Xana Timbhoni Ta Yehova Ti Pfumela Yini?
“Hi vona swi fanerile ku twa eka wena leswi u swi anakanyaka, hikuva entiyisweni malunghana ni mpambukwa lowu ha swi tiva leswaku wu soriwa kwihi na kwihi.” (Mintirho 28:22, New World Translation) Varhangeri lava va tiko eRhoma yo sungula va veka xikombiso lexinene. Va lave ku twa munhu hi yexe, ematshan’wini yo twa vasori van’wana ntsena.
Hi ku fanana, Timbhoni ta Yehova namuntlha hakanyingi ta soriwa, naswona ku nga va xihoxo ku lava ku twa ntiyiso ehenhleni ka vona wu huma eka swihlovo leswi solaka. Kutani hi tsakela ku ku hlamusela swin’wana swa misinya ya leswi hi swi pfumelaka.
Bibele, Yesu Kriste Na Xikwembu
Hi pfumela leswaku “Matsalwa hinkwawo ma huhutiwile hi Xikwembu, ma pfuna.” (2 Timotiya 3:16) Hambi leswi van’wana va vuleke leswaku a hi Vakriste va xiviri, leswi a hi ntiyiso. Hi tiyisa vumbhoni bya muapostola Petro hi ku helela malunghana na Yesu Kriste: “A ku na vito rimbe ehansi ka matilo leri nyikiweke vanhu, leri hi fanelaka ku ponisiwa ha rona.”—Mintirho 4:12.
Hambi swi ri tano, leswi Yesu a vuleke leswaku hi yena “N’wana wa Xikwembu” ni leswaku hi yena loyi ‘Tatana a nga n’wi rhuma,’ Timbhoni ta Yehova ti pfumela leswaku Xikwembu i xikulu eka Yesu. (Yohane 10:36; 6:57) Yesu hi yexe u pfumerile: “Tatana ú nkulukumba ku tlula mina.” (Yohane 14:28; 8:28) Xisweswo a hi pfumeli leswaku Yesu u ringana na Tatana, hi laha dyondzo ya Vunharhu-Un’we yi vulaka ha kona. Kambe, hi pfumela leswaku u vumbiwe hi Xikwembu ni leswaku u le hansi ka xona.—Vakolosa 1:15; 1 Vakorinto 11:3.
Hi ririmi ra Xitsonga, vito ra Xikwembu i Yehova. Bibele yi ri: “Wena, loyi vito ra wena ntsena u nga YEHOVA, u tlakukile henhla ka misava hinkwayo.” (Psalma 83:18, King James Version) Ku pfumelelana ni xiboho lexi, Yesu u ri kandziyise swinene vito ra Xikwembu, a dyondzisa valandzeri vakwe ku khongela va ku: “Tata wa hina, la nge matilweni, vito ra wena a ri hlawuleke.” Naswona yena hi yexe u khongele eka Xikwembu a ku: “Vito ra wena ndzi ri hlavuterile eka vanhu lava u ndzi nyikeke vona.”—Matewu 6:9; Yohane 17:6.
Timbhoni ta Yehova ti pfumela leswaku ti fanele ku fana na Yesu eku tiviseni ka vito ra Xikwembu na swikongomelo eka van’wana. Hikwalaho hi tekelele vito ra Timbhoni ta Yehova hikuva hi tekelela Yesu, “mbhoni leyo tshembeka.” (Nhlavutelo 1:5; 3:14) Hi mfanelo, Esaya 43:10 yi vulavula hi vanhu lava yimelaka Xikwembu yi ku: “Mi timbhoni ta mina, ku vula Yehova, kun’we ni nandza wa mina loyi ndzi n’wi hlawuleke.”
