Hi Byihi Vumundzuku Bya Vukreste?

XANA misava yi ta hundzukela eka Vukreste, kumbe xana Vukreste byi ta hela? Xana Vukreste i xihlovo xa ku vonakala emisaveni leyi yi nga ni munyama kumbe a bya ha voningi kahle? Leswi i swivutiso leswi hi karhataka ku ta fikela namuntlha.

Hi ku tirhisa xifaniso xo olova, Yesu u kombise leswaku endzhakunyana ka loko a byale timbewu ta Vukreste, nala, ku nga Sathana, u nghenelerile. (Matewu 13:24, 25) Hikwalaho, a ku ngo va mukhuva ntsena lowu tiendlekelaka lowu vangeke leswaku Vukreste byi cinca eka malembe-xidzana yo sungula endzhaku ka vutirheli bya Yesu. A ku ri ntirho wa nala, ku nga Sathana. Namuntlha tikereke ta Vujagana ti ya emahlweni ti endla swihoxo leswi endliweke enkarhini lowu hundzeke naswona ti tshovela leswi ti swi byalaka.—2 Vakorinto 11:14, 15; Yakobo 4:4.

Vukreste Byi Hlaseriwa Hi Ndlela Leyi Tumbeleke

Yesu u vule leswaku tidyondzo takwe ti ta onhiwa. U te: “Mfumo wa matilo wu fana ni munhu la haxeke mbewu leyinene ensin’wini yakwe. Loko vanhu va ha etlele, nala wakwe a ta kutani a haxa mfava exikarhi ka koroni, kutani a suka.” Lexi hlamarisaka, loko malandza ma byela munhu loyi hi nchumu lowo biha lowu endliweke, naswona ma kombela mpfumelelo wo susa mfava, munhu loyi u te: “E-e; leswaku mi nga tshuki mi simula ni koroni, loko mi hlengeleta mfava. Swi tshikeni swi kula haswimbirhi kukondza ku fika ntshovelo; kutani hi nguva ya ntshovelo ndzi ta byela vatshoveri ndzi ku, Sungulani hi ku hlengeleta mfava mi wu boha wu va tinyandza leswaku mi wu hisa, endzhaku ka sweswo mi hlengeleta koroni mi yi nghenisa exitlatini xa mina.”—Matewu 13:24-30.

Hilaha Yesu hi byakwe a hlamuseleke hakona, exifanisweni xakwe, wanuna la byaleke koroni u fanekisela Yesu, naswona timbewu leti a ti byaleke ti fanekisela Vakreste va ntiyiso. Nala la byaleke mfava exikarhi ka koroni u fanekisela “Diyavulosi.” Mfava wu fanekisela vuhomboloki, vavanuna lava xandzukeke lava hembaka va vula leswaku i malandza ya Xikwembu. (Matewu 13:36-42) Muapostola Pawulo u nyike vuxokoxoko lebyi engetelekeke malunghana ni leswi nga ta humelela. U te: “Ndza swi tiva leswaku loko se ndzi fambile timhisi leti tshikilelaka ti ta nghena exikarhi ka n’wina naswona ntlhambi a ti nge wu khomi hi rirhandzu, kutani exikarhi ka n’wina ku ta humelela vavanuna va vulavula swilo leswi soholotiweke leswaku va tikokela vadyondzisiwa.”—Mintirho 20:29, 30.

Vukreste Byi Onhiwa

Xana leswi Yesu a swi vuleke exifanisweni xakwe ni leswi Pawulo a swi profeteke swi endlekile? Kunene swi endlekile. Vanhu lava nga ni makwanga va teke vandlha leri Yesu a ri simekeke, kutani va sungula ku ri lawula ni ku ri tirhisela leswi vuyerisaka vona. Yesu u byele valandzeri vakwe a ku: ‘A mi xiphemu xa misava.’ (Yohane 15:19) Nilokoswiritano, vanhu lava a va lava matimba ya ku lawula va endle ntwanano ni vafumi kutani va endla tikereke leti seketeriwaka hi Mfumo leti a ti ri ni matimba ni rifuwo lerikulu. Tikereke leti a ti dyondzisa “swilo leswi soholotiweke.” Hi xikombiso, ti dyondzise vanhu ku gandzela Mfumo ni ku nyiketela vutomi bya vona byi va switlhavelo enyimpini. Xisweswo, vanhu volavo va tivulaka Vakreste va hlanganyele eka Tinyimpi ta Nkutsulo ni ku dlaya vanhu lava va va tekaka va nga ri vapfumeri. Ti tlhele ti ya enyimpini ni ku dlaya “vamakwavo” lava nghenaka kereke yin’we na vona. Ti tsandzekile ku ka ti nga hlanganyeli eka Tipolitiki ni ku rhandza vaakelani.—Matewu 22:37-39; Yohane 15:19; 2 Vakorinto 10:3-5; 1 Yohane 4:8, 11.

