriwa loko se ku ri nkarhi wa vona wo vonana na hina naswona va pfumele ku fambiseriwa dyondzo ya Bibele.” Hi ku famba ka nkarhi, vunyingi bya lava va sunguleke ku fambiseriwa dyondzo ya Bibele eximutanini xexo va endle nhluvuko lowunene hi tlhelo ra moya. Endzhaku ka malembe mambirhi, Nikolay na Valya va khuvuriwile. Sweswi vana va vona vambirhi va vafana i vahuweleri lava nga khuvuriwangiki kasi Nikolay wa ha ku hlawuriwa ku va nkulu eka ntlawa wolowo lowu nga woxe.

Georgia

Maphayona ma chumayela eswifundzheni swa le tintshaveni leswi nga ekule le tikweni ra Georgia. Vamakwerhu vambirhi va xisati lava nga maphayona va fambe tikhilomitara ta nhungu va ya eximutanini xa le kule, emakumu ka patu ra le tintshaveni kutani va sungula ku chumayela hi yindlu ni yindlu. Ku nga ri khale, ku fike yin’wana ya tindhuna ta ximutana xexo, yi yimisa Ketevan, un’wana wa vamakwerhu lava va xisati kutani yi lava ku tiva leswaku ha yini a chumayela kambe a nga ngheni kereke ya Orthodox. U ringete ku hlamusela kambe ndhuna leyi a yi ome nhloko. Hiloko yi n’wi tlumbela ehansi kutani yi n’wi ba hi nhonga. Vanhu vo hlayanyana va n’wi vonile loko a ri karhi a biwa naswona mhaka yoleyo yi hangalake ni ximutana hinkwaxo. Endzhakunyana, makwerhu loyi u tlhele a ya chumayela eximutanini lexi. Wansati un’wana loyi eku sunguleni a a kaneta u byele makwerhu loyi a ku: “U vuyile hambileswi u biweke! Hakunene u ni xivindzi! Ndzi kombela u ta ekaya ndzi lava ku twa leswi engetelekeke.” Endzhaku ko rhiya ndleve, u byele Ketevan leswaku a nga ta rini na rini ekaya rakwe a ta n’wi chumayela, u ta n’wi amukela hi mandla mambirhi.

AFRIKA

MATIKO 57

VAAKI 802 232 357

VAHUWELERI 1 043 396

TIDYONDZO TA BIBELE 1 903 665

Rwanda

Siku rin’wana, vahundzi va ndlela va thumbe buku leyi nge U Nga Hanya Hi Masiku aParadeyisini eMisaveni etlhelo ka patu. Hiloko va yi yisa eka mufundhisi wa kereke ya vona ya Protestente. U yi hlayile kutani a yi tsakela ivi a lavana ni Timbhoni, kutani ti sungula ku dyondza na yena Bibele. Vutivi bya yena hi Bibele byi kurile, hiloko a tshika kereke kutani a khuvuriwa. Kambe a nga tshamanga hi mavoko, u hisekele ku byela ntiyiso eka van’wana lava a a nghena na vona kereke kutani vanhu va 25 va tshike kereke va va Timbhoni ta Yehovha. Loyi a tekeke xikhundlha xa yena xa vufundhisi na yena u sungule ku dyondzeriwa Bibele hi Timbhoni kutani a tshika kereke. Sweswi u va kona eminhlanganweni ya Vukreste naswona u vule leswaku u navela ku va muhuweleri. Nsati wa yena u khuvuriwe eka siku ra nhlengeletano yo hlawuleka leya ha ku hundzaka. Swa hlamarisa ku vona leswaku leswi hinkwaswo swi sungule hi buku leyi thumbiweke etlhelo ka patu!

Côte d’Ivoire

Loko Berenger, muntshwa la nga Mbhoni, a ya ensin’wini edorobeni leri nga ntsindza ra Abidjan, u hlangane ni wansati la xavisaka xinkwa. Wansati loyi u wise mali yo ringana 5 000 wa ti-franc (tidolara ta 10 ta le Amerika) a nga swi voni. Loko Berenger a ku wa yi teka leswaku a ta n’wi nyiketa yona, wansati un’wana u n’wi huwelerile a ku, “Tisa mali yoleyo; i ya mina!” Hambiswiritano, Berenger u n’wi vutise leswaku i mali muni kambe o hlundzuka ivi a n’wi komba xikosi. Hiloko Berenger a tsutsumela eka wansati loyi a wiseke mali yoleyo. Loko a fika eka yena, u arile leswaku i ya yena, a tlhela a ku: “U lava ku ndzi gevenga mali ya mina.” Hambiswiritano, loko a vone ku tiyimisela ni ku phikelela ka Berenger, u kambile kutani a kuma leswaku hakunene u lahle mali yo ringana 5 000 wa ti-franc, leyi nga xavaka malofo ya xinkwa ya 50.

Berenger u te: “Ndzi n’wi nyike mali yoleyo, ndzi n’wi byela leswaku lexi endlaka ndzi n’wi nyika yona hileswi Yehovha, Xikwembu xa mina a dyondzisaka malandza ya yena leswaku ma tshembeka. U be mandla a vuyelela a ku: ‘Loko munhu un’wana ni un’wana a a hanya ku fana ni Timbhoni ta Yehovha, vanhu hinkwavo a va ta va vanghana. Ndzo sungula evuton’wini bya mina ku vona muntshwa la fanaka na wena.’ Ndzi n’wi nyike xiphephana kutani a tshembisa leswaku u ta hamba a rhiya ndleve loko Timbhoni ta Yehovha ti vulavula. Siku rero a ndzi khome mali yo ringana 50 wa ti-franc ntsena leyi a ndzi ta yi tirhisa siku hinkwaro. Nilokoswiritano, a ndzi tsakile leswi ndzi endleke leswi lulameke.”

