Langutelo Ra Bibele

Xana Hi Fanele Hi Sola Sathana Hikwalaho Ka Swidyoho Swa Hina?

SATHANA hi yena la soriweke hikwalaho ka xidyoho xo sungula xa vanhu. Evha u te: “I nyoka le’yi nga nḍi kanganyisa, kutani nḍi dya.” (Genesa 3:13) Ku sukela kwalaho, “nyoka ya khale, leyi vuriwaka Diyavulosi na Sathana” yi ye emahlweni yi hlasela vanhu hi lunya, yi ‘dlaya mianakanyo’ ya vanhu ni ku ‘xisa misava hinkwayo leyi akiweke.’ (Nhlavutelo 12:9; 2 Vakorinto 4:4) A nga kona munhu la nga balekelaka ntshikilelo wakwe, kambe, xana leswi swi vula leswaku a hi nge swi koti ku lwisana ni nkucetelo wakwe? Loko hi dyoha, xana minkarhi hinkwayo i nandzu wakwe?

Bibele yi hlamusela leswaku hakunene Sathana u n’wi xisile Evha. (1 Timotiya 2:14) U xisiwile, leswaku a vona onge a nga kuma vutlhari byo fana ni bya Xikwembu a tlhela a tilawula, loko o tlula xileriso xa Xikwembu. (Genesa 3:4, 5) Hi ku ehleketa tano, u dyohile. Kambe, Xikwembu xi n’wi vone nandzu kutani xi n’wi avanyisela rifu. Ha yini? Hikuva hambiloko Sathana a hembile, yena a a xi tiva kahle xileriso xa Xikwembu. A nga sindzisiwanga leswaku a nga yingisi; ematshan’weni ya sweswo, a a swi kota ku lawula swiendlo swakwe, a swi kota kahle ku lwisana ni nkucetelo wa Sathana.

Lwisana Na Diyavulosi

Hina vanhu hi nga swi kota ku lwisana na Diyavulosi. Eka Vaefesa 6:12, hi byeriwa leswaku hi ‘dodombisana’ ni “mavandla lama hombolokeke ya moya, etindhawini ta le tilweni.” Xisweswo swi le rivaleni leswaku Xikwembu xi langutele leswaku hi lwisana ni nkucetelo wa Sathana. Kambe, xana munhu a nga swi kotisa ku yini ku lwisana ni matimba yo tlula ya munhu, ya Sathana ni madimona yakwe? Xana hi byeriwa leswaku hi lwa nyimpi leyi nga le henhla ka matimba ya hina, leyi hi tiyisekaka leswaku hi ta hluriwa eka yona? A swi tano, hikuva Xikwembu a xi hi byeli leswaku hi lwisana na Diyavulosi hi matimba ya hina vini. Yehovha u hi nyika tindlela to hambana-hambana leti hi nga ti tirhisaka ku lwisana ni mintlhamu ya Diyavulosi ha tona ni ku yi hlula. Bibele ya hi byela leswaku Diyavulosi i mani, ndlela leyi a tirhaka ha yona, ni ndlela leyi hi nga tisirhelelaka ha yona.—Yohane 8:44; 2 Vakorinto 2:11; 11:14.

Ndlela Yo “Kaneta Diyavulosi”

Matsalwa ma bumabumela tindlela timbirhi leti hi nga ti tirhisaka ku kaneta Diyavulosi. Ha byeriwa: “Hikwalaho, tivekeni ehansi ka Xikwembu; kambe mi kaneta Diyavulosi, kutani u ta mi balekela.” (Yakobo 4:7) Ndlela yo sungula yo tiveka ehansi ka Xikwembu yi katsa ku yingisa swileriso swa xona. Ku tshama hi tiva leswaku Xikwembu xi kona, vunene bya xona, matimba ya xona lamakulu ni vulawuri bya xona, ni misinya ya milawu ya xona leyi tlakukeke swi ta hi nyika matimba yo lwisana na Sathana. Ku phikelela eku khongeleni eka Xikwembu na swona i swa nkoka.—Vaefesa 6:18.

Ehleketa hi nkarhi lowu Yesu a ringiweke hi Diyavulosi ha wona. Ku tsundzuka ni ku tshaha swileriso swo hambana-hambana leswi humaka eka Xikwembu entiyisweni swi pfune Yesu leswaku a yima a tiyile. Loko a tsandzeka ku yenga Yesu leswaku a nghena exidyohweni, Sathana u n’wi sukerile. Endzhaku ka ndzingo wolowo wo vava, Yehovha, hi ku tirhisa tintsumi takwe, u ye emahlweni a tiyisa Yesu. (Matewu 4:1-11) Xisweswo, hi xivindzi Yesu u swi kotile ku khutaza vadyondzisiwa vakwe leswaku va kombela leswaku Xikwembu xi va ‘kutsula eka lowo biha.’—Matewu 6:13.

