Vantshwa Va Vutisa . . .

Xana Ndzi Nga Endla Yini Hi Vutomi Bya Mina?

“Eku sunguleni a ndzi nga vileli hi vumundzuku. Kambe loko ndzi ya ndzi va kusuhi ni ku heta xikolo, ndzi sungule ku xiya leswaku, ku nga ri khale ndzi ta huma exikolweni ndzi ya laha ku tirhiwaka kona hi xiviri. Laha ku nga ni swikweleti swa xiviri.”—Alex, la nga ni malembe ya 17.

LOKO wa ha ri ntsongo, xana u tshame u lorha leswaku loko u kurile u ta endla yini? Xana u titwa njhani hi ku navela koloko sweswi? Xana u pfilunganyekile hileswaku u ta tihlayisa njhani loko u kurile? Loko swi ri tano, a wu wexe. Buku leyi nge Career Coaching Your Kids yi ri: “Ku langa ntirho-vutomi i swin’wana swa swilo leswi tikaka swinene eka vantshwa.”

Hi hala tlhelo, swi nga ha endleka leswaku ntirho-vutomi ku nga ri nchumu lowu u ehleketaka ha wona sweswi. Kumbexana leswi u swi navelaka sweswi i ku titsakisa. A swi bihanga ku titsakisa, hikuva Bibele yi ku byela leswaku u “tsakela vutomi loko wa ha ri muntshwa!” (Eklesiasta 11:9, Contemporary English Version) Nilokoswiritano, lowu hi wona nkarhi wa kahle wa ku anakanyisisa hi leswi u nga ta swi endla hi vutomi bya wena. Swivuriso 14:15 yi ri: “Lowo tlhariha u xiyisisa magoza yakwe.” Xana wena u nga ma xiyisisa njhani magoza ya wena?

“Tiva Lomu U Yaka Kona”

A hi nge u pulana riendzo leri nga ta ku yisa ekule swinene ni le kaya. Kumbexana u ta sungula hi ku langutisa mepe ku vona ndlela leyinene. Swi tano ni hi ku pulana vumundzuku bya wena. Michael, jaha leri tirhaka eka rin’wana ra marhavi ya Timbhoni ta Yehovha, u ri: “Ku ni swo tala leswi u nga swi hlawulaka.” Xana u nga swi kotisa ku yini ku hlawula leswi nga swona? Michael u ri: “Swi ya hi tipakani ta wena.”

Pakani ya wena hi yona yi nga ta ku yisa lomu u lavaka ku ya kona. Swi nge endleki leswaku u fika lomu u lavaka ku ya kona hi xiwelo. Hi ndlela yo fanekisela, swa antswa u humesa mepe wa wena u fungha kunene lomu u lavaka ku ya kona. Hi ku endla tano, u ta va u landzela xitsundzuxo xa Swivuriso 4:26, lexi nge: “Khulela nenge wa wena ndlela.” Kasi Bibele ya Mahungu Lamanene yi ri: “Xiyaxiya laha u kandziyaka kona.”

Emalembeni lama nga ta landzela, u ta endla swiboho swo tala mayelana ni vugandzeri, ntirho, vukati, ndyangu ni timhaka tin’wana ta nkoka. Swi ta ku olovela ku endla swiboho swa vutlhari loko u sungula hi ku tiva lomu u lavaka ku ya kona. Naswona loko u ri karhi u kunguhata leswi u lavaka ku swi endla evuton’wini bya wena, ku ni xin’wana lexi u nga ta ka u nga xi honisi.

“Tsundzuka Mutumbuluxi Wa Wena”

Leswaku u ta tsaka hakunene, u fanele u yingisa marito ya Solomoni, Hosi yo tlhariha, lama nge: “Tsundzuka Mutumbuluxi wa wena loko wa ha ri ntsongo.” (Eklesiasta 12:1, Today’s English Version) Leswi u lavaka ku swi endla evuton’wini bya wena swi fanele swi kongomisiwa hi ku rhandza ka wena ku tsakisa Xikwembu.

