Ku Nyangisisa Misisi Ya Wena

BUKU yin’wana yi ri: “Eka nguva ni ndhavuko wun’wana ni wun’wana, misisi yi kombisa swo karhi hi n’wini wa yona.” Hikwalaho, a swi hlamarisi leswi vanhu vo tala va rhandzaka ku hlayisa misisi ya vona yi ri kahle naswona yi koka mahlo.

Xalamuka! yi vutise vanhu lava endlaka vanhu switayele swa misisi swivutiso leswi tolovelekeke, malunghana ni xivumbeko xa misisi ni ndlela yo yi khathalela. Ku kumeke leswaku misisi ya wena yi rharhangane ku tlula hilaha yi langutekaka ha yona.

Ku Kula Ni Ku Dzuvuka Ka Misisi

Xiv: Xana misisi yi endliwe hi yini?

Nhl: Misisi yi ni keratin, ku nga protheyini ya rivovo. Nsisi wun’wana ni wun’wana wu hluka enhlongeni leyi vuriwaka follicle. Ehansi ka follicle yin’wana ni yin’wana ku ni leswi vuriwaka papilla, leyi nga ni misiha yo tala ya ngati. Papilla yi endla tisele ta misisi leti hlohlomukaka ti humela ehandle ka follicle kutani ti tiya ti va misisi.

Xiv: Vanhu vo tala va kholwa leswaku misisi yi kula hi ku hatlisa loko yi tsemetiwile. Xana swi tano?

Nhl: Doo! Vanhu van’wana va kholwa leswaku misisi yi wundliwa hi miri ku fana ni ndlela leyi marhavi ma wundliwaka ha yona hi murhi. Kambe loko misisi yi mila enhlongeni, yi va nchumu lowu feke. Hikwalaho, ku tsemeta misisi a swi yi khumbi ndlela leyi yi kulaka ha yona.

Xiv: Ha yini misisi yi cinca yi va yo basa?

Nhl: Hala ndzeni laha misisi yi hlukaka kona, ku ni tisele leti ti yi pendaka. Loko tisele teto ti fa, misisi yi va yo basa; i xiphemu xa ku dyuhala. Mapfandzeni ma nga ha vangiwa hi xitekela kumbe hi vuvabyi byo karhi. Kambe, a swi nge endleki leswaku misisi yi va yo basa hi siku rin’we. Tisele leti pendaka misisi ti le hansi ka nhlonge. Hikwalaho, swi teka nkarhi leswaku misisi yo basa yi kula (1,25 wa tisentimitara hi n’hweti) kutani yi humelela ehandle ka nhloko.

Xiv: I yini leswi vangaka leswaku misisi yi dzuvuka?

Nhl: Ku dzuvuka ka misisi i xiphemu xa ntumbuluko xa ndzhendzheleko wa misisi. Hi xiringaniso, un’wana ni un’wana u dzuvukeriwa hi misisi ya 50 ku ya eka 80 hi siku. Kambe mpandlha leyi vavanuna va talaka ku va na yona yi sukela eka xitekela naswona swi vonaka yi vangiwa hi ku kayivela ko karhi ka tihomoni, leswi vangaka leswaku misisi yi dzuvukela makumu. Ku dzuvuka ka misisi hi ndlela leyi nga riki ya ntumbuluko ku vuriwa alopecia.a

Xiv: Van’wana va vula leswaku misisi yi kombisa rihanyo ra munhu. Xana mi swi lemukile sweswo?

Nhl: Ina. Ngati yi wundla misisi endzeni ka nhlonge. Hikwalaho misisi leyinene yi nga ha va xikombiso xa leswaku yi kuma ngati hi mpimo lowunene ngopfu. Kambe, munhu loyi a nga dyiki kahle kumbe a tipeteke hi nhloko ebyalweni a nga ha kuma leswaku misisi yakwe ya vevuka, yi tsanile, tanihi leswi mphakelo wakwe wa ngati wu tsandzekaka ku wundla misisi hi mfanelo. Ku dzuvuka ka misisi kumbe ku tsana ka yona swi nga ha va xikombiso xo sungula xa mavabyi kumbe ku va ni nyimba.

Ku Hlayisa Nhlonge Ni Misisi Ya Wena Swi Hanye Kahle

Xiv: Hi byeleni ndlela yo hlamba misisi ni nhlonge hi “shampoo.”