Democratic Republic of Congo

Eugene la nga nkulu, u tirha ku basisa ni ku rindza emuakweni lowu tirhanaka ni dayimani. U ri: “Madyambu man’wana, ku te wanuna un’wana exitolo lexi xavisaka dayimani a ta xavisa tidayimani leti durhaka tidolara ta 22 000 ta le Amerika. Kambe, xisakana lexi a a hoxe tidayimani eka xona xi wile. U lave a kala a karhala kambe ko fana ni kwala. Hi xamundzuku xa kona, muthori wa yena ni mutirhi-kulobye va ye hansi ni le henhla exitarateni va lavana ni xisakana xexo, kambe na vona va vuye ximandlamandla. Hiloko ndzi sungula ku kukula ehandle, emahlweni ka xitolo xexo kutani ndzi vona xisakana xexo xa tidayimani! Ndzi xi tekile ivi ndzi tsutsuma ndzi ya xi nyika muthori wa mina, loyi a a huma eBelgium. A nga swi kholwanga leswi ndzi nga swi endla. Hiloko ndzi n’wi byela leswaku ndzi Mbhoni ya Yehovha nileswaku ndzi chava Xikwembu hi mbilu ya mina hinkwayo. N’wini wa tidayimani teto loko a vona ku tshembeka ka mina, u boheke ku vula a ku: ‘Leri i singita!’

“Un’wana wa vatirhi-kulorhi u te: ‘Eugene, u endle leswaku hi tshama hi ri ni ndhuma leyinene!’

“Ndzi n’wi hlamule ndzi ku: ‘Ndza nkhensa! Kambe, loyi a faneleke a dzunisiwa i Yehovha hikuva hi yena la ndzi dyondziseke ku tshembeka.’”

Angola

Loko João la nga murhumiwa tlhelo mulanguteri wa xifundzha, a endzela ndhawu ya le makaya, a a lava ku komba vamakwerhu ni vanhu lava tsakelaka DVD leyi nge Noah Walked With God—David Trusted in God. Kutani u fambe ni janareta leyitsongo, swipikara swimbirhi ni petirolo swin’we ni khompyuta ya yena leyitsongo. Eka ximutana xo sungula, u tshame exiyindlwanini lexi phamiweke hi misava kutani a hlela ku va kombisa DVD nimadyambu. U ri: “Ndzi hlamarile loko ku fika vanhu va 38 va tamele switulu, mabenci, maribye ni mabakiti yo chela ntswamba ni swilo swin’wana leswaku va ta tshama eka swona. Ndhawu a yi ri yitsongo exiyindlwanini xexo kutani hi yi hlalele hi ri ehandle. A ku nga ri na mapapa naswona ndzi veke khompyuta ehenhla ka switina kutani vo tala lava a va tile a va tshame ehenhla ka minceka.” Mahungu ma hatle ma hangalaka endhawini yoleyo leswaku ku endze João, kutani ku te vanhu vo tala eswimitanini leswi a swi endzeleke. U ri: “Loko ndzi heta ku va komba vhidiyo leyi, a nga kona loyi a a lava ku muka. Vo tala va vule leswaku a va si tshama va tiphina tano evuton’wini bya vona kutani va nkhensa Yehovha hi timbilu ta vona hinkwato hi lunghiselelo leri ra moya.” Emavhikini manharhu lawa João a endzeleke mintlawa leyi nga le tindhawini ta le makaya, DVD yoleyo yi hlaleriwe hi vanhu va 1 568!

Ghana

Vida la tirhaka ku xavisa swakudya eAccra, a a kanakana ku xavisela rhavi ra le Ghana matsavu. Ha yini? Hikuva mufundhisi wa yena a a n’wi byele leswaku Timbhoni ti venga vanhu lava nga riki Timbhoni. Kambe, loko Vida a yisa oda ya yena yo sungula ya matsavu, u hlamarisiwe hi ndlela leyi vatirhi va le khixini va n’wi amukeleke ha yona. Emavhikini lama landzeleke, u tolovelane ni vatirhi va le rhavini, a xiya leswaku un’wana ni un’wana u ni musa eka yena kutani a swi vona leswaku mufundhisi u n’wi byele mavunwa.

Leswi Vida a a tiyimisele ku dyondza swo tala, u kombele ku dyondzeriwa Bibele hambileswi a a nga swi tivi ku hlaya. Ku nga si hela tin’hweti ta tsevu, Vida se a a tiva ku hlaya Bibele ya yena, naswona u khuvuriwile eka ntsombano wa muganga wa sweswinyana. Hambileswi swirho swa ndyangu ni khale ka vanghana va yena va n’wi hlekulaka, u kote ku pfuna muzala wa yena leswaku a faneleka ku va muhuweleri la nga khuvuriwangiki.

Sudan

Loko makwerhu un’wana wa xisati a ri karhi a chumayela hi yindlu ni yindlu, u hlangane ni swinhwanyetana swimbirhi leswi n’wi amukeleke. Lexi hlamarisaka, swinhwanyetana leswi a swi nga lavi leswaku makwerhu a swi pfuna ku pfula matsalwa eBibeleni ya swona. Xivangelo hileswaku mufundhisi wa le mugangeni wolowo u swi lume ndleve leswaku loko Mbhoni ya Yehovha yo khumba Bibele ya munhu, leswi nga endzeni ka yona swi hundzuka swi fana ni leswi yi swi vulaka. Swinhwanyetana leswi swi ale ni ku qhavula makwerhu loyi. Hambiswiritano, loko swi ti pfulela matsalwa hi swoxe swi kume leswaku rungula leri swi ri hlayaka ri pfumelelana ni leswi makwerhu a swi vuleke. Hiloko swi endla xiboho xo dyondzeriwa Bibele hikuva swi swi vonile leswaku mufundhisi wa hemba. Hi ku nyangatseka, mufundhisi u swi tshembise leswaku u ta swi nyika mali yo xava swakudya loko swo tshika ku dyondzeriwa Bibele. Loko swi n’wi hlamula swi te: “Swa antswa ku tata makhwiri ya hina hi rito ra Xikwembu ku ri ni ku ma tata hi swakudya.” Sweswi swinhwanyetana sweswo swi va kona eminhlanganweni ya vandlha.