Ha yini swi ri swa nkoka sweswo? Eka Nhlavutelo 4:11, Bibele yi ri: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” Ina, hinkwaswo leswi hanyaka etilweni ni le misaveni swi ni xivangelo xo khensa Muvumbi. Xana wa swi tlangela leswi xi ku nyikeke “vutomi ni ku hefemula ni swilo hinkwaswo”? (Mintirho 17:25) Xana a wu titwi u susumeteleka ku tlherisela swo karhi eka Yehovha Xikwembu hikwalaho ka hinkwaswo leswi xi ku nyikeke swona?

Hi ku anakanyisisa hi Muvumbi wa vona, vantshwa vo tala lava nga Timbhoni ta Yehovha va hlawule ku nghenela ntirho wa nkarhi-hinkwawo. Ntiyiso hileswaku, ntirho wa nkarhi hinkwawo i pakani leyi tlakukeke swinene, naswona yi tisa mikateko yo tala. (Malakiya 3:10) Hambiswiritano, swi lava leswaku munhu a anakanyisisa kahle ha yona. Hi xikombiso, tivutise, ‘Hi byihi vuswikoti ni vutshila lebyi ndzi nga na byona lebyi ndzi nga byi tirhisaka ku tihlayisa loko ndzi nghenele ntirho wa nkarhi hinkwawo?’

Kelly, loyi sweswi a nga ni malembe ya 27, u sungule hi ku endla pulani a ha ri ntsongo. A a ri ni pakani leyi nga erivaleni yo nghenela ntirho wa nkarhi hinkwawo. Loko se a hundzile eka malembe ya kondlo-a-ndzi-dyi, Kelly u sungule ku “hlawula ndlela ya yena hi vukheta” loko swi ta eka timhaka ta ntirho wo tihanyisa. U ri: “A swi lava ndzi hlawula ntirho lowu nga ta kota ku ndzi hlayisa loko ndzi ri entirhweni wa nkarhi hinkwawo.”

Kelly u leteriwe ku va mupfuni wa n’anga ya meno hi tidyondzo ta yena ta le xikolweni xa le henhla. U tlhele a wina eka mphikizano wa mfumo. Kambe, ku humelela kakwe a swi endlanga leswaku a rivala pakani ya yena. Kelly u ri: “A ndzi lava ku nghenela ntirho wa nkarhi hinkwawo. Leswi swin’wana hinkwaswo a swi ta endzhaku.” Kelly wa ha tiphina hi ntirho wa nkarhi hinkwawo. U ri: “Ndzi swi vona kahle leswaku xiboho lexi ndzi xi tekeke hi xona xo antswa ku tlula hinkwaswo.”

Kombela Mpfuno

Loko u famba endhawini leyi u nga yi tolovelangiki, swi nga ha lava leswaku nkarhi wun’wana u yima u vutisa ndlela—hambiloko u khome mepe. U nga endla leswi fanaka loko u pulana vumundzuku bya wena. Vutisa van’wana leswaku va ku pfuna. Swivuriso 20:18 yi ri: “Makungu ma simekiwa ma tiya hi xitsundzuxo.” Phela, u nga ha kombela mpfuno eka vatswari va wena. U nga ha kombela mpfuno ni le ka Vakreste lava wupfeke, lava vutomi bya vona byi kombisaka leswaku va famba hi vutlhari bya Xikwembu. Roberto u ri: “Languta lava va nga xikombiso lexinene evandlheni ra ka n’wina kumbe tindhawu leti nga le kusuhi. Va nga ha ku byela swin’wana leswi a wu nga swi ehleketi.”

Ku tlula hambi ku ri mani, Yehovha Xikwembu u lava ku ku pfuna leswaku u endla swiboho leswi nga ta ku pfuna u va ni ntsako evuton’wini bya wena. Xisweswo n’wi kombele leswaku a ku pfuna u ‘hambeta u twisisa leswi ku rhandza ka Yena ku nga swona’ mayelana ni vumundzuku bya wena. (Vaefesa 5:17) Loko u tshemba Yehovha hi mbilu ya wena hinkwayo, “yena u ta lulamisa tindlela ta wena.”—Swivuriso 3:5, 6.

Swihloko swo tala leswi humaka eka ntlhandlamano wa swihloko leswi nge “Vantshwa Va Vutisa . . . ” swa kumeka eka Internete eka adirese leyi www.watchtower.org/ypa

SWIVUTISO SWO ANAKANYISISA HA SWONA

◼ I vuswikoti ni vutshila byihi lebyi u nga na byona?