Nhl: Ntokoto wu kombise leswaku vanhu vo tala lava nga ni swiphiqo swa nhlonge va hlamba nhlonge ya vona ko tala ngopfu hi shampoo. Ina, mafurha lama nga emisisini ya wena ma koka thyaka ra nhlonge naswona ma nga ha pfala swimbhovana swa mafurha leswi yaka eka ti-follicle. Hikwalaho, swi fanerile leswaku u hlamba nkarhi ni nkarhi hi shampoo. Kambe, mafurha lawa ya ntumbuluko ma tlhela ma sirhelela nhlonge ya wena eka switsongwatsongwana swo biha ni ku yi hlayisa yi tsakama kahle. Loko u hlamba ko tala hi shampoo, u susa mafurha lawa ma sirhelelaka nhlonge ya wena kutani u vanga swiphiqo swo tanihi ku oma ka nhlonge. Vativi vo tala va bumabumela leswaku u hlamba nhlonge kumbe misisi hi shampoo ntsena loko yi thyakile. Vanhu lava nga ni misisi leyi nga ni mafurha yo tala va fanele va hlamba ko tala ku tlula lava nga ni misisi leyi tolovelekeke kumbe yo oma.

Loko u hlamba u hlamba hi shampoo, rhidimba nhlonge ya wena. Leswi swi susa tisele leti feke enhlongeni ya wena kutani swi endla leswaku mphakelo wa ngati leyi wundlaka misisi wu famba kahle. U nga rivali ku yi basisa kahle hi mati! Loko u nga tibasisanga kahle endzhaku ka loko u hlambe hi xisibi, nhlonge ya wena yi ta omelela kutani yi handzukela. Hilaha ku fanaka, loko u nga yi susi hinkwayo shampoo, nhlonge yi nga ha omelela kutani yi khwaxa.

Xiv: Xana nhlonge leyi omeke yi nga tsakamisiwa njhani?

Nhl: Nwana mati yo tala kutani u dya swakudya leswi akaka miri. Leswi swi tsakamisa nhlonge ya wena ni ku seketela mphakelo wa ngati. Tirhisa shampoo leyi nga riki na matimba ngopfu, naswona u rhidimba nhlonge ya wena minkarhi hinkwayo. Vanhu van’wana va tirhisa mafurha ya misisi ku tota nhlonge.

Ku Sasekisa Misisi Ya Wena

Xiv: I yini lexi munhu a faneleke a xi tsundzuka loko a ya eka muendli wa switayele swa misisi?

Nhl: Loko u lava ku cinca xitayele xa misisi ya wena, tana ni xifaniso xa xitayele lexi u xi lavaka kumbexana ni xitayele lexi u nga xi laviki. N’wi byele hi ku kongoma leswi u swi rhandzaka ni nkarhi lowu u tiyimiseleke ku wu tirhisa ku khathalela misisi ya wena siku ni siku, tanihi leswi switayele swin’wana swa misisi swi dyaka nkarhi wo tala ku tlula swin’wana. Tsundzuka leswaku swi nga lava ku endzela muendli wa switayele swa misisi kambirhi kumbe kanharhu kukondza a tiva misisi ya wena ni ku kota ku burisana kahle na wena. Hikwalaho, u nga tsutsumeli ku n’wi lan’wa munhu loyi a ku endlaka xitayele!

Leswi Misisi Ya Wena Yi Swi Paluxaka

Ndlela leyi u khathalelaka ni ku sasekisa misisi ya wena ha yona yi vula swo karhi ha wena. Misisi yi tsemiwile, yi engeteriwile, yi ololoxiwile, yi nghenisiwe tikhele, yi cinciwe muhlovo, naswona yi endliwe switayele swo hambana-hambana leswaku yi fambisana ni tifexeni, ni ripfumelo ra vukhongeri ni swikongomelo swa vaaki ni swa tipolitiki. Nyangisisa misisi ya wena. Xana yi paluxa yini ha wena? Misisi leyi hanyeke kahle leyi sasekisiweke hi ndlela leyinene yi bombisa n’wini wa yona naswona yi bumabumeriwa hi van’wana.

[Nhlamuselo ya le hansi]

[Swifaniso leswi nga eka tluka 26]

Ku dya swakudya leswi akaka miri ni ku nwa mati yo tala swi nga ha pfuna ku tsakamisa nhlonge leyi omeke

[Xifaniso lexi nga eka tluka 26]

Ku tshamela ku hlamba hi “shampoo” swi nga kavanyeta mafurha lama sirhelelaka nhlonge

[Xifaniso lexi nga eka tluka 26]

Timpfi i xiphemu lexi tolovelekeke xa ku dyuhala