Vuvabyi Byo Tsandzeka Ku Hlaya A Byi Ndzi Sivelanga Ku Fikelela Tipakani Leti A Ndzi Tivekele Tona

Hi ku vula ka Michael Henborg

Ndzi ni vuvabyi byo tsandzeka ku hlaya. Vuvabyi lebyi, lebyi endlaka leswaku Tatana, Manana ni tindzisana ta mina tinharhu ta xinuna va nga dyi byi rhelela, byi endle leswaku swi ndzi tikela ku hlaya ririmi ra rikwerhu ra Xidenixi, naswona a a byi endla leswaku swi ndzi tikela ku dyondza exikolweni. Nilokoswiritano, ndyangu wa ka hina wu ndzi pfunile wu tlhela wu ndzi khutaza swinene.

NDYANGU wa ka hina wu ve Timbhoni ta Yehovha ku sukela eka kokwana-xinguwe, naswona ku hlaya, ngopfu-ngopfu ku hlaya Bibele ni tibuku leti sekeriweke eBibeleni i nchumu wa nkoka evuton’wini bya hina. Mina na ndzisana ya mina Flemming nakambe nkarhi na nkarhi a hi famba na Tatana ensin’wini, naswona sweswo swi hi endle hi vona nkoka wa ku hlaya ni ku tsala kahle.

Loko ndza ha ri n’wana, a ndzi hlaya nkandziyiso wun’wana ni wun’wana wa Xihondzo xo Rindza ni Xalamuka! ndzi heta tiawara ta 15 ku hlaya magazini wun’we. Ku engetela kwalaho, ndzi sungule ku hlaya Bibele hinkwayo. Ndzi tlhele ndzi tsarisa eXikolweni xa Vutirheli bya le Tilweni, lexi khomiwaka emavandlheni ya Timbhoni ta Yehovha emisaveni hinkwayo. Xikolo lexi xi letela swichudeni ku hlaya ni ku vulavula kahle ni ku nyikela tinkulumo emahlweni ka vanhu. Malunghiselelo lawa hinkwawo ma ndzi pfune ngopfu leswaku ndzi langutana ni vuvabyi bya mina bya ku tsandzeka ku hlaya. Hambiswiritano, a ndzi nga swi tivi leswaku ndzi langutana ni mintlhontlho yo tala. Mi nge ndzi hlamusela.

Ndzi Dyondza Xinghezi

Hi 1988 loko ndza ha ri na 24 wa malembe, ndzi ve phayona, ku nga muchumayeri wa mahungu lamanene wa nkarhi hinkwawo. Leswi tiko ra Denmark ri nga ni vanhu vo tala lava humaka ematikweni mambe, a a ndzi lava ku va chumayela tidyondzo ta Bibele. Hambiswiritano, leswaku ndzi kota ku va chumayela kahle, a ndzi fanele ku dyondza Xinghezi, leswi a swi ndzi tikela swinene. Kambe ndzi endle nhluvuko hakatsongo-ntsongo hikwalaho ka ku tiyisela nileswi a ndzi dyondzisiwa ndzi ri ndzexe, naswona hi ku famba ka nkarhi ndzi kote ku chumayela mahungu lamanene ya Mfumo wa Xikwembu eka vanhu vambe lava vulavulaka Xinghezi lava tshamaka edorobeni leri ndzi tshamaka eka rona ra Copenhagen. Entiyisweni a a ndzi endla swihoxo swo tala loko ndzi vulavula Xinghezi, kambe sweswo a swi ndzi tshikisanga ku xi dyondza ni ku chumayela hi xona.

Ku tiva ka mina Xinghezi swi ndzi pfunile leswaku ndzi tirha hi ku tirhandzela eka matsima yo aka ya Timbhoni ta Yehovha ematikweni yo hambana-hambana. Ndzi rhange hi ku rhumeriwa eGreece, ivi endzhakunyana ndzi pfuneta loko ku akiwa rhavi leri nga eMadrid, le Spain.

