Xana Hakunene Va Hanye Malembe Yo Tarisa Xisweswo?

Hi ku ya hi Bibele, Adamu u hanye malembe ya 930, Seta ya 912, Metusela ya 969—a ku lo sala malembe ya 31 ntsena leswaku a hlanganisa ya 1 000! (Genesa 5:5, 8, 27) Xana malembe wolawo a ma ringana ni malembe lama hi ma toloveleke namuntlha, kumbe, xana a ma komile, kumbexana a ma ringana ni n’hweti hilaha van’wana va ringanyeteke hakona?

Bibele yi kombisa leswaku a ma lehe ku ringana ni ya hina. Hi xikombiso: Loko lembe ra khale a ri lo leha ku ringana ni n’hweti ya hina, vavanuna lava landzelaka a va ta va va kume vana va ha ri vana hi voxe: Kenana a a ta va a kume n’wana a ri ni malembe ya tsevu, Mahalalele na Enoko va nga si hlanganisa ni malembe ya tsevu.—Genesa 5:12, 15, 21.

Tlhandlakambirhi, vanhu va khale a va swi kota ku hambanisa exikarhi ka masiku, tin’hweti ni malembe. (Genesa 1:14-16; 8:13) Entiyisweni, loko hi kambisisa hi vuxokoxoko ku tlhandlamana ka swiendlakalo swa le sikwini ra Nowa hi swi kuma kahle leswaku n’hweti a yi ri ni masiku mangani. Loko hi pimanisa Genesa 7:11, 24 na Genesa 8:3, 4 hi kuma leswaku tin’hweti ta ntlhanu, leti a ti sukela eka siku ra vu-17 ra n’hweti ya vumbirhi ku ya eka siku ra vu-17 ra n’hweti ya vunkombo, a ti ri ni masiku ya 150. Kutani, swi komba leswaku tin’hweti leti Nowa a a hlayela ha tona a ti ri ni masiku ya 30, naswona loko ti hlanganisiwa ti ri 12 a ti endla lembe.—Genesa 8:5-13.a

Kambe, vanhu a va swi kotisa ku yini ku hanya malembe ya 900 kumbe ku tlula? Bibele yi hi byela leswaku Xikwembu xi endle vanhu leswaku va hanya hilaha ku nga heriki nileswaku xidyoho xa Adamu xi tise ku nga hetiseki ni rifu eka vanhu. (Genesa 2:17; 3:17-19; Varhoma 5:12) Vanhu lava hanyeke ku nga si fika Ndhambi a va ri ekusuhi ngopfu ni ku hetiseka ku tlula lava hanyaka namuntlha, naswona a swi kanakanisi leswaku leswi hi swona swi endleke leswaku va hanya nkarhi wo leha. Hi xikombiso, Metusela a a ri wa xitukulwana xa vunkombo ku suka eka Adamu.—Luka 3:37, 38.

Kambe, ku nga ri khale, Yehovha Xikwembu u ta xi susa hi ku helela xidyoho hinkwaxo xa Adamu eka hinkwavo lava kombisaka ripfumelo engatini ya N’wana wa yena leyi halakeke, ku nga Yesu Kreste. “Hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Phela, wa ta nkarhi lowu malembe ya 969 lama Metusela a ma hanyeke ma nga ta vonaka ma kome ngopfu!

[Nhlamuselo ya le hansi]

[Grafu leyi nga eka tluka 30]

(Leswaku u vona rungula leri hleriweke hi ku helela, vona nkandziyiso wa kona)

1000

Metusela

Adamu

Seta

900

800

700

600

500

400

300

200

100

Munhu hi xiringaniso namuntlha