Ndlela Yo Tlhelela Eparadeyisini

HI KU vona ku navela ka munhu Paradeyisi ni matshalatshala lamakulu ni lamatsongo yo tlhela a yi endla, un’wana a nga ha ehleketa leswaku sweswi misava a yi fanele yi ve paradeyisi ya xiviri. Kambe a yi si va yona.

Kambe, vanhu va rhangise makwanga, lawa hakanyingi ma hoxaka xandla eku onheni ka mbango ni vunyingi bya swilo swa wona leswi hanyaka. Hi ku tshemba leswaku rifuwo ra nyama ri ta lawula, vanhu vo tala va lahlekeriwe hi ntshembo wa leswaku misava leyi yi ta kala yi hundzuriwa yi va paradeyisi yo fana na Edeni. Ematshan’weni ya sweswo, va languta eka vutomi bya le ndzhaku ka rifu etilweni tanihi ntshembo wa vona ntsena wa Paradeyisi. Xo sungula, vonelo leri ri kombisa leswaku ku navela ka hina ka vumunhu ka Edeni a ku nge heli, naswona xa vumbirhi, leswaku Xikwembu xi tshike pulanete leyi leswaku vanhu va endla vuhomboloki ni makwanga eka yona. Xana leswi swi tano? Kahle-kahle xana vumundzuku byi hi khomele yini? Naswona xana sweswo swi ta fika rini?

Paradeyisi—eTilweni Kumbe eMisaveni Xana?

Kwalomu ka malembe ya 2000 lama hundzeke, loko a vulavula ni khamba leri hundzukeke leri beleriweke etlhelo ka yena, Yesu Kreste u te: “U ta va na mina eParadeyisini.” (Luka 23:43) Xana Yesu a a vula leswaku u ta famba ni khamba leri etilweni? E-e.

Muendli wa leswo biha a nga ri na yona mianakanyo yoleyo. Ha yini a nga vanga na yona? Hikuva swi nga endleka a tolovelane ni marito ya Matsalwa ya Xiheveru, lawa a ma ri kona esikwini rakwe, yo tanihi xiphemu xo sungula xa Pisalema 37:29 leyi nge: “Lav̌o lulama v̌a ta fuma misav̌a.” (Xiitaliki i xerhu.) Yesu u dyondzise ntiyiso lowu fanaka, a ku: “Ku katekile lavo rhula, hikuva va ta dya ndzhaka ya misava.” (Matewu 5:5, xiitaliki ixerhu) Tsalwa leri ri pfumelelana ni leswi hi ntolovelo swi vuriwaka Xikhongelo xa Hosi, lexi nge: “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.”—Matewu 6:9, 10.

Bibele yi dyondzisa leswaku Xikwembu xi vumbe misava, ku nga ri matilo, leswaku yi va kaya ra ndyangu wa vanhu. Rito ra xona ri vula leswaku “a nga yi endlanga mananga [misava], kambe o yi endlile leŝaku yi akiwa.” (Esaya 45:18) Xana u yi endle leswaku yi akiwa ku fikela rini? “O tiyisile misav̌a e masungulweni ya yona, yi nga ka yi nga ṭekaṭeki ni siku ni riṅwe.” (Pisalema 104:5) Ina, “misav̌a yi ṭhama hi laha ku nga heriki.”—Eklesiasta 1:4.

I xikongomelo xa Xikwembu leswaku vunyingi lebyikulu bya lava xi tirhelaka va endla leswaku misava leyi yi va kaya ra vona hilaha ku nga heriki. Xiya leswi Rito ra Xikwembu, ku nga Bibele, ri swi vulaka emhakeni leyi. Pisalema 37:11 ya vhumba: “V̌a musa v̌a ta fuma misav̌a, v̌a ta tiṭakela e ku ruleni lo’kukulu ka vona.” Xana swi ta teka nkarhi wo tanihi kwihi? Pisalema 37:29 yi ri: “La’v̌o lulama v̌a ta fuma misav̌a, v̌a ta ṭhama ka yona hi masiku.” (Xiitaliki i xerhu.) Enkarhini wolowo ku ta hetiseka tsalwa leri nge: “[Wena Xikwembu] u funungula šandla ša wena, u šurisa [ku navela ka, NW] hikwaŝo le’ŝi hanyaka,” ku nga ku navela loku pfumelelanaka ni ku rhandza ka Xikwembu.—Pisalema 145:16.

Ku vuriwa yini hi lava nga swi laviki ku endla ku rhandza ka Xikwembu? Swivuriso 2:21, 22 yi ri: “La’v̌a lulameke v̌a ta aka misav̌eni, la’v̌o tenga v̌a ta siyiwa kona; kambe la’v̌o biha v̌a ta susiwa la misav̌eni, ni timbabva ti ta ṭhuv̌uriwa ka yona.”

Paradeyisi Leyi Kondleteriweke

Ku nga ri khale, Xikwembu xi ta avanyisa misava leyi yo homboloka. (Matewu 24:3-14; 2 Timotiya 3:1-5, 13) Kambe Xikwembu xi ta ponisa “ntshungu lowukulu” wa vanhu eka ndzoviso wolowo lowu taka ivi va nghena emisaveni leyintshwa leyi endliweke hi xona.—Nhlavutelo 7:9-17.

Kutani, Xikwembu xi ta nyika vanhu lava xi va fumaka ntirho lowu tsakisaka wa ku hundzula misava hinkwayo yi va kaya ra vanhu ra paradeyisi. Bibele ya tshembisa: “Tiko ra ntlhohe ri ta ṭaka, ni tiko le’ri omeke; makwanḍasi ma ta ṭakisisa, ma rumbuka kukota koṅhwa! . . . Hikuv̌a mati ma ta khuluka mananga, ni ŝinambyana ŝi ta khulukela makwanḍasini.”—Esaya 35:1, 6.