Leswi a ndzi lava ku hlanganyela hi xitalo entirhweni wo chumayela, ndzi endle xikombelo xo ya eXikolweni xa Ndzetelo wa Vutirheli xa Timbhoni ta Yehovha. Xikolo lexi, lexi tekaka mavhiki ya nhungu, xi letela vamakwerhu lava nga si tekaka lava nga Vakreste lava tiyimiseleke ku amukela swiavelo etindhawini leti ku lavekaka vachumayeri vo tala va mahungu lamanene. (Marka 13:10) Ndzi rhambiwe ku ya dyondza Xinghezi eka xikolo xo dyondzisa ririmi lexi a xi ta va eSweden.

Ntlawa wolowo wu sungule hi September 1, 1994. A ndzi lava ku famba ndzi lunghekile swinene, hikwalaho ndzi dyondze Xinghezi tiawara ta mune siku ni siku ku ringana tin’hweti ta nhungu, naswona ndzi ye ndzi ya hlanganyela evandlheni leri tirhisaka Xinghezi. Kutani, loko xikolo xexo xi sungula, a ndzi pfumelanga leswaku vuvabyi bya mina byi ndzi sivela ku endla nhluvuko. Hi xikombiso, loko valeteri va vutisa swivutiso, a ndzi tshamela ku yimisa voko leswaku ndzi hlamula hambileswi minkarhi yin’wana a ndzi nga tiyiseki loko ndzi ta tirhisa marito lama faneleke. Loko ndzi thwasile, ndzi averiwe ku ya phayona le Copenhagen. Ku dyondza Xinghezi a ku nga ri matlangwana, kambe a ka ha ri ni ntlhontlho lowukulu lowu a wa ha ndzi yimerile.

Ndzi Dyondza Xitamil

Hi December 1995, ndzi averiwe ku ya hlanganyela evandlheni leri tirhisaka Xitamil edorobeni ra Herning le Denmark. A ndzi anakanya leswaku Xitamil i rin’wana ra tindzimi leti nonon’hwaka swinene emisaveni. Xi ni maletere ya 31, kun’we ni mapeletwana lawa hi xiwona ma vumbaka maletere man’wana, leswi endlaka leswaku ririmi leri ri tirhisa tinhlanga ta kwalomu ka 250!

Eku sunguleni evandlheni a ndzi nyikela tinkulumo hi Xidenixi kutani ti hundzuluxeriwa hi Xitamil. Loko se ndzi sungula ku nyikela tinkulumo hi Xitamil, a ndzi tshembi leswaku u kona loyi a ndzi twisiseke. Hambiswiritano, vayingiseri a va rhiya ndleve hambileswi vo tala a va ndzi hleka. Leswaku ndzi ta xi dyondza hi ku hatlisa, ndzi endle xiboho xo ya le Sri Lanka laha vanhu va timiliyoni va vulavulaka Xitamil.

Loko ndzi fika le Sri Lanka hi October 1996, etikweni rero a ku ri ni nyimpi ya xin’wana-manana. Ndzi tshame edorobeni ra Vavuniya, leri nga le ndzilakaneni wa mintlawa mimbirhi leyi a yi ri eku lweni, ku ringana nkarhi wo karhi. Timbhoni ta kwalaho a ti ri swisiwana, kambe a ti rhandza vanhu ti tlhela ti va ni malwandla lamakulu naswona ti ringete hi matimba ku ndzi dyondzisa Xitamil. Vanhu lava nga riki Timbhoni va tsakisiwe hi leswi a ndzi ringeta ku vulavula na vona hi ririmi ra vona, hambileswi a ndzo va mulungu ndzi ri ndzexe endhawini yoleyo. Ku tlangela ka vona ni ku titsongahata ka vona swi endle leswaku swi ndzi olovela ku vulavula na vona hi timhaka ta le Bibeleni.