Etiyopiya

Hambileswi nsati wa Awoke a veke Mbhoni kwalomu ka malembe ya khume, yena a a nga ri na mhaka ni ntiyiso. Hambiswiritano, loko a endzela endhawini yin’wana a ya ekhosweni ya tin’hweti timbirhi, u endle xiboho xo lavana ni Timbhoni. Loko a fika, u kongomisiwe eka hofisi leyi makwerhu un’wana wa xisati a a tirha eka yona. Makwerhu loyi wa xisati a a ri karhi a khongela leswaku ku ta makwerhu wa xinuna a ta va pfuna evandlheni ra vona. Loko a twa leswaku ku ni wanuna la nga le ku laveni ka Timbhoni ta Yehovha, u tsundzuke swikhongelo swa yena. Kuteloko a vona Awoke, loyi a a ambale a tlhela a tilunghisa kahle, a namba a tibyela leswaku hi yena makwerhu loyi a n’wi khongeleleke leswaku a ta. U ye eka yena hi ku hatlisa a fika a n’wi xeweta hi ntsako. Leswi Awoke a a tsakile, a nga swi kotanga ni ku n’wi byela leswaku a hi Mbhoni naswona a a nga lavi ku n’wi heta matimba loko a ri karhi a n’wi tivisa eka vamakwerhu. Loko a ri kwale, u ve kona eka minhlangano hinkwayo. Loko khoso ya yena yi hela kutani a fanele a muka, ntlawa wolowo wa vamakwerhu va xisati wu n’wi rhambele eswakudyeni swa ninhlikanhi kutani wu n’wi kombela leswaku a khongela. U tsundzuke ndlela leyi nsati wa yena a a swi khongelela ha yona swakudya, a ambale ni xo funengeta nhloko, nileswaku xikhongelo xa yena a xi gimeta hi vito ra Yesu. Kutani xikhongelo xi fambe kahle naswona va tiphinile hi swakudya sweswo. Hikwalaho ko khumbiwa hi musa lowu a kombiweke wona loko a endzele kwalaho, Awoke u endle xiboho xo va makwerhu wa xiviri. Loko a fika ekaya, u sungule ku dyondzeriwa kutani wa ha ku khuvuriwa eka nhlengeletano leya ha ku hundzaka. Nsati wa yena u tsakile naswona Awoke u rindzele ku kuma nkarhi wo va byela mhaka leyi evandlheni leri a a ri endzerile.

YUROPA

MATIKO 46

VAAKI 730 776 667

VAHUWELERI 1 506 019

TIDYONDZO TA BIBELE 744 319

Ukraine

Wanuna un’wana la tirhaka hi gezi u ye a ya lunghisa muchini wo pima gezi eHolweni ya Mfumo. Emugangeni lowu a a tshama eka wona a a dume hi ku va xidakwa. Loko a ri karhi a wu lunghisa, u xiye ndzimana ya lembe leyi nge: “Tshinelani eka Xikwembu, kutani xi ta tshinela eka n’wina.” (Yak. 4:8) U yimenyana kutani a vutisa makwerhu un’wana a ku: “Xana swa koteka hakunene ku tshinela eka Xikwembu? Xana vadyohi va nga tshinela eka Xikwembu?” Makwerhu u n’wi hlamule hi Bibele a tlhela a n’wi rhambela eminhlanganweni. Hi Sonto, u endle xiboho xo ya eminhlanganweni emugangeni wun’wana hikuva a a nga lavi leswaku vaakelani va yena va n’wi vona loko a ya eHolweni ya Mfumo. Kambe, loko a fika emugangeni wolowo, u kume leswaku nkulumo ya le rivaleni yi nyikeriwa hi nkulu wa muganga lowu a tshamaka eka wona. Loko a n’wi vona, u ringete ku tumbela. Kambe nkulu u n’wi vonile kutani a n’wi amukela hi malwandla. Hiloko a sungula ku ya eminhlanganweni ya le mugangeni lowu a tshamaka eka wona. U sungule ku dyondzeriwa Bibele kutani endzhaku ka lembe a khuvuriwa.

Hi nkarhi wolowo nsati wa yena a a tirha etikweni rimbe naswona a a nga tshembi leswaku nuna wa yena u tshikile ku nwa nileswaku se i Mbhoni ya Yehovha. Kutani u mukile leswaku a ta tivonela hi ya yena. A a tsakile leswi nuna wa yena a nga ha riki xidakwa naswona se a khathalelaka vana va yena, kambe a a nga yi rhandza mhaka ya leswaku se i Mbhoni ya Yehovha. Hambiswiritano, siku rin’wana u kombele nsati wa yena a ku, “Ndzi kombela hi famba swin’we eHolweni ya Mfumo tanihi ndyangu.” U pfumerile. Na yena u sungule ku dyondzeriwa kutani ku nga ri khale a khuvuriwa swin’we ni vana va yena vanharhu va vanhwanyana. Xisweswo, ndzimana yin’we ya Bibele yi pfune vanhu va ntlhanu leswaku va tshinela eka Xikwembu.

