Vantshwa Va Vutisa . . . 

Ha Yini Xikwembu Xi Hi Tshika Hi Xaniseka?

“Xikwembu xi le henhla ematilweni laha swilo hinkwaswo swi tsakisaka, kasi hina ha xaniseka la hansi.”—Mary.a

VANTSHWA va namuntlha va tswaleriwe emisaveni ya lunya. Ku tsekatseka ka misava loku chavisaka ni timhangu ta ntumbuluko leti mukaka ni vanhu va magidi se to va tshamela maxelo. Tinyimpi ni minhlaselo ya matherorisi a swa ha heli eka mahungu. Mavabyi, swifo, vugevenga ni timhangu, swi dlaya vanhu lava hi va rhandzaka. Mary, la tshahiweke la henhla, u langutane ni xiyimo xo tika. Marito yakwe layo vava u ma vule endzhaku ka ku fa ka tata wakwe.

Loko hi weriwa hi khombo, swi tolovelekile leswaku hi titwa hi pfilunganyekile, hi lahlekeriwile hambi ku ri ku titwa hi hlundzukile. U nga ha tivutisa u ku: ‘Ha yini ndzi weriwa hi khombo leri? Ha yini ri wela mina?’ kumbe ‘Ha yini ri ndzi wela sweswi?’ Swivutiso swo tano swi lava tinhlamulo leti enerisaka. Kambe leswaku hi kuma tinhlamulo leti faneleke, hi fanele hi ya exihlobyeni lexi faneleke. Hilaha muntshwa la vuriwaka Turrell a swi lemukeke hakona, minkarhi yin’wana vanhu va “twa ku vava ngopfu lerova a va swi koti ku ehleketisisa kahle hi mhaka ya kona.” Kutani ke, swi nga ha lava u kuma ndlela yo rhulisa mbilu katsongo leswaku u ta kota ku ehleketa hi ndlela leyi faneleke.

Ku Langutana Ni Swiyimo Swo Vava

Swi nga ha tika ku ehleketa hi rifu ni ku xaniseka, kambe ku hava lexi hi nga xi endlaka ku papalata swilo leswi. Yobo u swi veke kahle loko a ku: “Munhu la velekiweke hi wansati, u hanya nkarhi wo koma naswona u taleriwe hi ku karhateka.”—Yobo 14:1.

Bibele yi tshembisa leswaku ku ta va ni misava leyintshwa laha “ku [nga] ta va ni ku lulama.” (2 Petro 3:13; Nhlavutelo 21:3, 4) Kambe swiyimo sweswo leswinene swi ta fika endzhaku ka loko vanhu se va langutane ni vubihi lebyikulu swinene. Bibele yi ri: “Tiva leswi, leswaku emasikwini yo hetelela ku ta fika minkarhi ya mangava leyi swi nonon’hwaka ku langutana na yona.”—2 Timotiya 3:1.

Xana swiyimo leswi swo tika swi ta va kona ku fikela rini? Vadyondzisiwa va Yesu va tlakuse xivutiso lexi nga ni mongo lowu fanaka ni wa lexi. Kambe, Yesu a nga va nyikanga siku kumbe awara yo karhi leyi xiyimo lexi xa mangava xi nga ta hela ha yona. Ku ri na sweswo, Yesu u te: “Loyi a tiyiseleke ku fika emakumu hi yena la nga ta ponisiwa.” (Matewu 24:3, 13) Marito ya Yesu ma hi khutaza leswaku hi va ni vonelo leri naveke. Hi fanele hi tiyimisela ku tiyiselela swiyimo swo tala leswi nga tsakisiki loko ha ha rindze makumu leswaku ma fika.

Xana Hi Fanele Hi Sola Xikwembu?

Kutani, xana swi fanerile leswaku hi hlundzukela Xikwembu hikwalaho ka leswi xi pfumeleleke ku xaniseka? A swi fanelanga, tanihi leswi hi tivaka leswaku Xikwembu xi tshembise ku herisa ku xaniseka hinkwako. Naswona a swi fanelanga hi vona onge Xikwembu hi xona lexi vangaka swilo swo biha. Swiyimo swo tala swo biha swi vangiwa hi makhombo lama tiendlekelaka. Hi xikombiso, a hi nge moya wu ba hi matimba kutani wu wisa nsinya, kutani nsinya wolowo wu vavisa munhu. Vanhu va nga ha vula leswaku leswi swi endliwe hi Xikwembu. Kambe a hi Xikwembu lexi wiseke nsinya wolowo. Bibele ya hi byela leswaku swilo swo tano ko va mimbuyelo yo vava ya “nkarhi ni xiendlakalo lexi nga languteriwangiki.”—Eklesiasta 9:11.

