Langutelo Ra Bibele

Xana Yesu A A Ri N’wana Wa Xikwembu Hakunene?

HI KU tiyiseka lokukulu muapostola Petro u byele Yesu a ku: “U Kreste, N’wana wa Xikwembu lexi hanyaka.” (Matewu 16:16) Leyi hi yin’wana ya tindhawu to tala ta le Bibeleni leti kombetelaka eka Yesu tanihi N’wana wa Xikwembu, leswi endleke leswaku vanhu lava voyameleke evukhongerini va angula hi tindlela to hambana-hambana.

Vo tala lava tshembaka leswaku Yesu Kreste i Xikwembu, swa va tikela ku hlamusela leswaku ha yini a vitaniwa N’wana wa Xikwembu. Swi le rivaleni leswaku a nge vi Xikwembu a tlhela a va N’wana wa xona. Van’wana va teka Yesu tanihi munhu wa nkoka ematin’wini, wanuna wo tlhariha, kumbe tanihi muprofeta wa ntiyiso wa Xikwembu, swi helela kwalaho. I yini leswi Bibele yi swi dyondzisaka hakunene? Xana a swi na mhaka leswaku u kholwa yini?

Mativula Ya Xikwembu

Bibele yi kombisa leswaku ku ve ni nkarhi lowu Xikwembu a xi ri xoxe. Hikwalaho ka rirhandzu ra xona xi endle xiboho xa leswaku xi endla xivumbiwa xin’wana lexi hanyaka leswaku Xona xi ta va tatana—kambe ku nga ri hi ndlela ya nyama. Ematshan’weni ya sweswo, Yehovha u tirhise matimba ya yena ya ku tumbuluxa lama nga pimekiki a endla munhu wa moya la tlhariheke—“masungulo ya ntumbuluko wa Xikwembu,” loyi sweswi hi n’wi tivaka tanihi Yesu Kreste. (Nhlavutelo 3:14; Swivuriso 8:22) Hikwalaho ka leswi Yesu a vumbiweke hi Xikwembu hi ku kongoma loko Xikwembu xa ha ri xoxe, swa fanela leswi Yesu a vitaniwaka “n’wana la tswariweke a ri swakwe” tlhelo “mativula ya ntumbuluko hinkwawo.”—Yohane 1:14; Vakolosa 1:15.

Hikwalaho, tanihi mativula ya ntumbuluko wa Xikwembu, Yesu a nge vi Muvumbi, “Xikwembu xi ri xoxe.” (1 Timotiya 1:17) Hi hala tlhelo, Xikwembu xi nyike N’wana wa xona malunghelo yo tala. Hi xikombiso, hi ku tirhisa Yesu, Xikwembu xi vumbe “swilo leswin’wana hinkwaswo” hambi ti ri tintsumi. Tintsumi leti ti vuriwa “vana va Xikwembu”—Yehovha i Munyiki wa Vutomi.—Vakolosa 1:16; Yobo 1:6; 38:7.

Endzhaku ko lunghisa misava leswaku vanhu va ta tshama eka yona, swi tikomba onge Xikwembu xi vulavule ni N’wana wa xona wa mativula, xi ku: “A hi endle munhu hi xifaniso xa hina.” (Genesa 1:26; Swivuriso 8:22-31) Xisweswo, Yehovha u tlhele a vumba n’wana wa yena wo sungula wa nyama, ku nga Adamu, hi ku tirhisa xivumbiwa xa moya lexi a xi ta va Yesu.—Luka 3:38.

Yesu A Va N’wana Wa Xikwembu Wa Nyama

Muapostola Yohane u paluxe leswaku hi nkarhi lowu vekiweke, N’wana wa Xikwembu wa moya “u ve nyama ivi a tshama exikarhi ka hina.” (Yohane 1:14) Leswaku xi cinca Yesu a suka eka ku va munhu wa moya a va munhu wa nyama, Xikwembu xi hundzisele vutomi bya Yesu ku suka etilweni byi ya ekhwirini ra nhwanyana wa Muyuda, la vuriwaka Mariya. Hi ndlela yoleyo Yesu u tshame a ri N’wana wa Xikwembu, hambiloko a ri munhu wa nyama. Ku tlula kwalaho, leswi ku nga hava munhu la nyikeke Yesu vutomi, kambe a nyikiweke hi Xikwembu, Yesu u velekiwe a hetisekile, a nga ri na xidyoho. Ntsumi Gabriyele yi byele Mariya yi ku: “Lexi nga ta velekiwa . . . xi ta vuriwa lexo kwetsima, N’wana wa Xikwembu.”—Luka 1:35; Vaheveru 7:26.