Mfumo Wa Xikwembu
Yesu u dyondzise valandzeri vakwe ku khongela va ku, “A ku te ku fuma ka wena,” naswona u endle leswaku Mfumo wolowo wu va nhloko-mhaka-nkulu ya ku dyondzisa kakwe. (Matewu 6:10; Luka 4:43) Timbhoni ta Yehova ti pfumela leswaku Mfumo i hulumendhe ya xiviri leyi humaka etilweni, leyi nga ta fuma misava, ni leswaku Yesu Kriste i Hosi ya wona leyi hlawuriweke leyi nga vonekiki. “Hulumendhe yi ta va ekatleni ra yena,” ku vula Bibele. “Ku kula ka hulumendhe yakwe ni ku rhula a swi nga vi na makumu.”—Esaya 9:6, 7, KJ.
Hambi swi ri tano, Yesu Kriste a nga ka a nga vi hosi ya hulumendhe ya Xikwembu a ri yexe. U ta va ni vafumi-kulobye vo tala etilweni. “Loko hi tiyisela,” ku tsale muapostola Pawulo, “nakona hi ta fuma na yena.” (2 Timotiya 2:12) Bibele yi komba leswaku vanhu lava pfuxeriweke ku fuma na Kriste etilweni va hikiwe va va “144 000, lava kutsuriweke emisaveni.”—Nhlavutelo 14:1, 3.
Kavula, hulumendhe yihi na yihi yi fanele ku va ni vafumiwa, naswona Timbhoni ta Yehova ti pfumela leswaku tibiliyoni to tala ehandle ka vafumi lava va le tilweni ti ta kuma vutomi lebyi nga heriki. Eku heteleleni misava, leyi hundzuriweke yi va paradeyisi leyo saseka, yi ta tala hi vafumiwa lava fanelekaka va Mfumo wa Xikwembu, lava hinkwavo va titsongahatelaka ku fuma ka Kriste ni vafumi-kulobye. Xisweswo Timbhoni ta Yehova ti tiyiseka swinene leswaku misava yi nga ka yi nga lovisiwi nikan’we na leswaku xitshembiso xa Bibele xi ta hetiseka: “Lavo lulama va ta fuma misava, va ta tshama ka yona hi masiku.”—Psalma 37:29; 104:5.
Kambe Mfumo wa Xikwembu wu ta tisa ku yini? Xana i ku va vanhu hinkwavo hi ku tirhandzela va titsongahatela hulumendhe ya Xikwembu? Ku hambana ni sweswo, hi ku twakala Bibele yi komba leswaku ku ta ka Mfumo swi ta lava ku nghenelela loku kongomeke ka Xikwembu etimhakeni ta misava: “Xikwembu xa matilo xi ta pfuxa ku fuma loku nga ta ka ku nga onhaki, ni siku rin’we, kutani vuhosi bya kona byi . . . ta seletela ni ku herisa ku fuma koloku hinkwako, kambe kona ku ta va kona hi laha ku nga riki na makumu.”—Daniel 2:44.
Mfumo wa Xikwembu wu ta ta rini ke? Exisekelweni xa vuprofeta bya Bibele lebyi byi hetisekaka sweswi, Timbhoni ta Yehova ti pfumela leswaku wu ta ta sweswinyana. Hi ku rhambela ku kambisisa vuprofeta byin’wana lebyi hlamuselaka timhaka ta “masiku ya makumu” ya mafambiselo lawa yo biha ya swilo. Byi rhekhodiwe eka Matewu 24:3-14; Luka 21:7-13, 25-31; na 2 Timotiya 3:1-5.
Hikwalaho ka leswi hi ‘rhandzaka Yehova Xikwembu xa hina hi timbilu ta hina hinkwato, moya, miehleketo, ni matimba, ni munhu-kulorhi tanihi loko hi tirhandza,’ a hi avananga hi ku ya hi matiko, tinxaka ni ku akisana. (Marka 12:30, 31) Hi xiyiwa emisaveni hinkwayo hikwalaho ka rirhandzu leri kombisiwaka exikarhi ka vamakwerhu va Vukriste lava kumekaka ematikweni hinkwawo. (Yohane 13:35; 1 Yohane 3:10-12) Xisweswo hi hlayisa xiyimo xa vukala-tlhelo etimhakeni ta misava ta matiko wolawo. Hi ringeta ku fana ni vadyondzisiwa vo sungula va Yesu, lava ha vona a nga te: “A hi va misava, tani hi leswi na mina ndzi nga riki wa misava.” (Yohane 17:16) Hi pfumela leswaku ku tshama hi hambanile ni misava swi vula ku papalata vunghwavava lebyi taleke namuntlha, ku katsa ni ku hemba, ku yiva, vumbhisa, vuoswi, vusodoma, ku tirhisiwa loko biha ka ngati, ku gandzela swifaniso ni swin’wana swilo swo tano leswi soriwaka eBibeleni.—1 Vakorinto 6:9-11; Vaefesa 5:3-5; Mintirho 15:28, 29.
