Langutelo Ra Bibele

Xana Hi Fanele Hi Ya eMinhlanganweni Ya Vukhongeri?

“A NDZI ya ekerekeni, kambe sweswi a ndza ha yi.” “Ndzi ehleketa leswaku u nga gandzela Xikwembu kun’wana ni kun’wana, ku nga ri ekerekeni ntsena.” “Ndzi kholwa Xikwembu ni Bibele, kambe ndzi vona swi nga ri swa nkoka ku ya ekerekeni.” Xana u tshame u twa van’wana va vula leswi fanaka? Namuntlha vanhu vo tala va vula leswi fanaka, ngopfu-ngopfu ematikweni ya le Vupela-dyambu. Vanhu lava a va tala ku ya ekerekeni sweswi va vona swi nga ha ri swa nkoka ku ya kona. Xana Bibele yi ri yini hi ku ya ekerekeni? Xana Vakreste va fanele va ya endhawini yo karhi kumbe emuakweni wo karhi leswaku vugandzeri bya vona byi ta amukeleka eka Xikwembu?

Vugandzeri eRixakeni Ra Israyele

Nawu wa Muxe a wu lava leswaku vavanuna va Vayuda hinkwavo va hlangana endhawini yo karhi eminkhubyeni yinharhu ya lembe ni lembe. Vavasati vo tala swin’we ni vana a va hlanganyela na vona. (Deteronoma 16:16; Luka 2:41-44) Minkarhi yin’wana vaprista ni Valevhi va dyondzise nhlengeletano leyikulu, va hlaya eNawini wa Xikwembu. Va wu ‘endla wu va erivaleni, va wu hlamusela, va endla leswaku swi twisisiwa leswi hlayiwaka.’ (Nehemiya 8:8) Hi malembe ya Savata, nkongomiso wa Xikwembu wu te: “Hlengeletani vanhu, vavanuna ni vavasati ni vana ni muluveri la nga endzeni ka tinyangwa ta n’wina, leswaku va yingisa nileswaku va dyondza, hikuva va fanele va chava Yehovha Xikwembu xa n’wina, va khathalela ku hetisisa marito hinkwawo ya nawu lowu.”—Deteronoma 31:12.

A ku ri etempeleni ya le Yerusalema ntsena laha munhu a nyikelaka magandzelo eka Xikwembu naswona a kuma swiletelo eka vaprista. (Deteronoma 12:5-7; 2 Tikronika 7:12) Hi ku famba ka nkarhi, tindlu tin’wana ta vugandzeri ti simekiwile eIsrayele—ku nga masinagoga. Etindhawini leti, a ku hlayiwa Matsalwa ni ku khongeriwa. Hambiswiritano, tempele ya le Yerusalema a yi ri ntsindza wa vugandzeri. Leswi swi kombise hi leswi Luka mutsari wa Bibele a swi vuleke. U boxe wansati loyi a kuleke la vuriwaka Ana, “loyi a a nga kali etempeleni, a a endla ntirho wo kwetsima vusiku ni nhlikanhi a ri karhi a titsona swakudya, a endla ni swikombelo.” (Luka 2:36, 37) Ana a a teka vugandzeri bya ntiyiso lebyi a a byi hlanganyela ni van’wana lava tinyiketeleke byi ri bya nkoka evuton’wini byakwe. Vayuda van’wana lava chavaka Xikwembu va landzele ntila lowu fanaka.

Vugandzeri Bya Ntiyiso Endzhaku Ka Rifu Ra Kreste

Endzhaku ka rifu ra Yesu, valandzeri va yena a va nga ha ri ehansi ka Nawu wa Muxe naswona a swi nga bohi leswaku va gandzela etempeleni. (Vagalatiya 3:23-25) Hambiswiritano, va hambetile va hlangana va khongela ni ku dyondza Rito ra Xikwembu. A va ri hava miako leyikulu, ematshan’weni ya sweswo a va tirhisa tindlu ta vona ni tindhawu ta mani na mani. (Mintirho 2:1, 2; 12:12; 19:9; Varhoma 16:4, 5) Minhlangano ya Vakreste va lembe-xidzana ro sungula a yi nga rharhangananga, a yi nga tirhisi mihivahivana kambe a yi xiximeka.

Hambileswi Mfumo wa Rhoma a wu nga landzeli mahanyelo lamanene, kambe misinya ya milawu ya Bibele leyi a wu yi dyondzisa eminhlanganweni ya wona a yi ri leyinene ngopfu. Lava a va nga ri vapfumeri loko va ta ro sungula a va ku: “Xikwembu xi le xikarhi ka n’wina hakunene.” (1 Vakorinto 14:24, 25) Ina, Xikwembu a xi ri exikarhi ka vona hakunene. “Hikokwalaho, hakunene mavandlha [“tikereke,” RS, JB] a ma ya ma tiyisiwa eripfumelweni ni ku andza hi nhlayo siku rin’wana ni rin’wana.”—Mintirho 16:5.

Xana Mukreste eminkarhini yoleyo a a amukeriwile hi Xikwembu hi ku gandzela etitempeleni ta vuhedeni kumbe eka ya xona? Bibele yi nyikela nkongomiso lowu nga erivaleni emhakeni leyi: Vagandzeri lava amukeriweke a va fanele va va xiphemu xa vukhongeri bya ntiyiso, kumbe nhlengeletano ya “miri wun’we” ya vagandzeri va ntiyiso. Lava a ku ri vadyondzisiwa va Yesu, lava tiviwaka tanihi Vakreste.—Vaefesa 4:4, 5; Mintirho 11:26.

Ku Vuriwa Yini Namuntlha?

Ematshan’weni ya leswaku hi khutaziwa leswaku hi gandzela ekerekeni, Bibele yi hi khutaza leswaku hi gandzela ni vandlha “vandlha ra Xikwembu lexi hanyaka,” vanhu lava “gandzela[ka] hi moya ni ntiyiso.” (1 Timotiya 3:15; Yohane 4:24) Minhlangano ya vukhongeri leyi amukeriwaka hi Xikwembu yi fanele ku letela vanhu “swiendlo swo kwetsima swa ku tikhoma ni swiendlo swa ku tinyiketela loku nga ni vukwembu.” (2 Petro 3:11) Va fanele va pfuna lava nga kona leswaku va va Vakreste lava wupfeke, lava nga ta kota ku “hambanisa leswi lulameke ni leswi hoxeke.”—Vaheveru 5:14.

Timbhoni ta Yehovha ti lwela ku landzela xikombiso xa Vakreste va lembe-xidzana ro sungula. Ku tlula mavandlha ya 91 400 emisaveni hinkwayo ma hlangana nkarhi hinkwawo ma dyondza Bibele ni ku khutazana, ma endla leswi eTiholweni ta Mfumo, emakaya ni le tindhawini tin’wana. Leswi swi pfumelelana ni marito ya muapostola Pawulo: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina.”—Vaheveru 10:24, 25.