“Hi Ba Mandla Hi Vuyelela Hi Swihloko Leswi Swa Ntlhandlamano!”
● Vanhu lava tshamaka emisaveni hinkwayo va kombise ku tlangela ka vona swihloko swa ntlhandlamano leswi humaka eka Xalamuka! leswi nga ni nhloko-mhaka leyi nge “Swivutiso Swo Bula Ha Swona Endyangwini,” leswi nga eka matluka 30 na 31. Swifaniso, swivutiso, makhadi ya Bibele lama tsemiwaka, ma petsiwa hi le xikarhi kutani ma hlayisiwa, ku va vana va lava-lava swifaniso ni swiavelo leswi ndyangu wu avelanaka swona swa dyondzisa naswona swa tsakisa. Xiya leswi va swi vulaka:
“Ndzi dyondza Bibele hi email ni vatukulu va mina vambirhi va majaha lava nga ni malembe ya 12. Hi ku tirhisa xihloko lexi nge ‘Swivutiso Swo Bula Ha Swona Endyangwini,’ ndzi va kombela leswaku va hlamula swivutiso leswi nga exihlokweni lexi kutani va ndzi rhumela matluka ya kona. Swi tikomba va yi tsakela swinene dyondzo leyi naswona ndlela leyi hi dyondzaka ha yona yi ndzi pfuna leswaku ndzi engetela vutivi bya mina. Ha nkhensa swinene hi swihloko leswi!”
V. C. wa le United States
“Xijahana xa mina xa malembe ya ntlhanu xa ha ku ndzi kombela leswaku loko hi ya eku etleleni hi rhanga hi ku kambisisa xihloko lexi nge ‘I Yini Leswi Hoxeke eXifanisweni Lexi?’ Ndzi kume xifaniso xin’we kutani hi sungula ku bula ha xona. Xijahana xa mina a xi yingisele hi vurhon’wana loko ndzi ri karhi ndzi hlaya rungula ra kona eBibeleni. Sweswi xi lava leswaku hi dyondza madyambu man’wana ni man’wana. Mina ni ndyangu wa mina hi mi nkhensa hi timbilu ta hina hinkwato hikwalaho ka leswi mi pfunaka vana va hina leswaku va tiphina hi ku dyondza Bibele.”
M. F. wa le France
“Loko ndzi ri exitichini xa bazi, ndzi hlangane na David la nga ni malembe ya 12 na Jennifer la nga ni malembe ya tsevu. Tata wa vona u ndzi vone ndzi ri karhi ndzi nyika vanhu ti-Xalamuka!, kutani u va byele leswaku va ta ti kombela. Loko tatana ni xijahana xakwe va sungula ku hlaya timagazini leti, mina na Jennifer a hi ri karhi hi tiphina hi ku kambisisa swifaniso swa swinyenyana ni swiharhi. Hi bule hi swilo swo xonga leswi Yehovha Xikwembu a hi endleleke swona leswaku hi tiphina. Loko hi fika eka tluka 31, hi ringete ku bula hi xihloko lexi nge ‘Vana Va Lava-lava Swifaniso.’ Loko ndza ha kayakaya ku kuma xifaniso xo sungula, Jennifer swi n’wi tekele tisekoni ku va a kuma tluka ra kona. Hi ringete ku kuma xifaniso xa vumbirhi ni xa vunharhu, ni sweswo hi yena a rhangeke a swi kuma. Entiyisweni, Jennifer a a lava leswaku hi ya emahlweni kukondza hi heta swifaniso hinkwaswo leswi nga eminkandziyisweni ya khume leyi a ndzi ri na yona! Eku heteleleni, Jennifer u kombele leswaku ndzi n’wi nyika minkandziyiso yin’wana yimbirhi leswaku a ta yi nyika tata wakwe ni buti wakwe. Loko ndzi famba, havunharhu bya vona va yi tlangele swinene minkandziyiso leyi.”
M. C. wa le Ecuador