Grikiya

Makwerhu loyi a fambaka hi ndlela yin’we loko a ya entirhweni u xiye wansati un’wana la hambaka a endzela ndhawu yin’we leyitsongo yo khongelela eka yona. Hi ntolovelo tindhawu to tano ti tala ku kumeka etlhelo ka patu eGrikiya naswona ti akiwa laha ku veke ni mhangu leyikulu ivi ku fa vanhu. Leswaku makwerhu a pfuna wansati loyi, u n’wi tsalele papila ro koma leri nga ni Matsalwa lama chavelelaka emhakeni ya xiyimo xa vafi ni lama hlamuselaka hi ntshembo wa ku pfuxiwa ka vafi. Endzhaku ka loko a tsale vito ra yena ni adirese, u veke papila rero endzeni ka ndhawu leyi yo khongelela eka yona. Hi xamundzuku ka kona, wansati loyi u bele makwerhu riqingho, a n’wi byela leswaku u ma tsakela hi mbilu hinkwayo mahungu wolawo lamanene. Sweswi u hamba a endzeriwa leswaku ku buriwa na yena hi mahungu lamanene.

Norway

Vamakwerhu va xisati va tsevu va ye ekhefini loko va huma ensin’wini. Va bule hi nkulumo leyinene ya le rivaleni leyi va yi tweke tolweni ka kona eHolweni ya Mfumo. A yi vulavula hi ku pfuxiwa ka vafi. Endzhakunyana, wansati un’wana loyi a a yingiserile loko va ri karhi va vulavula, u tile etafuleni ra vona. U kombele ku tshama na vona a yingisela mhaka leyi va bulaka ha yona. U va byele leswaku wa ha ku loveriwa hi vatswari. Va ve ni bulo leri akaka swin’we na yena. Vamakwerhu va kombele nomboro ya riqingho ya wansati loyi kutani un’wana wa vona a n’wi endzela kutani a sungula dyondzo ya Bibele na yena.

Lithuania

Olga, la nga phayona lera ha riki muntshwa, u sungule dyondzo ya Bibele ni wansati wa Murhaxiya va lo yima hi milenge. Siku rin’wana loko va ri karhi va dyondza, wansati loyi u kombele Olga leswaku a n’wi hlamusela leswi marito lama nge ‘masiku yo hetelela’ ma vulaka swona eBibeleni. (2 Tim. 3:1) Olga u tshembise leswaku u ta n’wi hlamusela loko a vuya. Olga u te ko tala ku kala ku hela n’hweti kambe a nga kumi munhu ekaya. Kambe u xiye leswaku ku ni munhu la hlometelaka eximbhovaneni lexi nga enyangweni ku vona leswaku i mani la gongondzaka, hambileswi munhu wa kona a a nga pfuli. Olga u ri: “A ndzi swi tiva leswaku wansati loyi wa swi lava leswaku hi ya emahlweni hi bula hi Bibele. Swi nga endleka leswaku i munhu un’wana la hlometelaka eximbhovaneni. Hiloko ndzi endla xiboho xo n’wi tsalela papila ndzi hlamula mhaka liya a hi fanele hi bula ha yona. Endzhaku ka masiku manharhu, ndzi ringete ku n’wi endzela nakambe. A ndzi tsake ngopfu loko a ndzi pfulela nyangwa. Papila leri ndzi n’wi tsaleleke rona ni leswi ndzi kombiseke leswaku ndza n’wi khathalela swi n’wi khumbile swinene.”

Wansati loyi u nkhense Olga kutani a ku: “Papila ra wena ndzi ri hlaye ko hlayanyana naswona leswi u ndzi tsaleleke swona ndzi swi twisise hinkwaswo.” Hikwalaho ka sweswo, va tshike ku dyondza va yime hi milenge kutani va hamba va dyondza Bibele va tshame ehansi, va tirhisa buku leyi nge Leswi Bibele Yi Swi Dyondzisaka. Kutani sweswi nkarhi wun’wana ni wun’wana loko Olga a endzela wansati loyi, u n’wi amukela hi mandla mambirhi.

Switzerland

Le Geneva edorobeni leri taleke hi vanhu va tinxaka to hambana-hambana, makwerhu la vuriwaka Marie u vulavule ni wansati la humaka eMiddle East. Leswi Marie a dyondzaka Xiarabu, u vulavule na yena hi ririmi rero. Marie u byele wansati loyi leswaku u pfumela eka Xikwembu xin’we ntsena xa ntiyiso. Hiloko wansati yoloye a n’wi angarha a tlhela a n’wi tswontswa, a vula leswaku u ni gome naswona a a ri eku khongeleni loko Marie a n’wi vulavurisa. U vule leswaku u tlhelela etikweni ra rikwavo hi xa mundzuku ka kona. Marie u pfule Bibele ya yena eka 1 Petro 3:7 kutani a yi hlaya, ivi a hlamusela leswaku Xikwembu xi va xixima ngopfu vavasati. A engeta hi ku n’wi byela leswaku Yehovha u lava leswaku vavanuna hinkwavo va fundzha ni ku xixima vasati va vona. Wansati loyi u hlamarile kutani a ku: “Xana u ntsumi kumbe u munhu? Phela ndzi ni gome hileswi nuna wa mina a nga riki na mhaka ni leswi Xikwembu xi swi vulaka etsalweni leri. Ndzi khongela minkarhi hinkwayo leswaku Xikwembu xi ndzi pfuna. Kutani wena u pfule Bibele u ndzi hlayela ndzimana leyi.” Hiloko wansati yoloye a kombela Marie leswaku a n’wi tsalela tsalwa rero ephepheni. U vule leswaku u ta famba na rona, a ya ri komba swirho swa ndyangu wa yena kutani a swi byela hi ntokoto lowu wo tsakisa lowu n’wi humeleleke. Marie u twe ku vava leswi wansati yoloye a a fanele a famba kambe va twanane leswaku va ta hamba va vulavurisana.

