Langutelo Ra Bibele
Xana Hi Fanele Hi Wu Tirhisa Njhani Ntshunxeko Wa Hina Wa Ku Tihlawulela?
XIKWEMBU xi endle leswaku vanhu vo sungula, Adamu na Evha va va ni vuswikoti bya ku tihlawulela. Xi nyike Adamu vutihlamuleri entangeni wa Edeni. Mintirho ya Adamu a yi katsa ku thya swiharhi mavito. (Genesa 2:15, 19) Xana nkoka ngopfu, Adamu na Evha a va ri ni ntshunxeko wo hlawula ku yingisa Xikwembu kumbe va nga xi yingisi.—Genesa 2:17, 18.
Ku sukela hi nkarhi wolowo, vanhu va endle swiboho swo tala ngopfu—swo tala swa swona swi ve swinene, swin’wana a swi nga ri swinene naswona swin’wanyana a swi bihe ngopfu. Swiboho swin’wana swo biha leswi vanhu va swi endleke swi tise vuyelo lebyi nga ni khombo. Hambiswiritano, Xikwembu a xi si tshama xi hi kavanyeta eka lunghelo ra hina ro tihlawulela. Leswi Xikwembu xi nga Tatana la nga ni rirhandzu, xi hi nyike Bibele leswaku yi hi pfuna ku endla swiboho leswinene. Xi tlhela xi hi lemukisa hi makhombo lama nga hi welaka loko hi endla swiboho leswi hoxeke. Bibele yi vula leswaku hi ta tshovela leswi hi swi byaleke.—Vagalatiya 6:7.
Ku Endla Swiboho eTimhakeni Ta Munhu Hi Xiyexe
Etimhakeni tin’wana, Xikwembu xi swi vula hi ku kongoma leswi xi swi lavaka, xi tlhela xi hi nyika nkongomiso lowu faneleke. Kambe eka swo tala, Bibele a yi veki milawu leyi khumbaka timhaka ta hina hinkwato ta munhu hi xiyexe. Ematshan’weni ya sweswo, yi hi nyika nkongomiso lowu anameke lowu ntshunxaka munhu ha un’we leswaku a endla leswi a swi rhandzaka ni leswi a swi tsakelaka. Hi xikombiso, twana leswi yi swi vulaka hi vuhungasi.
Matsalwa ma vula leswaku Yehovha i “Xikwembu lexi tsakeke.” (1 Timotiya 1:11) Rito ra yena ri vulavula hi “nkarhi wa ku hleka” ni “nkarhi wa ku tlula-tlula.” (Eklesiasta 3:1, 4) Bibele yi hi byela leswaku Hosi Davhida u tlange vuyimbeleri leswaku van’wana va tiphina. (1 Samuwele 16:16-18, 23) Yesu u ye enkhubyeni wa mucato, naswona u hoxe xandla eka nkhuvo wolowo hi ku cinca mati ma va vhinyo.—Yohane 2:1-10.
Hambiswiritano, Bibele yi hi lemukisa hi ku kongoma yi ku: “Loyi a fambaka ni vanhu vo tlhariha u ta tlhariha, kambe loyi a tirhisanaka ni lavo hunguka, a swi nge n’wi fambeli kahle.” (Swivuriso 13:20) “Mafenya lama thyakeke” ni swiendlo swo biha a swi xi tsakisi Xikwembu naswona swi nga onha vuxaka bya hina na xona. (Vaefesa 5:3-5) Loko byalwa byi nga lawuriwi eswinkhubyaneni swa ku titsakisa, ku nga ha va ni swiphiqo leswikulu. (Swivuriso 23:29-35; Esaya 5:11, 12) Nakambe Xikwembu xa ma venga madzolonga.—Pisalema 11:5; Swivuriso 3:31.
Matsalwa lawa ya Bibele ma hi pfuna leswaku hi languta vuhungasi hi ndlela leyi Xikwembu xi byi langutaka ha yona. Loko Vakreste va endla swiboho, va kambisisa leswaku Bibele yi ri yini. Phela, un’wana ni un’wana wa hina u ta langutana ni mimbuyelo leyinene kumbe yo biha ya swiboho leswi a swi endlaka.—Vagalatiya 6:7-10.
Hilaha ku fanaka, Vakreste va khutaziwa ku endla swiboho swa vutlhari leswi pfumelelanaka ni misinya ya milawu ya Bibele etimhakeni to fana ni swiambalo, vukati, ku va mutswari ni le timhakeni ta mabindzu. Leswi swi katsa timhaka leti nga boxiwangiki hi ku kongoma eMatsalweni, kambe misinya ya milawu leyi kumekaka eka wona ya va pfuna ku endla swiboho hi ku ya hi ripfalo ra vona. (Varhoma 2:14, 15) Nkongomiso lowu wu fanele wu tirha eka swiboho hinkwaswo leswi Vakreste va swi endlaka: “Hambi mi dya kumbe mi nwa kumbe mi endla yini na yini, endlani hinkwaswo leswaku mi vangamisa Xikwembu.”—1 Vakorinto 10:31.
