Nchumu Lowu Kongomisaka Xibodze

Xana Wu Lo Endliwa?

● Valavisisi va hlamusela ku tlhotlhoriwa ni ku kula ka xibodze tanihi “xin’wana xa swiharhi leswi hlamarisaka eka swiharhi hinkwaswo.” Se swi endla makume ya malembe valavisisi va ri karhi va hlamarisiwa hi vutomi bya xona.

Xiya: Endzhaku ka malembe man’wana ni man’wana mambirhi ku ya eka ya mune, xibodze xa xisati xi ya eribuweni xi ya tshikela mandza ya kwalomu ka dzana emugodini, ivi xi ma funengeta hi misava. Loko swi tlhotlhorhiwa, swibodzwana leswi swi ya elwandle. Endzhaku ka sweswo, swi teka riendzo ro leha swinene ra kwalomu ka tikhilomitara ta 12 900. Endzhaku ka malembe, xibodze lexi kuleke xa xisati xi tlhelela elwandle leri xi tlhotlhoriweke eka rona kutani xi fika xi tshikela mandza!

Xana Xibodze lexi xi yi tiva njhani ndlela yo ya eribuweni leri xi tlhotlhoriweke eka rona? Mutivi wa vutomi, Kenneth Lohmann wa le Yunivhesiti ya North Carolina le United States la tshahiweke eka National Geographic News u te: “Swi tikomba onge swi velekiwa swi ri ni mepe wa maginete.” Ndzavisiso wu kombisa leswaku xibodze xi kota ku tiva laha xi nga kona hi ku tirhisa matimba ya maginete ya misava. Nchumu lowu, lowu hlamarisaka lowu swibodze swi tlhotlhorhiwaka swi ri na wona wu swi pfuna leswaku swi kota ku rhendzeleka tikhilomitara ta 12 900 eLwandle ra Atlantic, naswona Lohmann u ye emahlweni a vula leswaku “leswi swi swi endla swi ri swoxe, a swi landzelelani.”

U ehleketa yini? Xana nchumu lowu kongomisaka xibodze wu lo tiendlekela kumbe wu lo endliwa?

[Bokisi leri nga eka tluka 25]

SWIN’WANA LESWI HLAMARISAKA HI SWIBODZE

● Endzhaku ko tshikela ni ku seletela mandza, xibodze a xa ha tlheleli leswaku xi ya ma kambela.

● Leswaku xi tlhotlhorheka, xibodzwana xi tirhisa tino ro hlawuleka leri vuriwaka caruncle, leri sukaka endzhaku ka loko xi faye tandza.

● Xibodze xi heta 90 wa tiphesente ta vutomi bya xona xi ri ematini.

[Laha Xifaniso Xi Humaka Kona eka tluka 25]

© Masa Ushioda/WaterF/age fotostock