Netherlands

Edorobeni ra Rotterdam ku ni hlaluko lerikulu eka hinkwawo emisaveni. Nhundzu leyi taka hi swikepe yi tekiwa hi tilori yi yisiwa eMatikweni ya le Yuropa ni man’wana ya le handle. Hikwalaho ku ni tilori to tala leti tsemakanyaka edorobeni leri. Rin’wana ra magondzo lamakulu lama nghenaka etikweni ra Jarimani leri nga le kusuhi ni doroba ra Rotterdam, laha ku hundzaka tilori leti lavaka ku va 1 500 hi awara ri ni ndhawu leyikulu laha vachayeri va tilori va fikaka va wisa kona. Leswi hi nawu vachayeri va faneleke va fika va wisa kwalaho, vamakwerhu va tirhisa nkarhi lowu leswaku va va chumayela, kutani va hlangana ni vachayeri lava humaka eYuropa, eMiddle East ni le ka tirhiphabliki hinkwato ta khale ka tiko ra Soviet. Vachayeri va ti rhandza ngopfu timagazini ta hina. N’wexemu, vamakwerhu va chumayele kwalaho minkarhi leyi nga vaka 82 kutani va fambisa timagazini leti tlulaka 10 000 hi tindzimi ta 35.

MATIKO YA AMERIKA

MATIKO 56

VAAKI 883 782 291

VAHUWELERI 3 256 287

TIDYONDZO TA BIBELE 3 111 358

Peru

Jorge i phayona ra nkarhi hinkwawo naswona u tihanyisa hi ku mpfampfarhuta swifaniso. U chumayele Hubert loyi na yena a nga mumpfampfarhuti kutani a pfumela ku dyondzeriwa Bibele. Hambileswi swirho swa ndyangu wa ka vona, vanghana ni vaakelani va n’wi kaneteke ngopfu, u hete ku dyondza buku leyi nge Vutivi Lebyi Yisaka eVuton’wini Lebyi Nga Heriki hi tin’hweti ta tsevu ntsena. Eswikhongelweni swa yena, u kombele Yehovha leswaku a pfuna ndyangu wa ka vona wu dyondza ntiyiso. U hlamale ngopfu loko makwavo, ku nga Jhon a hlanganyela edyondzweni ya yena kutani a sungula ni ku va kona eminhlanganweni. Vhiki leri tlhandlamaka, Cesar sivara wa Jhon na yena u hlanganyerile edyondzweni. Hambileswi eku sunguleni nsati wa Cesar a a kaneta u sungule ku dyondzeriwa na yena. Hi ku famba ka nkarhi, Reynaldo loyi a nghenaka xikolo na Hubert u lave ku dyondzeriwa. Leswi a a kanetiwa ngopfu, u boheke ku dyondzela ekaya ra Hubert. Hi ku hatlisa endzhakunyana ka sweswo, Milton, makwavo wa Hubert na yena u sungule ku dyondzeriwa. Endzhaku ka dyondzo yo sungula, Milton u chumayele swichudeni-kulobye swimbirhi, ku nga Darwin na Christian lava na vona va sunguleke ku dyondzeriwa ni ku va kona eminhlanganweni. Hubert a a ri ni vabuti vambirhi, ku nga Ronald na Martin. Ronald u te edyondzweni ya Hubert a tamele nxaxamelo wa swivutiso swo tala swa Bibele, kutani Jorge a n’wi byela leswaku dyondzo ya Bibele yi nga swi hlamula hinkwaswo swivutiso swa yena. U pfumerile. Endzhaku ka sweswo, Martin na yena u sungule ku dyondzeriwa kutani vana va yena vambirhi va vanhwanyana na vona va hlanganyela edyondzweni. Hubert na Jhon va khuvuriwe eka Ntsombano wa Muganga lowu nge “Nkutsulo Wu Tshinele!” Ku bula ni munhu un’we ntsena hi Bibele ku endle leswaku vanhu va 18 va dyondza hi Yehovha.

Brazil

Paulo u tshama epurasini leritsongo en’walungwini wa tiko. Xigangu lexi a a tshama na xona naswona a tekaneke na xona hi ku famba ka nkarhi a xi dyondzeriwa Bibele kutani u pfumele ku va ni dyondzo ya Bibele ntsena leswaku a xi tsakisa. Hi nkarhi wolowo, varisi va tihomu lava a va tshama epurasini rero va hlongorise ndloti leyi dlayeke tihomu to tala va kala va yi dlaya. Leswaku va dyelela n’wini wa purasi, va luke mano yo n’wi bela riqingho, va vula leswaku ku laveka mali yo hirha munhu la tivaka ku phasa tindloti. Paulo na yena u ri seketerile rhengu leri a kala a byela n’wini wa purasi leswaku swi tano. Hambiswiritano, ripfalo ra yena ri n’wi kingindzile hikwalaho ka leswi a swi dyondzeke eBibeleni. Hi ku tiva leswaku a nga lahlekeriwa hi ntirho wa yena nileswaku vatirhi-kulobye va ta n’wi hlundzukela, u bele n’wini wa purasi riqingho a n’wi byela ntiyiso wa mhaka. Hi ku famba ka nkarhi, Paulo u nyikiwe xikhundlha xo va mulanguteri wa purasi hikwalaho ka ku tshembeka ka yena. Sweswi se i muhuweleri wa mahungu lamanene la khuvuriweke swin’we ni nkatakwe. Swi tsakisa swonghasi ku n’wi vona tanihi munhu la tshembekaka a ta eHolweni ya Mfumo ni nkatakwe ni vana va vona vambirhi hi teretere!