Emhakeni leyi, hi fanele hi anakanya nakambe hi nsinya wa nawu lowu khutazaka ku ‘karhatekela timhaka ta hina vini.’ (1 Vatesalonika 4:11) Hakanyingi Vakreste va langutana ni ku endla swiboho swo hlayanyana leswi nga lwisaniki ni ku rhandza ka Xikwembu. Xisweswo, leswi Vakreste van’wana va swi rhandzaka swi nga ha hambana ni swa van’wanyana. Xikwembu a xi nge swi tsakeli ku vona malandza ya xona ma avanyisana. (Yakobo 4:11, 12) Bibele yi nyikela xitsundzuxo lexi xa vutlhari: “A nga tshuki ni un’we wa n’wina a xanisiwa . . . hi ku nghenelela timhaka ta vanhu van’wana.”—1 Petro 4:15.
Xiboho Xa Ku Tirhela Xikwembu
Bibele yi kandziyisa nkoka wa ku yingisa Xikwembu. Hambiswiritano, Xikwembu a xi sindzisi munhu ku xi gandzela. Ematshan’weni ya sweswo, xi rhamba swivumbiwa swa xona leswi nga vanhu leswaku swi va vagandzeri va xona. Hi xikombiso, Bibele yi ri: “Tanani, a hi gandzeleni, hi nkhinsama; a hi nkhinsameni emahlweni ka Yehovha Muendli wa hina.”—Pisalema 95:6.
Xirhambo lexi xi hundziseriwe eka Vaisrayele va khale. Emalembeni lama tlulaka 3 500 lama hundzeke, tiko ra Israyele a ri yime emahlweni ka Ntshava ya Sinayi, naswona Xikwembu xi tivise vanhu volavo va timiliyoni fambiselo ra vukhongeri bya ntiyiso leri kumekaka eNawini wa Muxe. Sweswi a va fanele va endla xiboho: Xana a va ta tirhela Xikwembu kumbe va nga xi tirheli? Va angule njhani? Va pfumelelane hi rito rin’we va ku: “Hinkwaswo leswi Yehovha a swi vuleke hi tiyimiserile ku swi endla ni ku yingisa.” (Eksoda 24:7) Hi vona va tiendleleke xiboho xa ku gandzela Yehovha.
Eka lembe-xidzana ro sungula, Yesu u sungule ku chumayeriwa ka mahungu lamanene ya Mfumo wa Xikwembu. (Matewu 4:17; 24:14) A nga sindzisanga munhu leswaku a n’wi joyina entirhweni lowu. Ematshan’weni ya sweswo, u rhambe van’wana hi musa, a ku: ‘Tanani, mi va valandzeri va mina.’ (Marka 2:14; 10:21) Vanhu vo tala va amukele xirhambo lexi kutani va sungula ku chumayela na yena. (Luka 10:1-9) Hi ku famba ka nkarhi, van’wana va endle xiboho xa ku fularhela Yesu. Yudasi u hlawule ku n’wi xenga. (Yohane 6:66; Mintirho 1:25) Hi ku famba ka nkarhi, ehansi ka nkongomiso wa vaapostola, vanhu vo tala va ve vadyondzisiwa, va nga xungetiwi hi ku dlayiwa, kambe hi ku swi rhandza. A va ri ni “mboyamelo lowunene” kutani ‘va ve vapfumeri.’ (Mintirho 13:48; 17:34) Ninamuntlha, Vakreste va ntiyiso va yingisa Rito ra Xikwembu hi ku tirhandzela naswona va landzela dyondzo ya Yesu.
Swi le rivaleni leswaku Xikwembu xi rhandza leswaku hi tirhisa vuswikoti bya hina leswaku hi tihlawulela. Nakambe xi hi nyika nkongomiso eBibeleni lowu hi pfunaka ku endla swiboho swa vutlhari. (Pisalema 25:12) Loko swi ta emhakeni ya ku endla swiboho swa munhu hi xiyexe, Mukreste ha un’we u fanele a kambisisa misinya ya milawu ya Xikwembu. Hi yona ntsena ndlela leyi hi nga nyikelaka Xikwembu ‘xitlhavelo xo kwetsima hi matimba ya hina ya ku anakanya.’—Varhoma 12:1.