Ku Chumayela Ni Ku Dyondzisa eMisaveni Hinkwayo

Afrika

MATIKO 57

VAAKA-TIKO 827 387 930

VAHUWELERI 1 086 653

TIDYONDZO TA BIBELE 2 027 124

Côte d’Ivoire

Eximutanini xa Bianouan lexi nga le vuxeni bya tiko, vaaki va kona va lava ku dyondza ntiyiso hi timbilu ta vona hinkwato. Van’wana va pfuxa vahuweleri hi awara ya tsevu nimixo leswaku va ta bula hi Bibele va nga si ya tirha emasin’wini. Van’wana va kombela ku dyondzeriwa Bibele nivusiku endzhaku ka minhlangano ya vandlha. Siku rin’wana, wansati la nga swi kotiki ku hlaya u kombele leswaku makwerhu a n’wi nyika buku leyi nge Xana Bibele Yi Dyondzisa Yini Hakunene? U vule leswaku nuna wa yena u ta n’wi hlayela yona. Makwerhu u n’wi nyike buku leyi kutani a n’wi endzela hi xamundzuku xa kona. U kume va n’wi rindzile. Nuna loyi a nga yanga emasin’wini hikuva ri kale ri xa a ri karhi a hlaya buku leyi. Kutani a a lava ku bula ni makwerhu hi leswi a swi hlayeke. Mpatswa lowu wu sungule ku dyondzeriwa Bibele.

Benin

Ndyangu wun’wana endhawini leyi nga le kule wu sungule ku dyondzeriwa Bibele. Tatana wa kona a a ri mufundhisi. Endzhaku ka mavhiki mambirhi loko ndyangu lowu wu sungule ku dyondzeriwa, wu amukele xirhambo xo ya entsombanweni wa muganga. Hi Mugqivela nimadyambu n’wana wa vona wa mativula u lo na swipfuketana a vabya kutani a lova. Hambileswi tatana loyi a loveriweke hi n’wana wa yena a nga swi langutelanga, u tile entsombanweni hi Sonto. Hi Musumbhunuku u te, “Sathana u ringeta ku hi heta matimba kambe a hi nge n’wi pfumeleli.” U hlengelete swiambalo swa yena hinkwaswo swa kereke ku nga phuraphura, xihuku, bandhi, mafurha yo tota ni nxongotelo, a swi hisa, hilaha hi hlayaka hakona eka Mintirho 19:19. Nsati wa yena, loyi na yena a a ri ni xikhundlha ekerekeni, u endle hilaha ku fanaka. Nuna loyi u te: “Hi tseme richocho hi chuveka ekerekeni leyi.” Hiloko ndyangu lowu wu endla nhluvuko.

Madagascar

N’wexemu, mufundhisi un’wana la tshamaka eximutanini lexi nga ni vaaki va kwalomu ka 500, u kume buku leyi nge Leswi Bibele Yi Swi Dyondzisaka eka Mbhoni yin’wana loko a endzele eximutanini xin’wana. Endzhaku ko yi hlaya hi vukheta, u khorwile leswaku u kume ntiyiso kutani a sungula ku byela swirho swin’wana swa kereke leswi a swi dyondzeke. Ku nga ri khale, yena ni ndyangu wa yena swin’we ni swirho swin’wana swa 20, va sungule ku khoma minhlangano ku fana ni Timbhoni ta Yehovha. Maphayona yo hlawuleka ma tile ma ta va pfuna. Ma fambise tidyondzo ta Bibele ni lava tsakelaka ma tlhela ma hlela leswaku ku hamba ku khomiwa Dyondzo ya Buku ya Vandlha ni ya Xihondzo xo Rindza. Hi October, vanhu va ntlhanu va ve vahuweleri lava nga khuvuriwangiki naswona maphayona ma hlele leswaku ku khomiwa Nhlangano wa le Rivaleni ni Xikolo xa Vutirheli bya le Tilweni. Ku va ni vanhu va kwalomu ka 40 eminhlanganweni naswona ku fambisiwa tidyondzo ta Bibele leti tlulaka 20.

Afrika Dzonga

Hennie ni nsati wa yena a va chumayela hi yindlu ni yindlu. Loko va ri karhi va famba ekusuhi ni jarata ra yindlu yin’wana, mbyana yi humese nhloko exikarhi ka tinsimbi leti sirheleleke jarata rero kutani yi n’wi luma evokweni. Leswi a a huma ngati yo tala, va tlhelele ekaya hi ku hatlisa kutani nsati wa yena a basisa mbanga ya yena a tlhela a yi bandicha. Hennie u hlele ku ya vona dokodela endzhaku ka nkarhi. U byele nsati wa yena leswaku a nge pfumeleli mbyana yi n’wi tshikisa ku chumayela kutani endzhaku ka awara va tlhelele ensin’wini. Va fike va sungula eka yindlu leyi landzelaka ya mbyana leyi n’wi lumeke. Endzhaku ko nghena etindlwini ti nga ri tingani, va nghene endlwini ya wanuna un’wana. U va yingisile a tlhela a va byela leswaku va vuya. Va sungule ku dyondza na yena Bibele kutani a sungula ku va kona eminhlanganweni hinkwayo. Loko a tshike ku va xirho xa Kereke ya Dutch Reformed, xirho xin’wana lexi nga ni xikhundlha lexi tlakukeke xi n’wi endzerile kutani xi n’wi tshembisa ku n’wi endla mudiyakoni. Kambe a nga pfumelanga. U hambeta a endla nhluvuko lowunene naswona u tsarise eXikolweni xa Vutirheli bya le Tilweni.

Tanzania

Eka tsima rin’wana ro ya chumayela masimu lama nga le kule, hi October 2005, vamakwerhu va kaye va Vandlha ra Iringa va ye ePawaga, ku nga mpfhuka wa kwalomu ka tikhilomitara ta 75. A va twe leswaku ku ni makwerhu la tshamaka endhawini leyi kutani a va lava ku n’wi vona. Endzhaku ko vutisela vanhu vo tala, va kale va n’wi kuma hiloko a va byela leswaku se u ni malembe yo tlula 20 a tshama endhawini yoleyo naswona a a tiva leswaku ntirho wo chumayela wa ha yirisiwile eTanzania. Emalembeni wolawo hinkwawo a a ri karhi a chumayela naswona u vule leswaku a ku ri ni vanhu lava a va tiyimisele ku yingisa rungula ra Bibele. Vamakwerhu va le Vandlheni ra Iringa va pfumele ku heta mavhiki mambirhi loko va endzele ximutana lexi, leswaku va ta pfuna vanhu lava tsakelaka. Hi 2006, maphayona mambirhi ma rhurhele eximutanini lexi leswaku ma ta chumayela nsimu leyi, leyi noneke. Makwerhu luya a kumiweke eximutanini lexi u pfuniwile leswaku a tiyisa vuxaka bya yena na Yehovha naswona ntlawa wolowo lowutsongo wu ni vahuweleri va kaye. Va ha khomela minhlangano ya vona ehansi ka murhi kambe ku karhi ku endliwa malunghiselelo yo aka ndhawu leyitsongo yo khomela minhlangano eka yona, ku tirhisiwa nhundzu ya kwalaho.

