Ntiyiso Wa Bibele Wu Va Ntshunxile
YESU KRESTE u byele vayingiseri vakwe a ku: “Mi ta tiva ntiyiso, kutani ntiyiso wu ta mi ntshunxa.” (Yohane 8:32) Hilaha swikombiso leswi landzelaka swi nga ta kombisa ha kona ntshunxeko wolowo a wu katsa ku ntshunxiwa eka madimona, ku nga mavunwa lama hlohloteriwaka hi vangoma.—Yohane 8:44.
Mintokoto leyi yi kombisa leswaku ntiyiso wa Bibele wa sirhelela hakunene. Entiyisweni, hi yona ntsena leyi ntshunxaka vanhu. Na wena loko wo kambisisa Bibele hi wexe, a wu nge tisoli.
[Bokisi/Xifaniso lexi nga eka tluka 8]
Pictures are reenactments
● Susanna wa le Brazil a a ri muprista wa xisati etempeleni. A a lava ku pfuna vanhu lava lavaka mpfuno hi ku tirhisa masalamusi. Ku engetela kwalaho a a rhandza ku phahla mana wakwe. Hambiswiritano, hi ku famba ka nkarhi mana wakwe u n’wi kombele leswaku a tidlaya leswaku va ta ya tshama swin’we exivandleni xa moya. Leswi swi n’wi karhate ngopfu Susanna naswona a swi n’wi hahamisa. Kutani yena ni nuna wakwe va sungule ku dyondza Bibele ni Timbhoni ta Yehovha. Va lwe hi matimba leswaku va “kaneta Diyavulosi” kambe eku heteleleni ‘u balekile.’ (Yakobo 4:7) Sweswi va ni ku rhula naswona Susanna a nga ha hahami. U tsale a ku: “Ku ni swilo swo tala leswi ndzi swi nkhensaka leswi Yehovha a ndzi endleleke swona kambe ndzi n’wi nkhensa swinene hi leswi a hi humeseke emunyameni wa moya.”
[Bokisi/Xifaniso lexi nga eka tluka 8]
● Timothy, loyi a tshamaka eAfrika Vupela-dyambu i bofu naswona i mbheveve.a Leswi madokodela ma tsandzekeke ku n’wi pfuna, u ye eka vafundhisi va vujagana kambe a ko fana ni kwala. U tsale a ku: “A ndzi karhateke ngopfu hikwalaho ka vukanganyisi bya vona.” Kutani u dyondze Bibele ni Timbhoni ta Yehovha, leti n’wi hlamuseleke hi xikongomelo xa Xikwembu xo herisa mavabyi hinkwawo ni vulema. Timothy u te: “Ndzi ri rindzele hi mahlo ngati siku leri misava leyintshwa ya Xikwembu yi nga ta fika ha rona, laha ‘tindleve ta lava nga twiki ti nga ta pfuriwa . . . ni ririmi ra la nga vulavuriki ri nga ta huwelela hi ku tsaka.’” (Esaya 35:1-6) Sweswi u tsakela ku chumayela vanhu lava nga twiki rungula ra ntiyiso wa Bibele hi ku tirhisa muchini lowutsongo wa ku tlanga DVD, a va pfuna leswaku va kuma ntshunxeko wa xiviri.
[Nhlamuselo ya le hansi]
a Mavito man’wana ma cinciwile.
[Bokisi/Xifaniso lexi nga eka tluka 9]
● Evelyn a a tirhisana swinene ni vangoma le Estonia. Leswi Yesu a hanyiseke vanhu, na yena a a lava ku endla leswi fanaka. Ngopfu-ngopfu a a lava ku pfuna mana wakwe loyi a a karhatiwa hi vuvabyi lebyi nga tshungulekiki. Xisweswo u dyondze ku tirhisa mintsembyana leswaku a ta kota ku tiva mavabyi ni ku tshungula vuvabyi lebyikulu. Hi ku famba ka nkarhi u dyondze Bibele. Vuyelo byi ve byihi? U te: “Ndzi sungule ku swi xiya leswaku a ndzi kanganyisiwile. Kutani ndzi hise tibuku ta vungoma ni mintsembyana ya mina.” Sweswi u dyondzisa van’wana ntiyiso lowu sirhelelaka wa Bibele.
[Bokisi/Xifaniso lexi nga eka tluka 9]
● Mary u kulele exihlaleni xin’wana xa le Papua New Guinea laha vanhu va kona va chavaka vafi. Loko ko tshuka ku fa munhu eximutanini lexi a tshamaka eka xona, Mary a a etlela ehansi ka mubedo wa munhu un’wana hi ku chava leswaku moya wa mufi wu nga n’wi xanisa loko a etlele a ri yexe. Kutani u dyondze eBibeleni leswaku vafi va etlele—va le masirheni, va rindzele ku pfuxiwa leswaku va ta hanya emisaveni leyi nga ta va Paradeyisi. (Luka 23:43; Yohane 11:11-14) Sweswi, a nga ha va chavi vafi.
[Bokisi/Xifaniso lexi nga eka tluka 9]
● Alicia, la kuriseriweke endyangwini wa Vakreste eUnited States, u sungule ku tsakela tibuku ni tifilimi leti vulavulaka hi vungoma. Kutani u sungule ku anakanyisisa hi ntiyiso wa Bibele lowu a wu dyondzeke. Loko a xiya leswaku a a ringeta ku ‘dya etafuleni ra Yehovha swin’we ni le tafuleni ra madimona,’ u cince tindlela takwe naswona sweswi u ni ripfalo leri baseke emahlweni ka Xikwembu.—1 Vakorinto 10:21.