Ndzima 129

Ku Humelela Kun’wana

VADYONDZISIWA va ha vavisekile. A va yi twisisi nhlamuselo ya sirha leri nga riki na nchumu, hambi ku ri ku tshemba swiviko swa vavasati lava. Kutani endzhakunyana hi Sonto, Keleyopasi ni mudyondzisiwa un’wana va suka eYerusalema va ya aEmawusi, mpfhuka wo ringana 11 wa tikhilomitara.

Endleleni ya vona, loko va ri karhi va vulavula hi swiendlakalo swa siku, munhu loyi a nga tivekiki wa va joyina. “Hi tihi timhaka leti mi vulavulaka ha tona endleleni ke?” wa va vutisa.

Vadyondzisiwa va yima, va ri ni gome, kutani Keleyopasi a hlamula: “Exikarhi ka lava endzeke eYerusalema, xana hi wena u ri wexe la nga tiviki timhaka leti humeleleke kona hi masiku lawa ke?” Wa vutisa: “Hi tihi xana?”

“Ta Yesu wa Nazareta,” va hlamula. “Vaprista lavakulu ni vakulukumba va hina va n’wi nyiketile leswaku a avanyiseriwa rifu, kutani va n’wi vambile. Loko hi ri hina a hi tshembile leswaku hi yena loyi a nga ta kutsula Israyele.”

Keleyopasi ni loyi a a ri na yena va hlamusele xiendlakalo xo hlamarisa xa siku rero—xiviko xa mahlori xo vona tintsumi ni sirha leri nga riki na nchumu—kambe va vula ni xidoledole xa vona malunghana ni nhlamuselo ya swilo leswi. Munhu la nga tivekiki wa va tshinya: “Yo! vanhu lava nga twisisiki, va timbilu leti hlwelaka ku kholwa hinkwaswo leswi vuriweke hi vaprofeta! Xana a swi nga faneri leswaku Mesiya a twisiwa ku vaviseka koloku, a tlhela a nghena eku kwetsimeni ka yena ke?” Kutani a va hlamusela timhaka leti humaka ematsalweni yo kwetsima leti kombetelaka eka Kriste.

Eku heteleleni va fika ekusuhi ni le Emawusi, kutani munhu la nga tivekiki a endla onge u le riendzweni. Hi ku lava ku tiva swo tala, vadyondzisiwa va n’wi kombela hi matimba: “Xwana na hina, hikuva ri ya eku peleni.” Kutani a tshama a tsakela swakudya. Ku te loko a khongela a phema xinkwa a va nyika, va swi xiya leswaku hakunene a a ri Yesu hi miri wa vanhu. Kutani a nyamalala.

Kutani va twisisa leswaku hikwalaho ka yini munhu loyi a nga tivekiki a a tiva swo tala swonghasi! ‘Xana timbilu ta hina a ti pfurhanga,’ va vutisa, “loko a vulavula na hina endleleni, a hi hlamusela mapapila xana?” Hi xihatla, va hatlisa va tlhelela eYerusalema, laha va nga kuma vaapostola ni lava hlengeletaneke na vona. Keleyopasi ni loyi ngi a ri na yena va nga si vula nchumu, lavan’wana hi ku nyanyuka va vika: “Hakunene [Yesu u] pfukile eku feni, naswona [u] tikombile eka Simoni!” Kutani lavambirhi na vona va hlamusela hi laha Yesu a humeleleke ka vona ha kona. Se i minkarhi ya mune esikwini laha a nga humelela eka vadyondzisiwa va yena vo hambana-hambana.

Yesu u humelela ra vuntlhanu hi xitshuketa. Hambi leswi tinyangwa a ti pfariwile hi leswi vadyondzisiwa va chavaka Vayuda, a yima exikarhi ka vona, a ku: “Ku rhula a ku ve na n’wina!” Va tshukile hi ku ehleketa leswaku va vona xipuku. Kutani ke, ku va hlamusela leswaku a nga ri ndzhuti, Yesu u ri: “Xana mi chavisiwa ha yini, hikwalaho ka yini mi ri ni ku kanakana etimbilwini ta n’wina ke? Vonani swandla swa mina ni milenge ya mina! Hi mina hi xiviri xa mina. Ndzi khomeni mi ndzi ringetela. Xipuku a xi na nyama ni marhambu, kasi mina ndzi na swona.” Kambe ni sweswi, a va kombisi ku kholwa.