Hi January 1997, ndzi boheke ku tlhelela eDenmark, naswona haxawa xa kona ndzi tekane na Camilla loyi a a ri phayona. A ndzi swi lava hi mbilu hinkwayo ku tlhelela eSri Lanka, hikwalaho hi December 1999, ndzi tlhelerile se ndzi ri ni nsati wa mina. Swi nga si ya kwihi se a hi dyondza Bibele ni mindyangu yo hlayanyana ni vanhu van’wana, naswona a hi famba ni Timbhoni ta kwalaho eka vanhu lava ti dyondzaka Bibele na vona. A hi tirha hi matimba ensin’wini hi ri karhi hi dyondza ririmi.

Hi March 2000, hi boheke ku tlhelela eDenmark. A a swi tika ku hambana ni Timbhoni-kulorhi swin’we ni vanhu lava a hi dyondza Bibele na vona hikuva se a hi va rhandza ngopfu. Kambe a hi yimeriwe hi ntirho wo tala, ku katsa ni ntlhontlho wo dyondza ririmi rin’wana.

Endzhaku Ko Dyondza Xitamil Ndzi Dyondze Xilatvia

Hi May 2002, mina na Camilla loko se hi ri ni malembe ya mune hi tekanile, hi amukele xirhambo xo ya va varhumiwa le Latvia, ku nga tiko ra le Yuropa leri nga evuxeni bya Denmark. Camilla u hatle a dyondza Xilatvia naswona u kote ku xi vulavula endzhaku ka mavhiki ya tsevu ntsena. Kambe mina a ndzi nga fani na yena. Entiyisweni, ni sweswi ndza ha titwa ndzi endle nhluvuko wutsongo ku nga khathariseki ndlela leyi ndzi pfuniweke ha yona. Nilokoswiritano, ndza ha tiyimisele ku ya emahlweni ndzi ri dyondza ririmi leri.a

Camilla u hambeta a ndzi seketela swinene naswona havumbirhi bya hina ha wu tsakela ntirho wa hina wa ku va varhumiwa. Entiyisweni, hi dyondze Bibele ni vanhu vo tala lava titsongahataka lava vulavulaka Xilatvia. Loko ndzi rivala marito man’wana kumbe ndzi nga ma tirhisi kahle, Timbhoni ta kwalaho ni swichudeni swa Bibele a va ringeta ku twisisa leswi ndzi swi vulaka va tlhela va ndzi pfuna. Sweswo swi endle leswaku ndzi ya ndzi titshemba loko ndzi ri ensin’wini niloko ndzi ri karhi ndzi nyikela tinkulumo eminhlanganweni ya Vukreste.

Ha yini ndzi amukele ntlhontlho wo dyondza tindzimi tin’wana kasi swa ndzi tikela ku ti dyondza? Ndzi endle tano hileswi ndzi rhandzaka vanhu ku nga ri ku tsakela ku dyondza tindzimi. I lunghelo lerikulu ku pfuna munhu un’wana leswaku a tiva Xikwembu xa ntiyiso, Yehovha, kutani a tshinela eka yena. Nakambe hilaha varhumiwa vo tala va swi voneke hakona hi ku phindha-phindha, ntirho wolowo wu hetiseka kahle loko munhu a vulavula ni vanhu van’wana hi ririmi ra rikwavo, ku nga ririmi leri fikelelaka timbilu ta vona.

Emalembeni lama hundzeke, mina na nkatanga hi kote ku pfuna vanhu vo tala leswaku va va ni vutivi lebyi kongomeke bya ntiyiso wa le Bibeleni. Hambiswiritano, a hi nge tibumi hi mhaka yoleyo. Kambe, hi nkhensa Yehovha hikwalaho ka vuyelo lebyinene lebyi hi byi voneke. Phela hina hi lo byala hi tlhela hi cheleta timbewu ta ntiyiso wa le Bibeleni; kambe Xikwembu hi xona xi ti kuriseke.—1 Vakorinto 3:6.

