Dyondzo 115

Paradeyisi Leyintshwa eMisaveni

VONA mirhi leyo leha, swiluva swo tala ni tintshava to leha. Xana a ku sasekanga laha? Vona mhofu yi dya evokweni ra xifanyatana lexi. Nakambe vona tinghala ni tihanci leti nga laha ku nga ni byanyi bya rihlaza. Xana a wu nga ta swi tsakela ku tshama endlwini leyi nga endhawini yo fana ni leyi?

Xikwembu xi lava leswaku u hanya hilaha ku nga heriki emisaveni ya paradeyisi. Naswona a xi swi lavi leswaku u va ni switlhavi leswi karhataka vanhu namuntlha. Leswi hi leswi Bibele yi swi tshembisaka vanhu lava nga ta hanya eparadeyisini leyintshwa: ‘Xikwembu xi ta va na vona. Rifu a ri nge he vi kona hambi ku ri xirilo kumbe xitlhavi. Swilo swo sungula swi hundzile.’

Yesu u ta endla leswaku ku va ni ku cinca loku ko hlamarisa. Xana wa swi tiva leswaku swi ta endleka rini? Ina, endzhaku ka loko xi herise vubihi hinkwabyo emisaveni swin’we ni vanhu lavo biha. Tsundzuka, loko Yesu a ri laha misaveni, u horise vanhu lava khomiweke hi tinxaka hinkwato ta mavabyi hambi ku ri ku pfuxa vafi. Yesu u endle leswi ku kombisa leswi a nga ta swi endla emisaveni hinkwayo loko a ta va Hosi ya mfumo wa Xikwembu.

Anakanya ndlela leyi ku nga ta tsakisa ha yona eparadeyisini leyintshwa emisaveni! Yesu u ta va a fuma etilweni swin’we ni van’wana lava a va hlawuleke. Vafumi lava va ta khathalela vanhu hinkwavo emisaveni ni ku vona leswaku va tsakile. A hi voneni leswaku i yini lexi hi faneleke hi xi endla ku tiyisekisa leswaku Xikwembu xi ta hi nyika vutomi lebyi nga heriki eparadeyisini ya xona leyintshwa.

Nhlavutelo 21:3, 4; 5:9, 10; 14:1-3.