Leswaku a va endla va tshemba leswaku hi yena Yesu, u ri: “Xana mi ni swakudya kwala ke?” Endzhaku ka loko a amukele xikwavi xa nhlampfi lexi oxiweke a tlhela a xi dya, u ri: “Hi tona timhaka leti ndzi nga mi tivisa tona, loko ndza ha ri na n’wina, [ndzi nga si fa] [leswaku] hinkwaswo leswi tsariweke ehenhla ka mina enawini wa Muxe ni ka vaprofeta, ni ka Tipisalema swi fanele ku hetiseka.”

Loko a ya emahlweni, ni leswi fanaka ni dyondzo ya Bibele eka vona, Yesu u dyondzisa a ku: “Matsalwa ma vurisile ma te [Kriste] ú ta twisiwa ku vaviseka, a tlhela a pfuka eku feni hi siku ra vunharhu. Kutani, hi vito ra yena, timhaka ta ku hundzuka ni ku rivaleriwa swidyoho ti ta twarisiwa ematikweni hinkwawo—ku sungula hi le Yerusalema, mi timbhoni ta timhaka leti.”

Hikwalaho ka swivangelo swo karhi Tomasi a nga kona eka nhlangano lowu wo hlawuleka wa madyambu lawa ya Sonto. Kutani hi masiku lama landzelaka, lavan’wana hi ku tsaka va n’wi byela va ku: “Hi vonile Hosi!”

“Loko ndzi nga voni timbanga ta timhingu eswandleni swa yena,” Tomasi wa landzula, “ni loko ndzi nga nghenisi ni xandla etsheveni ra yena, ndzi nga ka ndzi nga pfumeri.”

Hambi swi ri tano, endzhaku ka masiku ya nhungu vadyondzisiwa va hlengeletana nakambe endlwini. Kambe sweswi Tomasi u kona na yena. Hambi leswi tinyangwa ti pfariweke, Yesu nakambe u yima exikarhi ka vona a ku: “Ku rhula a ku ve na n’wina.” Loko a hundzulukela eka Tomasi, wa n’wi vitana: “Tisa ritiho ra wena la, u languta ni swandla swa mina; tshambuluta xandla xa wena, u ri nghenisa etsheveni ra mina; u nga kanakani!”

“Hosi ni Xikwembu xanga!” Tomasi a vula hi ku tshuka.

“Xana u pfumela hi leswi u nga ndzi vona xana?” Yesu wa vutisa. “Va katekile lava pfumelaka, hambiloko va nga vonanga.” Luka 24:11, 13-48; Yohane 20:19-29.

▪ I swivutiso swihi leswi munhu la nga tivekiki a swi vutisaka vadyondzisiwa lavambirhi endleleni ya vona yo ya aEmawusi?

▪ I yini leswi vuriwaka hi munhu la nga tivekiki leswi vangelaka timbilu ta vadyondzisiwa ti pfurha endzeni ka vona?

▪ Xana vadyondzisiwa va n’wi tivisa ku yini munhu loyi a nga tivekiki?

▪ Loko Keleyopasi ni loyi ngi a ri na yena va tlhelela eYerusalema, i xiviko xihi lexi nyanyulaka lexi va xi twaka?

▪ I ku humelela kwihi ka vuntlhanu loku Yesu a ku endlaka eka vadyondzisiwa va yena, naswona ku humelela yini hi nkarhi wolowo?

▪ Ku humelele yini masiku ya nhungu endzhaku ka ku humelela ka Yesu ka vuntlhanu, naswona eku heteleleni Tomasi u khorwiseke njhani leswaku Yesu wa hanya?