Ndlela Leyi Ha Yona Misava Yi Nga Ta Va Ni Vun’we

MATSHALATSHALA ya vanhu ya ku tifuma hi laha ku humelelaka ma tsandzekile hi ku helela. Handle ko kanakana u ta pfumelelana ni marito lama huhuteriweke lama nge: “V̌anhu v̌a [fuma] henhla ka vaṅwana ku v̌a endla ŝo biha.” (Eklesiasta 8:9) Ha yini vanhu va tsandzeke hi laha ku heleleke ku tifuma?

Bibele yi nyika xivangelo, yi hlamusela yi ku: “Munhu l’a fambaka a nga ka a nga lulamisi renḍo ra yena.” (Yeremiya 10:23) E-e, a hi mfanelo kumbe lunghelo ra munhu leswaku a tifuma kumbe a fuma vanhu van’wana. I mfanelo leyi hlawulekeke ya Yehovha Xikwembu, Mutumbuluxi wa hina, loyi hi byeriwaka leswi ha yena: “Yehova i muav̌anyisi wa hina; Yehova i mulawuri wa hina; Yehova i hosi ya hina.”—Esaya 33:22.

Misava yi ta va ni vun’we ntsena loko vanhu hinkwavo va amukele Yehovha Xikwembu tanihi Mufumi. Kambe, xana sweswo swi ta kala swi humelela? Muprofeta wa Xikwembu u vulavule khale hi ‘minkarhi ya makumu,’ laha vanhu vo tala va nga ta sungula ku lava nkongomiso wa Yehovha.

Ku Rhula Ka Misava Hinkwayo Loku Vhumbhiweke

Muprofeta Esaya u tsarile: “E mikarini ya makumo, ku ta humelela leŝaku nṭhav̌a ya yindlu ya Israel yi ta v̌ekiwa e nhlohlorini ya tinṭhav̌a, . . . kutani matiko hikwawo ma ta talela kona. Matiko la’yo tala ma ta ta kona, ma ku: Tanani, hi ta tlhandlukela nṭhav̌eni ya Yehova, e ndlwini ya Šikwembu ša Yakob; ši ta hi dyonḍisa tindlela ta šona.” Loko hi hlaya hi ya emahlweni, hi vona vuyelo bya ku lava nkongomiso wa Yehovha. Vuprofeta byi ya emahlweni: “Hi mabanga ya v̌ona v̌a ta fula ŝikomu, hi matlhari ya vona v̌a ta fula masikeri; tiko ri nga ka ri nga ha lwi ni riṅwana, kutani a ku nga ha dyonḍisiwi ku lwa.”—Esaya 2:2-4.

Ina, vuyelo bya ku yingisa dyondzo leyi ya Xikwembu ku ta va ku hela ka ku lwa, ku hela ka madzolonga ya rixaka ni ku hela ka nyimpi. Vafumi va vanhu a va ehleketa leswaku va ta swi kota ku hetisisa vuprofeta lebyi bya Bibele, va tlhela va tsala xiphemu xa byona xo hetelela ekhumbini ra Muako wa Nhlangano wa Matiko eDorobeni ra New York. Hambi swi ri tano, nyimpi ni rivengo exikarhi ka matiko ni mintlawa ya tinxaka swi tlakukile ku fikela eku heleni ka 1993. Kutani xana u nga vula leswaku vuprofeta bya Xikwembu byi tsandzekile?

E-e, a byi tsandzekanga—hikuva vanhu lava humaka ematikweni hinkwawo sweswi va khitikanela endlwini ya Yehovha leswaku va ta dyondzisiwa dyondzo ya Xikwembu. Hakunene, Mintsombano ya ximumu lexi hundzeke ya Timbhoni ta Yehovha ya “Dyondzo Ya Xikwembu” yi nyikele vumbhoni lebyinene swonghasi bya ku hetiseka ka vuprofeta lebyi! Vumakwerhu bya misava hinkwayo bya Timbhoni ta Yehovha a byi pfumeleli nchumu—ku nga va rixaka, vutiko kumbe ndhavuko wa rixaka—ku va endla leswaku va vengana kumbe va dlayana. Hi ku fanekisela va fule mabanga ya vona ma va swikomu ni matlhari ya vona ma va masikela.

‘Kambe,’ van’wana va nga ha kaneta, ‘u nga ka u nga rindzeli leswaku un’wana ni un’wana a yingisela xileriso xa Xikwembu xa ku rhandzana.’ Hambi loko ku ri ntiyiso leswaku, Xikwembu xi ni matimba ya ku susa hinkwavo lava kanetanaka ni ku rhandza ka xona.

Leswi Xikwembu Xi Nga Ta Swi Endla

Xana u khongela hi laha Yesu a dyondziseke valandzeri vakwe, hi leswaku: “Tata wa hina la nge matilweni, vito ra wena a ri hlawuleke; a ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni”? (Matewu 6:9, 10) Loko u endla tano, u nga tiyiseka leswaku Tata wa hina wa rirhandzu wa le tilweni u ta hlamula xikhongelo xexo. Xana u ta swi endlisa ku yini?

Xikwembu ana se xi hlawule N’wana wa xona, “Hosana ya ku Rhula,” tanihi hosi leyi hlawuriweke ya “hulumendhe” ya xona, Mfumo lowu hi lerisiweke ku wu khongelela. (Esaya 9:6, King James Version) Hi lava hosi yo fana ni yoleyo leyi nga ni matimba ya moya yo tlula ya munhu, hikuva hi yona ntsena yi nga ntshunxaka vanhu ehansi ka nkucetelo wo biha wa Sathana ni mademona yakwe. Tihosi leti nga vanhu, ku nga khathariseki leswaku i tinene ku fikela kwihi, ti nga ka ti nga swi endli leswi.—1 Yohane 3:8; Nhlavutelo 12:7-12.

Hambi swi ri tano, xana ku ta humelela yini hi tihulumendhe ta namuntlha leti tsandzekaka ku titsongahata ehansi ka vulawuri bya Xikwembu? Vuprofeta byin’wana bya Bibele lebyi hlamuselaka Mfumo lowu Yesu a hi dyondziseke ku wu khongelela byi ri: “Šikwembu ša matilo ši ta pfuša ku fuma lo’ku nga taka ku nga onhaki ni siku rin’we. . . . [Mfumo wa Xikwembu wa le matilweni wu] ta seletela ni ku herisa ku fuma kuloku hikwako, kambe [w]ona [w]u ta v̌a kona hi laha ku nga riki na makumu.” Xisweswo, loko hi khongelela Mfumo wa Xikwembu leswaku wu ta swi vula leswaku hi khongelela hulumendhe yin’we ya misava hinkwayo ehansi ka vulawuri bya ‘Hosana ya ku Rhula.’—Daniyele 2:44; Esaya 9:6.

Xisweswo, loko ndyangu wa vanhu wu hlanganile hi ku rhula ehansi ka Mfumo wa Xikwembu, hinkwavo va ta rhandzana ku nga khathariseki leswaku i va rixaka kumbe ndhavuko wihi. Wolowo wu ta va nkarhi wo tsakisa swonghasi! (Nhlavutelo 21:3, 4) Ha ku rhamba leswaku u tsakela masungulo ya xiyimo xexo xo rhula lexi nga kona hambi ku ri sweswi exikarhi ka Timbhoni ta Yehovha, ivi u langutela na vona nkarhi lowu misava hinkwayo yi nga ta va yi hlanganile hi ku rhula.