Dyondzo 20
Dina A Nghena eKhombyeni
XANA wa va vona vanhu lava Dina a va endzelaka? U endzela vanhwanyana van’wana lava tshamaka etikweni ra le Kanana. Xana tata wa yena Yakobe u ta swi tsakela sweswo? Leswaku u kota ku hlamula xivutiso lexi, ringeta ku tsundzuka leswi Abrahama na Isaka a va swi ehleketa hi vavasati va le Kanana.
Xana Abrahama a a swi lava leswaku n’wana wa yena Isaka a teka nhwanyana wa le Kanana? Doo, a a nga swi lavi. Xana Isaka na Raveka a va swi lava leswaku n’wana wa vona Yakobe a teka nhwanyana wa Mukanana? Doo, a va nga swi lavi. Xana wa swi tiva leswaku ha yini?
Hileswi vanhu va le Kanana a va gandzela swikwembu swa hava. A va nga ri vanhu lavanene lava munhu a nga tekanaka na vona kumbe ku kuma munghana lonkulu eka vona. Kutani hi nga tiyiseka leswaku Yakobe a a nga ta swi tsakela leswaku n’wana wakwe a endla xinghana ni vanhwanyana lava va Vakanana.
Hakunene, Dina u nghene ekhombyeni. Xana wa n’wi vona wanuna wa Mukanana exifanisweni lexi loyi a languteke Dina? Vito rakwe i Xikeme. Siku rin’wana loko Dina a endzile, Xikeme u teke Dina kutani a n’wi sindzisa ku etlela na yena. Sweswo a swi bihile hikuva i vanhu lava tekaneke ntsena lava faneleke va etlela swin’we. Nchumu lowo biha lowu Xikeme a wu endleke eka Dina wu vange makhombo yo tala.
Loko vamakwavo va Dina va twa leswi endlekeke, va karihe ngopfu. Vambirhi va vona, ku nga Simiyoni na Levhi, a va hlundzuke ngopfu lerova va teke mabanga kutani va ya emutini va ya hlasela vavanuna va kwalaho va nga swi rindzelanga. Vona ni vamakwavo va dlaye Xikeme swin’we ni vavanuna lavan’wana hinkwavo. Yakobe u hlundzukile hikwalaho ka leswi vana va yena va majaha va endleke nchumu lowu wo biha.
Xana swiphiqo leswi hinkwaswo swi sungule njhani? Swi sungule hikwalaho ka leswi Dina a endleke xinghana ni vanhu lava nga yingisiki milawu ya Xikwembu. A hi swi lavi ku endla xinghana ni vanhu vo tano, a hi swona ke?