Ndzima 83

U Amukeriwe Hi Mufarisi

YESU wa ha ri ekaya ra Mufarisi la dumeke, naswona wa ha ku horisa munhu loyi a a xaniseka hi vuvabyi byo pfimba miri. Loko a xiya vaendzi-kulobye va ri karhi va hlawula switshamo swa le mahlweni eswakudyeni, u dyondzisa dyondzo leyi vulavulaka hi ku titsongahata.

“Loko munhu a ku rhamba enkhubyeni wa vukati,” Yesu wa hlamusela, “u nga yi u ya tshamisa exitshan’wini xa le mahlweni; hikuva swi nga kumeka leswaku un’wana loyi a ku tlulaka hi ku chaviseka u rhambiwile na yena hi n’wini wa nkhuvo; kutani loyi a nga mi rhamba hi vumbirhi bya n’wina, u ta ta, a ku ka wena: ‘Sukela munhu loyi exitshamo lexi.’ Kutani u ta ya tshama u ri ni tingana exitshan’wini xa le ndzhaku.”

Kutani Yesu wa tsundzuxa a ku: “Loko u rhambiwile, yana u ya tshamisa exitshan’wini xa le ndzhaku leswaku loko ku ta loyi a ku rhambeke, u ta ku ka wena: ‘Nakulorhi, tshinela haleno henhla.’ Hi mukhuva wolowo, u ta dzunisiwa emahlweni ka hinkwavo lava tshameke eswakudyeni swin’we na wena.” Loko a dlayelela, Yesu u ri: “Hikuva un’wana ni un’wana loyi a tikurisaka, u ta tsongahatiwa; kambe loyi a titsongahataka u ta kurisiwa.”

Ku ya emahlweni, Yesu u vulavula ni Mufarisi loyi a n’wi rhambeke ivi a hlamusela ndlela yo lunghiselela swakudya leswi pfumelelanaka hi xiviri na Xikwembu. “Loko u endla nkhuvo wa xifihlulo kumbe wa xilalelo, u nga rhambi vanghana va wena, kumbe vamakwenu, kumbe maxaka ya wena, kumbe vafuwi lava vandzakaneke na wena; hikuva na vona va ta ku rhamba, kutani swi hundzuka xinkhenso eka wena. Kambe loko u endla nkhuvo, rhamba vapfumari, ni swilema, ni vahluleki, ni lavo-fe-mahlo; u ta kateka, hikuva a va na swa ku ku tlherisela va ku nkhensa ha swona.”

Ku lunghiselela vapfumari swakudya swo tano ku ta tisa ntsako eka mulunghiseleli wa swona hikuva, hi laha Yesu a hlamuselaka ha kona eka muamukeri wa yena, “Hi siku ra ku pfuka ka lavo lulama u ta tlheriseriwa swona.” Nhlamuselo ya Yesu ya swakudya leswi swi amukelekaka yi tsundzuxa muendzi-kulobye hi muxaka wun’wana wa swakudya. Muendzi loyi u ri: “Ku katekile loyi a nga ta dya swakudya eMfun’weni wa Xikwembu.” Hambi swi ri tano, a hi hinkwavo lava kahle-kahle va amukelaka langutelo rero ro tsakisa, hi laha Yesu a yaka emahlweni a kombisa ha kona hi xifaniso.

“Munhu un’wana u tshama a endla nkhuvo lowukulu wa swakudya, a rhamba vanhu lavo tala eka wona. Kutani . . . a rhuma nandza wa yena ku ya tivisa lava rhambiweke a ku: ‘Tanani, swilo hinkwaswo swi lunghisiwile.’ Kambe hinkwavo va va nomu wun’we ku tilandzula. Lowo sungula a ku ka nandza: ‘Ndzi xavile nsimu, kutani ndzi fanele ku ya yi vona; ndza ku kombela, u ya ndzi landzulela.’ Un’wana a ku: ‘Ndzi xavile khume ra tihavi, kutani ndzi ya eku ti ringeteni; ndza ku kombela, u ya ndzi landzulela.’ Un’wana a ku: ‘Ndza ha ku teka nsati, hikwalaho a ndzi koti ku ya.’”

Vona ku tiyimelela loku nga twaliki swonghasi! Nsimu kumbe swifuwo hakanyingi swa kamberiwa swi nga si xaviwa, kutani a ku na xihatla xo ya swi languta endzhaku. Hi ku fanana, ku teka ka munhu a ku nga fanelanga ku n’wi sivela ku amukela xirhambo xo tano xa nkoka. Kutani loko a twa hi ku tiyimelela loku, n’wini u sungula ku hlundzuka kutani a rhuma nandza wakwe a ku:

“‘Hatlisa, u famba, u ya eswitarateni, ne tindleleni ta muti, u tisa haleno vapfumari, ni swilema, ni lavo-fe-mahlo, ni vahluleki.’ Kutani nandza a ku: ‘Hosi, ku endliwile hi laha u leriseke ha kona, kambe vutshamo bya ha ri kona.’ Kutani n’wini a ku ka nandza: ‘Yana etindleleni, u rhendzeleka ni lomu ku biyiweke hi rihlampfu, u hluhlurheta vanhu ku nghena leswaku yindlu ya mina yi tala. . . . A ku na munhu ni un’we wa lava rhambiweke la nga ta nantswa nkhuvo wa mina.’”

I xiyimo xihi lexi hlamuseriwaka hi xikombiso lexi ke? Kavula, “n’wini” la lunghiselelaka swakudya u yimela Yehova Xikwembu; “nandza” la hundziselaka xirhambo u yimela Yesu Kriste; naswona “nkhuvo lowukulu wa swakudya,” wu yimela minkarhi ya ku va eku pfumelelaneni ni Mfumo wa le matilweni.

Lava va nga rhanga va amukela xirhambo xo ta eku pfumelelaneni na Mfumo, ku tlula van’wana hinkwavo, a ku ri varhangeri va vukhongeri bya Vayuda va siku ra Yesu. Hambi swi ri tano, va ale xirhambo. Xisweswo, ngopfu-ngopfu ku sukela hi Pentekosta ya 33 C.E., xirhambo xa vumbirhi xi hundziseriwe eka vanhu lava nga nyawuriki ni lava titsongahataka va tiko ra Yuda. Kambe a ku pfumelanga lava ringaneke ku tata swivandla swa 144 000 eMfun’weni wa Xikwembu wa le tilweni. Kutani hi 36 C.E., malembe manharhu na hafu endzhakunyana, xirhambo xa vunharhu ni xo hetelela xi hundziseriwe eka lava nga riki Vayuda lava nga yimbangiki, naswona ku hlengeletiwa ka vanhu vo tano ku ya emahlweni ku ta fika esikwini ra hina. Luka 14:1-24.

▪ I dyondzo yihi leyi vulavulaka hi ku titsongahata leyi Yesu a yi dyondzisaka?

▪ Xana muamukeri wa vaendzi a nga lunghiselela swakudya leswi amukeriwaka hi Xikwembu hi ndlela yihi, naswona ha yini swi ta n’wi nyika ntsako?

▪ Ha yini ku tiyimelela ka vaendzi lava rhambiweke ku nga twali?

▪ I yini lexi faniseriwaka hi xikombiso xa Yesu xa “nkhuvo lowukulu wa swakudya”?