Rwanda

Nhwanyana la vuriwaka Gentille a a dume hi ku howisa entlangwini wa bolo. Vanhu a va n’wi vitana Manayibitego, leswi vulaka “xikwembu xa ku howisa” hi ririmi ra kwalaho. Mantariyana man’wana ma tsakele ndlela leyi a tlangaka ha yona kutani ma lava ku n’wi pfuna leswaku a kuma ndzetelo lowu engetelekeke. Hiloko ma n’wi rhamba leswaku a ya tlanga bolo le Italy. Ku rhurhela eYuropa ni ku va mutlangi wa bolo la dumeke emisaveni a ku ri nchumu lowu tsakisaka. Hambiswiritano, Gentille a a swi tiva leswaku loko a famba u ta siya ndyangu wa ka vona. Mana wa yena i Mbhoni kambe hambileswi Gentille a dyondzeriweke Bibele, a nga swi tekelanga enhlokweni leswi a a dyondzisiwa swona. Bolo a ku ri vutomi bya yena. Gentille u bule ni mana wa yena hi mhaka leyi kutani a vona ndlela leyi sweswo swi nga ta dlaya vuxaka bya yena na Yehovha ha yona. A nga xi amukelanga xirhambo lexi kambe u rhangise ntirho wa Mfumo evuton’wini bya yena. Wa ha ku khuvuriwa enhlengeletanweni leya ha ku hundzaka.

Matiko Ya Amerika

MATIKO 55

VAAKI 893 357 181

VAHUWELERI 3 367 544

TIDYONDZO TA BIBELE 3 236 692

Curaçao

Siku rin’wana loko makwerhu a ya fambisa dyondzo ya yena ya Bibele, n’wini wa muti u n’wi nyike kulu ya xibamu kutani a n’wi vutisa leswaku i yini lexi a hetaka ku n’wi nyika xona. Hiloko n’wini wa muti a n’wi hlamusela leswaku loko makwerhu a nga si ta ro sungula ekaya rakwe, ku hele tin’hweti to hlayanyana a ri karhi a anakanya ku tisunga hileswi a lahlekeriweke hi ntirho ni ndyangu wa wena. U lave ku tirihisela hi ku dlaya vanhu va mune lava a a ehleketa leswaku hi vona va n’wi vangeleke swiphiqo leswi. Hiloko a teka xibamu xa yena a hoxa tikulu ta mune kutani a hlayisa yin’we leyi a a ta yi tirhisa loko o ehleketa ku tidlaya. Kambe, loko a nga si famba, u rhange hi ku khongela eka Xikwembu a kombela mpfuno. U pfule thelevhixini a lava xitichi xa vukhongeri. Hi nkarhi wolowo, ku fike Timbhoni timbirhi endlwini ya yena kutani hi ku famba ka nkarhi ti sungula ku n’wi dyondzela Bibele. U lahle tikulu letiya ta mune kambe a rivala leyi a a yi hlayisile. Loko a yi kuma exikhwameni xa yena, u yi kombe makwerhu loyi kutani a n’wi rungulela leswi endlekeke ni ndlela leyi vutomi bya yena byi cinceke ha yona ku sukela loko a sungule ku dyondzeriwa Bibele. U vule leswaku Timbhoni ta Yehovha ti ponise vutomi bya vanhu va ntlhanu. Sweswi u va kona eminhlanganweni ya vandlha.

Uruguay

Wansati loyi a a khavaxele mihloti, u rhambe Timbhoni timbirhi endlwini ya yena, a ti hlamusela leswaku u khongele Xikwembu vusiku hinkwabyo, a kombela leswaku xi n’wi pfuna a twisisa ku rhandza ka xona. Vafundhisi va kereke yakwe a va ha ku n’wi endzela kambe a va tele ku ta koleka vukhume bya mali yo tala leyi a a ha ku yi kuma. A a hele matimba hikuva a va nga si tshama va n’wi endzela hambiloko a kombele mpfuno loko a ri ni gome. U hete n’hweti a nga yi ekerekeni. Eku heteleleni, u byele mufundhisi un’wana leswaku a nga ha swi tshembi leswi va swi dyondzisaka. Hambiswiritano, ematshan’weni yo n’wi pfuna, mufundhisi u n’wi byele leswaku u ta rhukaniwa ka nkombo leswi a tshikeke kereke. Vamakwerhu va n’wi byele leswaku Xikwembu xa ntiyiso xi tirhisa tintsumi ku kuma vanhu lava lavaka ntiyiso. U vutise swivutiso swo tala naswona va hatle va sungula ku n’wi dyondzela Bibele hi buku leyi nge Xana Bibele Yi Dyondzisa Yini Hakunene? Hi ku famba ka nkarhi nuna wa yena u sungule ku dyondzeriwa naswona a va ri kona eXitsundzuxweni ni le ka nkulumo yo hlawuleka. Va tsakisiwe hi ndlela leyi Timbhoni ta Yehovha ti dyondzisaka ha yona eHolweni ya Mfumo naswona va hlamarisiwe hi mhaka ya leswaku a ku kolekiwi. Va karhi va endla nhluvuko naswona va kume vanghana vo tala evandlheni.

Chile

Wansati un’wana la tshamaka emahetelelweni ya Amerika Dzonga, laha ku vuriwaka Cape Horn u dyondzeriwa Bibele. Nuna wa yena u khathalela yindlu leyi nga ni rivoni leri kongomisaka vatluti. Loko wansati loyi a ri ePunta Arenas, makwerhu un’wana la nga phayona ra nkarhinyana u n’wi fambisele dyondzo ya Bibele mavhiki ya mune kukondza wansati loyi a rhurhela eCape Horn. Ku sukela hi nkarhi wolowo, va dyondza hi riqingho. U endla nhluvuko lowunene.