Mexico

Loko María la nga phayona ra nkarhi hinkwawo a ri enhlanganweni wa xikolo lexi vana va yena vambirhi va nghenaka eka xona, u xiye leswaku vadyondzisi va karhatekile hi moya wa ku xandzuka ni mahanyelo yo biha lama nga kona eka vana van’wana va xikolo. Mudyondzisi un’wana u te: “Vatswari, loko mi nga lavi ku vona vana va n’wina va va swihunguki, hi kombela mi hi pfuna. Vulavulani ni vana va n’wina. Va xaveleni buku. Va pfuneni hikuva va ni swivutiso swo tala. Mi nga va tshiki va tikumela tinhlamulo eka tintangha ta vona.” Endzhakunyana María u ye ehofisini ya nhloko ya xikolo a ya twa leswaku vana va yena va tikhome njhani exikolweni kutani u byeriwe leswaku va ni mahanyelo lamanene. Hiloko a n’wi byela hi ta buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka leswaku hi yona leyi nga pfunaka vana va xikolo. Nhloko ya xikolo yi rhiye ndleve kutani yi kombela María leswaku a yi tisela kopi. Loko María a yi tisile hi xamundzuku ka kona, nhloko ya xikolo yi yi phendlile yi tsakile, kutani yi kombela kopi yin’wana leyi nga ta va ya la tirhanaka ni mavabyi ya mianakanyo exikolweni. Endzhaku ka loko na yena a yi hlayile, u ringanyete leswaku vana va dyondzisiwa hi yona. Leswi xikolo lexi a xi ri ni vadyondzisi va 12, nhloko ya xikolo yi kombele tibuku ta 12 leswaku mudyondzisi ha un’we a nyikiwa ya yena ni ta 50 leti nga ta vekiwa elayiburari.

Uruguay

Siku rin’wana dyambu ri nga si tsuvuka, wanuna un’wana u khome ndlela a suka eArgentina a ya eUruguay. A a rindzele ku khandziya xikepe lexi tsemakanyaka nambu wa Río de la Plata, loko ku ta xinhwanyetana xi n’wi nyika Xalamuka! ya January 2006, leyi exifunengetweni yi nga ni nhloko-mhaka leyi nge “Xana Vumundzuku Byi Hi Khomele Yini?” Xinhwanyetana lexi a xi ri ni vunghana kutani wanuna loyi u amukele Xalamuka! yoleyo hi mbilu yo basa. Loko a fika eMontevideo, vanhu lava teke hi xikepe va yisiwe endhawini leyikulu laha mabazi ma khandziyiwaka kona. U hlamarile loko ku tlhela ku ta Mbhoni, kambe sweswi a ku ri kokwana la fambaka hi nxongotelo. U n’wi nyike Xalamuka! leyi fanaka kutani a yi teka. Loko a ha ku fika ekaya madyambu wolawo, u twe munhu a gongondza. Ina, a ku ri Mbhoni ya Yehovha. Endzhaku ko bula na yena hi ku komisa, yi n’wi fambisele magazini leyi fanaka ni tin’wana timbirhi leti se a a ti kumile siku rero! Loko Mbhoni yi n’wi hlamusela hi munyikelo wa ntirho wa misava hinkwayo, wanuna loyi u vule leswaku ana se wa ri tiva lunghiselelo rero kutani a landza mali. Loko a vuya u te ni timagazini leti ana se a nyikiweke tona siku rero. Kutani a vulavula hi xivutiso lexi vutisiwaka, lexi nge “Xana vumundzuku byi hi khomele yini?” a n’wayitela a ku: “Hambileswi ndzi nga swi tiviki leswi vumundzuku byi hi khomeleke swona kambe lexi ndzi xi tivaka hileswaku ndzi ta tlhela ndzi endzeriwa hi Mbhoni yin’wana ya Yehovha!”

Puerto Rico

Makwerhu un’wana wa xisati a a endzele n’wana wa yena wa nhwanyana loko swigevenga swi hlasela ekaya ra vona, xin’wana a xi khome xibamu. A swi lava mali kambe loko va vula leswaku a va na yona, xin’wana xi sungule ku secha yindlu loko lexin’wana xi va kombetele hi xibamu. Hiloko va sungula ku khongela Yehovha. Xigevenga xi va vutisile xi ku, “Xana mi endla yini?” Va vule leswaku i Timbhoni ta Yehovha kutani va khongela Yehovha Xikwembu xa vona. Loko vamakwerhu va ri karhi va chumayela xigevenga lexi va kombeteleke hi xibamu, lexin’wana lexi a xi ri karhi xi secha yindlu xi vuyile, xi vula leswaku xi kume khadi ra muchini wo koka mali. Hiloko swigevenga swi va nghenisa emovheni wa makwerhu ni n’wana wa yena ivi swi kongoma ebanki. Vamakwerhu va hambete va chumayela ni ku vulavula ni swigevenga leswi hi ndlela ya xichavo. Hiloko makwerhu a kombela xigevenga lexi tameleke xibamu leswaku xi xi veka, hakunene xi xi vekile, xi vula leswaku xi xixima ndlela leyi a rhuleke ha yona. Makwerhu u vule leswaku u ni n’wana wa jaha la ringanaka na swona swigevenga leswi kambe yena u ta va ni vumundzuku lebyinene. U kombele leswaku swi cinca mahanyelo ya swona ma pfumelelana ni tindlela ta Yehovha leswaku na swona swi ta va ni vumundzuku lebyinene. Nilokoswiritano, swi yile ebanki kutani n’wana wa makwerhu loyi a humesa mali emuchinini. Hiloko swigevenga leswi swi teka vamakwerhu swi va yisa ephasejini yo lala, swi fika swi va siya kwalaho. Xigevenga lexin’wana a xi lava ku va bohelela kambe lexi a xi tamele xibamu xi ala. Xi vule leswaku vamakwerhu va sirheleriwe hi munhu un’wana lonkulu ngopfu. A swa ha ku gevenga van’wana emugangeni wolowo kutani swi va boha swi tlhela swi va bukutela.

