“Tsundzuka Mutumbuluxi Wa Wena”
“Tsundzuka Mutumbuluxi wa wena loko wa ha ri ntsongo! Emalembeni lama taka u ta va ni swiphiqo swo tala kutani u ku, ‘A ndza ha byi tsakeli vutomi.’ ”—Eklesiasta 12:1, “Contemporary English Version.”
MARITO lama nga laha henhla lama humaka eBibeleni ma endla leswaku hi ehleketa. Vuntshwa byi ta kan’we evuton’wini. Endzhaku ka nkarhi, loko munhu a ehleketa hi malembe ya vuntshwa bya yena, a nga tsaka kumbe a tisola swinene. Wena u ta titwa njhani? U nga endla yini leswaku u titwa hi ndlela leyi u lavaka yona?
Marito ya Bibele, lama tshahiweke laha henhla ma ku khutaza leswaku u “tsundzuka Mutumbuluxi wa wena.” U nga swi endlisa ku yini sweswo? Hi ku namarhela milawu ni misinya ya milawu ya Xikwembu, leyi kumekaka eRitweni ra xona, ku nga Bibele. Phela, leswi a swi vuli swona leswaku u ta hisekela vukhongeri etlhelo, u titsona ntsako. Ematshan’weni ya sweswo, ku tsundzuka Mutumbuluxi wa wena swi ta endla leswaku u kuma ntsako lowukulu swinene. Xana swi nga endlekisa ku yini sweswo?
Hi xikombiso, a hi nge u nyikiwe movha ni layisense yo chayela. A wu tikoti hi ku tsaka hikwalaho ka ntshunxeko lowukulu lowu u wu kumeke. Ehleketa ntsena leswaku u nga rhandza ku endzela kwihi! Kambe, ntshunxeko lowu wa ha ku wu kumaka wu fambisana ni vutihlamuleri lebyikulu. Loko u ri karhi u chayela, u fanele u landzela milawu ya pato naswona u landzela mimfungho ya le gondzweni, u famba hi rivilo leri pfumeleriweke ni ku landzela mimfungho leyi ku lemukisaka hi swo karhi. Xana vutihlamuleri lebyi byi endla leswaku u nga swi tsakeli ku chayela? Doo! Entiyisweni, bya ku sirhelela. Xana u nga kuma ntsako loko wo endla mhangu?
Swi tano ni hi ntshunxeko lowu Mutumbuluxi wa wena, Yehovha Xikwembu, a ku nyikeke wona. Loko u ri karhi u kula, wa ku tshika u hlawula ndlela leyi u lavaka ku tirhisa ntshunxeko wa wena ha yona. (Deteronoma 30:19; Swivuriso 27:11) Mawaku lunghelo lerikulu swonghasi! Kambe ntshunxeko wolowo wu fambisana ni vutihlamuleri lebyikulu. ERitweni rakwe, Yehovha u veke ‘milawu ya pato’—mimpimanyeto leyi a lavaka leswaku u hanya ha yona. Xana mimpimanyeto leyi yi kavanyeta ntsako wa wena? Doo! Ematshan’weni ya sweswo, ya ku sirhelela eka swiphiqo ni makhombo lama kayakayisaka vantshwa vo tala namuntlha.
Federico, sweswi u le malembeni ya va-30 u wu tiva kahle ntiyiso wa sweswo. Loko a ha ri muntshwa, u vone vana lava a a nghena na vona xikolo va endla swilo hinkwaswo leswi a a swi tiva leswaku a nga fanelanga a swi endla. U ri: “A swi vonaka onge va tiphina, kambe a ndzi nga ehleketi leswaku va tsakile hakunene.” Loko a languta endzhaku, Federico wa tsaka hileswi a a ri ni mimpimanyeto ya Bibele leyi a yi n’wi kongomisa evuntshweni byakwe. U ri: “I ntiyiso leswaku a ndzi langutane ni swiphiqo swo karhi ku fana ni vantshwa hinkwavo. Kambe Bibele yi ndzi sirhelerile hakunene. Naswona minkarhi hinkwayo a ku ri ni Vakreste-kulorhi lava a va ndzi pfuna. Ku landzela misinya ya milawu ya Bibele swi ndzi nyike ntsako lowukulu lowu a ndzi nga ehleketi leswaku ndzi nga va na wona!”
Yehovha Xikwembu u lava leswaku u tsaka—u tsaka hakunene. Ku nga ri ntsako lowu nga riki wa xiviri, lowu ngo siva ntsena gome leri u ri xevaka hi nhlomulo. Bibele yi ri: “Tsakela vuntshwa bya wena. Tsaka loko wa ha ri ntsongo.” Kambe ndzimana leyi fanaka ya Bibele yi nyikela xilemukiso. Yi ri: “Tsundzuka leswaku Xikwembu xi ta ku avanyisa eka hinkwaswo leswi u swi endlaka.”—Eklesiasta 11:9, Today’s English Version.
Tsundzuka Mutumbuluxi wa wena hi ku wu tirhisa hi vutlhari ntshunxeko lowu a ku nyikeke wona. Loko wo endla tano, tiyiseka leswaku Mutumbuluxi wa wena u ta ku tsundzuka naswona u ta ku nyika ntsako lowu tlulaka hinkwaswo. Bibele yi ri: “Nkateko wa Yehovha—hi wona lowu fuwisaka, naswona a nga engeteli ku vaviseka eka wona.”—Swivuriso 10:22.
Timbhoni ta Yehovha ti kandziyise buku ya matluka ya 320 leyi nge, Swivutiso Leswi Vantshwa Va Swi Vutisaka . . . Tinhlamulo Leti Tirhaka leswaku ti pfuna n’wina vantshwa ku langutana ni miringo ya vuntshwa. Ku fikela sweswi, ku kandziyisiwe kwalomu ka 34 wa timiliyoni ta buku leyi hi tindzimi ta 77. U nga kuma kopi ya buku leyi hi ku tihlanganisa ni Timbhoni ta Yehovha ta le ndhawini ya ka n’wina.
[Swifaniso leswi nga eka tluka 8, 9]
Ku Ku Pfuna Leswaku Swi Ku Fambela Kahle eVuntshweni Bya Wena
Tinyike nkarhi wa ku hlaya Rito ra Xikwembu
Tirha hi matimba evutirhelini
Papalata vunghana lebyo biha
Tshama u ri karhi u bula ni vatswari va wena
[Xihlovo Xa Kona]
Xifunengeto xa Broxara: Pictorial Archive (Near Eastern History) Est.