Langutelo Ra Bibele

Xana Vakreste Va Nga Hlahluva Hi Ndlela Leyi Vitaniwaka Fêng Shui?

LE ASIYA, vanhu va hlahluvela leswaku va tiva ndhawu leyi va nga ta lahla vafi va vona eka yona. Va tlhela va hlahluva leswaku va kuma ndlela leyi va nga ta aka ni ku khavisa miako ya vona ha yona. Naswona va rhanga va hlahluva va nga si xava ni ku xavisa nhundzu. Le China, sweswo swi vitaniwa fêng shui, ku nga ndlela yo karhi yo hlahluva kumbe ku vhumbha. Hambileswi ku hlahluva loku vitaniwaka fêng shui ku veke ni ndhuma hi malembe-xidzana le Asiya, masiku lawa se ku tlulele ni le matikweni ya le Vupela-dyambu. Vampfampfarhuti van’wana va rhanga va hlahluva va nga si mpfampfarhuta tipulani ta miako leyikulu, ta tihofisi ni ta makaya. Vavasati van’wana na vona va hlahluva leswaku va kuma ndlela yo sasekisa makaya ya vona. Tibuku ta ntsandza-vahlayi swin’we ni Internet swi khutaza swi tlhela swi dyondzisa vanhu ku hlahluva.

Ha yini mukhuva lowu wu ya mahlweni wu rhandziwa? Hi ku ya hi gqweta-nkulu rin’wana, fêng shui yi nga “antswisa ndlela leyi vanhu va hanyaka ha yona, rihanyo ra vona, vukati bya vona, ndlela leyi va tirhisanaka ha yona, yi nga va tisela rifuwo ro tala yi tlhela yi va endla va va ni ku rhula ka mianakanyo.” Hambiloko leswi swi vonaka swi tsakisa, xana xiendlo lexi i yini, naswona Vakreste va fanele va xi teka njhani?

I Yini?

Marito ya Xichayina lama nge fêng shui, hi ku kongoma ma vula “mati ya moya.” Fêng shui yi sungule khale swinene loko ku sungula tifilosofi to tala ta vanhu va le Vuxeni. Eka swin’wana leswi a va swi kholwa a ku ri ntirhisano lowu nga kona exikarhi ka yin na yang, ku nga (munyama ni ku vonakala, ku hisa ni ku titimela, leswinene ni leswo biha). Dyondzo ya yin na yang yi fambisana ni dyondzo ya chʼi, leswi hi ku kongoma swi vulaka “moya” kumbe “ku hefemula.” Marito lama nge yin, yang ni leri nge chʼi, swin’we ni man’wana ya ntlhanu ya swilo leswi vumbaka vuako bya hina, ku nga murhi, misava, mati, ndzilo ni ntsopfu, i swa nkoka eka dyondzo ya fêng shui. Vanhu lava tinyiketeleke eka fêng shui va kholwa leswaku ku ni matimba lamakulu endhawini yin’wana ni yin’wana. Pakani ya kona i ku kombetela eka tindhawu leti matimba kumbe chʼi, ya misava ni xibakabaka ma hlanganaka kona. Leswi va swi endla hi ku cinca tindhawu kumbe hi ku cinca muako eka tlhelo rin’wana. Loko va endla tano, va ehleketa leswaku sweswo swi ta va tisela vanhu lava tirhaka kumbe lava tshamaka kwalaho mikateko.

Hi ntolovelo, vanhu lava nga ni vutshila bya fêng shui, va tirhisa khompasi ya ntivo-misava.a Leyi i khompasi leyitsongo leyi nga ni maginete leyi vekiweke exikarhi ka chati ya vangoma va tinyeleti. Khompasi leyi yi ni xirhendzevutana, lexi nga ni tilayini leti hingakanyanaka. Khompasi ya ntivo-misava yi ni rungula ra tinyeleti, tinguva swin’we ni minkarhi ya ku rhendzeleka ka dyambu. Loko ku kambisisiwa ndhawu kumbe muako, ku tekiwa rungula leri kombisiwaka hi khompasi. Mutivi-nkulu wa fêng shui u xiya laha neleta ya khompasi yoleyo yi hlanganaka kona ni tilayeni leti, endzhaku ka sweswo u endla xiboho xa leswi faneleke swi endliwa ku “lulamisa” ndhawu yoleyo.

Leswaku va endla ndhawu yoleyo yi ringana kahle, va kambisisa xivumbeko xa ndhawu ya kwalaho, tindhawu ta mati, fambiselo ra nkululo hambi ku ri ndlela leyi va nga ta ma nghenisa ha yona mafasitere ni minyangwa. Hi xikombiso, le Canada, n’wini wa xitolo u hayeka xivoni erivantini ra hala ndzhaku ka xitolo leswaku a kota ku “lunghisa” mayimelo ya timbanti. Hilaha ku fanaka, muhlahluvi a nga ha ringanyeta leswaku ku susiwa swimilana kumbe fanichara, ku susiwa xifaniso, ku vekiwa swingolongodzwana leswi baka huwa loko ku hunga moya, kumbe ku vekiwa nchumu lowu tamelaka swivumbiwa swa le matini leswaku ku biyiwa muako kumbe kamara rolero.

