Vantshwa Va Vutisa . . .

Ndzi Nga Va Pfuna Njhani Lava Pfumalaka?

“Ndzi tshemba leswaku loko ndzi heta xikolo, ndzi ta kuma ntirho wo tirha hi gezi. Ndzi lava ku pfuna eku akiweni ka Tiholo ta Mfumo.”—Tristan, wa malembe ya 14.

“Ndzi nyikela hi tidolara ta 20 [R120] leswaku ti tirhisiwa eka muchini wa n’wina lowuntshwa wo kandziyisa. Leyi i mali leyi ndzi yi nyikiwaka hi vatswari va mina, kambe ndzi lava ku mi nyika yona.”—Abby, wa malembe ya kaye.

EKA nguva leyi, laha vanhu van’wana va tsutsumelaka ku vula leswaku vantshwa va ni vutianakanyi, u kuma leswaku vantshwa vo tala—ku katsa ni lava va tshahiweke laha henhla—a va na byona vutianakanyi. Eka Timbhoni ta Yehovha, vantshwa vo tala va tirhisa nkarhi wa vona, matimba ya vona ni leswi va nga na swona ku pfuna van’wana. (Pisalema 110:3) Xiya swikombiso swin’wana.

Endzhakunyana ka ku fa ka kokwa wakwe wa xisati, Jirah wa le Australia la nga ni malembe ya nkombo u kume nyiko ya R225 yo huma eka kokwa wakwe wa xinuna. Xana Jirah u endle yini hi mali yoleyo? Eka nhlangano wa vandlha lowu landzeleke, u hoxe mali yoleyo hinkwayo ebokisini ra munyikelo. Ha yini? Jirah u hlamusele mana wakwe a ku: “Ndzi ni tithoyi to tala, kambe a ndzi ri ni kokwana un’we ntsena. Ndza swi tiva leswaku Kokwana a a ta tsakela leswaku ndzi nyikela hi mali leyi, hikuva a a rhandza Yehovha hi mbilu yakwe hinkwayo.”

Hannah wa malembe ya ntlhanu wa le United States u rhandza tihanci. A a lava ku xava thoyi ya hanci, leyi a yi durha R450. Ku n’wi dyondzisa leswaku i swa nkoka ku hlayisa mali, vatswari va Hannah a va hamba va n’wi nyika mali leswaku a tihlayisela yona eka xibokisana xakwe xo hlayisa mali. Ku nga ri kungani Hannah a a ri ni mali leyi ringaneke ku xava thoyi liya.

Kambe hi nkarhi wolowo, Xidzedze xa Katrina se a xi onhile le Ribuweni ra Gulf. Hannah a a twa mbilu ya yena yi vava hikwalaho ka vanhu lava hlaseriweke hi xidzedze lexi, kutani u endle xiboho xo nyikela hi mali yoleyo hinkwayo—yo tlula R610—leswaku a va pfuna. Hannah u tsalele yindlu-nkulu ya Timbhoni ta Yehovha, a ku: “Ndzi lava ku mi nyika mali leyi hikuva ndzi rhandza Yehovha naswona ndzi lava ku pfuna.” Xana Yehovha wa swi xiya swiendlo swo tano leswi kombisaka moya wa ku hanana? Bibele yi ri: “Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.”—Vaheveru 13:16.

Xinhwanyetana xin’wana lexi vitaniwaka Tiffany, lexi na xona xi nga xa le United States, xi tsalele yindlu-nkulu ya Timbhoni ta Yehovha endzhaku ka loko swidzedze swimbirhi swi hlasele Florida hi 2004. Xi ku: “Mina ni ndzisana ya mina Timothy hi nyikela hi $110 [R670]. Yindlu ya ka hina a yi onhakanga ngopfu, kambe hi swi vonile leswi swidzedze leswi swi swi endleke etindlwini tin’wana. A hi lava ku pfuna, kutani hi sungule ku hlayisa mali ya hina. Timothy u kume $10 [R60] hi ku pfuna ku kwamula phepha leri damarhetiweke endlwini yin’wana, kasi mina ndzi hlayise $100 [R610].” Tiffany u ni malembe ya 13 kasi ndzisana yakwe yi ni malembe ya nkombo ntsena! Xana ku humelela yini loko hi rhangisa swilaveko swa van’wana ku ri ni swa hina? Swivuriso 11:25 yi ri: “Loyi a cheletaka van’wana mahala na yena u ta cheletiwa mahala.”

Ntlawa wa vantshwa lava nga Timbhoni va le United States, lava nga exikarhi ka malembe ya mune ku ya eka 15, va twe leswaku vapfumeri-kulobye va le Afrika va lava Tiholo ta Mfumo. Kutani va bohe ku teka goza. “Hi xavise makokisi kutani hi kuma mali leyi ringanaka $106.54 [R647,76]. A hi byela vanhu leswaku mali leyi yi ta tirhisiwa ku aka ndhawu leyi vanhu va nga ta hlanganyela eka yona le Afrika leswaku va dyondza Bibele. Vo tala va angule kahle. Hi hete tiawara ta kaye hi xavisa makokisi, kambe sweswo a swi fanerile— a hi endlela Yehovha!”

U Nga Pfuna

Vantshwa lava mintokoto ya vona yi tsariweke laha henhla va wu vonile ntiyiso wa marito ya Yesu lama nge: “Ku nyika swi tisa ntsako lowukulu ku tlula ku amukela.” (Mintirho 20:35) Na wena u nga wu kuma ntsako loko u hanana. Xana u nga hanana hi tindlela tihi?

