Tluka Ra Lothasi Leri Mati Ma Nga Tshamiki Eka Rona

Xana Ri Lo Endliwa?

◼ Xana hi nga swi kota ku endla tikhapu ta plasitiki leti tibasisaka? Ku endla mafasitere lama tshamaka ma omile hambiloko ku na mpfula? Ku endla michini ya makhiroskopu leyi nga khuhlaniki ngopfu? Van’wasayense va vula leswaku leswi ko va swilo swi nga ri swingani leswi va nga kotaka ku swi endla loko vo kuma xihundla xa tluka ra lothasi.

Xiya: Ehenhla ka tluka ra lothasi ku ni swirhumbana leswi voniwaka hi makhiroskopu leswi nga ni swimbhovana leswi nga mhula. Loko mathonsi ya mati ma wela ehenhla ka tluka leri ma wela ehenhla ka swimbhovana leswi, leswi endlaka leswaku mati ma nga tshami ehenhla ka tluka. Ku voyama ka tluka leri ku endla leswaku mati ma nga tshami ehenhla ka rona, sweswo swi endla leswaku mati ma nga koti ku nwelela etlukeni. Vuyelo byi va byihi? Tluka ra lothasi a ri tshami ri omile ntsena kambe ri tshama ri basile, tanihi leswi thyaka ni ritshuri swi fambaka ni mathonsi ya mati.

Van’wasayense va lava ku endla swilo leswi tirhaka ku fana ni swilo leswi endlaka leswaku mati ma nga tshami eka tluka ra lothasi. Ni michini ya makhiroskopu leyi nga onhiwaka hi mati, yi nga vuyeriwa loko yo endliwa ku fana ni tluka ra lothasi. Science Daily yi vika yi ku: “Swilo leswi nga endliwaka swi tele ngopfu.”

U anakanya yini? Xana tluka ra lothasi ri lo tiendlekela? Kumbe ri lo endliwa?