Swi le rivaleni leswaku se ku hundze malembe-xidzana yo tala tikereke leti a ti titeka ti ri ta Vukreste ti vonakile leswaku i Vukreste bya mavunwa. Leswi swi xi kombisa kahle xivangelo xa kona, hilaha hi swi voneke hakona eswihlokweni leswi hundzeke, tikereke ta pandzeka ku huma mimpambukwa, tikereke ti nghenela tipolitiki naswona ti bakanya milawu ya Xikwembu. Vuyelo byebyo byo biha a hi mihandzu ya Vukreste bya ntiyiso, kambe i mihandzu ya Vukreste bya mavunwa, lebyi byi sunguriweke hi Diyavulosi. Xana vukhongeri lebyi bya mavunwa byi ta helela kwihi? Hilaha Yesu a kombiseke hakona exifanisweni xakwe, a byi nge herisiwi ntsena hi ku va byi nga ri na vaseketeri. Kambe byi ta avanyisiwa ni ku lovisiwa.

Vakreste Va Ntiyiso Va Voninga eMunyameni

Loko “mfava” wa Vukreste bya mavunwa wu nga si hlengeletiwa ni ku lovisiwa, xifaniso xa Yesu xi kombisa leswaku ku ni swin’wana leswi nga ta endleka. Se ku hundze malembe-xidzana yo tala ku kula ka “mfava” wa Vukreste bya mavunwa ku ri kukulu lerova “koroni” ya Vukreste bya ntiyiso a yi nga vonaki hikwalaho ka mfava lowu. Kambe Yesu u hlamusele leswaku koroni yi ta hambanisiwa ni mfava hi nkarhi wa “ntshovelo,” lowu hi ku vula ka yena wu fanekiselaka “makumu ya mafambiselo lawa ya swilo.” U tlhele a ku: “Enkarhini wolowo lava va lulameke va ta voninga ngopfu kukota dyambu.” (Matewu 13:39-43) Vumbhoni byi kombisa leswaku ku sukela hi Nyimpi yo Sungula ya Misava, leyi veke kona emalembeni ya 90 lama hundzeke, hi hanya emakumu ka mafambiselo lawa ya swilo. (Matewu 24:3, 7-12) Xana byin’wana bya vuprofeta bya xifaniso xa Yesu byi hetisekile?

Vakreste va ntiyiso va humesiwile exikarhi ka “mfava” lowu wa Vujagana. Timbhoni ta Yehovha ti “voninga ngopfu kukota dyambu,” ti pfuna vanhu leswaku va tiva Xikwembu xa ntiyiso, ku nga Yehovha. Timbhoni a ti yi thyakisi milawu ya xona. Ku ri na sweswo, hi ntolovelo vanhu lava vaka Timbhoni va boheka ku cinca swinene eka ndlela leyi va hanyaka ha yona leswaku va hanya hi misinya ya milawu ya Vukreste leyi kumekaka eBibeleni.

Timbhoni ta Yehovha a ti endli vuhungasi eminhlanganweni ya tona, kambe ti nyikela dyondzo ya mahala ya Bibele. Ti tlhela ti kombisana rirhandzu ni vunghana, ku nga timfanelo leti ti vaka na tona hikwalaho ko dyondza Matsalwa. Ti kholwa leswaku Xikwembu xi ta cinca misava leyi yi va paradeyisi ni ku endla leswaku vanhu lavanene va tshama eka yona, hilaha a xi swi lavise xiswona eku sunguleni. Kambe, misava yi fanele yi rhanga yi basisiwa, ku susiwa nkucetelo wo biha wa vukhongeri bya mavunwa, lebyi eBibeleni byi vitaniwaka Babilona Lonkulu. Hi ku ya hi vuprofeta bya Bibele, ku nga ri kungani Yehovha u ta endla leswaku ku va ni ku cinca koloko lokukulu.—Matewu 5:5; Nhlavutelo 18:9-10, 21.

Loko vanhu lava yingisaka se va ntshunxiwile eka mikhuva leyi kanganyisaka ya vukhongeri bya mavunwa, vugandzeri bya Vakreste va ntiyiso byi endla leswaku ku va ni vun’we eka vanhu hinkwavo lava hanyaka emisaveni. Mawaku vumundzuku lebyinene swonghasi bya Vukreste bya ntiyiso lebyi sunguriweke hi Yesu! Paradeyisi ya le Edeni yi ta vuyeteriwa emisaveni yo rhula, laha ku nga taka ku nga ha ri na vukhongeri bya mavunwa lebyi nga ta hambanisa vanhu!

[Xifaniso lexi nga eka tluka 7]

“Nala wakwe a ta kutani a haxa mfava.”—Matewu 13:25

[Swifaniso leswi nga eka tluka 8, 9]

Wa rhambiwa eholweni hambi yi ri yihi ya Timbhoni ta Yehovha, laha ku kumekaka dyondzo ya mahala ya Bibele

[Xifaniso lexi nga eka tluka 9]

“Endzhaku ka sweswo mi hlengeleta koroni mi yi nghenisa exitlatini xa mina.”—Matewu 13:30