Ntshembo Wa Vumundzuku
Timbhoni ta Yehova ti pfumela leswaku vutomi bya hina bya sweswi emisaveni leyi a hi byona ntsena byi nga kona. Hi pfumela leswaku Yehova u rhumele Kriste emisaveni ku ta halata ngati ya vutomi byakwe tanihi nkutsulo leswaku vanhu va ta va ni xiyimo xo lulama na Xikwembu ivi va kuma vutomi lebyi nga heriki emafambiselweni lamantshwa ya swilo. Hi laha muapostola wa Yesu a vuleke ha kona: ‘Hi endliwile lava lulameke sweswi, hi mhaka ya ngati ya yena.’ (Varhoma 5:9; Matewu 20:28) Timbhoni ta Yehova ti tlangela swinene eka Xikwembu ni le ka N’wana wa xona hikwalaho ka lunghiselelo leri ra nkutsulo leri endlaka leswaku vutomi bya nkarhi lowu taka byi koteka.
Timbhoni ta Yehova ti na ntshembo lowu heleleke eka vutomi bya nkarhi lowu taka, lebyi seketeriweke hi ku pfuka eku feni ehansi ka Mfumo wa Xikwembu. Hi tshemba, hi laha Bibele yi dyondzisaka ha kona, leswaku loko munhu a fa vukona byakwe byi hela hi xiviri, leswaku ‘hi siku rero makungu ya yena ma hela.’ (Psalma 146:3, 4; Ezekiel 18:4; Eklesiasta 9:5) Ina, vutomi bya nkarhi lowu taka bya lava feke byi tiseketele hi ku tsundzukiwa ka vona hi Xikwembu eku pfuxiweni.—Yohane 5:28, 29.
Hambi swi ri tano, Timbhoni ta Yehova ta kholwa leswaku vo tala lava hanyaka sweswi va ta pona loko Mfumo wa Xikwembu wu tisa makumu ya tihulumendhe leti nga kona hinkwato naswona, hi laha Nowa ni ndyangu wakwe va poneke ha kona Ndhambi, va ta hambeta va hanya leswaku va tsakela vutomi hi masiku emisaveni leyi basisiweke. (Matewu 24:36-39; 2 Petro 3:5-7, 13) Kambe ha pfumela leswaku ku pona ku tiseketele hi ku fikelela swilaveko swa Yehova, hi laha Bibele yi vulaka ha kona: “Misava ya hundza . . . , kambe loyi a endlaka ku rhandza ka Xikwembu, u tshama hi laha ku nga heriki.”—1 Yohane 2:17; Psalma 37:11; Nhlavutelo 7:9, 13-15; 21:1-5.
Kahle-kahle, a swi koteki laha ku hlanganisa leswi pfumeriwaka hi Timbhoni ta Yehova hinkwaswo, kambe hi ku rhambela ku kuma vuxokoxoko byin’wana.
Handle ka mfungho, matsalwa ya Xiheveru lama tshahiweke eka xiphephana lexi ma huma eka Bibele ya Xitsonga kasi ya Xigriki ya huma eka Testamente ya Mahungu Lamanene.
[Marito lama tshahiweke exihlokweni lama nga eka tluka 4]
Hi amukerile vito ra Timbhoni ta Yehova hikuva hi tekelela Yesu