Dyondzo 80
Vanhu Va Xikwembu Va Huma eBabilona
SE KU hundze kwalomu ka malembe mambirhi Vameda ni Vaperesiya va teke muti wa Babilona. Vona leswi humeleleke! Ina, Vaisrayele va huma emutini wa Babilona. Xana va ntshunxiwe njhani? I mani loyi a va ntshunxeke?
Va ntshunxiwe hi Korexe, hosi ya Peresiya. Loko Korexe a nga si velekiwa, Yehovha u byele muprofeta wakwe Esaya leswaku a tsala leswi malunghana na yena: ‘U ta endla leswi ndzi lavaka leswaku u swi endla. Tinyangwa ti ta siyiwa ti pfuriwile leswaku u nghena u teka muti.’ Korexe u rhangerile eku hluriweni ka muti wa Babilona. Vameda ni Vaperesiya va nghene emutini nivusiku hi tinyangwa leti siyiweke ti pfulekile.
Kambe Esaya muprofeta wa Yehovha u tlhele a vula leswaku Korexe u ta lerisa leswaku Yerusalema ni tempele ya wona swi tlhela swi akiwa. Xana Korexe u xi nyikerile xileriso lexi? Ina. Korexe u byele Vaisrayele a ku: ‘Sweswi, yanani eYerusalema mi ya aka tempele ya Yehovha, Xikwembu xa n’wina.’ Hi swona leswi Vaisrayele lava va yaka eku swi endleni.
Kambe a hi Vaisrayele hinkwavo lava a va ri eBabilona lava a va ta swi kota ku tlhelela eYerusalema. A ku ri riendzo ro leha swinene ra kwalomu ka 800 wa tikhilomitara naswona vo tala a va dyuharile kasi van’wana a va vabya lerova a va nga ta famba mpfhuka wo leha. Naswona a ku ri ni swivangelo swin’wana leswi endleke leswaku vanhu van’wana va nga fambi. Kutani Korexe u byele lava nga fambiki a ku: ‘Nyikani vanhu lava yaka ku ya pfuxa Yerusalema ni tempele silivhere ni nsuku ni tinyiko tin’wana.’
Hikwalaho, Vaisrayele lava a va ya eYerusalema va nyikiwe tinyiko to tala. Korexe u tlhele a va nyika swibya ni swinwelo leswi Hosi Nebukadnetsara a a swi tekile etempeleni ya Yehovha loko a lovisa Yerusalema. Vanhu a va ri ni mindzhwalo yo tala loko va tlhelela endzhaku.
Endzhaku ko famba kwalomu ka tin’hweti ta mune, Vaisrayele va fike eYerusalema hi nkarhi lowu faneleke. A ku hundze malembe ya 70 hi mpfhuka muti wolowo wu lovisiwile, naswona a ku lo sala marhumbi ntsena. Kambe hambileswi Vaisrayele se a va tlhelele etikweni ra vona, a va ha ta va ni swiphiqo, tanihi leswi hi nga ta dyondza ha swona enkarhini lowu taka.
Esaya 44:28; 45:1-4; Ezra 1:1-11.