9 Ku titiva kahle

LESWI SWI VULAKA SWONA

Ku titiva swi vula swo tala ku tlula ku tiva vito ra wena ni leswi u langutekisaka xiswona. Swi katsa milawu leyi u tivekeleke yona, leswi u swi pfumelaka ni vumunhu bya wena. Vumunhu bya wena, byi hlamusela hinkwaswo leswi u nga swona.

LEXI ENDLAKA SWI VA SWA NKOKA

Loko u titiva kahle, u yimela leswi u swi pfumelaka ematshan’weni yo pfumelela tintangha ta wena ti ku lawula.

“Vanhu vo tala va fana ni swipopana leswi navetisaka swiambalo exitolo. A swi tihlawuleli swiambalo kambe swo hlawuleriwa.”—Adrian.

“Ndzi dyondze ku yimela leswinene hambiloko swi tika. Vanghana va mina va ntiyiso ndzi va vona hi ndlela leyi va endlaka swilo ha yona ni ndlela leyi ndzi endlaka swilo ha yona loko ndzi ri na vona.”—Courtney.

NSINYA WA NAWU WA LE BIBELENI: “Tshikani ku titwananisa ni mafambiselo lawa ya swilo, kambe mi hundzuka hi ku hundzula mianakanyo ya n’wina.”—Varhoma 12:2.

LESWI U NGA SWI ENDLAKA

Tiva leswi u nga swona sweswi ni leswi u lavaka ku va swona hi ku kambisisa leswi u kotaka ku swi endlaka kahle, leswi u tsandzekaka eka swona ni leswi u pfumelaka eka swona. Ndlela leyinene yo sungula i ku hlamula swivutiso leswi landzelaka.

Leswi u swi kotaka: Hi byihi vuswikoti lebyi ndzi nga na byona? I yini leswi ndzi swi kotaka kahle? (Hi xikombiso: Xana ndza wu khoma nkarhi? Xana ndza swi kota ku tikhoma? Xana ndzi tirha hi matimba? Xana ndza hanana?) Hi swihi swilo leswinene leswi ndzi swi endlaka?

XIRINGANYETO: Xana swa ku tikela ku xiya swilo leswinene leswi u swi endleke? Vutisa mutswari kumbe munghana loyi u n’wi tshembaka a ku byela swilo leswi u kotaka ku swi endla kahle atlhela a ku hlamusela ni xivangelo xa kona.

NSINYA WA NAWU WA LE BIBELENI: “Un’wana ni un’wana a a kombise leswi ntirho wa yena wu nga swona, kutani u ta va ni xivangelo xo khana malunghana na yena hi yexe, naswona ku nga ri hi ku tiringanisa ni munhu un’wana.”—Vagalatiya 6:4.

Leswi u tsandzekaka eka swona: Hi kwihi laha ndzi faneleke ndzi antswisa kona ngopfungopfu eka vumunhu bya mina? I yini leswi talaka ku ndzi ringa ku endla swilo swo biha? Hi le ka swiyimo swihi laha ndzi faneleke ndzi tikhoma eka swona?

NSINYA WA NAWU WA LE BIBELENI: “Loko hi ku: ‘A hi na xidyoho,’ ha tixisa naswona a hi na ntiyiso.”—1 Yohane 1:8.

Leswi u pfumelaka eka swona: Hi yihi milawu ya mahanyelo leyi ndzi kongomisaka naswona hikwalaho ka yini? Xana ndza pfumela eka Xikwembu? I yini lexi endleke ndzi tshemba leswaku Xikwembu xi kona? Hi swihi swiendlo leswi ndzi vonaka swi bihile naswona i yini lexi endlaka swi va tano? I yini leswi ndzi tshembaka leswaku swi ta endleka enkarhini lowu taka?

NSINYA WA NAWU WA LE BIBELENI: “Vuswikoti byo ehleketa byi ta ku rindza, ku twisisa ku ta ku hlayisa.”—Swivuriso 2:11.