EParadeyisini yoleyo leyi ndlandlamuxiweke, a ku nge he vi na ndlala, vusweti, swidakana, vanhu lava pfumalaka makaya kumbe tindhawu leti hlaseriweke hi vugevenga. “Ku ta v̌a ni nḍalo ya koro la misav̌eni.” (Pisalema 72:16) “Muri wa le masiṅwini wu ta v̌eka mihanḍu ya wona, ni tiko ri ta v̌eka ŝa rona.” (Ezekiyele 34:27) “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona. V̌a nga ka v̌a nga ha aki tindlu, leŝaku uṅwana a ta ṭhama kona, v̌a nga ka v̌a nga ha byari leŝaku uṅwana a ta dya.” (Esaya 65:21, 22) “V̌a ta ṭhama uṅwana ni uṅwana e hansi ka nkuwa, ni le hansi ka vinya ya yena, ku nga ri na loyi a v̌a pfušaka.”—Mikiya 4:4.

Xivangelo Xo Va Van’wana Va Ya eTilweni

Swi nga ha endleka vanhu vo tala va pfumela leswaku va navela paradeyisi ya le misaveni. Leswi i swa ntumbuluko, hikuva Xikwembu a xi nghenisanga ku navela ku ya etilweni eka vona; a va swi tivi ni leswaku vutomi byi njhani etilweni. Hi xikombiso, loko a burisana ni mufundhisi wa Church of England, Pat, hambileswi a ri xirho xa kereke lexi tinyiketeleke, u te: “A ndzi si tshama ndzi va ni mianakanyo ya ku ya etilweni. A ndzi lavi ku ya, swona xana ndzi ta ya endla yini kona?”—Ringanisa Pisalema 115:16.

I ntiyiso, Bibele yi dyondzisa leswaku nhlayo leyi pimiweke ya vanhu, va 144 000, va ya etilweni. (Nhlavutelo 14:1, 4) Yi tlhela yi hlamusela xivangelo xa kona: “U va endlile tiko, ni ku va vaprista lava tirhelaka Xikwembu xa hina, kutani va ta va tihosi emisaveni.” (Nhlavutelo 5:9, 10, xiitaliki i xerhu.) Kun’we ni Hosi ya vona, Yesu Kreste, lava va endla ‘mfumo,’ hulumendhe leyintshwa ya le misaveni, leyi Vakreste va yi khongelelaka. Hulumendhe leyi yi ta langutela ntirho hinkwawo wa ku kondletela misava ni vanhu.—Daniyele 2:44; 2 Petro 3:13.

Hambiswiritano, leswi ku navela ku ya hanya etilweni ku nga riki kona eka vanhu, ku tirha ka moya wa Xikwembu loko hlawuleka ku “nyikela vumbhoni” eka lava 144 000 leswaku va vona “ku vitaneriwa ka le henhla” loku hlawulekeke. (Varhoma 8:16, 17; Vafilipiya 3:14, NW) Kambe, handle ko kanakana, ku tirha ko tano ka moya lowo kwetsima a ku laveki eka vanhu hinkwavo hikuva kaya ra vona ra hi masiku ri ta va emisaveni ya paradeyisi.

Paradeyisi Ya Moya Yi Pfula Ndlela

Xana munhu u byi fanelekela njhani vutomi lebyi nga heriki emisaveni ya Paradeyisi? Yesu u te: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” (Yohane 17:3) Loko yi hlanganisa vuxaka bya ku rhula ka vanhu ni vutivi bya Xikwembu, Esaya 11:9 yi ri: “Ku nga ka ku nga endliwi ŝo biha, ni ku onhiwa e nṭhav̌eni hikwayo le’yi kwetsimaka ya mina; hikuv̌a ku tiv̌a Yehova ku ta eneta misav̌a, tani hi leŝi mati ma funengetaka v̌uento bya lwandle.”—Ringanisa Esaya 48:18.

Kavula, vutivi lebyi a hi ku va ni vutivi ntsena. Byi kucetela vumunhu bya munhu ni ku kurisa timfanelo ta ku chava Xikwembu, to tanihi “rirhandzu, ni ku tsaka, ni ku rhula, ni ku leha mbilu, ni vunene, ni ku hanana, ni ku tshembeka, ni musa, ni ku tikhoma.” (Vagalatiya 5:22, 23) Timbhoni ta Yehovha ti lwela ku hlakulela timfanelo leti, xisweswo, hambi ku ri sweswi, ti katekisiwe hi paradeyisi ya moya leyi tengeke.—Esaya 65:13, 14.

Vona ku hambana ka xiyimo xa tona xa moya ni lexiyani xa misava, leyi yaka yi mbombomela hi ku pfumala Xikwembu ni ku onhaka! Hambiswiritano, ku nga ri khale, misava leyi yo homboloka yi ta lovisiwa hi Xikwembu. Enkarhini lowu, Timbhoni ta Yehovha ti ku rhambela leswaku u endzela—ina, u ta vona—paradeyisi ya moya leyi ti tiphinaka ha yona. Tivonele hi wexe leswaku sweswi, Yesu, Hosi ya le tilweni leyi nga vonakiki, u kongomisa vaaki va nkarhi lowu taka va misava yoleyo leyintshwa hi ku rhula leswaku va famba hi ndlela yo khuma leyi yaka eParadeyisini ya laha misaveni ni le vuton’wini lebyi nga heriki!—Matewu 7:13, 14; Nhlavutelo 7:17; 21:3, 4.

[Xifaniso lexi nga eka tluka 8]

Vaponi va ku hela ka misava leyi va ta tiphina hi ku hlanganyela eku hundzuleni ka misava yi va paradeyisi