Leswi Endleke Ndzi Tshika Ntlango Wa Serekisi

HI KU VULA KA MARCELO NEÍM

NDZI velekiwe le Montevideo, eUruguay. Hambileswi vatswari va mina a va chava Xikwembu, a va nga ri swirho swa vukhongeri byo karhi. Mana wa mina u love eka mhangu ya movha loko ndzi ri ni malembe ya mune, kutani ndzi kurisiwe hi maxaka lama ringeteke ku ndzi dyondzisa mahanyelo lamanene. Loko ndzi ri ni malembe ya 20 hi vukhale, ndzi sungule ku famba-famba ndzi vona matiko yo hambana-hambana ni mindhavuko ya kona.

Loko ndzi ri le Colombia, ntirho wa mina a ku ri ku pfuneta eserekisini. Ndzi xiye leswaku vatlangi a va tsaka swinene loko vahlaleri va va phokotelela mavoko, hiloko na mina ndzi lava ku va un’wana wa vona. Kutani ndzi sungule ku praktisa ku gada xikanyakanya, kambe a ndzi praktisa hi swikanyakanya leswitsongo kukondza eku heteleleni ndzi kota ku gada xikanyakanya lexitsongo swinene lexi ringanaka ni khongoloti hi ku leha—hi xin’wana xa swikanyakanya leswitsongo ku tlula hinkwaswo emisaveni. A xi ri xitsongo lerova a xi enela endzeni ka xandla xa mina. Ndzi sungule ku duma ngopfu le Amerika Dzonga. Loko ndzi ri ni malembe ya 25, ndzi ye eMexico kutani ndzi tirha eka tiserekisi to hlayanyana.

Vutomi Bya Mina Byi Cinca

A ndzi rhandza vutomi bya serekisi. A hi tshama hi ri eku fambeni, hi tshama eka tihotela ta manyunyu ni ku dya etikhefini ta mavito. Kambe, hi nkarhi wolowo vutomi bya mina a byi nga ri na xikongomelo, naswona a ndzi nga ri na ntshembo hi vumundzuku. Siku rin’wana ni ndzhenga, vutomi bya mina byi cincile. Mufambisi wa serekisi u ndzi nyike buku leyi a nga lo nyikiwa leyi nge, Nhlavutelo—Ku Chaputa Ka Yona Loku Hlamarisaka Ku Tshinele!a Endzhaku ko heta ntlango wa serekisi, ndzi yi hlaye ri kondza ri xa. Hambileswi buku leyi a ndzi nga yi twisisi kahle, kambe nhlamuselo ya yona ya xivandzana xa muvala wa ribungu ni nghwavava swi ndzi tsakise ngopfu. (Nhlavutelo 17:3–18:8) Kutani loko ndzi ri karhi ndzi basisa kharavhani leyi ndzi yi xaveke, ndzi kume buku yin’wana leyi nge, U Nga Hanya Hi Masiku aParadeyisini eMisaveni.* Buku leyi a yi olova ku yi twisisa, xikan’we-kan’we ndzi xiye leswaku ndzi fanele ndzi chumayela. Hiloko ndzi sungula ku bula ni vanhu lava a ndzi hlangana na vona.

Hi ku famba ka nkarhi, ndzi xiye leswaku ndzi fanele ndzi vonana ni Timbhoni ta Yehovha. Endzeni ka buku leyi ya Nhlavutelo, a ku ri ni vito ra nhwana la nga Mbhoni, loyi ku nga yena a nyikeke munghana wa mina buku leyi. Hiloko ndzi fona, kutani tata wa yena a ndzi rhamba ku ta entsombanweni wa Timbhoni ta Yehovha le Tijuana, eMexico. Ndzi tsakisiwe hi rirhandzu leri a va ri na rona, kutani ndzi khorwiseka leswaku lebyi i vukhongeri bya ntiyiso. Lomu a hi famba kona ni serekisi, a ndzi ya eHolweni ya Mfumo naswona a ndzi kuma tibuku leti a ndzi ti fambisela vanhu lava ndzi hlanganaka na vona.

