Langutelo Ra Bibele
Xana Ku Tixekelela Swi Nga Endla Leswaku U Va Ekusuhi Ni Xikwembu?
VANHU vo tala a va yi seketeli mhaka ya ku tixekelela. Kambe, vagandzeri lava xanisaka mimiri ya vona hi ku tixekelela, ku titsona swakudya ni hi ku ambala tihembe to khwaxa leti vavisaka mimiri ya vona, va tibyela leswaku leswi swi kombisa leswaku va chava Xikwembu. Swilo leswi swa ha endliwa ninamuntlha. Hi ku ya hi swiviko swa sweswinyana, hambi ku ri varhangeri lava dumeke va vukhongeri na vona va tixekelela.
I yini lexi susumetelaka vanhu leswaku va gandzela hi ndlela yoleyo? Muvulavuleri wa nhlangano wun’wana lowu tivulaka wa Vukreste u vule leswaku “leyi i ndlela yin’wana yo kombisa leswaku munhu u amukela Yesu Kreste hi ku tirhandzela hikuva na yena u xaniseke hi ku tirhandzela leswaku a hi kutsula exidyohweni.” Ku nga khathariseki leswi vuriwaka hi varhangeri va vukhongeri, xana Bibele yi ri yini hi mhaka leyi?
Khathalela Miri Wa Wena
Bibele a yi swi khutazi leswaku vanhu va gandzela Xikwembu hi ku tixekelela. Ku ri na sweswo, yi khutaza vanhu lava chavaka Xikwembu leswaku va khathalela mimiri ya vona. Xiya ndlela leyi Bibele yi ri hlamuselaka ha yona rirhandzu leri nga kona exikarhi ka nuna ni nsati. Loko yi vulavula hi ndlela leyi wanuna a wu khomaka ha yona miri wakwe, yi ri: “Vavanuna va fanele ku rhandza vasati va vona ku fana ni mimiri ya vona. . . . A nga kona munhu loyi a tshameke a venga nyama yakwe; kambe wa yi wundla ni ku yi khathalela, hilaha Kreste na yena a endlaka hakona evandlheni.”—Vaefesa 5:28, 29.
Xana nawu wa leswaku wanuna a rhandza nsati wakwe ku fana ni miri wakwe a wu ta twala loko vagandzeri a va fanele va khoma mimiri ya vona hi tihanyi loko va gandzela? Swi le rivaleni leswaku vanhu lava rhandzaka milawu leyi nga eMatsalweni, va fanele va khathalela mimiri ya vona va tlhela va yi rhandza, naswona leswi va fanele va tlhela va swi kombisa ni le ka vanghana va vona va vukati.
A swi hlamarisi leswi Bibele yi nga ni milawu yo tala leyi pfunaka vahlayi va yona leswaku va khathalela mimiri ya vona. Hi xikombiso, Bibele yi vulavula hi vuyelo byo endla vutiolori hi ndlela leyinene. (1 Timotiya 4:8) Yi hi khutaza hi madyelo lamanene ya swakudya swo karhi yi tlhela yi hi lemukisa hi makhombo lama vangiwaka hi swakudya leswi nga akiki miri. (Swivuriso 23:20, 21; 1 Timotiya 5:23) Matsalwa ma khutaza vanhu leswaku va tshama va ri ni rihanyo lerinene hikuva leswi swi ta va pfuna leswaku va kota ku endla mintirho yo hambana-hambana. (Eklesiasta 9:4) Loko ku languteriwe leswaku vahlayi va Bibele va hlayisa rihanyo ra vona, xana swa twala leswaku va fanele va tlhela va xekelela mimiri ya vona?—2 Vakorinto 7:1.
Xana Vakreste Va Fanele Va Tixanisa Hi Ndlela Leyi Yesu A Xanisekeke Ha Yona?
Ninamuntlha vukhongeri byin’wana lebyi khutazaka moya wa ku tixekelela byi dzike ngopfu eka ndlela leyi Yesu ni valandzeri vakwe vo sungula va xanisekeke ha yona. Kambe ku xaniseka loku hlamuseriwaka hi malandza ya Xikwembu eBibeleni a hi ku tixekelela. Loko vatsari va Bibele lava nga Vakreste va vulavula hi ku xaniseka ka Kreste, a va lava ku khutaza Vakreste leswaku va tiyisela nxaniso, ku nga ri leswaku va tixanisa. Xisweswo, lava xanisaka mimiri ya vona a va tekeleli Yesu Kreste.