OCEANIA

MATIKO 30

VAAKI 35 914 649

VAHUWELERI 94 323

TIDYONDZO TA BIBELE 49 667

Papua New Guinea

Tom loyi a nga tshama a va socha u tiva maxangu lama vangiwaka hi nyimpi. Loko a hlangana ni Timbhoni emugangeni lowu a tshamaka eka wona, u tsakisiwe hi xitshembiso xa Bibele xa misava leyi nga riki na nyimpi. Tom u dyondze Bibele kutani a kula emoyeni kambe ripfumelo ra yena ri ringiwe loko a fanele a endla xiboho xo ya eXitsundzuxweni. Tata wa yena u tshama a va mufundhisi wa kereke leyi vuriwaka United naswona loko Tom a ri karhi a dyondzeriwa Bibele a a ri mutshama-xitulu ekerekeni yoleyo, leyi a yi vandzamane ni Holo ya Mfumo. Loko a nghena eHolweni ya Mfumo, a a vona swirho swa kereke yakwe swi n’wi honolerile—ku nga vanghana va yena, khale ka vatirhi-kulobye swin’we ni mufundhisi. Tom a a lava ku tifihla kambe a ku: ‘Ndzi tifihlela yini? Sweswi i nkarhi wa leswaku vanhu va swi tiva leswaku ndzi lava ku va Mbhoni ya Yehovha.’ Endzhaku ka tiholideyi ta Paseka, u ye eka mufundhisi wa kereke ya yena a ku, “Xana u ndzi vonile le Holweni ya Mfumo?”

Mufundhisi u hlamule a ku, “Ina, ndzi ku vonile,” hiloko havambirhi va hleka.

Kutani Tom a ku: “Wa tiva a ndzi anakanya leswaku khefi yin’wana leyi a ndzi hamba ndzi xava swakudya eka yona yi sweka swakudya swa kahle ngopfu, kambe ndzi kume leswaku yi ndzi dyisa chefu. Kutani ndzi kume yin’wana, leyi ndzi swekelaka swakudya swo xawula, leswi akaka miri. Leswi se ndzi nantsweke swakudya leswi nandzihaka swonghasi, a ndzi nge he tlheleli eka liya ya khale!”

Mufundhisi u yi kumile yinhla kutani a ku, “Tom, wa tiva na mina ndzi hlaya timagazini ta Xalamuka! kambe u nga byeli munhu.” Tom u sule vito ra yena ekerekeni kutani a va nandza wa Yehovha la tinyiketeleke hambileswi a a langutaneke ni miringo yo hlayanyana.

Solomon Islands

Hi February 18, 2006, vahuweleri va 58 va thwasile eKhosweni yo sungula ya Ririmi ra Mavoko ra le Australia [Basic Auslan Sign Language Course], leyi hleriweke hi rhavi ra Timbhoni ta Yehovha. Ku sukela nkarhi wolowo, vanhu va khume lava feke tindleve va pfumele ku dyondzeriwa Bibele naswona va va kona eminhlanganweni ya vandlha. Un’wana wa vona i Moses. Muakelani wa yena u vule leswaku i “munhu wa swifafa naswona a nga tiyimiselanga ku twisisa nchumu.” Hambiswiritano, loko xaka ra yena leri nga Mbhoni, leri dyondzeke ririmi ra mavoko, ri kombela ku n’wi fambisela dyondzo ya Bibele, u hatle a pfumela. Endzhaku ka n’hweti u ye eHolweni ya Mfumo ro sungula, swiambalo swa yena a swi thyakile ni misisi yi lehile, kasi malepfu ya yena a ma nga languteki nikatsongo. Malwandla lawa a amukeriweke ha wona ni tidyondzo leti a ti “tweke,” swi khumbe mbilu ya yena. U hlamarile loko a dyondza eBibeleni leswaku munhu u dzunisa Xikwembu hi ndlela leyi a ambaleke ni ku languteka ha yona. Loko a nghena eHolweni ya Mfumo vhiki leri tlhandlamaka, vamakwerhu a va nga ha n’wi tivi. A a tsemete misisi, a byevule malepfu naswona a a ambale hi ndlela leyi xiximekaka. Nakambe a a cince ni mahanyelo ya yena. Muakelani wa yena u te: “Sweswi u basile, u tshama a ri eku n’wayiteleni.” Moses u endla nhluvuko hi tlhelo ra moya naswona u pfuna vanhu lava feke tindleve leswaku va twisisa mahungu lamanene.