Ku ni xin’wana lexi ndzi pfuneke ndzi vona leswaku ndlela leyi ndzi yi tekeke i ya ntiyiso. Timbhoni ti ndzi rhambe leswaku ndzi famba na tona eXitsundzuxweni xa rifu ra Kreste, ti ndzi byele leswaku i swa nkoka swinene leswaku Vakreste va va kona eka xiendlakalo lexi. Kambe a ku ri siku ro sungula ro va hi pfula ntlango wa serekisi, naswona a ndzi ehleketa leswaku a ndzi nge swi koti ku va kona. Ndzi khongele eka Yehovha hi mhaka leyi, naswona ku endleke nchumu wun’wana wo hlamarisa. Tiawara timbirhi ntlango wu nga si sungula, gezi ri timekile! Xisweswo, ndzi kote ku ya eXitsundzuxweni kutani ndzi tlhela ndzi vuya eserekisini. Ndzi swi vonile leswaku Yehovha u hlamule xikhongelo xa mina.

Siku rin’wana loko ndzi fole layini ebangi a ndzi ri karhi ndzi nyika vanhu swiphephana. Nkulu la nga Mukreste u ndzi vonile kutani a ndzi bumabumela hi leswi a ndzi swi endla. U ndzi khutaze leswaku ndzi chumayela hi ndlela leyi hlelekeke ehansi ka nkongomiso wa vandlha. U ndzi hlamusele hi ndlela ya rirhandzu leswaku ndzi fanele ku cinca vutomi bya mina leswaku ndzi ta kota ku endla tano. Nkarhi lowu a ndza ha ehleketa hi ku cinca vutomi bya mina, ndzi tshembisiwe ntirho lowu holelaka mali yo tala eserekisini le United States. A ndzi nga tivi leswaku ndzi hlawula yini. A ndzi lava ku ya eUnited States, kambe loko a ndzi lo pfumela, a ndzi nga tivi leswaku ku ta endleka yini hi vutomi lebyi a ndzi lava ku byi sungula. Lowu a ku ri ndzingo wa mina wo sungula, naswona a ndzi nga swi lavi ku khomisa Yehovha tingana. Hambileswi vatirhi-kulorhi a va nga swi twisisi, ndzi tshike ku tirha eserekisini kutani ndzi sungula ku hlanganyela ni vandlha, ndzi tsemete misisi ya mina yo leha ni ku cinca mahanyelo ya mina leswaku ndzi ta kota ku tirhela Yehovha.

Ndzi Hanya Vutomi Lebyi Enerisaka Naswona A Ndzi Tisoli

Hi 1997, emahlweninyana ka ku va ndzi khuvuriwa, ndzi langutane ni ndzingo wa vumbirhi—ndzi nyikiwe ntirho wun’wana nakambe wo ya eUnited States, sweswi a ndzi ta ya humelela eka nongonoko wa thelevhixini le Miami naswona a ndzi ta hakeleriwa hinkwaswo. Kambe a ndzi lava ku khuvuriwa ndzi kombisa ku tinyiketela ka mina eka Yehovha. Vayimeri va nongonoko wa kona va hlamele ngopfu loko ndzi ala ntirho wa kona.

Vanhu van’wana va ndzi vutisa leswaku xana ndza tisola hi ku tshika vutomi lebyi a ndzi byi hanya eserekisini. Ndzi va byela leswaku a ndzi nge pfuki ndzi tshike rirhandzu ni vunghana bya mina na Yehovha hikwalaho ka vutomi lebyi a ndzi byi hanya eku sunguleni. Hambileswi ntirho wa mina wo va muchumayeri wa nkarhi hinkwawo wu nga endliki leswaku vanhu va ndzi bela mavoko, wu nga nyikiki ndhuma kumbe rifuwo ra misava leyi, sweswi ndzi titwa ndzi ri ni xikongomelo evuton’wini. Ndzi enerisiwa hi ntshembo lowunene wa ku hanya emisaveni ya paradeyisi nileswaku ndzi ta amukela manana loko a pfuka eku feni.—Yohane 5:28, 29.

[Tinhlamuselo ta le hansi]