Hi xikombiso: Tiehlekete u vona munghana wa wena loyi u n’wi xiximaka swinene a rhuketeriwa ni ku hlaseriwa hi ntshungu wa vapfukeri. Loko u n’wi langutile, u vona ndlela leyi a tiyiselaka ha yona, u rhurile naswona a nga tlheriseli. Loko u lava ku tekelela munghana wa wena, xana u nga tihimetela naswona u titseketsela? Nikatsongo! Phela loko u endla tano, u ta va u tekelela swiendlo swa ntshungu wa vapfukeri. Na wena u nga swi papalata ku rihisela loko wo tikuma u ri exiyin’weni xo tano.
Swi le rivaleni leswaku valandzeri va Kreste a va fanelanga va tixekelela kumbe ku tekelela ntshungu lowu nga ni tihanyi, lowu dlayeke Yesu. (Yohane 5:18; 7:1, 25; 8:40; 11:53) Ematshan’weni ya sweswo loko va xanisiwa va fanele va tekelela ndlela yo rhula leyi Yesu a tiyiseleke ha yona.—Yohane 15:20.
Ku Soholotiwa Ka Matsalwa
Hambi ku ri emahlweni ka nguva ya Vukreste, Matsalwa lawa Vayuda a va ma tirhisa evuton’wini ni le vugandzerini bya vona, a ma va sivela ku endla nchumu wihi ni wihi lowu a wu ta vavisa mimiri ya vona. Hi xikombiso, Nawu a wu yirisa Vayuda ku va va tixekelela, ku nga xiendlo lexi a xi tolovelekile ematikweni ya khale ya vanhu lava nga riki Vayuda. (Levhitika 19:28; Deteronoma 14:1) Loko Xikwembu xi sola ku tixekelela, swi le rivaleni leswaku a xi swi lavi leswaku hi tivavisa hi ku tibukutela hi minkharisa. Nawu wa Bibele wu yi veka erivaleni mhaka leyi—ku va munhu a vavisa miri wakwe hi vomu, a swi amukeleki eka Xikwembu.
Tanihi leswi mumpfampfarhuti a lavaka leswaku xifaniso xakwe xi xiximiwa, Yehovha Xikwembu, la nga Muvumbi, na yena u lava leswaku miri wa munhu lowu a wu vumbeke wu xiximiwa. (Pisalema 139:14-16) Ku tixekelela a swi endli leswaku munhu a va ni vuxaka ni Xikwembu. Ematshan’weni ya sweswo, swi soholota leswi Tievhangeli ti swi dyondzisaka.
Muapostola Pawulo u huhuteriwe ku tsala hi tidyondzo teto ta vanhu, leti tshikilelaka a ku: “Swilo sweswo, hakunene, swi languteka swi ri ni vutlhari hi xivumbeko xa vugandzeri xa ku tisungulela ni ku titsongahata ka vuxisi, ku khoma miri hi tihanyi; kambe a swi pfuni nchumu eku lwisaneni ni ku enerisa nyama.” (Vakolosa 2:20-23) Ku va munhu a ti twisa ku vava hi ku tixekelela a swi nge n’wi pfuni leswaku a va ekusuhi ni Xikwembu. Ku ri na sweswo, vugandzeri bya Xikwembu bya ntiyiso bya phyuphyisa naswona a hi ndzhwalo.—Matewu 11:28-30.
XANA U TSHAME U TIVUTISA?
● Xana Xikwembu xi wu languta njhani miri wa munhu?—Pisalema 139:13-16.
● Xana ku xanisa miri wa wena swi nga ku pfuna leswaku u lwisana ni ku navela ko biha?—Vakolosa 2:20-23.
● Xana vugandzeri bya ntiyiso byi fanele byi va ndzhwalo?—Matewu 11:28-30.
[Marito lama tshahiweke exihlokweni lama nga eka tluka 11]
Nawu wa Bibele wu yi veka erivaleni mhaka leyi—ku va munhu a vavisa miri wakwe hi vomu, a swi amukeleki eka Xikwembu
[Xifaniso lexi nga eka tluka 10]
Mupfhumba la kasaka hi ndlela yo vava a ya ekerekeni
[Xihlovo Xa Kona]
© 2010 photolibrary.com