Langutelo Ra Bibele
Xana Xikwembu Xi Langutele Yini Eka Wena?
LESWI hi tshamaka hi khomekile hi boheka ku endla swilo swo tala. Minkarhi yin’wana swi nga ha lava hi endla matshalatshala lamakulu leswaku hi kota ku hetisisa vutihlamuleri bya hina hinkwabyo. Kambe, hi fanele hi tsundzuka leswaku vutomi hi byoxe i nyiko leyi hi nyikiweke hi Xikwembu. (Pisalema 36:9) Xana Xikwembu xi langutele leswaku hi heta nkarhi ni matimba yo tanihi kwihi hi ri eku xi tirheleni? Swa khutaza ku tiva leswaku nhlamulo ya le Bibeleni yi kombisa leswaku Xikwembu a xi langutelanga swilo swo tala eka hina.
Yesu a a swi tiva ku antswa ku tlula munhu wihi na wihi leswi Tata wakwe a swi languteleke eka vanhu. (Matewu 11:27) Loko Yesu a komberiwe ku vula xileriso lexikulu eka hinkwaswo, u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Marka 12:30) Xana sweswo swi vula yini? Xana xi lava swilo swo tala?
Leswi Ku Rhandza Xikwembu Hi Moya-xiviri Hinkwawo Swi Vulaka Swona
Hi nga ya hi xi rhandza swinene Xikwembu loko hi anakanyisisa hi swilo swo tala leswinene leswi xi hi endlelaka swona. Loko hi xi rhandza hi moya-xiviri hinkwawo, hi ta susumeteleka ku nyika Xikwembu leswinene ngopfu eka xin’wana ni xin’wana lexi hi nga na xona. Hi ta titwa hilaha mutsari wa Bibele a titweke ha kona, u vutisile a ku: “Xana ndzi ta tlherisela yini eka Yehovha hikwalaho ka hinkwaswo leswi pfunaka leswi a ndzi endleleke swona?” (Pisalema 116:12) Xana loko hi rhandza Xikwembu hi ndlela yoleyo swi ta yi khumba njhani ndlela leyi hi tirhisaka nkarhi wa hina ha yona?
Bibele a yi vuli leswaku hi fanele hi tirhisa tiawara tingani evugandzerini vhiki na vhiki. Kambe, yi vulavula hi mintirho leyi hi faneleke hi yi rhangisa evuton’wini yi tlhela yi hlamusela leswaku ha yini hi fanele hi endla tano. Hi xikombiso, Yesu u dyondzise leswaku ku nghenisa vutivi hi Xikwembu i goza ra nkoka leri yisaka ‘evuton’wini lebyi nga heriki.’ (Yohane 17:3) U tlhele a vula leswaku valandzeri vakwe va fanele va pfuna lava nga xi tiviki Xikwembu leswaku va kuma vutomi hi ku va byela hi vutivi bya Xikwembu. (Matewu 28:19, 20) Bibele yi hi byela leswaku hi fanele hi hlangana ni vapfumeri-kulorhi nkarhi ni nkarhi leswaku hi ta tshama hi tiyile entirhweni wa Xikwembu hi tlhela hi khutazana. (Vaheveru 10:24, 25) Mintirho leyi hinkwayo yi lava nkarhi.
Xana Xikwembu xi langutele leswaku hi hisekela vugandzeri ntsena, kutani hi nga ha endli mintirho leyin’wana? Nikatsongo! Timhaka leti pfunaka evuton’wini ta siku ni siku ti fanele ti tekeriwa enhlokweni na tona. Bibele yi lerisa tinhloko ta mindyangu leswaku ti wundla mindyangu ya tona, yi ku: “Hakunene, loko munhu a nga va wundli lava nga va ka vona, ngopfu-ngopfu lava nga swirho swa ndyangu wakwe, . . . u bihe ngopfu ku tlula munhu la nga riki na ripfumelo.”—1 Timotiya 5:8.
Xikwembu xi vumbe munhu a ri ni vuswikoti byo tiphina hi vutomi. Hikwalaho, swi fanerile leswaku hi heta nkarhi wo karhi hi ri ni mindyangu ya hina ni vanghana, hi tiphina hi swakudya leswinene ni vuhungasi lebyi phyuphyisaka. Hosi Solomoni u tsarile: “Ndza swi tiva leswaku a ku na nchumu lexi antswaka eka vona ematshan’weni yo tsaka ni ku endla leswinene evuton’wini bya munhu; nileswaku munhu un’wana ni un’wana u fanele a dya, kunene a nwa, a kuma leswinene entirhweni wakwe hinkwawo wa matimba. I nyiko leyi humaka eka Xikwembu.”—Eklesiasta 3:12, 13.
Nakambe Yehovha Xikwembu wa ku twisisa ku tsana ka vanhu, “wa tsundzuka leswaku hi ntshuri.” (Pisalema 103:14) Bibele ya pfumela leswaku hi fanele hi wisa hilaha ku eneleke. Endzhaku ko tirha nkarhi wo leha, Yesu u vitane vadyondzisiwa va yena leswaku va ya ‘enhoveni, va ya wisanyana.’—Marka 6:31.