Costa Rica

Etikweni leri, ku ni Maindiya ya kwalomu ka 10 000, lama vuriwaka Maguaymi, lawa vunyingi bya wona ma tshamaka edorobeni leritsongo ra Sixaola, ekusuhi ni ndzilakana wa Panama. Vunyingi bya Maindiya lawa ma tsakela ku dyondza Bibele. Mpatswa lowu nga maphayona yo hlawuleka wu averiwe ku ya tirha nsimu leyi leswaku wu ta pfuna Maindiya lawa ma dyondza Bibele. Hiloko wu sungula ku dyondza ririmi ra kwalaho. Wu kote ku endla swo tala hi ku pfuniwa hi vamakwerhu va 26 lava nga Maguaymi. Ku ve ni Xitsundzuxo ro sungula hi Xiguaymi naswona lava veke kona a va ri 264. Ku sukela hi nkarhi wolowo vanhu va tshama va ri karhi va amukela ntiyiso. Hi xikombiso, eka Dyondzo ya Buku ya Vandlha leyi a yi ri ni vahuweleri va 13 eku sunguleni, a ku va ni vanhu va kwalomu ka 20. Sweswi ku va ni vanhu va kwalomu ka 40. Hikwalaho ka sweswo, ku simekiwe mintlawa yin’wana yimbirhi ya Dyondzo ya Buku ya Vandlha.

Panama

Ramiro, la nga mudyondzisi wa vutiolori, u sungule ku dyondza Bibele ni Timbhoni ta Yehovha hi 2004. Hi nkarhi wolowo a a nyikiwe mintlawa ya tsevu leswaku a yi dyondzisa naswona a swi lava leswaku a tirha tiawara ta 24 hi vhiki, kambe a a kota ku tirha ntsena tiawara ta 12, kutani a a saleriwa hi tiawara ta 12 a nga ri na ntirho. Hikwalaho ka sweswo, nhloko ya xikolo yi n’wi byele leswaku u fanele a tirhisa nkarhi lowu seleke ku dyondzisa mintlawa yoleyo hi ta vukhongeri. Nhloko ya xikolo yi te: “Va dyondzise hi Xikwembu, Yesu na hi Bibele.” Hiloko Ramiro a va dyondzisa leswi a dyondzisiwaka swona. Lembe rero, u tirhise buku leyi nge Vutivi Lebyi Yisaka eVuton’wini Lebyi Nga Heriki, a dyondzisa swichudeni swa 150 leswi a swi ri eka gredi ya vutsevu ku ya eka ya vunhungu. Haxawa xa kona, loko ku humesiwa buku leyi nge Xana Bibele Yi Dyondzisa Yini Hakunene?, Ramiro se a a fanelekela ku va muhuweleri la nga khuvuriwangiki. U ye emahlweni a dyondzisa swichudeni leswi, kambe se a tirhisa buku leyi nge Leswi Bibele Yi Swi Dyondzisaka. Nhlayo ya swichudeni leswi yi andzile yi va 160 hiloko swi aviwa swi va mintlawa ya tsevu. Xana vuyelo byi ve byihi? Ramiro ni vahuweleri van’wana evandlheni va fambisa tidyondzo ta Bibele ni swin’wana swa swichudeni leswi. Vatswari va swin’wana swa swichudeni leswi va nkhensa Ramiro hikwalaho ka ku cinca loku va ku voneke eka mahanyelo ya vana va vona. Vatswari van’wana va va kona eminhlanganweni ya vandlha ni le tinhlengeletanweni tin’wana. Kasi Ramiro u khuvuriwe hi November 2006 naswona u hambeta a hisekela ku tirhisa nkarhi wun’wana ni wun’wana lowu a wu kumaka leswaku a dyondzisa vanhu ntiyiso wa Bibele.

Guatemala

Le Dorobeni ra Guatemala, Jeremy u ye ekaya ra jaha rin’wana leri a dyondzaka Bibele na rona. Yindlu leyi a yi biyeriwe hi makhumbi. Jeremy u fike a gongondza kutani sesi wa jaha leri a n’wi byela leswaku a ri kona. Loko Jeremy a ha yime enyangweni, ku te majaha mambirhi. Rin’wana ri n’wi kombe hi xibamu enhlokweni kutani ri ku: “Ndzi lerisiwe leswaku ndzi ta ku dlaya.” (Hi ku famba ka nkarhi Jeremy u twe leswaku swigevenga swi vula marito lawa leswaku swi chavisa vanhu.) Jeremy u ri: “Sesi wa jaha leriya u pfale nyangwa kutani ndzi vutisa majaha lawa ndzi ku, ‘Mi lava yini?’ Rin’wana ra wona ri te, ‘U lava yini laha?’ Ndzi ma byele leswaku ndzi chumayela mahungu lamanene. Rin’wana ra wona ri hlamule ri karihile ri ku, ‘Ma siye eka mina!’ A ndzi chuhile naswona a ndzi nga tivi leswaku ndzi nga endla yini. Hiloko ndzi pfula xikhwama xa mina kutani ndzi humesa Bibele. Hi nkarhi wolowo, jaha leri a ri khome xibamu ri sungule ku rila hikuva a ri swi tiva leswaku leswi ri swi endlaka a swi lulamanga. Ri ndzi kombele leswaku ndzi ri pfuna. Hiloko ri teka xikhwama xa mina kutani ri kuma Xalamuka! leyi vulavulaka hi mali. Jaha lerin’wana ri sungule ku ndzi secha ri lava xipachi kambe leri a ri khome xibamu ri te: ‘U nga n’wi sechi.’ Hiloko ri ndzi nkhensa kutani ri ndzi angarha ivi majaha lawa ma famba. Endzhaku ka sweswo, ndzi te hefu, kutani ndzi nkhensa Yehovha leswi a ndzi poniseke.”

Dominican Republic

Makwerhu wa xisati la nga dokodela wa meno u ye eka seminara ya siku rin’we, laha a va dyondzisiwa ku hoxa meno eka vanhu lava nga riki na wona. Madokodela ya meno yo tlula 250 lawa a ma ri kona eka seminara leyi ma byeriwe leswaku ma nga endla xikombelo xo yisa tidyondzo ta wona emahlweni le Yuropa, leti a ti koxa mali yo tala. A ku ta hlawuriwa madokodela ya nhungu ntsena. Loko seminara leyi yi hela, makwerhu u byeriwe leswaku u hlawuriwile nileswaku a nge hakeli nchumu. U hlamarile, kambe a ku: “Ndza nkhensa ku va mi anakanye ha mina kambe a ndzi xi endlanga xikombelo naswona a ndzi nge swi koti ku yi amukela nyiko leyi ya n’wina ya musa. Tanihi Mbhoni ya Yehovha, vuxaka bya ndyangu wa mina na Yehovha i bya nkoka. Ku ni minhlangano ya ntlhanu leyi ndzi faneleke ndzi ya eka yona naswona a ndzi fanelanga ndzi xwa ni siku ni rin’we kutani a ndzi nge swi koti ku yisa tidyondzo ta mina emahlweni hala tlhelo ndzi ya eminhlanganweni. A swi nge ndzi tsakisi ku kuma digri kutani loko ndzi vuya ndzi kuma leswaku vafana va mina vambirhi va tirhisa swidzidzirisi kumbe va tikhoma hi ndlela yo biha hileswi ndzi va siyeke va ri voxe!”

