Dyondzo 3

Yesu Kreste I Mani?

Ha yini Yesu a vitaniwa N’wana wa Xikwembu wa “mativula”? (1)

Ha yini a vitaniwa “Rito”? (1)

Xana Yesu a a tela yini emisaveni tanihi munhu? (2-4)

Ha yini a endle masingita? (5)

Xana Yesu u ta endla yini ku nga ri khale? (6)

1. Loko Yesu a nga si ta laha misaveni a a hanya etilweni a ri munhu wa moya. A a ri xivumbiwa xo sungula xa Xikwembu, hikwalaho u vitaniwa N’wana wa Xikwembu wa “mativula.” (Vakolosa 1:15; Nhlavutelo 3:14) Yesu hi yena N’wana a ri yexe loyi Xikwembu xi nga n’wi vumba hi xoxe. Yehovha u tirhise Yesu loyi a nga si va munhu wa nyama tanihi “mutatisi” wakwe ku tumbuluxa swilo leswin’wana hinkwaswo etilweni ni le misaveni. (Swivuriso 8:22-31; Vakolosa 1:16, 17) Xikwembu xi tlhele xi n’wi tirhisa ku va muvulavuleri wa xona lonkulu. Hi yona mhaka leyi Yesu a vitaniwaka “Rito.”—Yohane 1:1-3; Nhlavutelo 19:13.

2. Xikwembu xi rhumele N’wana wa xona emisaveni hi ku hundzisela vutomi bya yena ekhwirini ra Mariya. Hikwalaho Yesu a nga vanga na yena tatana wa munhu. Hikwalaho a nga vanga na xidyoho ni xin’we kumbe ku pfumala ku hetiseka. Xikwembu xi rhumele Yesu emisaveni hikwalaho ka swivangelo swinharhu: (1) Leswaku a ta hi dyondzisa ntiyiso mayelana ni Xikwembu (Yohane 18:37), (2) leswaku a ta hlayisa vutshembeki lebyi hetisekeke, a hi lunghiselela ntila wo wu landzela (1 Petro 2:21), ni (3) ku nyikela vutomi byakwe leswaku a hi ntshunxa eka xidyoho ni rifu. Ha yini leswi a swi laveka?—Matewu 20:28.

3. Hi ku tlula ku lerisa ka Xikwembu, munhu wo sungula, Adamu, u endle leswi Bibele yi swi vitanaka “xidyoho.” Kutani Xikwembu xi n’wi gwevele rifu. (Genesa 3:17-19) A a nga ha faneleki hi ku ya hi mimpimanyeto ya Xikwembu, kutani a a nga ha hetisekanga. Hakatsongo-tsongo u dyuharile ivi a fa. Adamu u hundzisele xidyoho eka vana vakwe hinkwavo. Hi yona mhaka leyi na hina hi dyuhalaka, hi vabyaka ni ku fa. Xana vanhu a va ta ponisiwa njhani?—Varhoma 3:23; 5:12.

4. Yesu a ri munhu la hetisekeke ku fana na Adamu. Hambiswiritano, ku hambana na Adamu, Yesu a a yingisa Xikwembu eka hinkwaswo hambiloko a ri endzingweni lowukulu. Hikwalaho u kote ku nyikela vutomi byakwe lebyi hetisekeke leswaku a hakela xidyoho xa Adamu. Leswi hi swona leswi Bibele yi swi vulaka “nkutsulo.” Xisweswo vana va Adamu a va ta ntshunxeka eka xidyoho ni rifu. Hinkwavo lava kombisaka ripfumelo eka Yesu va nga rivaleriwa swidyoho swa vona ni ku kuma vutomi lebyi nga heriki.—1 Timotiya 2:5, 6; Yohane 3:16; Varhoma 5:18, 19.

5. Loko a ri emisaveni Yesu u horise vavabyi, a phamela lava nga ni ndlala, a miyeta ni swidzedze. U tlhele a pfuxa ni vafi. Xana a ma endlela yini masingita? (1) A a va twela vusiwana vanhu lava xanisekaka, naswona a a lava ku va pfuna. (2) Masingita ya yena a ma kombisa leswaku a a ri N’wana wa Xikwembu. (3) Ma kombise leswi a nga ta swi endlela vanhu lava yingisaka loko a fuma misava a ri Hosi.—Matewu 14:14; Marka 2:10-12; Yohane 5:28, 29.

6. Yesu u file kutani Xikwembu xi n’wi pfuxa a ri xivumbiwa xa moya, xa matimba kutani a tlhelela etilweni. (1 Petro 3:18) Ku sukela enkarhini wolowo, Xikwembu xi n’wi endle Hosi. Ku nga ri khale Yesu u ta susa vuhomboloki ni ku xaniseka hinkwako laha misaveni.—Pisalema 37:9-11; Swivuriso 2:21, 22.

[Swifaniso leswi nga eka tluka 7]

Vutirheli bya Yesu a byi katsa ku dyondzisa, ku endla masingita ni ku nyikela vutomi bya yena hikwalaho ka hina