◼ Xana u nga ehleketa hi tindlela leti u nga tirhisaka vuswikoti bya wena ku dzunisa Yehovha?

◼ Hi wihi ntirho wa nkarhi hinkwawo lowu tsariweke exihlokweni lexi, lowu ku tsakisaka?

[Bokisi leri nga eka tluka 23]

VUMUNDZUKU LEBYI NGA ENERISIKI

Bibele yi ri: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni.” Ndlela leyi yisaka eku fuweni yi tele makhombo! Yi nga ha hetelela yi ku vangele swikweleti, ku tshama u vilela, ni ku wa hi tlhelo ra moya.—1 Timotiya 6:9, 10.

[Bokisi/Swifaniso leswi nga eka tluka 24, 25]

VUPHAYONA

Muhuweleri la phayonaka i Mukreste la khuvuriweke naswona a nga xikombiso lexinene, loyi a hleleke ku heta 70 wa tiawara hi n’hweti a chumayela mahungu lamanene ya Mfumo wa Xikwembu. Hi ku dyondzisiwa ni hi ntokoto, maphayona ma va vadyondzisi va Bibele lava nga ni vutshila.

NTIRHO WA BETHELE

Vatirhi va le Bethele va tirha emarhavini ya tihofisi ta Timbhoni ta Yehovha laha va pfunaka hi ku lunghiselela, ku kandziyisa ni ku rhumela tibuku leti sekeriweke eBibeleni. Xiavelo xin’wana ni xin’wana eBethele i ntirho wo hlawuleka, wo kwetsima.

KU PFUNA LOMU KU NGA NI XILAVEKO LEXIKULU

Maphayona man’wana ma kota ku ya tshama laha ku nga ni xilaveko lexikulu xa vahuweleri va Mfumo. Van’wana va dyondza ririmi rin’wana leswaku va ya pfuna eka tiko leri nga le kule kumbe va tirha ni vandlha leri tirhisaka ririmi rero.

NTIRHO WO TIRHANDZELA WA MISAVA HINKWAYO

Vatirhi vo tirhandzela va misava hinkwayo va ya ematikweni man’wana ku ya pfuna eku akeni ka Tiholo ta Mfumo ni miako ya marhavi. Lowu i ntirho wo hlawuleka wo kwetsima wo fana ni lowu a wu endliwa hi vatirhi lava a va aka tempele ya Solomoni.—1 Tihosi 8:13-18.

XIKOLO XA NDZETELO WA VUTIRHELI

Xikolo lexi tekaka mavhiki ya nhungu xi letela vakulu ni malandza ya vutirheli lava nga tekangiki, mayelana ni timhaka ta nhlengeletano ni ndlela yo nyikela tinkulumo. Mathwasana man’wana ma rhumeriwa ku ya tirha lomu ma humaka kona; kasi man’wana ma averiwa ku ya tirha ematikweni man’wana.

NTIRHO WA VURHUMIWA

Maphayona lama fanelekaka lama hanyeke kahle emirini naswona ma nga ni matimba, ma dyondzisiwa ku ya tirha ematikweni man’wana. Varhumiwa lava, va hanya vutomi lebyi tsakisaka ni lebyi vuyerisaka.

[Bokisi/Xifaniso lexi nga eka tluka 24]

WHAT WILL I DO WITH MY LIFE?

Leyi i dvd leyi humesiweke hi Timbhoni ta Yehovha, naswona yi tamele mimbulavurisano leyi endliweke ni vantshwa lava humaka eBrazil, Britain, Jarimani ni le United States. Yi ta kumeka hi tindzimi tin’wana ku nga ri khale.

[Xifaniso lexi nga eka tluka 23]

“Swi ya hi tipakani ta wena.—Michael, loyi a nga xirho xa ndyangu wa Bethele

[Xifaniso lexi nga eka tluka 24]

“Ndzi endle xiboho xa kahle swinene.”—Kelly, la nga ni malembe ya tsevu a ri phayona

[Xifaniso lexi nga eka tluka 25]

“Languta lava va nga xikombiso lexinene.”—Roberto, xirho xa ndyangu wa Bethele