Ku xaniseka ku nga ha vangiwa hi swiboho swa hina leswi hoxeke. A hi nge ntlawa wa vantshwa wu kukutlela byala ku tlula mpimo kutani wu nghena emovheni wu famba. Ivi ku va ni mhangu leyikulu. I mani la nga ni nandzu? Xana i Xikwembu? Doo, vantshwa volavo va kume vuyelo bya xiboho xa vona lexi hoxeke.—Vagalatiya 6:7.

Kambe u nga ha tivutisa: ‘Xana a hi swona leswaku Xikwembu xi ni matimba yo herisa ku xaniseka sweswi?’ Vavanuna vo tshembeka va le minkarhini ya Bibele va tivutise xivutiso lexi fanaka. Muprofeta Habakuku u vutise Xikwembu a ku: “Ha yini u languta lava va xengaka, u miyela loko munhu wo homboloka a mita loyi a lulameke ku n’wi tlula?” Hambiswiritano, Habakuku a nga tsutsumelanga ku endla xiboho. U te: “Ndzi ta tshama ndzi rindzile, leswaku ndzi vona leswi a nga ta swi vula ha mina.” Hi ku famba ka nkarhi, Xikwembu xi n’wi tiyisekisile leswaku hi “nkarhi lowu vekiweke,” xi ta ku herisa ku xaniseka. (Habakuku 1:13; 2:1-3) Hikwalaho, hi fanele hi lehisa mbilu, hi rindzela leswaku Xikwembu xi herisa vubihi hi nkarhi wa xona lowu xi wu vekeke.

U nga tsutsumeli ku vula leswaku hi ndlela yo karhi Xikwembu xi lava leswaku hi xaniseka kumbe leswaku xi le ku hi ringeni. I ntiyiso leswaku ku xaniseka ku nga hi pfuna leswaku hi kombisa timfanelo letinene ngopfu nileswaku Bibele ya vula leswaku miringo leyi Xikwembu xi yi pfumelelaka yi endla leswaku hi va ni ripfumelo lerinene. (Vaheveru 5:8; 1 Petro 1:7) Kunene, vanhu vo tala lava langutanaka ni miringo kumbe swiyimo swo tika va dyondza ku lehisa mbilu kumbe va ni ntwela-vusiwana. Kambe a hi fanelanga hi ehleketa leswaku ku xaniseka ka vona ku vangiwe hi Xikwembu. Mianakanyo yo tano yi endla Xikwembu xi vonaka onge a xi na rirhandzu naswona xi vonaka xi nga tlharihanga. Bibele yi swi veka hi ku kongoma yi ku: “Loko a ri endzingweni, munhu a nga vuli a ku: ‘Ndzi ringiwa hi Xikwembu.’ Hikuva Xikwembu xi nga ka xi nga ringiwi hi swilo swo biha naswona xona a xi ringi munhu.” Ku hambana ni sweswo, “nyiko yin’wana ni yin’wana leyinene ni nyiko yin’wana ni yin’wana leyi hetisekeke” yi huma eka Xikwembu.—Yakobo 1:13, 17.

Leswi Endleke Leswaku Xikwembu Xi Pfumelela Vubihi

Kutani ke, xana vubihi byi huma kwihi? Tsundzuka leswaku ku ni lava va lwaka ni Xikwembu—murhangeri wa vona la “vuriwaka Diyavulosi na Sathana, [la] xisaka misava hinkwayo leyi akiweke.” (Nhlavutelo 12:9) Xikwembu xi veke vatswari va hina vo sungula, Adamu na Evha emisaveni leyi nga riki na maxangu. Hambiswiritano, Sathana u tiyisekise Evha leswaku swilo a swi ta n’wi fambela kahle loko o suka ehansi ka vulawuri bya Xikwembu. (Genesa 3:1-5) Khombo ra kona, Evha u kholwe mavunwa ya Sathana kutani a xandzukela Xikwembu. Adamu u pfumelelane na yena eka nxandzuko lowu. Xana ku ve ni vuyelo byihi? Bibele yi ri: “Rifu ri tlulele vanhu hinkwavo.”—Varhoma 5:12.

