Xana I Ntsheketo Kumbe I Ntiyiso?

Timotiya loyi a a ri nkulu evandlheni ra Vukreste u letele vanhu lava tsakelaka ku gandzela Xikwembu xa ntiyiso leswaku va nga landzeli ‘tidyondzo ta mavunwa’ ni “mintsheketo.” (1 Timotiya 1:3, 4; Bibele Mahungu Lamanene) Xana xilemukiso lexi i xa nkoka namuntlha? Ina, vanhu va hambukisiwa evugandzerini bya ntiyiso hi ku dyondzisiwa tidyondzo leti hoxeke malunghana ni Bibele. Laha hansi ku ni tidyondzo leti tolovelekeke leti vanhu va ti tirhisaka malunghana ni Bibele. Xiya mhaka leyi humaka eBibeleni hi yoxe. Xana leswi, swi nga ku pfuna leswaku u kota ku hambanisa ntsheketo ni ntiyiso.

◼ Ntsheketo: Masingita ya le Bibeleni a hi ya ntiyiso.

Ntiyiso: Vanhu va fanele va dyondza swo tala malunghana ni ntumbuluko wa Xikwembu. Hambi ku ri van’wasayense a va swi koti ku hlamusela nkoka-misava hi vuenti, ku hlamusela swiaki hinkwaswo swa athomo, kumbe ku hlamusela nkarhi hi ku kongoma. “Xana u nga kumisisa swilo swo enta swa Xikwembu, kumbe, xana u nga kumisisa laha Lowa Matimba Hinkwawo a helelaka kona?” (Yobo 11:7) Leswi hi tsandzekaka ku swi twisisa hi vuenti swilo leswi tumbuluxiweke, van’wasayense va sungula ku va ni vuxiya-xiya leswaku va nga vuli leswaku nchumu wo karhi a wu nge endleki.

◼ Ntsheketo: Vukhongeri hinkwabyo bya amukeleka eka Xikwembu.

Ntiyiso: Yesu u te: “Loko mi tshama eritweni ra mina, hakunene mi vadyondzisiwa va mina, naswona mi ta tiva ntiyiso, kutani ntiyiso wu ta mi ntshunxa.” (Yohane 8:31, 32) Loko vukhongeri hinkwabyo byi amukelaka eka Xikwembu, xana i swa nkoka leswaku swirho swa byona swi lava ntshunxeko? Entiyisweni, Yesu u dyondzise leswaku a va talanga vanhu lava nga ‘egondzweni leri yisaka evuton’wini.’—Matewu 7:13, 14.

◼ Ntsheketo: Vanhu hinkwavo lavo lulama va ya etilweni loko va fa.

Ntiyiso: “Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu. Lavo lulama va ta dya ndzhaka ya misava, va ta tshama eka yona hi masiku. Tshemba Yehovha u hlayisa ndlela yakwe, u ta ku tlakusa leswaku u dya ndzhaka ya misava.” (Pisalema 37:11, 29, 34) I vanhu va 144 000 ntsena lava yaka etilweni. Xiavelo lexi Xikwembu xi va nyikeke xona i ku “va tihosi emisaveni.”—Nhlavutelo 5:9, 10; 14:1, 4.

◼ Ntsheketo: “Testamente ya Khale” a ya ha va pfuni Vakreste.

Ntiyiso: “Matsalwa hinkwawo ma huhuteriwe hi Xikwembu naswona ma pfuna.” (2 Timotiya 3:16, 17) “Swilo hinkwaswo leswi tsariweke enkarhini lowu hundzeke swi tsaleriwe ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Varhoma 15:4) “Testamente ya Khale,” ku nga Matsalwa ya Xiheveru i xihlovo xa nkoka xa swiletelo leswi humaka eka Xikwembu naswona ma hi nyika xisekelo xo va ni ripfumelo eka “Testamente Leyintshwa,” ku nga Matsalwa ya Vukreste ya Xigriki.

◼ Ntsheketo: Rungula ro tala leri nga eka buku ya Genesa, ku katsa ni timhaka ta Adamu na Evha i ntsheketo.

Ntiyiso: Matimu ya xivongo xa Yesu ku sukela eka Adamu ma tsariwe hi Luka mutsari wa Evhangeli. (Luka 3:23-38) Loko buku ya Genesa yi ri ntsheketo, xana mavito ya ntiyiso ya swivongo ma helele kwihi naswona vanhu lava dumeke ematin’wini va sungule kwihi? Yesu loyi a a ri kona etilweni loko a nga si ta emisaveni, a a swi kholwa leswi tsariweke eka Genesa, ku katsa ni timhaka leti vulavulaka hi Adamu na Evha. (Matewu 19:4-6) Hikwalaho, loko munhu a nga yi tshembi buku ya Genesa u kanakana Yesu hi byakwe, xikan’we ni vatsari vo tala va Bibele.—1 Tikronika 1:1; 1 Vakorinto 15:22; Yudha 14.