Vutomi Lebyi Nga Riki Na Ku Xaniseka—Xitshembiso Lexi Tshembekaka

“[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4.

XANA xitshembiso lexi xo tsakisa hi nga xi tshemba? Tsundzuka xin’wana xa swilemukiso swo sungula leswi nyikiweke Adamu. Xikwembu xi n’wi byele leswaku loko a nga yingisi, u ta “fa hakunene.” (Genesa 2:17) Naswona ku endleke leswi Xikwembu xi vuleke leswaku swi ta endleka. Rifu ni ku xaniseka loku vanhu va langutanaka na kona namuntlha, i vumbhoni bya leswaku hi fanele hi xi tshemba Xikwembu. Xana xi kona xivangelo xo kanakana xitshembiso xa Xikwembu xo tisa swiyimo leswi hetisekeke laha misaveni?

Nakambe tsundzuka timfanelo ta Xikwembu leti hlamuseriweke eka xihloko lexi hundzeke. Leswi hi navelaka leswaku ku xaniseka ku hela, hi kombisa ntwela-vusiwana wa Xikwembu, rirhandzu ni vululami bya xona. Ku tlula kwalaho, swiendlakalo swa misava leswi endlekaka namuntlha swi kombisa leswaku nkarhi wa leswaku Xikwembu xi teka goza wu tshinele.—Vona bokisi leri nge “Xana Swilo Leswi Swi Ta Endleka Rini?”

Ha yini Yehovha Xikwembu a faneleka ku herisa ku xaniseka ka vanhu? Xiya ndlela leyi a nga ta swi endla ha yona sweswo hi ku tirhisa N’wana wakwe Yesu, leswaku a herisa leswi endlaka leswaku vanhu va xaniseka.

Ku tihlawulela.

Kokwa wa hina Adamu u endle xiboho lexi veke ni vuyelo byo biha eka vatukulu va yena hinkwavo. Muapostola Pawulo u tsale a ku: “Ntumbuluko hinkwawo wu hambeta wu konya ni ku vaviseka swin’we.” (Varhoma 8:22) Tindlela ta Xikwembu ti lulamile, ti ni tintswalo naswona ta olova. Varhoma 6:23 yi ri: “Hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.”

Wanuna la hetisekeke Adamu u dyohe hi vomu naswona sweswo swi endle leswaku vanhu va xaniseka va tlhela va fa. Yesu wanuna la hetisekeke u hanye vutomi lebyi nga riki na xidyoho; rifu ra yena emhandzini ya nxaniso ri ntshunxe vanhu lava yingisaka eka xidyoho ni rifu. Sweswi hi ni ntshembo wo hanya hilaha ku nga heriki emisaveni leyi ku nga ta herisiwa xidyoho lexi hi velekiweke na xona, lexi endlaka leswaku hi endla swiboho leswi nga riki swinene. Vanhu lava xanisaka van’wana hi vomu na vona a va nge he vi kona hikuva “lava endlaka swo biha va ta herisiwa.”—Pisalema 37:9.

Swiendlakalo leswi nga languteriwangiki ni ku nga hetiseki.

Yesu Kreste, Hosi leyi hlawuriweke hi Xikwembu, wa swi kota ku lawula matimba ya ntumbuluko. Hi lembe-xidzana ro sungula C.E., Yesu ni vaapostola vakwe a va ri ebyatsweni loko “ku pfuka xidzedze lexikulu ngopfu, magandlati ma ba byatso ma nghena, lerova byatso a byi ri kusuhi ni ku khubumeteka.” Loko va huwelela Yesu leswaku a va pfuna, hiloko Yesu “a pfuka a tshinya mheho, kutani a byela lwandle a ku: ‘Miyela! U ku whii!’ Kutani mheho yi hunguteka, hiloko ku va ni ku rhula lokukulu.” Leswi swi va hlamarisile vaapostola vakwe, lerova va kale va ku: “Hambi ku ri mheho ni lwandle swa n’wi yingisa.”—Marka 4:37-41.

