Ndzima 103
Ku Endzela Tempele Nakambe
YESU ni vadyondzisiwa va yena va ha ku heta madyambu ya vona ya vunharhu eBetaniya hi mpfhuka va huma eYeriko. Kutani ku tlhava ka dyambu ra Musumbunuku, Nisan 10, ku va kuma ana va ri egondzweni ro ya eYerusalema. Yesu u twa ndlala. Kutani loko a vona nkuwa lowu nga ni matluka, u hambukela eka wona ku ya vona loko wu ri ni makuwa.
Matluka ya murhi ya hluke hi ku hatlisa, tanihi leswi nguva ya makuwa yi nga hi June, naswona sweswi ko va eku heleni ka March. Hambi swi ri tano, Yesu u swi teke hi ku olova leswaku leswi matluka ya hatleke ma hluka, makuwa na wona ma nga va ma hatle ma va kona. Kambe u hetiwe matimba. Matluka ya nyike murhi xivumbeko xo kanganyisa. Kutani Yesu u rhukana murhi, a ku: “A ku nga ha vi na munhu la nga ta dya mihandzu ya wena ni siku ni rin’we.” Vuyelo bya ku rhukana ka Yesu murhi wa nkuwa ni leswi a swi fanekisela swona swa dyondziwa eka mixo lowu landzelaka.
Ku ya emahlweni, Yesu ni vadyondzisiwa va yena hi ku hatlisa va fika Yerusalema. U ya etempeleni, leyi a yi endzerile hi ndzhenga lowu hundzeke. Kambe namuntlha u teka goza, tanihi laha a swi endleke ha kona malembe manharhu lama hundzeke loko a te eka Paseka hi 30 C.E. Yesu u hlongola lava xavisaka ni lava xavaka etempeleni, a wisetela matafula ya lava bindzurisaka mali ni switshamo swa lava xavisaka matuva. A nga pfumeleli munhu ku tsemakanya tempele a rhwele xa nchumu.
Ku avanyisa lava va bindzurisaka mali ni ku xavisa swifuwo etempeleni, u ri: “Xana a ku tsariwanga leswaku: ‘Yindlu ya mina yi ta vuriwa yindlu ya xikhongelo eka matiko hinkwawo’ xana? Kasi n’wina mi yi endlile ‘bako ra makhamba.’” I makhamba hikuva va lava minxavo yo tlakuka eka lava va bohekaka ku xava eka vona swifuwo leswi lavekaka swa magandzelo. Hikwalaho Yesu u languta maendlelo lawa ya bindzu tanihi ku vutla kumbe vukhamba.
Loko vaprista lavakulu, vatsari ni vakulukumba va tiko va twa leswi Yesu a swi endleke, nakambe va lava ndlela yo n’wi dlaya. Hi mukhuva wolowo va tikombisa va ri lava nga ololoxekiki. Kambe, a va tivi leswaku Yesu va nga n’wi dlayisa ku yini, hikuva vanhu hinkwavo a va namarhela eka yena va n’wi yingisela.
Handle ka Vayuda va ntumbuluko, Vamatiko na vona a va tile eka Paseka. Lava i vaproselita, leswi vulaka leswaku va hundzukele evukhongerini bya Vayuda. Magriki man’wana, lava entiyisweni va nga vaproselita, sweswi va tshinelela Filipi kutani va kombela ku vona Yesu. Filipi u ya ka Andriya, kumbexana ku ya vutisa loko ku hlangana koloko ku ta va ku fanerile. Yesu u vonaka a ha ri etempeleni, laha Magriki ma kotaka ku n’wi vona.
Yesu wa swi tiva leswaku u salele hi masiku ma nga ri mangani ya vutomi, kutani u kombisa xiyimo xa yena kahle: “Nkarhi wu fikile lowu N’wana-wa-Munhu a nga ta tlakusiwa ha wona. Ndzi tiyisile ndzi ri ka n’wina: Loko ndzoho ya vele yi nga weli emisaveni yi fa, yi to tshama yi ri tano; kambe loko yi fa, yi ta chela ngopfu.”
Ndzoho yin’we ya vele yi ni ntikelo wuntsongo. Kambe, ku vuriwa yini hi loko yi vekiwa emisaveni ivi yi “fa,” yi hetelela vutomi bya yona tanihi mbewu? Ya mila naswona hi nkarhi yi kula yi va rihlanga leri humesaka mbewu yo tala ngopfu ya mavele. Hi ku fanana, Yesu i munhu un’we la hetisekeke. Kambe loko a fa a ri la tshembekeke eka Xikwembu, u va ndlela yo kuma vutomi lebyi nga heriki eka lava tshembekeke lava nga ni moya wun’we wo tinyiketa lowu a nga na wona. Xisweswo, Yesu u te: “La rhandzaka vutomi bya yena, byi ta n’wi lahlekela, kambe la vengaka vutomi bya yena emisaveni leyi, ú ta byi hlayisela vutomi lebyi nga heriki.”
Yesu hi ku olova a nga ehleketi hi yena ntsena, hikuva u ya emahlweni a hlamusela: “Loko munhu a ndzi tirhela, a a ndzi landze, kutani laha ndzi nga kona, na yena nandza wa mina ú ta va kona. Loko munhu a ndzi tirhela, Tatana u ta n’wi komba mafundza.” I hakelo muni yo hlamarisa swonghasi yo landzela Yesu ni ku n’wi tirhela! I hakelo yo nyikiwa hi Tatana ku hlanganyela na Kriste eMfun’weni.
Hi ku ehleketa hi ku vaviseka lokukulu ni rifu ro vavisa leri n’wi yimeleke, Yesu u ya emahlweni: “Sweswi moya wa mina wa karhateka; xana ndzi nga vula yini? Xana ndzi nga ku, Tatana, ndzi ponise eka nkarhi lowu, xana?” Loko leswi swi n’wi yimeleke swi ngo papalatiwa! Kambe, e-e, hi laha a vulaka ha kona: “Leswi, hi swo leswi ndzi nga tela swona, eka nkarhi lowu.” Yesu u pfumelelana ni malunghiselelo hinkwawo ya Xikwembu, ku katsa ni rifu ra yena ra gandzelo. Matewu 21:12, 13, 18, 19; Marka 11:12-18; Luka 19:45-48; Yohane 12:20-27.
▪ Hikwalaho ka yini Yesu a langutela ku kuma makuwa hambi leswi ku nga riki nguva ya wona?
▪ Hikwalaho ka yini Yesu a vula lava a va xavisa etempeleni “makhamba”?
▪ Yesu u fana ni ndzoho ya vele leyi faka hi ndlela yihi?
▪ Yesu u titwisa ku yini mayelana na ku xaniseka ni rifu leri n’wi yimeleke?