Ndzima 84

Vutihlamuleri Bya Ku Va Mudyondzisiwa

ENDZHAKU ka ku suka endlwini ya Mufarisi loyi a dumeke, loyi entiyisweni a nga xirho xa Sanedri, Yesu u ya emahlweni a kongoma eYerusalema. U landzeriwa hi mintshungu leyikulu. Kambe minsusumeto ya vona hi yihi? Xana entiyisweni ku katseka yini eku veni ka mulandzeri wa yena wa ntiyiso?

Loko va karhi va famba, Yesu u hundzulukela emintshungwini naswona kumbexana u va tsema minhlana loko a ku: “Loko un’wana a ta ka mina, kambe a nga ri la vengaka tata wa yena, ni mana wa yena, ni nsati, ni vana, ni makwavo, hambi byi ri vutomi bya yena, a nga ka a nga koti ku va mudyondzisiwa wa mina.”

Xana Yesu u vula yini? Yesu laha a nga vuli swona leswaku valandzeri va yena va fanele va venga maxaka ya vona hi ku kongoma. Ematshan’wini ya sweswo, va fanele va ya venga emhakeni ya leswaku va rhandza yena ngopfu ku tlula vona. Yakobo kokwa wa Yesu ku vuriwa leswaku u ‘venge’ Leya kutani a rhandza Rahele, leswi vulaka leswaku Leya a a rhandziwa kantsongo ku tlula sesi wa yena Rahele.

Nakambe, xiya leswaku Yesu u vule leswaku mudyondzisiwa u fanele a venga “hambi [wu ri moya wa] yena,” kumbe vutomi. Nakambe lexi Yesu a xi vulaka hi leswaku mudyondzisiwa wa ntiyiso u fanele a rhandza Yena ku tlula leswi a byi rhandzisaka swona vutomi bya yena n’wini. Xisweswo Yesu u kandziyisa leswaku ku va mudyondzisiwa wa yena i vutihlamuleri lebyikulu. A hi nchumu wo wu nghenela u nga kalanga u wu xiyisisa hi vukheta.

Ku karhateka ni nxaniso swa katseka eku veni ka mudyondzisiwa wa Yesu, tanihi laha a yaka emahlweni a komba ha kona a ku: “Loyi a nga rhwariki xihambano xa yena a ndzi landza, a nga ka a nga koti ku va mudyondzisiwa wa mina.” Xisweswo, mudyondzisiwa wa ntiyiso u fanele a rhandza ku tokota ndzhwalo lowu fanaka wa xisandzu lowu Yesu a wu tiyiseleke, loko swi laveka, hambi ku ri ku katsa rifu emavokweni ya valala va Xikwembu, leswi Yesu a nga ta swi endla ku nga ri khale.

Hikwalaho ke, ku va mudyondzisiwa wa Kriste i mhaka leyi mintshungu leyi yi n’wi landzelaka yi faneleke ku yi kambisisa hi vukheta swinene. Yesu u kandziyisa yinhla leyi hi ku tirhisa xifaniso. “Hikuva,” ku vula yena, “i mani exikarhi ka n’wina, la nga rhangiki hi ku tshama hansi loko a lava ku aka xihondzo, a hlaya leswi a nga ta humesa swona, ku vona loko mali ya yena yi ta ringana ku heta ntirho xana? Loko a nga endlanga sweswo, u ta aka masungulo ntsena, kutani swi ya n’wi tsandza ku heta; hinkwavo lava nga ta swi vona va ta sungula ku n’wi hleka, va ku: ‘Munhu loyi u sungurile ku aka, kambe u tsandzekile ku heta.’”

Kutani Yesu u kombisa mintshungu leyi yi n’wi landzaka leswaku emahlweni ka ku va vadyondzisiwa va yena, yi fanele yi kunguhata hi laha ku tiyeke leswaku yi ta hetisisa leswi katsekaka, tanihi leswi munhu la lavaka ku aka xihondzo a tiyisekaka a nga si sungula leswaku u na xuma xo xi heta ha xona. Loko a nyikela xifaniso xin’wana, Yesu u hambeta a ku:

“Kumbe hi yihi hosi leyi humaka ku ya lwa ni hosi yin’wana, yi nga rhanganga hi ku tshama hansi, yi vona leswaku, xana hi vanhu va yona va 10 000 yi nga ya lwa ni hosi leyi yi taka yi ri ni vanhu va 20 000 xana? Loko vanhu va yona va nga ringananga, yi ta rhuma tintsumi ku ya kombela ku etlela ka tiko, nala a ha ri kule.”

Kutani Yesu u kandziyisa yinhla ya swifaniso swa yena, a ku: “Kutani ke un’wana ni un’wana exikarhi ka n’wina la nga tshikiki leswi a nga na swona, a nga ka a nga koti ku va mudyondzisiwa wa mina.” Sweswo hi leswi mintshungu leyi n’wi landzaka, ina, ni hinkwavo lava dyondzaka hi ta Kriste, va faneleke ku rhandza ku swi endla. Va fanele ku tiyimisela ku lahlekeriwa hi hinkwaswo leswi va nga na swona—hinkwaswo swa vona, ku katsa ni vutomi bya vona hi byoxe—loko va ta va vadyondzisiwa va yena. Xana wa swi rhandza ku endla leswi?

Yesu u hambeta a ku: “Munyu i xilo lexo nandziha.” Eka Dyondzo ya yena ya le Ntshaveni, u vule leswaku vadyondzisiwa va yena i “munyu wa misava,” leswi vulaka leswaku va na nkucetelo lowu hlayisaka eka vanhu, tanihi leswi munyu wa xiviri wu hlayisaka. Yesu u dlayelela hi ku: “Kambe loko munyu wu phyama, wu ta lungiwa hi yini ke? A wa ha pfuni nchumu, hambi ku nonisa misava, kumbe ku hundzuka vulongo; wu cukumetiwa ehandle. La nga ni tindleve ku yingisa, a a yingise!”

Kutani Yesu u komba leswaku hambi ku ri lava va nga va vadyondzisiwa va yena nkarhi wo leha a va fanelanga va tsana eku tiyimiseleni ka vona ku ya emahlweni. Loko va tsana, va nge pfuni nchumu, va ta va nchumu lowu hlekisaka emisaveni leyi naswona va nga faneleki emahlweni ka Xikwembu, entiyisweni, va va ndzhukano eka Xikwembu. Hikwalaho, ku fana ni munyu lowu phyamaka, lowu onhakeke, va ta cukumeteriwa ehandle, ina, va lovisiwa. Luka 14:25-35; Genesa 29:30-33; Matewu 5:13.

▪ Xana swi vula yini ku ‘venga’ maxaka ya munhu na yena hi yexe?

▪ Hi swihi swifaniso swimbirhi leswi Yesu a swi nyikelaka, naswona swi vula yini?

▪ Hi yihi yinhla ya tinhlamuselo to hetelela ta Yesu ehenhleni ka munyu?