Tahiti

Xihlala lexitsongo lexi nga le kule xa Makemo, lexi nga le kule na Tahiti hi tikhilomitara ta 600 xi ni vaaki va 720 ntsena. Wansati loyi vito ra yena ku nga Ravahere u twe ntiyiso loko a endzele maxaka ya yena le Tahiti. Loko a tlhelela eMakemo, u sungule ku dyondzeriwa Bibele, eku sunguleni dyondzo a yi fambisiwa hi ku n’wi tsalela mapapila ivi yi fambisiwa hi ku n’wi rhumelela rungula ra dyondzo hi muchini wa fax kutani a hetelela a dyondzeriwa hi riqingho. Ravahere u tsarise vukati bya yena ximfumo kutani a cinca mahanyelo ya yena leswaku ma pfumelelana ni milawu ya Yehovha, hambileswi swirho swin’wana swa ndyangu wa yena a swi n’wi kaneta hikuva a swi nga lavi leswaku a tshika kereke ya Mormon. Eku heteleleni, loko a endzele vandlha ra le Tahiti, u faneleke ku va muhuweleri la nga khuvuriwangiki. Endzhaku ka mavhiki man’wana ni man’wana mambirhi, u kuma mapapila lama khutazaka ma huma eka vahuweleri va vandlha rero.

Hi June 2006, mulanguteri wa xifundzha ni nsati wakwe va endzele Ravahere. Mulanguteri wa xifundzha u vike leswaku Ravahere u famba a chumayela hi yindlu ni yindlu mahelo-vhiki man’wana ni man’wana. U tiendlele mepe wa nsimu leyi a yi tirhaka kutani a sungula ku dyondza Bibele ni vanhu vo hlayanyana. U veka timagazini ta hina etlhelo ka khabodo leyi a xaviselaka eka yona swakudya swo siva nyoka. Nakambe u fambisa dyondzo ya buku, leyi nuna wa yena a vaka kona eka yona.

Fiji

Vhiki rin’wana ni rin’wana Matthew, la nga murhumiwa la leteriweke eGiliyadi naswona a nga nkulu, u fambisa dyondzo ya Bibele ni swichudeni swa mune ekholichini yo dyondzela ku va mudyondzisi. Ekholichini leyi, ku ta vafundhisi va tikereke to hambana-hambana va ta dyondzisa Bibele nimadyambu eka swirho swa kereke. Xikongomelo xa nongonoko lowu i ku seketela valawuri va xikolo hikuva va ringeta ku lwa ni mahanyelo yo biha lama tinyikeke matimba ekholichini.

Madyambu man’wana, Matthew u vone swichudeni swa kwalomu ka 250 swi ri ekhefini—swi tshamisekile, swi khome Tibibele, tibuku to tsala tinhla ni switsalo. A swi rindze mufundhisi wa kereke leyi dumeke leswaku a ta swi dyondzisa. Hambiswiritano, mufundhisi yoloye a nga fikanga kutani Matthew u komberiwe ku dyondzisa swichudeni leswi. Ku hambana ni leswi endliwaka hi vafundhisi van’wana, lava rhangaka hi risimu ivi va landzela hi dyondzo ya ku xanisiwa etiheleni, Matthew u dyondzise swichudeni leswi dyondzo leyi swi nga yi tolovelangiki, a tirhisa Matsalwa. Eka nkulumo ya yena leyi a nga lo yi lunghiselela kwalaho, u khutaze swichudeni leswaku swi tsundzuka Mutumbuluxi wa swona evuntshweni bya swona. Loko a heta, swichudeni hinkwaswo swi fole layini swi n’wi qhavula, swi nkhensa dyondzo yoleyo. U langutele ku swi pfuna leswaku swi hambeta swi tsakela rungula leri a swi dyondziseke rona hi xitshuketa.

Australia

Loko vamakwerhu vambirhi va ri karhi va famba hi yindlu ni yindlu, va hlangane ni wansati loyi a a vabya. U va byele leswaku u ni vuvabyi bya khensa leyi dlayaka nileswaku u karhi u paka nhundzu ya yena leswaku vanhu va nga sali va lwetana hi yona loko a file. Wansati loyi u vule leswaku a nga na xaka, a nga na munghana nileswaku u ni gome lerikulu hikwalaho ka xivundza. U tlhele a vula leswaku a swi n’wi tsakisanga swilo leswi a swi voneke etikerekeni tin’wana lerova u vona onge Xikwembu xi n’wi fularherile. Siku rin’wana, un’wana wa vamakwerhu lava n’wi endzeleke eku sunguleni u n’wi yisele swiluva kambe a nga n’wi kumi kutani a swi siya enyangweni wa yena ni xikhadana. Ndzhenga wolowo wansati loyi u n’wi bele riqingho a n’wi nkhensa hi mbilu hinkwayo hikwalaho ka tintswalo ta yena. U vule leswaku a nga kona loyi a nga tshama a n’wi komba tintswalo to tano kumbe a n’wi nyika swiluva, naswona u kombela ndzivalelo leswi makwerhu loyi a nga n’wi kumangiki ekaya. Loko makwerhu loyi a tlhela a n’wi endzela, u kume a n’wi rindzile. U n’wi kombe buku leyi nge Leswi Bibele Yi Swi Dyondzisaka, kutani makwerhu a hlela ku ta n’wi fambisela dyondzo ya Bibele.

[Xifaniso lexi nga eka tluka 43]

Miho

[Xifaniso lexi nga eka tluka 47]

Hi fambe hi thangi ra ntswamba

[Xifaniso lexi nga eka tluka 47]

Ketevan

[Xifaniso lexi nga eka tluka 48]

Van’wana va lava a va ri swirho swa kereke

[Xifaniso lexi nga eka tluka 55]

Olga

[Xifaniso lexi nga eka tluka 55]

Marie

[Xifaniso lexi nga eka tluka 57]

Hubert, Jorge na Jhon

[Xifaniso lexi nga eka tluka 58]

Paulo ni ndyangu wa yena

[Swifaniso leswi nga eka tluka 63]

Ravahere a ri laha a xaviselaka kona swakudya swo khomisa nyoka eMake

[Xifaniso lexi nga eka tluka 63]

Matthew

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela