MISAVA LEYI TALEKE HI MAXANGU

2 | Sirhelelaka Ntirho Ni Nhundzu Ya Wena

LESWI ENDLAKA SWI VA SWA NKOKA

Siku ni siku, vanhu vo tala va kulula va n’watseka leswaku va kuma swilo leswi va swi lavaka. Lexi twisaka ku vava, swa tika ku kuma leswi va swi lavaka hikwalaho ka swiphiqo swa misava leyi. Hikwalahokayini?

Loko etindhawini to karhi timhangu ku ri tshamela maxelo, hakanyingi swakudya ni ndhawu yo tshama swa durha swinene.
Timhangu ti nga endla leswaku mitirho yi kala kumbe vatirhi va hunguteriwa muholo.
Makhombo ma nga onha mabindzu, makaya kumbe nhundzu naswona sweswo swi nga ha va siya va ri evuswetini.

Leswi U Faneleke U Swi Tiva

Loko u yi tirhisa kahle mali ya wena swi ta ku pfuna leswaku u lunghekela swiyimo swo tika.
Tsundzuka leswaku ku va na timali, ntirho lowu holelaka, mali leyi u yi hlayiseke ebangi kumbe nhundzu leyi u nga na yona swi nga ha hela hi ku tsopeta ka tihlo.
Ku ni swilo leswi mali yi nga kotiki ku swi xava, swo tanihi ntsako ni ku va ni vun’we ekaya.

Leswi U Nga Swi Endlaka Sweswi

Bibele yi ri: “Loko hi ri ni swakudya ni swiambalo hi ta eneriseka hi swilo leswi.”—1 Timotiya 6:8.

Ku eneriseka hi leswi hi nga na swona swi ta endla leswaku hi tsaka loko hi kuma swilo leswi hi swi lavaka. Leswi i swa nkoka ngopfungopfu loko hi ri ni mali yitsongo.

Leswaku u eneriseka hileswi u nga na swona, u fanele u tidyondzisa ku papalata ku xava swilo swo durha. Loko u tshamela ku xava swilo leswi u tsandzekaka ku swi hakelela, swi ta ku vangela swiphiqo swo tala.

NDLELA LEYI U NGA SWI ENDLAKA HAYONA—Switsundzuxo Leswi Nga Ku Pfunaka

Hi mikarhi ya khombo, hlayisa mali ya wena hi ku endla leswi landzelaka

HUNGUTA LESWI U SWI XAVAKA

Hunguta leswi u swi xavaka

U nga tirhisi mali ya wena loko swi nga bohi. Tivutise: ‘Xana swo boha leswaku ndzi va na movha? Xana ndzi nga hlayisa mali yo xava matsavu hi ku ti rimela nsimu?’
Loko u nga se xava nchumu wo karhi, u fanele u tivutisa leswi: ‘Xana ndza wu lava hakunene? Xana ndzi na yona mali yo wu xava?’
Kombela mpfuno eka mfumo kumbe eka mihlangano yin’wana loko yi ri kona.

“Hi tshame ehansi tanihi ndyangu ivi hi kambisisa ndlela leyi hi hanyaka hayona. Hi tshike vuhungasi lebyi lavaka mali yo tala. Hi tlhele hi sungula ku xava swakudya leswi nga durhiki.”—Gift.

HLAYISA MALI

Kunguhata mali leyi u nga ta yi tirhisa

Bibele yi ri: “Makungu ya lava gingiritekaka ma pfuna hakunene, kambe hinkwavo lava nga ni magugu entiyisweni va ta va swisiwana.” (Swivuriso 21:5) Ku hlayisa mali swi ta ku pfuna leswaku u nga xavi swilo swo durha leswi nga ha tlulaka muholo wa wena.

Xo sungula, yi tsale ehansi mali leyi u nga ta va na yona loko n’wheti yi hela.
Xa vumbirhi, swi tsale ehansi swilo leswi lavekaka ekaya n’wheti ni n’wheti.
Xo hetelela, kamba loko muholo wa wena wu ta swi kota ku xava leswi lavekaka ekaya, loko wu nga swi fikeleli u nga ha hunguta leswi durhaka ku tlula muholo wa wena leswi nga bohiki ku swi xava.

“N’wheti ni n’wheti, hi wu tsala ehansi muholo wa hina ni leswi hi lavaka ku swi xava. Hi ringeta hi matimba ku hlayisa mali ya ndzindzakhombo ni ku kunguhata swikoxo swa nkarhi lowu taka. Sweswo swi hi endla hi nga vileli ngopfu hikuva hi va hi swi tiva ka ha ri nkarhi leswaku hi ta wu tirhisa njhani muholo wa hina.”—Carlos.

PAPALATA SWIKWELETI / HLAYISA MALI

Papalata swikweleti / hlayisa mali

Kunguhata ndlela leyi u nga xi hungutaka hayona xikweleti. Loko swi koteka, tshika ku tinghenisa eswikweletini. Hlayisa mali leyi u nga ta kota ku xava leswi u swi lavaka.
Hlayisa mali n’wheti ni n’wheti leswaku u ta xava leswi u swi lavaka enkarhini lowu taka.

TIRHA HI MATIMBA / HLAYISA NTIRHO

Bibele yi ri: “Swa vuyerisa ku endla ntirho wun’wana ni wun’wana wo tika.”—Swivuriso 14:23.

Tirha hi matimba / hlayisa ntirho wa wena

Rhandza ntirho wa wena. Hambiloko ku nga ri wona ntirho lowu u wu rhandzaka kambe wa ku pfuna leswaku u kuma mali.
Tirha hi matimba entirhweni wa wena naswona u tshembeka. Sweswo swi ta ku pfuna leswaku u hlayisa ntirho wa wena naswona enkarhini lowu taka swi ta ku olovela ku kuma ntirho wun’wana.

“Ndzi amukela ntirho wun’wana ni wun’wana lowu nga kona, hambiloko ndzi nga wu rhandzi kumbe wu holela swimalana. Mikarhi hinkwayo ndzi tirha hi ku tiyimisela onge hiloko ndzi ti tirha.”—Dmitriy.

Leswi u nga swi endlaka loko u lavana ni ntirho . . .

Teka goza. Fonela tikhampani leti nga ni mitirho leyi u nga yi tirhaka hambiloko va nga se navetisa ntirho wa kona. Byela vanghana ni vandyangu wa ka n’wina leswaku u lavana ni ntirho.
Fambisana ni swiyimo. A swi talanga ku kuma ntirho lowu nga ni swilo hinkwaswo leswi u swi lavaka.