Xana Xikwembu Xa Hakela?

INA, xa hakela. Kutani ke, xana i vutianakanyi ku tirhela Xikwembu u langutele ku hakeriwa? Doo, hikuva hi xona xi vekaka tihakelo emahlweni ka malandza ya xona lama tshembekaka. Entiyisweni, tanihi Xikwembu xa vululami ni rirhandzu, Yehovha u tiboha ku hakela lava n’wi tirhelaka. Rito rakwe, eka Vaheveru 11:6, hi ku komisa ri ri: “Un’wana ni un’wana loyi a lavaka ku tshinelela Xikwembu ú fanele ku pfumela leswaku xi kona, ni leswaku xi hakela lava va xi lavaka.”

Ku kombisa ripfumelo ra xiviri eka Xikwembu swi hi endla vanghana va xona, naswona vunghana lebyi byi ta endla leswaku hi hakeriwa. Xikwembu xi katekisa lava lavaka ku tsakeriwa hi xona hi mbilu hinkwayo.

Tihakelo I Swiendlo Swa Rirhandzu

Yehovha u lava leswaku hi swi tiva leswaku i Xikwembu xa tintswalo lexi hakelaka lava xi rhandzaka. Hi xikombiso, vatswari lava anakanyelaka va tikumela tindlela to hakela n’wana wa vona loyi hi ku tirhandzela a endlaka mintirho ya laha kaya hikwalaho ka leswi a rhandzaka vatswari va yena. Vatswari va nga ha n’wi nyika swilo leswi engetelekeke eka swilaveko swa vutomi, va hakela n’wana hi nyiko yo hlawuleka. Minkarhi yin’wana nyiko ya kona ku nga ha va mali leyi va yi vekelaka n’wana ebanki leswaku n’wana a va ni vumundzuku lebyi sirhelelekeke. Xisweswo, Xikwembu a xi fani ni vanhu lava nga tlangeliki kumbe lava nga va anakanyeriki lava va va endlelaka swilo hikwalaho ka leswi va va rhandzaka kumbe va tshembekeke. Yehovha u ni mbilu leyinene, naswona wa va tshinelela vanghana vakwe. Loko u namarhela eka yena swinene hi ripfumelo, a “nga ka [a] nga ku tshiki, kumbe ku ku cukumeta, ni siku ni rin’we.”—Vaheveru 13:5.

Xikwembu xa va tsakela naswona xi rhandza hinkwavo hambi lava xi tirhelaka switsongo, xi va nyika nkarhi lowu engetelekeke wa ku xi tiva. Marito ya Yesu eka Matewu 10:40-42 ya humesa yinhl: “Loyi a mi rhurhelaka, wa ndzi rhurhela; ni loyi a ndzi rhurhelaka, ú rhurhela la ndzi rhumeke. Loyi a rhurhelaka muprofeta hi leswi a nga muprofeta, ú ta kuma hakelo yo kota ya muprofeta; ni loyi a rhurhelaka la lulameke hi leswi a nga la lulameke, ú ta kuma hakelo yo kota ya la lulameke. Ndzi tiyisile ndzi ri ka n’wina: Un’wana ni un’wana la nyikaka hambi wu ri ndzheko wa mati yo titimela eka un’wana wa lavatsongo lava, hi ku tiva leswaku i mudyondzisiwa wa mina, a nga ka a nga pfumari hakelo ya yena.”

Yesu u rhumeriwe hi Tata wakwe, Yehovha. Hikwalaho, munhu loyi hi ku tirhandzela a amukelaka vadyondzisiwa va Kreste—ku nga khathariseki leswaku i vaprofeta, vavanuna lava lulameke, kumbe un’wana wa lavatsongo—u ta va a amukela Kreste swin’we ni Xikwembu, lexi rhumeke Kreste. Hakunene munhu yoloye u ta katekisiwa; a nge tshikiwi a nga hakeriwanga. Vuhlayiselo byakwe bya rifuwo ra moya byi ta ya byi tala. Ha yini? Hikuva Yehovha u tsundzuka hambi ku ri xiendlo lexitsongo xa ntirho lowu endleriweke ku seketela Mfumo wa yena, naswona xiendlo xexo a xi nge tshikiwi xi nga hakeriwi.—Vaheveru 6:10.

Lexi tsakisaka, Petro, mudyondzisiwa wa Yesu, u vutise Yesu hi ku kongoma loko yena ni vaapostola lavan’wana va ta hakeriwa: “Waswivo, hina hi tshikile hinkwaswo, hi ku landza; xana hi ta vuyeriwa hi yini?” (Matewu 19:27) Yesu a nga langutanga xivutiso lexi xi hoxile kambe u nyikele nhlamulo leyi nyikaka ntshembo a ku: “Kutani un’wana ni un’wana la tshikeke tindlu ta yena, kumbe vamakwavo va xinuna ni va xisati, kumbe tata wa yena, kumbe mana wa yena, kumbe vana, kumbe masimu, hikwalaho ka vito ra mina, ú ta nyikiwa swona ka dzana, a tlhela a dya ndzhaka ya vutomi lebyi nga heriki.”—Matewu 19:29.