Asia ni le Middle East

MATIKO 47

VAAKI 3 993 686 009

VAHUWELERI 607 112

TIDYONDZO TA BIBELE 496 577

Israel

Ella, muntshwa la nga phayona ra nkarhinyana u vone mukhegula un’wana a rhwale saka ro tika ra thyaka. Hiloko a n’wi pfuna a tlhela a n’wi chumayela. Hambileswi mukhegula loyi a n’wi nyikeke adirese ya laha a tshamaka kona, Ella u ye ko tala kambe a nga n’wi kumi. Eku heteleleni u n’wi kumile. Hikwalaho ka leswi mukhegula loyi a nga twiki kahle, a nga n’wi twanga Ella loko a gongondza emasikwini lama hundzeke. Hiloko a sungula ku n’wi dyondzela Bibele. Hambileswi a a nga pfumeli leswaku Xikwembu xi kona, u sungule ku xi rhandza a tlhela a rhandza ni Bibele. Endzhaku ka malembe mambirhi, u tinyiketele eka Yehovha naswona wa ha ku khuvuriwa a ri ni malembe ya 92 hi vukhale.

Mongolia

Mukhegula la vuriwaka Terbish, u tirhe exitolo xo xavisa tibuku a kala a dyuhala. Munkhzaya wa malembe ya 18 hi vukhale naswona a nga phayona, u n’wi endzerile kutani Terbish a n’wi byela leswaku u hlaye tibuku to tala ngopfu lerova u kota ku hatla a twisisa buku yin’wana ni yin’wana, swi nga khathariseki leswaku u yi sungula eku sunguleni, exikarhi, kumbe emakumu. Kambe Bibele yi n’wi tsandzile. Hambileswi a yi hlayeke ko tala, a nga yi twisisi. Ku ya ekerekeni a swi n’wi pfunanga leswaku a yi twisisa. Hiloko a yi dyondza a ri yexe kutani a ti tsalela tinhla eka tsalwa rin’wana ni rin’wana. Tsalwa leri Terbish a a lava ku ri twisisa kahle hi leri kumekaka eka Vaheveru 11:6. Munkhzaya u n’wi hlamusele tsalwa leri a tlhela a kombela ku dyondza na yena Bibele naswona a n’wi rhambela eHolweni ya Mfumo. Loko a twa leswaku Holo yi kumeka kwihi, u te: “Xana i muako lowu nga ni swiluva swo saseka? A ndzi hundzi ndzi nga rhanganga hi ku yima ndzi swi nyanga. Ndzi lava ku tiva loyi a swi khathalelaka.” Munkhzaya u n’wi kombe yena. Sweswi Terbish u tsakela ku dyondza hi Muvumbi naswona u va kona eminhlanganweni. Munkhzaya u ri, “Wansati loyi u kokiwe hi swiluva leswaku a amukela ntiyiso, mina ndzi lo n’wi pfuna leswaku a wu twisisa.”

Japani

Hiroko, la nga ni malembe ya 78 hi vukhale a nga ha swi koti ku chumayela hilaha a a endla hakona, hikwalaho ka leswi milenge ya yena yi pandzaka. U khongele Xikwembu leswaku xi n’wi pfuna, hiloko a kuma ndhawu leyi nga ni vanhu vo tala lava rindzeke mabazi kutani u kota ku tshama timinete ta 30 a chumayela. Loko a vona vanhu wa n’wayitela. Ku ni xibedlhele ekusuhi ni laha a chumayelaka kona kutani loko a vona vanhu va khome mirhi, wa va vutisa leswaku va pfuke njhani. Loko a vona vanhu va ri karhi va languta xiyimiso xa nkarhi lowu bazi ra vona ri nga ta fika ha wona, wa va pfuna naswona lava nga yi tolovelangiki ndhawu yoleyo, u va byela tindhawu leti nga ni swilo swo tsakisa. Wa va yingisela loko va vulavula a tlhela a va fambisela timagazini. Van’wana u va vona ko tala kutani u endla maendzo yo vuyela eka vona.

Myanmar

Lazaru a a ngungumerisa swidzidzirisi. A a hanya hi swona, a dlaya a tlhela a endla vubihi bya muxaka wun’wana ni wun’wana. Hambiswiritano, loko makwerhu un’wana wa xisati a n’wi kombe eBibeleni leswaku vito ra Xikwembu i Yehovha, u nambe a amukela ntiyiso kutani a pfumela ku dyondzeriwa Bibele. Hambileswi dyondzo ya yena yi tekeke nkarhi wo leha, vuxaka bya yena na Yehovha byi ye byi tiya. Lexi n’wi tikeleke ngopfu a ku ri ku tshika mahanyelo ya yena ya swidzidzirisi. Loko a byela vatirhi-kulobye leswaku u tshika ntirho, va chuhile hikuva a a tiva swihundla swo tala entirhweni lowu wa vona. Va n’wi xavele vanhu ko hlayanyana leswaku va n’wi dlaya kambe u swi kotile ku baleka. U hetelele a rhurhele endhawini yin’wana kutani yena ni nsati wakwe va khuvuriwile.

Taiwan

Vahuweleri van’wana va fike va yima ehandle ka khefi yo xavisa kofi leyi a yi tsariwe vito leri nga tolovelekangiki. Vito ra kona a ri ku, Khefi Ya Buku Ya Ezra (Book of Ezra Coffee Shop). Hiloko muhuweleri un’wana a vutisa n’wini wa khefi leyi hi ta vito leri ra Ezra. U n’wi byele leswaku u rhandza Ezra hikwalaho ka ndlela leyi a a hisekela vugandzeri bya ntiyiso ha yona. N’wini loyi wa khefi u hete malembe yo tala a ri karhi a ya ekerekeni kambe wa ha ku tshika hileswi nsati wa yena la humaka le Vietnam a nga twiki nchumu ekerekeni. Muhuweleri loyi u n’wi byele leswaku u ta n’wi tela ni Bibele ya ririmi ra le Vietnam kutani va tsakile loko a va tela na yona ndzhenga wolowo. Muhuweleri u sungule ku va dyondzela Bibele.

