Ku Pfuna Vantshwa Va Balekela “Moya Wa Ku Dlaya”

I yini lexi endlaka leswaku vantshwa namuntlha va rhandza timhaka leti vulavulaka hi ku dlaya? Henry Hyde, Muyimeri wa Vandla ra le United States, exifundzheni xa Illinois, le U.S.A., u te: “Vantshwa lava a va na nchumu swa moya emiehleketweni ya vona, kutani va ehleketa timhaka ta ku dlaya ni madzolonga.”

MUHLAYI wa magazini wa Time u tsarile: “Vatswari lava lolohaka, vuhungasi lebyi nga ni madzolonga ni ku pfumaleka ka xisekelo xa mahanyelo ni xa moya hi swona leswi endlaka leswaku vantshwa va ehleketa hi ku dlaya namuntlha.”

Xivundza i xiphiqo xin’wana lexikulu lexi karhataka vana va malembe ya kondlo-a-ndzi-dyi. Van’wana va tshama emakaya lawa vatswari va vona havambirhi va tirhaka naswona va nga viki kona ekaya nkarhi wo leha; van’wana va ni mutswari un’we ntsena. Hi ku ya hi buku yin’wana, vana va malembe ya kondlo-a-ndzi-dyi eUnited States va heta kwalomu ka tiawara tinharhu ni hafu va ri swavo siku rin’wana ni rin’wana naswona vhiki rin’wana ni rin’wana va heta tiawara leti nga ehansi ka 11 va ri ni vatswari, kasi a swi nga ri tano eka vana hi va-1960. Entiyisweni, vantshwa van’wana a va tshami ni vatswari kumbe ku kuma nseketelo wa vatswari hi tlhelo ra mintlhaveko.

Leswi Vatswari Va Nga Swi Endlaka

Hikwalaho ka leswi vantshwa va nga riki “na nchumu swa moya emiehleketweni,” xana mpfuno wa vatswari i wa nkoka ku fikela kwihi? Hi tlhelo rin’wana, vatswari lava tlhariheke va swi twisisa leswaku vana va vona va lava vuhungasi lebyinene ni nseketelo wa munhu hi xiyexe nkarhi ni nkarhi. Hi ku susumetiwa hi rirhandzu, vatswari va nga vulavula na vona hi vuyimbeleri lebyi va byi rhandzaka, minongonoko ya thelevhixini, tivhidiyo, tibuku, mintlango ya vhidiyo ni tifilimi. Hambiloko vantshwa va nga swi vuli, vo tala va vona va lava rirhandzu ni nkongomiso wa musa wa vatswari va vona. Va lava tinhlamulo leti pakanisaka hikuva va hanya emisaveni leyi teleke hi swilo leswi nga tivikaniki. Vatswari va fanele va swi twisisa leswaku vana va langutane ni misava leyi rharhanganeke ngopfu ku tlula leyi vona va hanyeke eka yona loko va ha ri vantshwa.

Vatswari lava lavaka ku sirhelela vana va vona va ta dya mabulo na vona nkarhi ni nkarhi, va ta va yingisa hi vukheta, kutani va va lemukisa hi makhombo lama nga kona eka nguva leyi. Loko vatswari va veka swipimelo leswi tiyeke naswona va phikelela, va pfumelelana ni swiyimo naswona va rhandza vana va vona, hakanyingi va ta kuma mimbuyelo leyinene.—Matewu 5:37.

Vatswari lava nga Timbhoni ta Yehovha va endla matshalatshala ya ku hamba va bula ni vana va vona, va tirhisa Bibele, tibuku ni tivhidiyo leti sekeriweke eBibeleni.a A va tirhisi minkarhi yoleyo leswaku va holovela vana va vona, kambe va bula hi timhaka leti akaka hi tlhelo ra moya. Eminhlanganweni yoleyo ya ndyangu, va yingisa swiphiqo kumbe mintlhontlho leyi khumbaka n’wana wa vona ha un’we leswaku vantshwa va swi kota ku kuma nyingiso wa munhu hi xiyexe.

