Tihanci To Koma To Rhula Leti Nga Ni Matimba Ta Le Swihlaleni Swa Shetland

Tihanci To Koma To Rhula Leti Nga Ni Matimba Ta Le Swihlaleni Swa Shetland

● Loko u tshame u ya eka xiendlakalo lexi nga ni mintlangu yo tala, u nga ha va u vone tihanci to koma kumbe u ti gadile. Tihanci leti kahle-kahle ti huma eSwihlaleni swa Shetland leswi nga en’walungu-vuxa bya Scotland. Entiyisweni, vayimburi lava tirhaka kwalaho va kume marhambu ya tihanci to koma lama nga ni magidi ya malembe ma ri kwalaho.

Tihanci to koma ta le Shetland ti voniwa hi ku olova hi milenge ya tona yo koma, voya byo leha lebyi nga enhan’wini ni le ncileni ni voya byo tsindziyela lebyi nga emirini wa tona, lebyi ti sirhelelaka eka maxelo yo titimela ya laha ti humaka kona. Hi ntolovelo tihanci leti ti lehe tisentimitara leti nga exikarhi ka 70 na 107 naswona hakanyingi ti ni muvala wa ntima kumbe wa buraweni. Ku hambana ni tihanci tin’wana, tihanci leti ta le Shetland ti pimiwa hi tisentimitara. Hi ntolovelo ti leha ti fika eka 107 wa tisentimitara, handle ka leta le Amerika leti nga hundziki tisentimitara ta 117.

Hambileswi tihanci leti ti solekeke, kambe ti ni matimba. Entiyisweni, hi ku ya hi mpimo wa tona, tihanci leti to koma hi tona leti nga ni matimba eka hinkwato leti pfanganisiweke. Hikwalaho ka sweswo, khale tihanci leti a ti tirhisiwa ku rhwala manyoro, ku rima masimu ni ku tirha emigodini ya malahla, laha swiharhi leswitsongo ku nga swona ntsena leswi a swi kota ku famba-famba emihochweni ya kona. Entiyisweni, to tala ta tona ti hete vutomi bya tona hinkwabyo emigodini, a ti nga si tshama ti vona ku vonakala ka dyambu.

Loko tihanci leti ti dyondzisiwe kahle, ti rhulile xisweswo swa olova ku va ti gadiwa hi vana. Kumbexana ku rhula ka tona hi kona loku endleke leswaku ku va ni vuyelo lebyinene lebyi kumiweke loko ku tirhisiwe tihanci leti eka minongonoko ya vanhu lava lamaleke.

Hikwalaho ka mahanyelo ni vuswikoti bya tona byo kota ku hanya etindhawini to hambana-hambana, tihanci leti to koma ti rhumeriwe emisaveni hinkwayo naswona ku sunguriwe mintlawa ya vanhu lava rhandzaka tihanci ni nxaxamelo wa le nawini wa tihanci ta muxaka wo karhi leti pfanganisiweke, leti vatswari va tona va tiviwaka. Kambe vito ra tihanci leti ra ha fambisana ni xihlala xa Shetland, laha muxaka lowu wa tihanci wu yaka emahlweni wu hanya kahle ni ku pfanganisiwa kahle.

[Xifaniso lexi nga eka tluka 24]

Hi ku ya hi mpimo wa tona, tihanci leti to koma hi tona leti nga ni matimba eka hinkwato leti pfanganisiweke

[Laha Xifaniso Xi Humaka Kona eka tluka 24]