Loko Xihinga Xi Va Mpfuno

Hambileswi vuvabyi bya ku tsandzeka ku hlaya byi veke xihinga eka mina, byi tlhele byi ndzi pfuna. Njhani? Loko ndzi nyikela tinkulumo evandlheni, a ndzi tshameli ku languta rungula leri ndzi ri tsaleke ehansi, hikwalaho sweswo swi endla leswaku ndzi kota ku languta vayingiseri va mina. Naswona ndzi tirhisa swifaniso swo tala, leswi swi olovaka ku swi tsundzuka. Xisweswo, eka swiyimo swin’wana, vuvabyi bya mina byi ndzi pfunile leswaku ndzi antswisa ndlela leyi ndzi dyondzisaka ha yona.

Muapostola Pawulo la nga Mukreste u tsarile a ku: “Xikwembu xi hlawule swilo leswi tsaneke emisaveni leswaku xi ta swi khomisa tingana swilo swo tiya.” (1 Vakorinto 1:27) Kunene vuvabyi bya mina byi ndzi endle ‘nchumu lowu tsaneke’ eka swilo swin’wana. Kambe hilaha mina ni van’wana hi swi xiyeke hakona, Yehovha a nga hi nyika matimba yo endla leswi a hi ta tsandzeka ku swi endla. Hi fanele hi tivekela tipakani leti hi nga ta kota ku ti fikelela, hi tiyimisela ku endla swilo leswi ringaneleke, hi khongela leswaku Xikwembu xi hi nyika moya lowo kwetsima kutani hi ringeta ku endla swilo leswi hi lavaka ku swi endla.

[Nhlamuselo ya le hansi]

[Bokisi leri nga eka tluka 22]

XANA VUVABYI BYO TSANDZEKA KU HLAYA BYI TWISISIWA KAHLE?

Xana vuvabyi bya ku tsandzeka ku hlaya i yini? Vuvabyi lebyi lebyi khomaka munhu vutomi hinkwabyo byi endla leswaku munhu swi n’wi tikela swinene ku dyondza tindzimi, ngopfu-ngopfu ku hlaya kahle. Vanhu lava nga ni vuvabyi lebyi swa va tikela ku twisisa vuxaka lebyi nga kona exikarhi ka maletere ni mpfumawulo wa wona. Hambiswiritano, swikombiso swa vuvabyi lebyi swa hambana hi ku ya hi vanhu.

Xana byi vangiwa hi yini? A swi si tiveka leswaku byi vangiwa hi yini hambileswi munhu loyi a nga na byona a vaka a tswariwe na byona. Hambileswi minkambisiso yi kombisaka leswaku byongo byi va byi nga kulanga kahle naswona byi nga tirhi kahle, vanhu lava nga ni vuvabyi lebyi a swi vuli swona leswaku a va tlharihanga naswona a va swi tsakeli ku dyondza swilo swo karhi. Entiyisweni, vanhu lava nga ni vuvabyi lebyi va va va ri ni vuswikoti byo endla mintirho leyi nga laviki vuswikoti lebyikulu byo tiva tindzimi.

Xana byi tshunguriwa njhani? I swa nkoka leswaku byi hatla byi voniwa. Leswaku munhu la nga ni vuvabyi lebyi a swi kota kahle ku dyondza tindzimi tin’wana u fanele a tirhisa switwi swa yena swo hlayanyana, ngopfu-ngopfu swo yingisela, swo vona ni swo khumba. Leswaku xichudeni xin’wana ni xin’wana xi kota ku endla nhluvuko hi ku ya hi vuswikoti bya xona, xi fanele xi dyondzisiwa xi ri xoxe. Swichudeni leswi swi nga ha tlhela swi lava ku pfuniwa etimhakeni leti khumbaka mintlhaveko ya swona leti vangiwaka hi swiphiqo leswi swi vaka na swona exikolweni. Loko swi dyondzisiwa kahle swi tlhela swi tirha hi matimba, swichudeni leswi nga ni vuvabyi lebyi swi nga kota ku hlaya ni ku tsala kahle.b

[Nhlamuselo ya le hansi]

[Xifaniso lexi nga eka tluka 23]

Ndzi ri ni Mbhoni yin’wana eSri Lanka

[Xifaniso lexi nga eka tluka 23]

Ndzi ri na Camilla eLatvia