Indiya

Vamakwerhu va ntlhanu va xisati va khomiwile kutani va heta masiku ya mune ekhotsweni hileswi va chumayeleke edorobeni leri vaaki va kona va nga laviki ku twa nchumu hi ntirho wo chumayela. Eku sunguleni murindzi wa vona a a va khahla naswona u va byele leswaku va nga chumayeli hi ta Kreste ekhotsweni. Hambiswiritano, u hatle a xiya leswaku va rhurile nileswaku va ni rirhandzu hiloko a sungula ku va khoma kahle. Vamakwerhu a va nyika vabohiwa van’wana ni varindzi mihandzu ni swakudya leswi a va tiseriwa swona ekhotsweni. Siku rin’wana nivusiku, murindzi u twe vamakwerhu loko va ri karhi va bula hi leswi va swi dyondzeke ebukwini leyi nge Tshinela Eka Yehovha. Hiloko a tshama enyangweni ya xitokisi xa vona a yingisela. Xaka ra yena ri lovile hi siku leri vamakwerhu va ntshunxiweke ha rona ekhotsweni kutani va kote ku n’wi chavelela hi ku n’wi byela hi ntshembo wa ku pfuxiwa ka vafi.

Eku sunguleni, murindzi un’wana u va vutisile leswaku va khomeriwe yini. Hiloko makwerhu un’wana a n’wi hlamusela leswaku valawuri a va anakanya leswaku ntirho wo chumayela i ku hundzula vanhu evukhongerini bya vona swi nga ri enawini. Hi ku tsakisiwa hi leswi makwerhu a n’wi byeleke swona, murindzi u te: “Hambileswi mi khomiweke a mi hlundzukanga. Ndzi ni ximbilwa-mbilwana kutani ndlela leyi mi vulavulaka hi ku titsongahata ha yona, yi ndzi khomisa tingana. Mi nga chavi ku ndzi byela loko ndzi nga vulavuli kahle naswona ndzi kombela mi ndzi dyondzisa ku vulavula ku fana na n’wina. A ndzi twisisi leswaku ha yini vanhu vo lulama ku fana na n’wina va pfaleriwe ekhotsweni.” Loko a kuma nkarhi, a a ya eka vamakwerhu, a fika a ku: “Ndzi byeleni leswi engetelekeke hi Bibele. Swi ndzi pfuna leswaku ndzi va ni ku rhula.” Vabohiwa van’wana vambirhi lava nga ni nandzu wa ku dlaya va tsakisiwe hi rungula ra Bibele. Vamakwerhu va va chumayele hi vutlhari swin’we ni vabohiwa van’wana. Leswi se va ntshunxiweke, va lava tindlela to ya pfuna vabohiwa lavaya lava tsakelaka, lava va va siyeke ekhotsweni.

Indonesia

Resmawati, la nga phayona ro hlawuleka, a a ha ku heta nsimu naswona a a lava ku muka, hiloko wansati un’wana a n’wi rhambela endlwini yakwe leswaku va ta bula hi Bibele. Endzhaku ka masiku manharhu, Resmawati u tlhelerile leswaku a ya n’wi vona. Loko a fika, wansati loyi u sungule ku rila, a n’wi byela hi nuna wa yena la n’wi khomaka hi ndlela yo biha. Resmawati u hlaye Vaheveru 4:12 kutani a n’wi hlamusela leswaku dyondzo ya Bibele yi nga cinca mahanyelo ya munhu. Hiloko a n’wi rungulela ntokoto wa Tony, lowu kumekaka eka khalenda ya Timbhoni ta Yehovha ya 2003. Wansati loyi u wu tsakerile ntokoto wolowo kutani a kombela khalenda yoleyo. Loko Resmawati a tlhela a n’wi endzela, u n’wi tele na yona. Va sungule ku dyondza buku leyi nge Leswi Bibele Yi Swi Dyondzisaka. Loko a vuya, nuna wa wansati loyi u kombele ku va kona loko va dyondza. U hlaye ntokoto wa Tony eka khalenda naswona wu endle leswaku a tianakanya. Vito ra nuna loyi i Tony naswona mahanyelo ya yena a ma fana ni ya Tony loyi ku vulavuriwaka hi yena eka khalenda loko a nga si dyondza ntiyiso. Loko a heta ku hlaya ntokoto lowu nga eka khalenda, u byele nsati ni vana a ku: “Phela ku vulavuriwa hi mina. Xana Mbhoni liya yi ri kumise ku yini vito ra mina leswaku yi tsala hi mina?” Nsati wa yena u te: “Timbhoni a ti ku tivi. Hambiloko a ti ku tiva, a ti nga to na swi pfuketana ti tsala ha wena eka khalenda yoleyo ya 2003, hambi ku ri leya 2007!” Loko wansati loyi a vona leswaku nuna wa yena u swi tsakerile leswi a swi hlayeke, u n’wi vutise hi vutlhari a ku: “Xana wa swi lava ku fana na Tony wa le ka khalenda?” U n’wi hlamarisile loko a ku: “Ina, ndza swi lava.” Hiloko a tshika mahanyelo yo biha kutani a tsemeta misisi a tlhela a tilunghisa leswaku a languteka kahle, ku fana na Tony wa le ka khalenda. Ndyangu hinkwawo wu ya emahlweni wu dyondza Bibele.

Malaysia

Etindhawini tin’wana ta le Borneo, vamakwerhu va tirhisa swifaniso swa sethalayiti eka Internet leswaku va vona lomu vanhu va tshamaka kona. Xiviko xa vona xi ri: “Leswi swi hi pfuna leswaku hi vona lomu tindlu ti kumekaka kona emakhwatini lama tlhumeke. Minkarhi yin’wana hi kuma leswaku malwangu man’wana i ya matshanga ya timbuti kutani ha hleka loko hi fika eka wona hikuva hi va hi tiyimisele ku chumayela vanhu, ku nga ri timbuti. A hi si tshama hi chumayela endhawini leyi ya le tintshaveni. Tanihi leswi makhwati lawa ma tlhumeke nileswi swi tikaka ku famba etindleleni ta kona, swifaniso swa sethalayiti swi hi pfuna ku tiva lomu hi nga ta famba kona.”

Yuropa

MATIKO 47

VAAKI 732 610 687

VAHUWELERI 1 533 790

TIDYONDZO TA BIBELE 749 911

Hungary

Nhwanyana un’wana la nga ni malembe ya 12 hi vukhale u ri: “Se ndzi ni tin’hweti ta kaye ndzi khuvuriwile naswona ndzi ni tin’hweti tinharhu ndzi ri phayona ra nkarhinyana. Mana wa mina u ndzi pfuna ngopfu. Vanhu vo tala va ndzi vutisa leswaku ndzi swi kotisa ku yini ku phayona ndza ha nghena xikolo, kambe ndzi anakanya leswaku a ndzi nga ta swi kota ku phayona loko a ndzi nga ngheni xikolo. Ndzi tirhisa nkarhi wo wisa exikolweni leswaku ndzi chumayela. Ndzi tshama ndzi ri karhi ndzi vulavula ni vadyondzi-kulorhi va ntlhanu hi Bibele. Vambirhi eka vona ndzi dyondza na vona Bibele. Hikwalaho ndza swi vona leswaku Yehovha wa ndzi katekisa. Vuphayona a hi ndzhwalo kambe i ndlela yin’wana leyi yi ndzi tiselaka ntsako. Mana wa mina i phayona ra nkarhi hinkwawo, na mina ndzi lava ku fana na yena. Ndzi lava ku tirhela Yehovha nkarhi hinkwawo.”

