Xana Xi Kona Xivangelo Xo Va Ni Ntshembo?

“Xiphiqo xin’wana eka vatekani lava nga ni swiphiqo i ku kholwa swinene leswaku swilo a swi nge antswi. Vonelo rero ri pfilunganya swilo hikuva ri endla leswaku u pfumala ntiya-nhlana wo ringeta nchumu wun’wana ni wun’wana lowu akaka.”—DOK. AARON T. BECK.

A HI nge u ni switlhavi naswona u ya eka dokodela leswaku a ya ku kambela. U karhatekile—naswona u ni swivangelo swo karhateka. Phela, rihanyo ra wena—hambi ku ri vutomi bya wena—swi nga ha endleka swi ri ekhombyeni. Kambe a hi nge endzhaku ko kamberiwa, dokodela u ku byela mahungu lamanene ya leswaku hambileswi vuvabyi bya wena byi nga riki byitsongo, kambe byi nga tshunguleka. Entiyisweni, dokodela u ku byela leswaku loko wo lawula ndlela leyi u dyaka ha yona naswona u endla vutiolori, u nga ha tshunguleka hi ku helela. Handle ko kanakana u ta ku hefu, naswona u ta landzela xitsundzuxo xakwe u tsakile!

Fanisa xiyimo lexi ni mhaka leyi hi yi tlhuvutsaka. Xana u langutane ni switlhavi evukatini bya wena? Entiyisweni, vukati byin’wana ni byin’wana byi ta va ni swiphiqo swa byona. Kutani, loko ku va ni minkarhi yo nonon’hwa evukatini bya wena, a swi vuli swona leswaku rirhandzu ri herile. Kambe ku vuriwa yini hiloko xiphiqo xa kona xi ya emahlweni mavhiki yo tala, tin’hweti to tala hambi ku ri malembe? Loko swi ri tano, u ni xivangelo xo karhateka, hikuva mhaka leyi a hi matlangwana. Kunene, xiyimo xa vukati bya wena xi nga ha khumba vutomi bya wena hi tindlela hinkwato—swin’we ni bya vana va wena. Hi xikombiso, ku khorwiwa leswaku ntshikilelo wa le vukatini wu nga ha va xivangelo-nkulu xa swiphiqo ni gome, ku tsandzeka ku endla ntirho hi mfanelo ni ku feyila ka vana exikolweni. Kambe a swi heleli kwalaho. Vakreste va lemuka leswaku vuxaka lebyi va nga na byona ni vanghana va vona va vukati, byi nga khumba vuxaka bya vona ni Xikwembu.—1 Petro 3:7.

Mhaka ya leswaku ku ni swiphiqo exikarhi ka wena ni munghana wa wena wa vukati, a yi vuli swona leswaku xiyimo xa n’wina a xi nge lulamiseki. Ku languta vukati hi tihlo ra xiviri—ku langutela leswaku ku ta va ni mintlhontlho—swi nga pfuna mpatswa wu va ni langutelo lerinene hi swiphiqo ni ku lava mintlhantlho. Wanuna la vuriwaka Isaac u ri: “A ndzi nga swi tivi leswaku a swi dlayi vuxaka loko ntsako wa mimpatswa wu cinca-cinca minkarhi yin’wana. A ndzi ehleketa leswaku swi kona leswi nga fambiki kahle eka hina!”

Hambiloko vukati bya wena byi hohlokile lerova ku nga ha ri na rirhandzu, byi nga ponisiwa. Phela, ku vaviseka loku vangiweke hi swiphiqo swa vukati bya n’wina ku nga ha va kukulu, ngopfu-ngopfu loko swiphiqo swa n’wina swi hete malembe yo tala. Nilokoswiritano, ku ni swivangelo leswi twalaka swo va ni ntshembo. Nchumu wa nkoka i ku tiyimisela. Hambi vanhu vambirhi lava nga ni swiphiqo leswikulu swa vukati va nga antswisa loko va vona swi ri swa nkoka ku endla tano.a

Hikwalaho tivutise, ‘Xana ndzi tiyimisele hi mpimo wo tanihi kwihi ku kuma vuxaka lebyi enerisaka?’ Xana wena ni munghana wa wena wa vukati mi tiyimiserile ku endla matshalatshala yo antswisa vukati bya n’wina? Dok. Beck la tshahiweke eku sunguleni u ri: “Minkarhi yo tala ndzi hlamarisiwe hi ndlela leyi vuxaka lebyi onhakeke byi nga lulamisiwaka ha yona loko vatekani va khomisana eku lunghiseni swiyimo leswi nga riki swinene ni ku languta timfanelo letinene evukatini bya vona.” Kambe ku vuriwa yini hiloko munghana wa wena wa vukati a kanakana eku khomisaneni na wena? Kumbe ku vuriwa yini hiloko munghana wa wena wa vukati a endla onge a nga xi voni xiphiqo lexi nga kona? Xana i ku tlanga hi nkarhi leswaku u lulamisa xiphiqo u ri swaku? Nikatsongo! Dok. Beck u ri: “Loko wena u cinca, sweswo swi nga ha endla leswaku ni munghana wa wena wa vukati a cinca—hakanyingi swi va hi ndlela yoleyo.”

U nga tsutsumeli ku gimeta hi leswaku leswi a swi nge tirhi eka wena. Vonelo ro tano ro biha ri nga ha va nxungeto lowukulu evukatini bya n’wina! Un’wana wa n’wina u fanele a teka goza ro sungula ku lulamisa. Xana ku nga va wena? Loko se u sungurile, munghana wa wena wa vukati a nga ha vona mpfuno wa ku tirhisana na wena eku akeni ka vukati lebyi tsakeke.

Hikwalaho, xana u nga endla yini—wena u ri wexe kumbe mi ri vambirhi—eku poniseni ka vukati bya n’wina? Bibele i mpfuno lowukulu eku hlamuleni ka xivutiso lexi. A hi voneni ndlela leyi yi nga mpfuno ha yona.

[Nhlamuselo ya le hansi]