Loko Yesu a ha ri munhu wa nyama, Tatana hi byakwe hi yena a swi tiyisekiseke leswaku Yesu i n’wana wakwe. Loko Yesu a khuvuriwa, Yohane Mukhuvuri u vone matilo ma pfuleka kutani a twa rito leri humaka etilweni ri ku: “Loyi i N’wananga, la rhandzekaka, loyi ndzi n’wi amukeleke.” (Matewu 3:16, 17) A swi hlamarisi leswi Yohane a byeleke vadyondzisiwa vakwe a ku: “Ndzi wu vonile, naswona ndzi nyikele vumbhoni bya leswaku loyi i N’wana wa Xikwembu.”—Yohane 1:34.

Hi nkarhi wa vutirheli bya yena bya laha misaveni, Yesu a nga fambanga a byela vanhu leswaku a a ri Mesiya, N’wana wa Xikwembu. (Marka 8:29, 30) Hakanyingi a a pfumelela vanhu leswaku va tivonela hi voxe hi ku yingisela tidyondzo takwe, ku xiya ndlela leyi a a hanya ha yona ni ku vona masingita ya yena yo tala, lama a a tala ku ma endla erivaleni. Hi xikombiso, u hanyise “hinkwavo lava nga pfukangiki kahle, lava karhatiwaka hi swifo swo hambana-hambana ni switlhavi.” (Matewu 4:24, 25; 7:28, 29; 12:15) Lavo-fe-mahlo, lava nga twiki, lava khutaka ni hinkwavo lava vabyaka a va ya eka Yesu kutani a va hanyisa. U pfuxe ni lava feke! (Matewu 11:4-6) Yesu u fambe ehenhla ka mati emahlweni ka vadyondzisiwa va yena a tlhela a miyeta xidzedze ni magandlati. Matimba lama a ma kombiseke ma susumetele vadyondzisiwa ku vula va ku: “Kunene u N’wana wa Xikwembu.”—Matewu 14:24-33.

Ndlela Leyi N’wana Wa Xikwembu A Nga Ku Pfunaka Ha Yona

Ha yini Xikwembu xi endle leswaku N’wana wa xona la nga swakwe a suka etilweni a ta emisaveni, ivi eku heteleleni a fa hi ndlela ya tihanyi? “Leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Phela, Yesu a a ta kota “ku nyikela moya-xiviri wakwe wu va nkutsulo wa lavo tala” hi ku va fela. (Matewu 20:28) Entiyisweni, ematin’wini hinkwawo ku hava munhu loyi a kombiseke vanhu rirhandzu ro tlula leri Yehovha ni N’wana wakwe wa mativula va ri kombiseke.—Varhoma 8:32.

Endzhaku ka rifu rakwe, Yesu u ‘vuriwe N’wana wa Xikwembu’ hi ndlela yo hlawuleka ni ya matimba swinene, “hi ku pfuxiwa eka lava feke” a ri N’wana wa Xikwembu wa moya. (Varhoma 1:4; 1 Petro 3:18) Kutani, endzhaku ko rindza etlhelo ka Tata wakwe kwalomu ka malembe-xidzana ya 19, Yesu u vekiwe ku va Hosi ya Mfumo wa Xikwembu—hulumendhe ya le tilweni leyi nga ta fuma misava hinkwayo ku nga ri khale.—Pisalema 2:7, 8; Daniyele 7:13, 14.

Xana wa swi lava ku amukeriwa hi N’wana loyi wa Xikwembu la nga ni matimba? Loko swi ri tano, hi ku khutaza leswaku u kambisisa tidyondzo ta yena u tlhela u ti tirhisa evuton’wini bya wena. Yesu hi byakwe u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Entiyisweni, leswi munhu a swi kholwaka malunghana ni N’wana wa Xikwembu i swa nkoka hakunene!—Yohane 3:18; 14:6; 1 Timotiya 6:19.

XANA U TSHAME U TIVUTISA?

◼ Xana Yesu i N’wana wa Xikwembu la nga swakwe hi ndlela yihi?—Yohane 1:3, 14; Nhlavutelo 3:14.

◼ Ha yini u fanele u tshemba leswaku Yesu i N’wana wa Xikwembu?—Matewu 3:16, 17.

◼ Xana u nga vuyeriwa njhani hi ku va ni ripfumelo eka Yesu tanihi N’wana wa Xikwembu?—Yohane 3:16; 14:6; 17:3.

[Swifaniso leswi nga eka tluka 12, 13]

Tidyondzo letinene ta Yesu ni masingita lamakulu swi tiyisekise leswaku a a nga ri munhu la tolovelekeke