Britain

Susan u sungule ku dyondzeriwa Bibele hi 2001 naswona ku hele malembe mambirhi a ri karhi a dyondzeriwa. Hi nkarhi wolowo a swi n’wi tikela ku tshika ku dzaha. U ringete ko tala kambe a swo fana ni kwala. Hikwalaho ka sweswo u tshike ku dyondzeriwa kambe u hambete a ya eminhlanganweni ya vandlha. Endzhaku ka malembe ya mune, Susan a a navela ku antswisa vuxaka bya yena na Yehovha hiloko a kombela mpfuno evandlheni. U sungule ku dyondzeriwa nakambe kutani a tsakela rungula ra buku leyi nge Tshinela Eka Yehovha. Ndlela leyi buku leyi yi ri hlamuselaka ha yona rirhandzu ra Yehovha ni ndlela leyi hi faneleke hi n’wi rhandza ha yona, yi cince mahanyelo ya yena. U tshike ku dzaha ku nga si hela mavhiki ya nhungu. Susan u vula leswaku buku leyi yi n’wi pfune leswaku a tshembela eka Yehovha. U endle nhluvuko kutani a tinyiketela eka Yehovha ivi a khuvuriwa eNtsombanweni wa Muganga lowu nge “Landzela Kreste!”

Estonia

Helgi, xichudeni xa malembe ya 17 hi vukhale, loyi a a tshama a ri yexe naswona vatswari va yena va dlayeke vukati, u tsakele ntiyiso kutani a sungula ku dyondzeriwa Bibele. Eku sunguleni a a nga swi koti ku ya eka minhlangano hinkwayo hikuva a a heta nkarhi wo tala a ri eku yimbeleleni ni bhendhe ya ndhawu leyi a a tshama eka yona. U sungule ku cinca ndlela leyi a a hanya ha yona loko vutivi bya yena bya Bibele byi ya byi kula. U byele lava a a yimbelela na vona leswaku a nge he swi koti ku yimbelela hi masiku ya minhlangano. Hiloko a tsarisa eXikolweni xa Vutirheli bya le Tilweni kutani a endla nhluvuko kukondza a va muhuweleri la nga khuvuriwangiki. U nghenele mphikizano wa le tikweni wo yimbelela, lowu eka wona loyi a nga ta wina a a ta tirha ni khampani leyi dumeke ya ta vuyimbeleri. Hambileswi vo tala va nga amukeriwangiki, Helgi u nambe a amukeriwa kutani a hundzela emahlweni ni mphikizano. Hambiswiritano, mphikizano lowu landzelaka a wu ta khomiwa hi nkarhi lowu a a ta nyikela nkulumo ya yena yo sungula eXikolweni xa Vutirheli bya le Tilweni. Xana a a ta endla yini? Mana wa yena la nga riki Mbhoni ya Yehovha, u n’wi byele leswaku a nga yi nyikeli kumbe a yi nyikela siku rin’wana. Helgi u vule leswaku mhaka ya nkoka evuton’wini bya yena, a ku ri ku rhangisa swilo leswi khumbaka vuxaka bya yena na Yehovha. U anakanyisise hi mhaka leyi kutani a hlawula ku ya nyikela nkulumo ya yena. U yile a ya yi nyikela naswona mana wa yena u xi xiximile xiboho xa yena.

Muviki wa mahungu ya thelevhixini u ye eNtsombanweni wa Muganga lowu nge “Landzela Kreste!” leswaku a ta teka swifaniso swa nkhuvulo ni ku tsala rungula ro karhi hi ntsombano. Loko muviki loyi a vona Helgi a khuvuriwa, u sungule ku n’wi teka xifaniso a tlhela a vulavurisana na yena. Mhaka leyi ku vulavuriwe ko tala ha yona emahungwini ya thelevhixini madyambu wolawo, laha va kombeke Helgi a ri karhi a yimbelela eku sunguleni ka mphikizano, va gimeta hi ku n’wi komba a ri karhi a khuvuriwa niloko a vula hi ku n’wayitela a ku: “Lexi i xiboho xa nkoka evuton’wini bya mina.”

Bulgaria

Ivelin i mubohiwa ekhotsweni leri nga le Belene. Loko a tsalela rhavi ra kwalaho ra Timbhoni ta Yehovha u te: “Laha khotsweni ndzi kume magazini wa Xihondzo xo Rindza hi xiwelo naswona ndzi ni swivutiso swo tala leswi ndzi lavaka ku mi vutisa swona. Se ndzi hundzukile eswidyohweni swa mina naswona ndzi lava ku hanya hi milawu ya Bibele. Ndzi kombela leswaku mi ndzi endlela nchumu lowu ndzi anakanyaka leswaku wa tika naswona a ndzi tshembi leswaku mi ta swi kota ku wu endla. Ndzi kombela mi ndzi tsalela mapapila leswaku ndzi ta tiva swo karhi hi Yehovha Xikwembu! A ndzi tshembi leswaku mi ta ndzi hlamula kambe ku tiva ntsena hi Yehovha, swa ndzi tsakisa. Ndzi lava ku tiva swo tala hi Yehovha leswaku ndzi ta dyondzisa ni vabohiwa van’wana. Kambe, tsundzukani leswaku loko mi nga ndzi tsaleli, siku rin’wana ndzi ta huma laha khotsweni, naswona loko ndzi huma ndzi ta lava ku hlangana na n’wina!” Vamakwerhu va hatle va hlamula, kutani sweswi va dyondza ni vabohiwa va khume ekhotsweni leri, ku katsa na Ivelin.