Ematshan’weni yo herisa ku xandzuka loku hi ku lovisa Sathana ni valandzeri vakwe, Xikwembu xi vone swi fanerile ku tshika nkarhi wu hundza. Xana sweswo a swi ta pfuna yini? Phela, leswi a swi ta endla leswaku Sathana a vonaka leswaku i muhembi! A swi ta endla leswaku ku va ni vumbhoni byo tala bya leswaku ku hanya ehandle ka nkongomiso wa Xikwembu, swi tisa khombo ntsena. Xana leswi a hi swona leswi endlekeke? “Misava hinkwayo yi le hansi ka matimba ya lowo homboloka.” (1 Yohane 5:19) Tlhandlakambirhi, ‘munhu u fume munhu ku n’wi endla swo biha.’ (Eklesiasta 8:9) Vukhongeri bya vanhu byi tele hi tidyondzo leti nga nsohe-nsohe, leti nga faniki. Vanhu a va ha ri na mahanyelo. Tihulumendhe ta vanhu ti ringete mafumelo yo hambana-hambana. Ti sayine mintwanano ni ku endla milawu, kambe ta tsandzeka ku enerisa swilaveko swa vanhu. Tinyimpi ti dyisa vanhu mbitsi va xeva hi mahlomulo.

Swi le rivaleni leswaku Xikwembu xi fanele xi nghenelela, xi herisa vubihi! Kambe leswi swi ta endleka ntsena hi nkarhi wa xona lowu xi wu vekeke. Kukondza nkarhi wolowo wu fika, hi ni lunghelo ra ku seketela ku fuma ka Xikwembu hi ku yingisa milawu ni misinya ya xona ya milawu, leyi kumekaka eBibeleni. Loko swilo leswo biha swi humelela, hi nga chaveleriwa hi ntshembo lowu tiyeke lowu hi nga na wona wa ku hanya emisaveni leyi nga riki na maxangu.

A Wu Swaku

Nilokoswiritano, loko hi xaniseka, hi nga ha tivutisa hi ku, ‘Ha yini ku xaniseka mina?’ Kambe, muapostola Pawulo wa hi tsundzuxa leswaku a hi swerhu eka ku xaniseka loku. Pawulo u vula leswaku “ntumbuluko hinkwawo wu hambeta wu konya ni ku vaviseka swin’we ku ta fika sweswi.” (Varhoma 8:22) Ku tiva leswi swi nga ku pfuna leswaku u tiyiselela ku xaniseka. Hi xikombiso, Nicole, u vaviseke swinene emintlhavekweni hi minhlaselo ya September 11, 2001, leyi endlekeke eDorobeni ra New York ni le Washington, D.C. U ri: “A ndzi nga tikoti hi ku chava.” Kambe loko a hlaya timhaka leti kombisaka ndlela leyi Vakreste-kulobye va langutaneke ha yona ni khombo rero, langutelo rakwe ri cincile.b “Ndzi xiye leswaku a ndzi swanga nikatsongo. Hakatsongo-ntsongo ndzi sungule ku hlakarhela eswitlhavini ni le nhlomulweni wanga.”

Eswiyin’weni swin’wana, i vutlhari leswaku u kuma munhu loyi u nga tiphofulaka eka yena—mutswari, munghana la wupfeke kumbe nkulu la nga Mukreste. Ku vulavula ni munhu loyi u n’wi tshembeka swi ta ku pfuna leswaku u kuma “rito lerinene” ra xikhutazo. (Swivuriso 12:25) Muntshwa un’wana la nga Mukreste wa le Brazil u ri: “Ndzi feriwe hi tata wa mina emalembeni ya kaye lama hundzeke, naswona ndza swi tiva leswaku Yehovha u ta n’wi pfuxa siku rin’wana. Kambe nchumu wun’wana lowu ndzi pfuneke a ku ri ku tsala ndzi phofula ndlela leyi ndzi titwaka ha yona. Nakambe, ndzi byela vanghana va mina lava nga Vakreste, ndlela leyi ndzi titwaka ha yona.” Xana u ni ‘vanghana va ntiyiso’ lava u nga va pfulelaka xifuva xa wena? (Swivuriso 17:17) Kutani, vuyeriwa eka mpfuno wa vona wa rirhandzu! U nga chavi ku rila kumbe ku kombisa ndlela leyi u titwaka ha yona. Phela, hambi ku ri Yesu u tshame a “a humesa mihloti” loko a feriwe hi munghana wakwe!—Yohane 11:35.

Bibele ya hi tiyisekisa leswaku siku rin’wana hi ta “ntshunxiwa evuhlongeni bya ku onhaka” kutani hi tsakela “ntshunxeko lowu vangamaka wa vana va Xikwembu.” (Varhoma 8:21) Kukondza nkarhi wolowo wu fika, vanhu vo tala lavanene va nga ha xaniseka. Chaveleleka hi ku tiva xivangelo xa ku xaniseka loku—nileswaku a ku nge tshami hilaha ku nga heriki.

[Tinhlamuselo ta le hansi]

[Xifaniso lexi nga eka tluka 14]

Swi nga ha pfuna ku phofula ndlela leyi u titwaka ha yona