Tihakelo Ta Sweswi Ni Ta Nkarhi Lowu Taka

Nhlamulo leyi Yesu a va hlamuleke ha yona yi kombisa leswaku valandzeri vakwe va hakeriwa sweswi ni le nkarhini lowu taka. Hakelo yin’wana ya sweswi i ku va va va xiphemu xa ndyangu lowu andzaka wa matiko hinkwawo wa vamakwavo va moya. Loko tikereke ta Vujagana ti konya hi leswi swirho swi hungutekaka naswona ti nga ha seketeriwiki, tiholo to hlanganela eka tona ta Timbhoni ta Yehovha hi ndlela yo fanekisela to khapa kunene. Madzana ya magidi ya Timbhoni letintshwa ya khuvuriwa lembe na lembe.

Ku engetela kwalaho, hakelo yin’wana i ku rhula ka mianakanyo ka ku eneriseka ni ntsako lowu tisiwaka hi vunghana ni Xikwembu ni ku xi tiva. Phela, “vukhongeri lebyi nga ni ku tsaka ka mbilu” i rifuwo lerikulu. (1 Timotiya 6:6) Kunene swi kombisa xiyimo xa mianakanyo leyi tsakeke loko munhu a kota ku vula leswi, hi laha muapostola Pawulo a vuleke ha kona: “Ndzi dyondzile ku kolwa hi leswi ndzi tikumaka ndzi ri ka swona,” ku nga ku eneriseka.—Vafilipiya 4:11.

Emahlweninyana ka rifu rakwe, Pawulo u tsale hi hakelo ya nkarhi lowu taka ya “ntlhambinyana” wa valandzeri va Yesu lava totiweke—hakelo ya ku pfuxeriwa evuton’wini bya le tilweni: “Leswi saleke, hileswaku harhi ya vahluri yi ndzi yimerile, ku nga ku lulama loku Hosi, muavanyisi lowo lulama, yi nga ta ndzi nyika hi siku lerikulu; kutani a yi nga nyiki mina ntsena, kambe yi ta nyika ni hinkwa[v]o lava tsakeleke ku humelela ka yona.”—Luka 12:32; 2 Timotiya 4:7, 8.

Timiliyoni ta valandzeri va Yesu lava nga “tinyimpfu tin’wana” eka yena va langutele hakelo ya nkarhi lowu taka ya vutomi lebyi nga heriki emisaveni leyi hundzuriweke yi va paradeyisi. (Yohane 10:16) Nakambe Yesu u tiyisekise leswaku valandzeri vakwe lava faka “hi siku ra ku pfuka ka lavo lulama [va] ta [hakeriwa].”—Luka 14:14, ringanisa NW.

Vona Hakelo Hi Mahlo Ya Mianakanyo

Swi fanerile ku ringeta ku vona mikateko yo tano hi mahlo ya mianakanyo hambi leswi ku nga riki na loyi hi ku kongoma a tivaka leswaku yi ta va njhani. Xana wa swi kota ku vona ntsako lowu hlamuseriweke eka Esaya 25:8: “O ta lov̌isa rifu hi laha ku nga heriki: Hosi, Yehova o ta hlangula mihloti e mimombyeni hikwayo; o ta sula tingana ta tiko ra yena hikwaro”? Ringeta ku vona marito ya Esaya 32:17 hi mahlo ya mianakanyo: “Ntiro wa ku lulama ku ta v̌a ku rula, ni mihanḍu ya ku lulama, e ku wisa ni ku ṭaka, lo’ku nga yiki helo.” Phela, vanhu hinkwavo va ta va va tirha swin’we va ri ni vunghana bya ntiyiso. (Esaya 65:21-25) Hambi ku ri namuntlha, ntirho wa vugingiriki wu humesa makaya lamanene ni mihandzu ya xiyimo xa le henhla. Kutani ke, emisaveni leyintshwa ya Xikwembu, vanhu lava nga ni rihanyo lerinene lava nga ehansi ka swiyimo leswi hetisekeke va ta swi kota ku humesa yini na yini lexi lavekaka leswaku vutomi byi tsakisa.—Pisalema 37:4.

Tihakelo leti Xikwembu xi hi nyikaka a hi ti kumi hikwalaho ka ntirho wo karhi lowu bohaka leswaku hi ti kuma kambe xi hi nyika xi susumetiwa hi rirhandzu ra xona hambi leswi hi nga exiyin’weni xa vudyoho lexi hi xi kumeke hi ndzhaka. (Varhoma 5:8-10) Ku nga khathariseki sweswo, ku ni mhakanyana exikarhi ka hakelo leyi hi yi languteleke ni mahanyelo ya hina. Hi ku hiseka hi fanele hi lava Yehovha hi ripfumelo ni ku tiyisela lokukulu. (Vaheveru 10:35-39) Hi marito man’wana, “xin’wana ni xin’wana lexi mi xi endlaka, xi endleni hi mbilu hinkwayo, onge hi loko mi tirhela Hosi, ku nga ri vanhu; hikuva ma swi tiva leswaku mi ta nyikiwa ndzhaka hi Hosi, yi ri hakelo ya n’wina.” Ina, kunene xa hakela.—Vakolosa 3:23, 24.