Portugal

Jana, la nga phayona ro hlawuleka u ri: “Siku rin’wana loko ndzi huma exitichini xa xitimela, ndzi vone wanuna wa Muchayina kutani ndzi namba ndzi n’wi chumayela. U hlamarile leswi ndzi vulavuleke na yena hi Xichayina kutani a ndzi byela leswaku u ya exibedlhele hikuva ku nga ri khale nsati wa yena a a ta kuma n’wana hi ku endliwa vuhandzuri. Nuna loyi ni nsati wa yena a va nga xi tivi Xiputukezi kutani madokodela a ma va kombele leswaku va kuma munhu loyi a a ta va tolokela. Nuna loyi a a karhatekile, hiloko a ndzi kombela leswaku ndzi n’wi pfuna. Hi xamundzuku xa kona, madokodela ma ndzi nyike swiambalo leswi ambariwaka loko ma endla vuhandzuri leswaku ndzi ta va kona loko wansati loyi a endliwa vuhandzuri. Loko madokodela ma ri karhi ma endla vuhandzuri, ndzi n’wi khome voko naswona u ndzi vutise swivutiso swo tala hi Bibele ni hi ntirho wa hina wo chumayela. U kume n’wana wa nhwanyana wo saseka naswona tanihi leswi ndzi n’wi pfuneke u ndzi kombele leswaku ndzi thya n’wana wa yena vito. Endzhaku ko yimanyana, ndzi n’wi thye vito ra Sarah. Ri n’wi tsakisile vito leri lerova u lave ku tiva swo tala hi Sara wa le Bibeleni ni Xikwembu lexi a a xi gandzela. Endzhaku ka loko a humile exibedlhele ndzi kombele ku va dyondzela Bibele. Loko ndzi nga si va pfuna a va nga swi lavi ku vulavula ni Timbhoni, kambe endzhaku ko pfuna nsati loyi, va hatle va cinca ndlela leyi a va ti languta ha yona Timbhoni. Va pfumerile ku dyondzeriwa Bibele naswona sweswi va va kona eminhlanganweni.”

Slovakia

Mpatswa wun’wana lowu nga maphayona yo hlawuleka wu hlangane ni majaha mambirhi lama humaka le Afghanistan. Eka nkarhi lowutsongo lowu ma wu tshameke eSlovakia, ma tsakele ku hlaya Bibele. Mpatswa lowu wu vulavule na wona ko hlayanyana kutani wu ma nyika Bibele ni buku leyi nge Xana Bibele Yi Dyondzisa Yini Hakunene? Wu tlhele wu ma komba ndlela leyi dyondzo ya Bibele yi fambisiwaka ha yona leswaku ma ta dyondza Bibele loko ma ri woxe niloko ma ri ni vanhu van’wana.

Oceania

MATIKO 30

VAAKI 36 829 259

VAHUWELERI 96 691

TIDYONDZO TA BIBELE 51 122

New Zealand

Siku rin’wana ninhlikanhi, makwerhu la vuriwaka Paul u hlangane ni wansati un’wana loko a ri karhi a chumayela hi yindlu ni yindlu. Loko makwerhu a n’wi nyika broxara, u yi amukerile kutani a vula leswaku xaka ra yena ri n’wi byele leswaku u fanele a dyondza Bibele. Mixo wolowo a a ha ku khongela Xikwembu a tirhisa vito ra xona leri nge, Yehovha, a kombela leswaku ku ta munhu a ta vulavula na yena hi Bibele. Paul u ri: “Ndzi fike endlwini ya yena endzhaku ka tiawara tinharhu. Ku tlula kwalaho, ndzi fike hi nkarhi lowu hi ntolovelo a vaka a nga ri kona ekaya.” U amukele dyondzo ya Bibele hi mandla mambirhi naswona u endla nhluvuko.

Australia

Armando na Elvira, vatekani lava ha riki vantshwa va tshama etikweni ra East Timor, leri khathaleriwaka hi rhavi ra Australia. Hi 2006, muganga lowu va tshamaka eka wona a wu tshamela ku hlaseriwa hi rixaka ro karhi kutani va boheka ku baleka. Va balekele ekampeni ya vahlapfa va nga khomanga nchumu handle ka Bibele ya Armando ni broxara leyi nge I Yini Leswi Xikwembu Xi Swi Languteleke Eka Hina? Va te loko va hlangana ni vamakwerhu, va sungula ku dyondzeriwa kambirhi hi vhiki ni ku ya eminhlanganweni ya vandlha. Armando u tlhele a chumayela ni maxaka ya yena lama tshamaka eximutanini lexi nga mpfhuka wa tiawara ta mune na hafu ku suka eDili. Ndyangu wa ka vona wu tsakele rungula ra Mfumo hiloko a kombela maphayona ya le Baucau leswaku ma ya wu pfuna, a ma fanele ma famba mpfhuka wa awara ni hafu. Vanhu vo tlula 20 va hlengeletanile leswaku va ta yingisela maphayona lawa. Tatana wa Armando loyi a nga muyimeri wa vanhu lava, u vule leswaku va tiyimiserile ku lahla swifaniso swa vona kambe u lave ku tiva loko va ha ta tama va sirhelelekile eka madimona. Maphayona ma va tiyisekisile leswaku Yehovha u ta va sirhelela. Hiloko va swi lahla. Sweswi ku ni vanhu vo tlula 25 lava dyondzeriwaka Bibele eximutanini xexo. Armando u langutele ku khuvuriwa ku nga ri khale naswona Elvira u karhi u endla nhluvuko.

Guam

Exihlaleni xa Saipan, lexi khathaleriwaka hi rhavi ra Guam, makwerhu un’wana wa xisati u hlamarile loko a kuma leswaku nuna wa yena, loyi a a ri mukaneti, a a yi hlaya exihundleni minkandziyiso leyi makwerhu a a yi siya endlwini. U hlaye timagazini ta Xihondzo xo Rindza ni ta Xalamuka! a tlhela a hlaya Tibuku Ta Lembe ni buku leyi nge Xihundla Xa Ntsako eNdyangwini. Siku rin’wana u vitane nsati ni vana va yena va ntlhanu, a vula leswaku u lava ku va byela mhaka yin’wana ya nkoka. A ku ri ro sungula a endla tano! Loko va hlengeletanile, va kume leswaku a a lava ku laya vana va yena vanharhu va vanhwanyana hi timhaka ta vukati. A a tsale eka phepha lerikulu, timfanelo leti va faneleke va ti languta eka majaha lawa va lavaka ku tekana na wona. Hambileswi a nga riki mupfumeri, kambe u tsakisiwe hi mhaka ya vutomi ya Sheila Winfield da Conceição, leyi kumekaka eka Xihondzo xo Rindza xa November 1, 2006, lerova a tsala swilaveko swa loyi a fanelekaka ku va munghana wa vukati, hilaha Sheila a endleke hakona. U khutaze vana vakwe leswaku va tekiwa hi majaha lama nga Timbhoni ta Yehovha nileswaku majaha ya kona ma fanele ma rhandza Yehovha ma tlhela ma tiva Bibele ku va tlula. U byele vana va yena vanharhu leswaku u navela onge va nga tiphina ku fana na Sheila. Leswi swi va khumbile swi tlhela swi va nyika ntshembo wa leswaku siku rin’wana tata wa vona u ta tirhela Yehovha swin’we na vona.