Ehansi ka vulawuri bya Yesu, vanhu lava yingisaka va ‘ta tshama va sirhelelekile naswona va nge kavanyetiwi hi ku chava khombo.’ (Swivuriso 1:33) Leswi swi vula leswaku va ta sirheleleka ni le ka timhangu ta ntumbuluko. Ku engetela kwalaho, vanhu lava nga yi khomiki kahle misava, lava akaka hi ndlela leyi nga hlayisekangiki, lava honisaka matimba ya ntumbuluko swin’we ni swihoxo leswi endliwaka hi vanhu, swi ta va swi nga ha ri kona. A nga kona la nga ta weriwa hi makhombo hileswi a nga endhawini leyi hoxeke hi nkarhi lowu hoxeke.

Loko Yesu a ri laha emisaveni u kombise nchumu wun’wana lowu a nga ta wu endla loko se a fuma, lowu nga ta herisa ku xaniseka kun’wana ni kun’wana loku vangiwaka hi swiendlakalo leswi nga languteriwangiki. U te: “Hi mina ku pfuka ni vutomi.” (Yohane 11:25) Ina, Yesu u ni matimba naswona wa swi tsakela ku pfuxa vanhu va timiliyoni lava feke ku vava hikwalaho ka timhangu ta ntumbuluko. Xana xitshembiso lexi ko va ntsheketo? Yesu u tiyisekise ntshembo wa hina hileswi a pfuxeke vanhu lava feke loko a ri laha misaveni. Swikombiso swinharhu swa mhaka leyi swa kumeka eBibeleni.—Marka 5:38-43; Luka 7:11-15; Yohane 11:38-44.

“Mufumi wa misava leyi.”

Kreste Yesu u hlawuriwe hi Xikwembu leswaku a “herisa la nga ni tindlela to vanga rifu, ku nga Diyavulosi.” (Vaheveru 2:14) Yesu u te: “Ku ni ku avanyisiwa ka misava leyi; kutani mufumi wa misava leyi u ta cukumeteriwa ehandle.” (Yohane 12:31) U ta “herisa mintirho ya Diyavulosi” hi ku va a herisa nkucetelo wa Diyavulosi lowu nga kona emisaveni. (1 Yohane 3:8) Hakunene ku ta va ni ku cinca lokukulu emisaveni loko moya wa Diyavulosi wa makwanga, vukanganyisi ni vutianakanyi wu herisiwile!

“Xana Swilo Leswi Swi Ta Endleka Rini?”

Valandzeri va Yesu va n’wi vutise va ku: “Xana swilo leswi swi ta endleka rini, naswona xi ta va xihi xikombiso xa vukona bya wena ni xa makumu ya mafambiselo ya swilo?” (Matewu 24:3) Nhlamulo ya Yesu swin’we ni tindzimana tin’wana ta Bibele leti tsariweke endzhaku ka rifu rakwe, swi hi byela hileswi a swi ta endleka loko nkarhi wa leswaku Xikwembu xi herisa ku xaniseka wu ri ekusuhi.a Vona ndlela leyi vuprofeta lebyi nga laha hansi byi fambisanaka ha yona ni swiyimo leswi nga kona namuntlha.

Nyimpi emisaveni hinkwayo—Matewu 24:7; Nhlavutelo 6:4.
Ku kayivela ka swakudya ni mintungu—Luka 21:11; Nhlavutelo 6:5-8.
Ku onhiwa ka misava—Nhlavutelo 11:18.
“Varhandzi va mali”—2 Timotiya 3:2.
“Lava nga yingisiki vatswari”—2 Timotiya 3:2.
“Lava rhandzaka mintsako ku ri ni ku rhandza Xikwembu”—2 Timotiya 3:4.

Timbhoni ta Yehovha ti ta swi tsakela ku ku pfuna leswaku u swi vona leswaku misava leyi ku nga riki na ku xaniseka eka yona yi kwala nyongeni. Tihlanganise ni Timbhoni ta laha u tshamaka kona. Ti ta swi tsakela ku dyondza na wena Bibele ekaya ra wena kumbe endhawini leyi u yi tsakelaka.

a Leswaku u kuma rungula leri engetelekeke, vona ndzima 9 leyi nga ni nhloko-mhaka leyi nge, “Xana Hi Hanya ‘eMasikwini Yo Hetelela’?” eka buku leyi nge, Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.