Kutani vutomi lebyi tsakisaka Xikwembu byi ringaniseriwile naswona byi nga katsa mintirho yo hambana-hambana. Hambiswiritano, nchumu wihi ni wihi lowu hi wu endlaka—ku nga khathariseki leswaku wu fambisana ni vugandzeri hi ku kongoma kumbe a wu fambisana na byona—wu fanele wu kombisa leswaku hi rhandza Xikwembu hi moya-xiviri hinkwawo. Ndzayo ya Bibele yi ri: “Hambi mi dya kumbe mi nwa kumbe mi endla yini na yini, endlani hinkwaswo leswaku mi vangamisa Xikwembu.”—1 Vakorinto 10:31.
Ku Rhangisa Mintirho Yo Karhi Hi Ndlela Leyi Humelelaka
Xana u vona swi ku tikela ku rhangisa vugandzeri bya Xikwembu evuton’wini kumbe ku ri nchumu lowu wu nga ku tsandzaka? I ntiyiso leswaku ku nyika Xikwembu leswi xi swi languteleke swi nga lava leswaku hi cinca swo karhi eka ndlela leyi hi tirhisaka nkarhi wa hina ha yona—hambi ku ri ku titsona swo karhi. Kambe entiyisweni Muvumbi wa hina la nga ni rirhandzu a nga hi kombelanga ku endla nchumu lowu nga kotekiki. Entiyisweni, u hi nyika mpfuno wo tala leswaku hi endla ku rhandza ka yena. Hi nga humelela loko hi titshega hi “ntamu lowu Xikwembu xi wu nyikaka.”—1 Petro 4:11.
Swi nga ha ku tikela ku cinca xiyimiso xa wena leswaku u katsa mintirho ya swilo swa moya. Tinyike nkarhi wo vulavula nkarhi na nkarhi na Yehovha Xikwembu, “Mutwi wa xikhongelo.” (Pisalema 65:2) Exikhongelweni u nga ha phofula mivilelo leyi u nga na yona, u ri karhi u swi tiva leswaku ‘wa ku khathalela.’ (1 Petro 5:7) Hosi Davhida u khongerile a ku: “Ndzi dyondzise ku endla ku rhandza ka wena, hikuva wena u Xikwembu xanga.” (Pisalema 143:10) Na wena u nga kombela mpfuno eka Xikwembu leswaku u endla mindzulamiso leyi faneleke evuton’wini bya wena.
Bibele yi ni xirhambo lexi xa rirhandzu: “Tshinelani eka Xikwembu, kutani xi ta tshinela eka n’wina.” (Yakobo 4:8) Loko u sungula ku endla mintirho leyi tsakisaka Xikwembu, yo tanihi ku dyondza Bibele ni ku ya eminhlanganweni ya Vukreste, u ta tshinela eka Xikwembu. Na xona xi ta ku nyika matimba leswaku u hambeta u endla nhluvuko.
Malunghana ni matshalatshala lawa a ma endleke leswaku a lulamisa leswi a swi rhangisaka, Jelena loyi a dyondzaka Bibele ni Timbhoni ta Yehovha, u ri: “A swi ndzi tikela ku cinca swilo leswi ndzi swi rhangisaka.” Kambe u tlhela a ku: “Loko se ndzi sungule ku ya eminhlanganweni ya Vukreste, ndzi kume matimba yo tirhisa leswi Bibele yi swi vulaka. Nseketelo lowu ndzi hambeteke ndzi wu kuma eka van’wana wu ndzi pfunile na wona.” Loko munhu a vona vuyelo lebyi tisiwaka hi ku tirhela Xikwembu swi n’wi nyika matimba lama engetelekeke. (Vaefesa 6:10) Jelena u ri: “Ndzi antswise vuxaka bya mina ni nuna wa mina ni ndlela leyi ndzi tshinyaka vana va mina ha yona.”
Moya lowo kwetsima wa Yehovha lowu nga ni matimba wu nga ku tiyisa ni ku ku susumetela leswaku u tlhela u kambisisa swilo leswi u swi rhangisaka evuton’wini kutani u “tixavela nkarhi” wo tirhela Xikwembu, ku nga khathariseki mintshikilelo ya vutomi bya manguva lawa. (Vaefesa 3:16; 5:15-17) Yesu u te: “Swilo leswi vanhu va nga swi kotiki Xikwembu xa swi kota.”—Luka 18:27.
XANA U TSHAME U TIVUTISA?
◼ Ha yini u fanele u rhangisa ku endla ku rhandza ka Xikwembu evuton’wini bya wena?—Pisalema 116:12; Marka 12:30.
◼ Hi yihi mintirho leyi Xikwembu xi languteleke leswaku u yi endla?—Matewu 28:19, 20; Yohane 17:3; Vaheveru 10:24, 25.
◼ Xana u nga cinca swilo leswi u swi rhangisaka evuton’wini hi ndlela leyi humelelaka leswaku u tsakisa Xikwembu?—Vaefesa 5:15-17; Yakobo 4:8.
[Xifaniso lexi nga eka tluka 20]
Leswaku munhu a tsakisa Xikwembu u fanele a ringanisela