Samoa

Makwerhu un’wana ni nsati wa yena va averiwe ku ya chumayela eSamoa, va huma erhavini rin’wana. Eka yindlu yo sungula leyi va ngheneke eka yona, makwerhu u fambisele n’wini wa muti buku leyi nge Xana Bibele Yi Dyondzisa Yini Hakunene? U hlamarile loko n’wini wa muti a n’wi byela leswaku a nghena endlwini. Hambiswiritano, n’wini loyi wa muti loyi a nga tshama a va ni mabindzu u miyerilenyana kutani a ku, “Ndzo va ni timinete ta 45 ntsena ku bula na n’wina mixo lowu.” Makwerhu loyi a a nga si tshama a hlamuriwa hi ndlela yoleyo. Va nambe va sungula ku n’wi dyondzela. Loko va fika vhiki leri landzelaka, wansati loyi u va amukerile a khome Bibele ni buku leyi nge Leswi Bibele Yi Swi Dyondzisaka. Ku ni ntshembo wa leswaku dyondzo leyi yi ta ya emahlweni.

Solomon Islands

Emily u tshama exihlaleni xa San Cristobal naswona i Mbhoni a ri yexe tlhelo phayona ra nkarhi hinkwawo. Sweswi u dyondzela vanhu va 20 Bibele naswona vanharhu va vona i vahuweleri lava nga khuvuriwangiki ku katsa ni vatswari va yena. Lance na Diane, lava rhavi ri va tirhisaka entirhweni wo aka ematikweni yo hambana-hambana, va teke masiku ya vona yo wisa leswaku va ya pfuna Emily hi Xitsundzuxo naswona va fambe tiawara ta 14 hi xikepe lexitsongo lexi a xi layiche ndzhwalo wo tala. Lance u ri: “Loko hi fika, a hi lava ku etlela kambe hi vone swi antswa leswaku hi rhanga hi ku vulavula ni hosi ya ximutana lexi. Loko hi heta ku yi hlamusela leswaku hi endzele ximutana lexi leswaku hi ta khoma Xitsundzuxo, yi te: ‘Vanhu vo tala a va xi kumanga xirhambo xo ta eXitsundzuxweni. Xana na vona va nga ta va ta yingisela?’ Hi yi byele hi ri karhi hi n’wayitela leswaku va nga ta.

“Loko ku fika nkarhi wa leswaku Xitsundzuxo xi sungula, a ku ri ni vavasati vambirhi ni vana va nga ri vangani. Hambiswiritano, hi vone vanhu vo tala va yime ekusuhi ni mirhi kutani hi hatla hi va vitana. Loko ku sungula ku phumela, hi tirhise janareta leswaku hi ta kota ku voningeriwa. Vanhu hinkwavo lava a va ri kona a va rhiye ndleve loko nkulumo ya Xitsundzuxo yi ri karhi yi nyikeriwa.” A ku ri ni vanhu va 130 ku katsa ni mufundhisi wa kereke ya Savata loyi a nga kombela Bibele ya Vuhundzuluxeri Bya Misava Leyintshwa, a vula leswaku u yi twisisa ku antswa ku tlula Bibele leyi a yi tirhisaka. Vanhu va ntlhanu va sungule ku dyondzeriwa Bibele endzhaku ko va kona eXitsundzuxweni.

Papua New Guinea

Swimitana swimbirhi leswi nga le kusuhi ni xidorobana a swi lawuriwa hi Kereke ya Khatoliki naswona a swi tika ku chumayela endhawini yoleyo. Vamakwerhu va ha ku ya eswimitanini leswi leswaku va ya hlamusela ntirho wa hina wo chumayela eka varhangeri va kona, nileswaku ha yini hi chumayela vanhu hinkwavo. Va kume leswaku eka xin’wana xa swimitana leswi, varhangeri a va ha ku khoma nhlangano ni vaaki va kona, va bula hi mhaka yo pfuna vantshwa leswaku va antswisa mahanyelo ya vona. Vamakwerhu va va byele leswaku Bibele yi nga va pfuna.

Vamakwerhu va pfumeleriwile ku chumayela kutani va sungula ku dyondza Bibele ni majaha yo hlayanyana. Loko vaaki va ximutana lexi va vona leswaku mahanyelo ya majaha lawa ma cincile hikwalaho ko dyondza ni Timbhoni ta Yehovha, va nambe va tshika ku kaneta ntirho wa hina wo chumayela. Hi ku famba ka nkarhi, vanghana ni vatswari va majaha lawa va sungule ku dyondzeriwa ku katsa ni n’wana wa nhwanyana wa mufundhisi loyi a nga tshama a xungeta vamakwerhu. Mufundhisi loyi u byele n’wana wa yena a ku: “A ndzi endle xihoxo lexikulu hi nkarhi wolowo. Ndzi tshemba leswaku Xikwembu ni Timbhoni ta Yehovha va ta ndzi rivalela.” Eka swimitana leswi swimbirhi, se ku ni vanhu va 27 lava va nga xwiki eminhlanganweni ya vandlha. Va mune va khuvuriwile naswona i maphayona ya nkarhinyana. Va tiyimisele ku va maphayona ya nkarhi hinkwawo.

[Mepe/Xifaniso lexi nga eka tluka 48]

(Leswaku u vona rungula leri hleriweke hi ku helela, vona nkandziyiso wa kona)

[Xifaniso]

Yindlu yo kongomisa vatluti le Cape Horn

[Mepe lowu nga eka tluka 63]

(Leswaku u vona rungula leri hleriweke hi ku helela, vona nkandziyiso wa kona)

Xihlala xa San Cristobal

[Xifaniso lexi nga eka tluka 44]

Ku ri karhi ku fambisiwa Dyondzo ya “Xihondzo xo Rindza” eximutanini xa Antanandava, eMadagascar

[Xifaniso lexi nga eka tluka 46]

Ntlawa wa le Pawaga, le Tanzania wu ri karhi wu dyondzeriwa buku leyi nge “Leswi Bibele Yi Swi Dyondzisaka”

[Xifaniso lexi nga eka tluka 49]

Dyondzo ya Buku ya Vandlha le Sixaola, eCosta Rica

[Xifaniso lexi nga eka tluka 50]

Ramiro a khome buku leyi nge “Leswi Bibele Yi Swi Dyondzisaka”

[Xifaniso lexi nga eka tluka 53]

Hiroko a ri karhi a chumayela endhawini yo khandziyela mabazi

[Xifaniso lexi nga eka tluka 58]

Helgi (exineneni) a ri karhi a nyikela nkulumo eXikolweni xa Vutirheli bya le Tilweni

[Xifaniso lexi nga eka tluka 64]

Lance, Diane na Emily