Ndzima 69

Mphikamakaneta Ya Ku Va Tatana

HI NKARHI wa nkhuvo, ku tlhuvutsana ka Yesu ni varhangeri va Vayuda ku kula hi matimba. “Ndza swi tiva leswaku mi vatukulu va Abrahama,” ku pfumela Yesu, “kambe mi lava ku ndzi dlaya, hikuva rito ra mina ri hava ndhawu eka n’wina. Mina ndzi vulavula hi leswi ndzi swi voneke eka Tatana, kambe n’wina mi endla leswi mi swi tweke swi huma eka tata wa n’wina.”

Hambi leswi a nga n’wi hlamuseliki tata wa vona, Yesu u swi veka erivaleni leswaku tata wa vona u hambane na wa yena. Hi ku ka va nga swi xiyi leswaku i mani loyi Yesu a nga na yena emianakanyweni, varhangeri va Vayuda va hlamula va ku: “Tata wa hina i Abrahama.” Va vona onge va ni ripfumelo leri fanaka ni ra Abrahama, loyi a a ri nakulobye wa Xikwembu.

Hambi swi ri tano, Yesu u va hlamarisa hi nhlamulo leyi nge: “Loko a mi ri vana va Abrahama, a mi ta tirha mintirho ya Abrahama.” Hakunene, n’wana wa xiviri u tekelela tata wa yena. “Kambe sweswi mi lava ku ndzi dlaya,” ku vula Yesu, “mina loyi ndzi nga mi byela ntiyiso lowu ndzi wu tweke eka Xikwembu! Abrahama a nga endlanga swona leswi.” Kutani nakambe Yesu u ri: “N’wina mi endla mintirho ya tata wa n’wina.”

Na sweswi a va n’wi twisisi loyi Yesu a vulavulaka ha yena. Va sindzisa leswaku vona i vana va le nawini va Abrahama, va ku: “Hina a hi vana vo tswariwa hi vuhunguki.” Hikwalaho, hi ku tivula vagandzeri va ntiyiso ku fana na Abrahama, va tiyisekisisa va ku: “Hi ni tatana un’we ntsena, xi nga Xikwembu.”

Kambe xana hakunene Xikwembu i Tata wa vona ke? Yesu wa hlamula: “Loko Xikwembu a xi ri tata wa n’wina, a mi ta ndzi rhandza, hikuva mina sweswi ndzi nga kwala ndzi huma eka Xikwembu. A ndzi tanga hi ku tisungulela, kambe ndzi rhumiwile hi xona. Hikwalaho ka yini mi nga twisisi leswi ndzi swi vulaka xana?”

Yesu u ringeta ku kombisa varhangeri lava va vukhongeri vuyelo bya ku n’wi landzula ka vona. Kambe sweswi hi ku kongoma u ri: “N’wina mi huma eka tata wa n’wina, a nga Diyavulosi, kutani mi tsakela ku endla ku navela ka tata wa n’wina.” Diyavulosi i tatana wa muxaka muni ke? Yesu u n’wi hlamusele tanihi mudlayi a tlhela a ku: “I muhembi, ni tata wa mavunwa.” Kutani Yesu wa dlayelela a ku: “Loyi a humaka eka Xikwembu u yingisa marito ya Xikwembu; n’wina a mi yingisi, hikuva a mi humi eka Xikwembu.”

Hikwalaho ka ku hlundzukisiwa hi ku avanyisa ka Yesu, Vayuda va hlamula va ku: “Xana ho hemba loko hi ku, u Musamariya, ni leswaku u ni demona ke?” Rito leri nge “Musamariya” ri tirhisiwa tanihi xiga xo hlekula kumbe ku rhukana, Vasamariya i vanhu lava a va vengiwa hi Vayuda.

Ku honisa ndzhukano wo n’wi hlekula hi ku va Musamariya, Yesu wa hlamula a ku: “Mina, a ndzi na demona, kambe ndzi xixima Tata wa mina, kutani n’wina a mi ndzi xiximi.” Loko a ya emahlweni Yesu u endla xitshembiso lexi hlamarisaka a ku: “Munhu la hlayisaka rito ra mina, a nga ka a nga voni rifu ni siku ni rin’we.” Kavula, Yesu a nga vuli swona leswaku hinkwavo lava n’wi landzelaka hi ku kongoma va nge voni rifu. Ku ri na sweswo, u vula leswaku va nga ka va nga voni ku loviseriwa makumu, kumbe “rifu ra vumbirhi,” leri ku nga riki na ku pfuxiwa eka rona.

Hambi swi ri tano, Vayuda va teka marito ya Yesu hi ku kongoma. Hikokwalaho, va ri: “Sweswi ha swi tiva leswaku u ni demona; Abrahama u file; swi tano na vaprofeta, va file; kutani wena u ku: ‘Loko munhu a hlayisa rito ra mina, a nga ka a nga khumbiwi hi rifu ni siku ni rin’we!’ Xana u lonkulu ku tlula Abrahama tata wa hina loyi a nga fa xana? Vaprofeta na vona va file; xana u tivona u ri mani xana?”

Eku tlhuvutsaneni loku hinkwako, swi le rivaleni leswaku Yesu u kongomisa vanhu lava emhakeni ya leswaku hi yena Mesiya la tshembisiweke. Kambe ku ri na ku va a hlamula xivutiso xa vona malunghana ni ku titivisa ka yena hi ku kongoma, Yesu u ri: “Loko ndzi tidzunisa, ku tidzunisa ka mina loku a ku pfuni nchumu. La ndzi dzunisaka i Tata wa mina, loyi mi nge: ‘I Xikwembu xa hina.’ Kasi a mi n’wi tivi, kambe mina ndza n’wi tiva. Loko ndzi nga vula leswaku a ndzi n’wi tivi, ndzi ta va muhembi ku fana na n’wina.”

Loko a ya emahlweni, Yesu nakambe u kombetela eka Abrahama la tshembekaka, a ku: “Tata wa n’wina Abrahama ú tsakile ngopfu ku vona siku ra mina; ú ri vonile, a vuya a tsaka.” Ina, hi mahlo ya ripfumelo, Abrahama u langutele ku fika ka Mesiya la tshembisiweke. Hi ku kayivela ripfumelo, Vayuda va hlamula va ku: “A wu si fika ni le ka malembe ya 50, kutani xana u ri, u vonile Abrahama xana?”

Yesu wa hlamula a ku: “Ndzi vurisile, ndzi ri ka n’wina: Loko Abrahama a nga si va kona, mina a ndzi ri kona.” Kavula, Yesu u hlamusela hi vukona bya yena bya le mahlweni ka ku va munhu tanihi munhu wa matimba wa moya etilweni.

Hikwalaho ka ku hlundzukisiwa hi ku tivula ka Yesu leswaku a a ri kona emahlweni ka Abrahama, Vayuda va rholela maribye ku n’wi hoxetela. Kambe wa tumbela ivi a humela ehandle ka tempele a nga vavisekanga. Yohane 8:37-59, BX; Nhlavutelo 3:14; 21:8.

▪ Yesu u swi kombisa hi ndlela yihi leswaku yena ni valala va yena va ni vatatana lava hambaneke?

▪ Hi wihi nkoka wa ku vitaniwa ka Yesu Musamariya hi Vayuda?

▪ Xana Yesu u vula leswaku valandzeri va yena va nga ka va nga ri voni rifu hi ndlela yihi?