Xana Milomu Ya Wena “I Swibya Swa Risima”?

● Hosi Solomoni wa khale u tsale a ku: “Ku ni nsuku ni tikorala to tala; kambe milomu ya vutivi, i swibya swa risima.” (Swivuriso 20:15) Nsuku wa durha swinene naswona hi nkarhi wa Solomoni, tikorala na tona a ti vitana. Hambiswiritano, milomu ya hina yi nga va ya risima swinene ku tlula nsuku ni tikorala. Njhani? Ku nga ri hi ndlela leyi yi langutekaka ha yona kambe hikwalaho ka marito lamanene lama humaka eka yona.

Milomu ya risima yi vula marito yo tsokombela ya vunene, musa ni rirhandzu. Tanihi leswi yi nga “milomu ya vutivi,” yi vulavula ntiyiso lowu tsariweke eBibeleni malunghana ni Xikwembu. I ntiyiso leswaku buku leyi ya khale yi tele hi vutlhari ni ntiyiso malunghana ni Muvumbi wa hina, ku katsa ni switsundzuxo leswinene swa vutomi.—Yohane 17:17.

Lexi khomisaka tingana hileswaku vanhu vo tala va tirhisa milomu ya vona hi ndlela yo biha hi ku va va vulavula mavunwa malunghana ni Xikwembu. Hi xikombiso, van’wana va xi sola hikwalaho ka vubihi ni ku xaniseka loku nga kona emisaveni, loku ko tala ku vangiwaka hi vanhu. Malunghana ni mhaka leyi, Swivuriso 19:3 yi ri: “Vuphukuphuku bya munhu wa la misaveni byi gombonyokisa ndlela yakwe, naswona mbilu yakwe yi karihela Yehovha.”

Van’wana va endla leswaku milomu ya vona yi nga ha vi ya nkoka ngopfu hi ku vulavula marito yo bola, rihlevo leri vavisaka hambi ku ri ku lumbeta. Hi ku tirhisa xitlhokovetselo xa matimba, Swivuriso 26:23 yi ri: “Milomu yo saseka leyi fambisanaka ni mbilu yo biha, yi fana ni xifunengeto xa silivhere lexi namekiweke ehenhla ka xibya xa vumba.” Ku fana ni “xifunengeto xa silivhere” lexi funengetaka xibya xa vumba, “milomu yo saseka,” leyi kombisaka ndlela leyi munhu a titwaka ha yona hambi ku ri ku xixima, entiyisweni yi nga funengeta “mbilu yo biha.”—Swivuriso 26:24-26.

I ntiyiso leswaku vubihi byo tano byi lo dlaa, ematihlweni ya Xikwembu! Xi vona leswi kahle-kahle hi nga xiswona! Yesu Kreste u te: “Sungulani hi ku basisa endzeni ka xinwelo ni ndyelo, leswaku swi ta basa ni le handle.” (Matewu 23:26) Vona ndlela leyi marito lawa ma nga ntiyiso ha yona! Tlhandlakambirhi, loko hi ri ni mbilu leyi tengeke naswona hi tiwundla hi ntiyiso lowu humaka eRitweni ra Xikwembu, swi ta tikomba hi ndlela leyi hi vulavulaka ha yona. Vuyelo byi ta va byihi? Milomu ya hina yi ta va “swibya swa risima” ngopfu-ngopfu emahlweni ka Xikwembu.

[Xifaniso lexi nga eka tluka 19]

Milomu ya lavo tlhariha “i swibya swa risima”