Vantshwa lava nga kumiki nkongomiso wa moya eka vatswari va vona va nga tiyisiwa hi marito ya Pisalema 27:10, leyi nge: “Loko tatana na manana vo ndzi tshika, Yehovha u ta ndzi teka.” Xana Yehovha, Tatana wa tintswalo letikulu, u va pfuna njhani vantshwa? Mavandlha ya Timbhoni ta Yehovha ma ve xichavelo laha vantshwa vo tala va kumeke rirhandzu leri humaka eka vanhu van’wana naswona ma herise ku kanakana ka vona. Josías, muntshwa loyi a voneke ntiyiso wa sweswo, u ri: “Nhlengeletano ya Yehovha yi endla ntirho wa nkoka. A ndzi vona onge vutomi a hi bya nkoka. A ndzi hanya ndzi nga ri na xikongomelo, ndzi nga ri na ntshembo. Ku tiva leswaku a ndzi swanga, swi cince vutomi bya mina hi ku helela. Evandlheni ndzi kume leswaku vamakwerhu va siva ndhawu ya ndyangu lowu ndzi lahlekeleke. Vakulu ni mindyangu ya le vandlheni va fana ni mhingu hi tlhelo ra mintlhaveko.”

Entiyisweni, vantshwa vo tala ni vanhu lavakulu va antswise ndlela leyi va ehleketaka ha yona ni ku endla nhluvuko hi tlhelo ra moya hi ku hamba va va kona eminhlanganweni ya vandlha ya Timbhoni ta Yehovha. Patricia Fortuny, mutivi wa ndhavuko wa vanhu u tshame a vulavula hi ndlela leyi minhlangano leyi yi pfunaka vanhu ha yona eka xitsalwana xakwe lexi nge Los Testigos de Jehová: una alternativa religiosa para enfrentar el fin del milenio (Timbhoni ta Yehovha: Vukhongeri Lebyi Pfunaka Vanhu Ku Langutana Ni Ku Hela Ka Gidi Ra Malembe): “Timbhoni ta Yehovha ti nyikela nkongomiso lowu kongomeke ni lowu nga erivaleni lowu nga tirhisiwaka evuton’wini bya siku ni siku, nsinya wa nawu lowu kongomisaka munhu eka ndlela leyi a faneleke a ehleketa ni ku endla swilo ha yona.” ‘Nkongomiso lowu nga erivaleni’ ni “nsinya wa nawu” lowu ku vulavuriwaka ha wona laha swi sekeriwe eBibeleni. Hikwalaho, hambileswi Timbhoni ta Yehovha ti langutanaka ni swiphiqo ni mintshikilelo leyi fanaka ni ya vaakelani va tona, ti tiyisiwa hi vutlhari lebyi hlamarisaka bya buku yoleyo ya khale. Ina, Timbhoni ti kuma xichavelo etidyondzweni ni le ka misinya ya milawu leyi kumekaka eBibeleni.

Loko ‘Rifu Ri Nga Ha Ri Kona’

Dyondzo leyi nyikeriwaka eTiholweni ta Mfumo ta Timbhoni ta Yehovha yi tshamela ku kandziyisa xitshembiso xa Xikwembu xa misava leyintshwa leyi yi nga ta fika hi ku hatlisa, laha eka yona ‘ku nga ta va ni ku lulama’ naswona “a ku nge vi na munhu loyi a va chavisaka.” (2 Petro 3:13; Mikiya 4:4) Ku tlula kwalaho, muprofeta Esaya u tsala leswaku enkarhini wolowo Xikwembu “[xi] ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.” Rifu ri hlasele vanhu hikwalaho ka ku tlula nawu ka munhu wo sungula, Adamu, kambe xitshembiso xa Xikwembu i xa leswaku hi ku hatlisa “rifu a ri nge he vi kona.”—Esaya 25:8; Nhlavutelo 21:3, 4; Varhoma 5:12.

Loko u ri muntshwa la lavaka mpfuno, ha ku rhamba leswaku u kuma ntshembo ni xivangelo xa ku hanya, hi ku tirhisa Bibele. Hi ku pfuniwa hi Timbhoni ta Yehovha, u nga ha va ni ntshembo wa leswaku minkarhi leyinene ya ha ta emisaveni leyintshwa leyi Xikwembu xi yi tshembisaka.

[Nhlamuselo ya le hansi]

[Xifaniso lexi nga eka tluka 9]

Vatswari va fanele va tinyika nkarhi wa ku yingisa vana va vona hi vukheta ni ku twisisa swiphiqo swa vona

[Swifaniso leswi nga eka tluka 10]

“Timbhoni ta Yehovha ti nyikela nkongomiso lowu kongomeke ni lowu nga erivaleni lowu nga tirhisiwaka evuton’wini bya siku na siku”