Vana Lava Nga Ni Ntshikilelo

◼ Loko Pablo, xifanyetana lexi nga ni malembe ya nhungu a vutisiwa hi mudyondzisi wa yena leswaku ha yini a nga tsalanga ntirho wa xikolo lowu a a fanele a wu tsala ekaya, u te: “A ndzi nga ri na nkarhi. Ndzi karhele.” Ku fana ni xifanyetana lexi xa le Spain, lexi langutekaka xi ri ni vurhongo, vana vo tala va ni swo tala swo swi endla leswi katsaka ku heta tiawara ta 12 kumbe ku tlula va ri karhi va dyondza ni ku endla mintirho ya xikolo leyi faneleke yi endliwa ekaya. Ha yini vana lava va ri ni ntirho wa xikolo wo tarisa xileswi?

Vatswari van’wana va tsarisa vana va vona eka mintirho yin’wana leyi endliwaka loko xikolo xi humile leswaku va nga vi ni xivundza kukondza un’wana wa vatswari va vona a vuya entirhweni. Kasi vatswari van’wana va lava leswaku vana va vona va heta nkarhi wo leha va ri karhi va dyondza leswaku swi ta va fambela kahle exikolweni nileswaku va ta kuma mintirho leyi holelaka kahle. Leswaku va fikelela pakani yoleyo, vatswari vo tala va le Korea Dzonga va yisa vana va vona eswikolweni leswi ku dyondziwaka nkarhi wo leha, laha minkarhi yin’wana swi sungulaka hi 7:30 nimixo, kukondza ku va xikarhi ka vusiku kumbe ku tlula naswona ku dyondziwa hi ndlela yoleyo vhiki hinkwaro. Phepha-hungu rin’wana ri vula leswaku “vatswari volavo va tiyimisele ku endla hinkwaswo leswaku va yisa vana va vona eka tiyunivhesiti ta xiyimo xa le henhla swinene.”—New York Times.

Phepha-hungu rin’wana leri humaka vhiki ni vhiki ra le Spain ri ri: “Vatswari lava langutelaka swo tala eka vana va vona, va lava leswaku swi va fambela kahle evuton’wini kambe vatswari volavo va lava leswaku va tirha hi matimba swinene.” (Mujer hoy) Leswaku vana volavo va tsakisa vatswari va vona, swi nga ha lava va tikarhata ku tlula mpimo, leswi eku heteleleni swi nga ha endlaka leswaku va tshikileleka swinene. Antonio Cano loyi a nga presidente wa Nhlangano wa le Spain lowu Kambisisaka Ku Vilela ni Ntshikilelo, u ri: “Hi ku ya hi leswi hi nga swi xiya, vantshwa va ni mintirho yo tala leyi va faneleke va yi endla.” Profesa un’wana u vula leswaku vana lava endlaka tiphesente ta 40 lava nga ni malembe lama nga tluliki 15 va le Spain, va tshikilelekile swinene. Ku tirha hi ndlela yoleyo swi ni khombo eka vantshwa naswona swi nga endla leswaku va hetelela va tisunga. Hi xikombiso, phepha-hungu rin’wana ri vula leswaku eKorea Dzonga “vantshwa vo tala lava nga ni malembe ya 10 ku ya eka 19 va dlayiwa hi timhangu ta timovha kambe nhlayo ya vona yi landzeriwa hi ya lava tisungaka.”—The New York Times.

I ntiyiso leswaku vana va fanele va tikarhata exikolweni naswona vatswari va fanele va va pfuna hilaha va nga kotaka hakona hikuva ku va muntshwa swa hundza. Kambe Irene Arrimadas la nga mudyondzisi u ri: “Vana a va fani ni vanhu lavakulu. A va nge swi koti ku dyondza nkarhi wo leha.” Vatswari lava nga ni rirhandzu lava yi twisisaka mhaka leyi, va tiyiseka leswaku vana va vona va kuma nkarhi lowu eneleke wo wisa ni wo hungasa hi ndlela leyinene tanihi ndyangu. Hosi Solomoni wo tlhariha loko a vulavula hi nkoka wo ringanisela u te: “Voko leri teleke ku wisa ra antswa ku ri ni mavoko mambirhi lama teleke ntirho wa matimba ni ku hlongorisa mheho.”—Eklesiasta 4:6.a

[Nhlamuselo ya le hansi]