Loko Xikwembu xi hi kutsula, a swi vuli leswaku xi ta veka xitlhangu lexi sirhelelaka ematlhelo ya hina. Ematshan’weni ya sweswo, xi hi byela leswaku hi hlakulela timfanelo ta vukwembu, tanihi ntiyiso, vululami, ku rhula ni ripfumelo. Timfanelo leti ti tirha tanihi “mahavelo,” ti hi pfuna leswaku hi ‘yima hi tiyile, hi lwisana ni marhengu hinkwawo ya Diyavulosi.’ (Vaefesa 6:11, 13-18) Kutani hi mpfuno wa Xikwembu, hi nga swi kota ku hlula miringo ya Diyavulosi.

Ndlela ya vumbirhi leyi bumabumeriwaka eka Yakobo 4:7 i ku “kaneta Diyavulosi.” Leswi swi katsa ku endla xiboho xa matimba, hi balekela nkucetelo wakwe wo biha. Munhu a nga fanelanga a tihoxa ekhombyeni ra ku va ematimbeni yakwe ya vuxisi naswona u fanele a papalata tifilosofi leti khutazaka ku rhandza swilo leswi vonakaka ni ku tikhoma loko biha leswi andzeke emisaveni ya namuntlha. Nyimpi yo tano yo kaneta Diyavulosi ku katsa ni vutomi lebyi nyikeriweke ku tsakisa Xikwembu i swa nkoka enyimpini ya hina yo lwa na Sathana. Kambe, xana swidyoho hinkwaswo swi vangiwa hi nkucetelo wa Diyavulosi hi ku kongoma?

Nyimpi Ya Hina Ya Le Ndzeni

Yakobo mutsari wa Bibele wa hlamusela: “Un’wana ni un’wana u ringiwa hi ku kokiwa ni ku wongiwa hi ku navela ka yena n’wini. Kutani ku navela, loko ku xurhe, ku veleka xidyoho.” (Yakobo 1:14, 15) Khombo ra kona, a hi nge swi koti ku ku hlula hi ku helela ku tsana ni ku nga hetiseki loku hi ku kumeke tanihi ndzhaka. (Varhoma 5:12) Bibele yi ri: “A ku na munhu wo tlhariha e misav̌eni l’a nga dyohiki ni siku riṅwe.”—Eklesiasta 7:20.

Leswi a swi vuli leswaku swidyoho hinkwaswo swi le henhla ka matimba ya hina. Eswiyin’weni swo karhi, hi titisela miringo hikwalaho ka minhlawulo leyi hoxeke leyi hi yi endlaka. Hambileswi ku navela loko biha ku nga ha vangeriwaka hi ku nga hetiseki ka hina kumbe hi nkucetelo wa Sathana, kambe hi hina hi endlaka xiboho xa leswaku ha byi hlakulela vubihi byebyo kumbe ha byi papalata. Muapostola Pawulo u tsale hilaha ku faneleke a ku: “Xin’wana ni xin’wana lexi munhu a xi byalaka, u ta tlhela a tshovela xona.”—Vagalatiya 6:7.

Tivone Nandzu

Hakanyingi swa tika leswaku vanhu va pfumela ku tsana ka vona, ku tsandzeka ka vona, swihoxo swa vona—ina, swidyoho. (Pisalema 36:2) Nchumu lowu nga endlaka leswaku hi pfumela nandzu wa hina i ku tiva leswaku Xikwembu a xi lavi leswaku hi va vanhu lava hetisekeke sweswi. Mupisalema Davhida u te: “A nga hi endlanga hi mpimo wa ku dyoha ka hina, a nga hi rihisanga hi mpimo wa milanḍzu ya hina.” (Pisalema 103:10) Hambileswi Xikwembu xi rivalelaka, kambe xi langutele leswaku na hina hi lwa hi matimba leswaku, hi titshinya, hi lwisana ni mintlhamu ya Diyavulosi ni mimboyamelo ya hina vini ya ku dyoha.—1 Vakorinto 9:27.

Hi fanele hi swi twisisa leswaku hambileswi Xikwembu xi swi vonaka leswaku Diyavulosi a nga va ni nkucetelo eka leswi hi swi endlaka naswona ku nga yena a nga ni nandzu lowukulu hikwalaho ka xiyimo lexi vanhu va nga eka xona xa vudyoho, leswi a swi hi ntshunxi eka vutihlamuleri bya hina vini. Hikwalaho, Varhoma 14:12 yi ri: “Un’wana ni un’wana wa hina u ta tihlamulela eka Xikwembu.”

Kambe, loko hi ‘nyenya leswi hombolokeke’ naswona hi “namarhela leswi nga swinene,” hi nga byi hlula vubihi. (Varhoma 12:9, 21) Evha wansati wo sungula, u tsandzekile ku endla tano naswona u xupuriwile hikwalaho ko pfumala tindleve; a a fanele a yime a tiyile naswona a yingise Xikwembu. (Genesa 3:16) Hambiswiritano, Xikwembu a xi swi langutelanga ehansi leswi Diyavulosi a swi endleke hi ku n’wi kanganyisa. Diyavulosi u rhukaniwile a tlhela a avanyiseriwa ku loviseriwa makumu. (Genesa 3:14, 15; Varhoma 16:20; Vaheveru 2:14) Ku nga ri khale, a hi nge he langutani ni nkucetelo wakwe wo biha.—Nhlavutelo 20:1-3, 10.

[Picture Credit Line on page 30]

Erich Lessing/Art Resource, NY