Langutelo Ra Vakreste

Lexi xiyekaka, tibuku to tala leti vulavulaka hi fêng shui ti yi hlanganisa ni matsalwa lama vulavulaka hi vungoma bya tinyeleti ni ku vhumbha. Entiyisweni, Webster’s Ninth New Collegiate Dictionary yi hlamusela ku hlahluva tanihi “vungoma lebyi tirhisaka tinomboro kumbe tilayini kumbe xivumbeko xa ndhawu.” (Xiitaliki i xerhu.) Xisweswo, swi amukeriwa emisaveni hinkwayo leswaku fêng shui ni mixaka yin’wana ya vungoma swa fambisana ni ku vhumbha. Swi katsa vungoma ni mimoya, ku nga nchumu lowu vanhu va wu toloveleke.

Loko Vaisrayele va suka aEgipta kutani va nghena etikweni ra Kanana hi lembe-xidzana ra vu-15 B.C.E., a ku tele vungoma bya mixaka-xaka ematikweni wolawo hamambirhi. Hi ku tirhisa Muxe, Xikwembu xi vule leswi eka Deteronoma 18:14: “Matiko lawa u ma hlongolaka a ma hamba ma yingisa lava va endlaka masalamusi ni lava va vhumbhaka; kambe loko ku ri wena, Yehovha Xikwembu xa wena a nga ku nyikanga nchumu lowu fanaka ni leswi.” Swilo swo tala swa vungoma aEgipta ni le Kanana swi sungule le Babilona wa khale. Loko Yehovha a pfilunganya tindzimi ta vanhu le Babilona, vanhu va hangalakile va ya eka tindhawu tin’wana, va ri ni mikhuva leyi fambisanaka ni ku hlahluva ni vungoma bya le Babilona.—Genesa 11:1-9.

Yehovha Xikwembu hi ku kongoma u tsundzuxe Vaisrayele hi ku phindha-phindha leswaku va nga tekeleli mukhuva wa ku hlahluva lowu endliwaka hi matiko man’wana, u ri: “Ku nga tshuki ku kumiwa eka wena munhu un’wana ni un’wana . . . la hlahluvaka, la endlaka masalamusi kumbe un’wana ni un’wana la endlaka mihlolo kumbe noyi . . . Hikuva vanhu hinkwavo lava endlaka swilo leswi i nchumu lowu nyenyetsaka eka Yehovha, naswona hikwalaho ka swilo leswi nyenyetsaka, Yehovha Xikwembu xa wena wa ma hlongola emahlweni ka wena.” (Deteronoma 18:9-12; Levhitika 19:26, 31) Lava hlahluvaka va fanele va dlayiwa.—Eksoda 22:18; Levhitika 20:27.

Hikwalaho ka yini ku hlahluva ku soriwa emisaveni hinkwayo? Mintirho 16:16-19 yi hi byela hi wansati loyi a a ri ni “dimona ra vungoma.” Ina, ku hlahluva swi fanisiwa ni vudimona hi ndlela leyi byi nga rharhangana ha yona. Kutani loko munhu a hlahluva u ta va a tihlanganisa na Sathana ni madimona yakwe! Leswi swi nga onha vumoya bya munhu.—2 Vakorinto 4:4.

Switayele swa manguva lawa leswi nga ni duma swa ku khavisa ni ku pima ndhawu, swa le matikweni ya le Vuxeni kumbe eVupela-dyambu, swi nga ha endlaka swi hlohloteriwe hi mikhuva ya vukhongeri bya mavunwa yo fana ni ya fêng shui. Kambe minkarhi yo tala, switayele swo tano a swa ha fambisani nikatsongo ni vukhongeri bya swona. Hambiswiritano, munhu u ta va a tlula nawu wa Xikwembu loko a tirhisa fêng shui leswaku a vhumbha vumundzuku kumbe ku tisa nkateko kumbe rihanyo lerinene. Loko munhu a endla tano u ta va a tlula xileriso xa Bibele lexi nga erivaleni xa leswaku hi papalata ku khumba xilo xin’wana ni xin’wana “lexi nga basangiki.”—2 Vakorinto 6:14-18.

[Nhlamuselo ya le hansi]

[Xifaniso lexi nga eka tluka 15]

Khompasi ya ntivo-misava

[Xihlovo Xa Kona]

Matluka 2 na 15: Hong Kong Tourism Board