Xana u tshame u twa hi ta vapfumeri-kuloni lava lavaka mpfuno? Hi xikombiso, xana ku ni mhangu ya ntumbuluko leyi nga humelela? Ringeta ku ehleketa leswaku swi nga va njhani ku lahlekeriwa hi kaya ra ka n’wina, swilo swa wena hambi ku ri ku feriwa hi munhu loyi u n’wi rhandzaka. Muapostola Pawulo u tsale leswaku Vakreste va “nga veki tihlo etimhakeni ta [vona] ntsena, kambe ni le timhakeni ta van’wana.” (Vafilipiya 2:4) Hambiloko u tshama ekule ni laha ku veke ni mhangu ya ntumbuluko kona, kumbexana u nga ha humesa munyikelo lowu nga pfunaka eka mphalalo lowu endliwaka hi Timbhoni ta Yehovha.a

Ku ni tindlela tin’wana leti u nga va pfunaka ha tona lava pfumalaka. Hi xikombiso, loko u ri un’wana wa Timbhoni ta Yehovha, ha yini u nga languti kwala Holweni ya Mfumo? Xana va kona vanhu lava dyuhaleke kumbe van’wana lava lavaka mpfuno? Xana u nga va pfuna hi swintirhwana swa le kaya? Muapostola Pawulo u tsalele Varhoma a ku: “Mi va ni xinakulobye lexikulu erirhandzwini ra vumakwerhu. Vanani lavo rhanga eku xiximaneni.” (Varhoma 12:10) Loko u vona ku ri ni xilaveko, hoxa xandla. Tiyimisele ku endla hambi ku ri mintirho leyi nga nyawuriki. Tsundzuka leswaku ku pfuna van’wana swi fambisana ni ku tirhela Xikwembu. Bibele yi ri: “Loyi a kombisaka xisiwana tintswalo u lomba Yehovha, naswona ndlela leyi a xi khomaka ha yona U ta yi tlherisela eka yena.”—Swivuriso 19:17.

Phela, ndlela leyikulu ku tlula hinkwato leyi u nga pfunaka van’wana ha yona i ku va byela leswi u swi tivaka hi Rito ra Xikwembu, ku nga Bibele. Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Sweswi, ku tlula hambi ku ri rini eku sunguleni, vanhu va lava ku twa rungula leri ponisaka vutomi ra ntiyiso lowu humaka eBibeleni. Hikwalaho, yana emahlweni u hlanganyela nkarhi hinkwawo ni hi ku hiseka entirhweni wo chumayela, u ri karhi u tiyiseka leswaku “ntirho wa [wena] a hi wa hava eHosini.”—1 Vakorinto 15:58.

SWIVUTISO SWO ANAKANYISISA HA SWONA

◼ Xana u kona loyi u ehleketaka leswaku a nga tsakela ku pfuniwa?

◼ Xana u nga pfuna njhani?

[Nhlamuselo ya le hansi]

[Marito lama tshahiweke exihlokweni lama nga eka tluka 25]

“Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.”—Vaheveru 13:16.

[Bokisi/Swifaniso leswi nga eka tluka 24, 25]

HA YINI U FANELE U DYONDZA KU NYIKA?

“Ku vona vatswari va mina va tirhisa nkarhi wa vona ni matimba ya vona ku tirhela Yehovha ni ku pfuna vaakelani va vona swi endle leswaku na mina ndzi lava ku hanya hi ndlela leyi fanaka. Tatana u ndzi byele a ku: ‘Ku nga khathariseki leswaku u endle leswitsongo ku fikela kwihi, swin’wana ni swin’wana leswi u swi endlelaka Yehovha swi tshama hilaha ku nga heriki. Yehovha u hanya hilaha ku nga heriki, naswona u ta swi tsundzuka hilaha ku nga heriki. Kambe ku hanya leswaku u endla leswi pfunaka wena ntsena i swa hava. Loko u fa, leswi u swi endleke swi fa na wena.’”—Kentaro, wa malembe ya 24, wa le Japani.

“Ku vula ntiyiso, a ndzi nga swi lavi hi mbilu ya mina hinkwayo ku pfuna lava dyuhaleke hi mintirho ya le kaya hi Mugqivela nindzhenga. A ndzi lava ku titsakisa ntsena, ndzi va ni vanghana va mina. Kambe, loko ndzi hete nkarhi swin’we ni lava dyuhaleke, ndzi kume leswaku swa tsakisa. Kutani ndzi sungule ku va teka tanihi vanhu lava fanaka na mina, lava na vona va nga tshama va va vantshwa. Leswi swi ndzi susumetele ku va pfuna.”—John, wa malembe ya 27, wa le Nghilandhi.

“Loko ndza ha ri ntsongo, a ndzi pfuna loko ku basisiwa Holo ya Mfumo ni le ka mintirho yin’wana yo tala. Nakambe a ndzi rhandza ku pfuna van’wana evandlheni hi mintirho ya mavoko. Loko u pfuna van’wana, u vona ndlela leyi va tsakaka ha yona. Hi xikombiso, ndzi tshame ndzi famba ni van’wana hi ya nameketa phepha ra le khumbini endlwini ya makwerhu un’wana wa xisati la dyuhaleke. A a nga tikoti hi ku tsaka! Loko u tsakisa munhu un’wana, na wena wa tsaka.”—Hermann, wa malembe ya 23, wa le Furwa.

[Xifaniso lexi nga eka tluka 24]

Vantshwa vo tala va nyikela hi mali ku pfuna vanhu lava weriweke hi mhangu