Loko U Weriwa Hi Maxangu

VANHU hinkwavo va weriwa hi maxangu yo karhi, ku katsa ni vanhu lava nga swigwili.

BIBELE YI RI:

“Lava va nga ni rivilo lerikulu a va hluli emphikizanweni, hambi ku ri lava va nga ni matimba a va hluli enyimpini, ni lavo tlhariha a va swi kumi swakudya, hambi ku ri lava twisisaka a va na rona rifuwo, ni lava va nga ni vutivi a va kombiwi tintswalo; hikuva nkarhi ni xiendlakalo lexi nga languteriwangiki swa va wela hinkwavo.”—Eklesiasta 9:11.

Mhaka ya nkoka a hi leswaku u ta weriwa hi maxangu kambe i ndlela leyi u nga ta langutana na wona ha yona loko ma ku wela. Hi xikombiso:

• Xana u ta endla yini loko wo lahlekeriwa hi rifuwo ra wena hinkwaro eka mhangu ya ntumbuluko?

• Xana u ta endla yini loko ko kumiwa leswaku u ni vuvabyi lebyi dlayaka?

• Xana u ta endla yini loko wo feriwa hi munhu loyi u n’wi rhandzaka?

Timbhoni ta Yehovha ku nga vakandziyisi va magazini lowu ti tshemba leswaku Bibele yi ta ku pfuna u langutana ni maxangu u tlhela u va ni ntshembo wa xiviri. (Varhoma 15:4) Xiya mintokoto yinharhu leyi kombisaka leswaku sweswo swi nga endleka njhani.