Dyondzo 6

Xana Mfumo Wa Xikwembu I Yini?

Xana Mfumo wa Xikwembu wu kwihi? (1)

Xana i mani Hosi ya wona? (2)

Xana va kona van’wana lava fumaka ni Hosi leyi? Loko swi ri tano, xana i vangani? (3)

I yini lexi kombisaka leswaku hi hanya emasikwini ya makumu? (4)

Xana Mfumo wa Xikwembu wu ta va endlela yini vanhu enkarhini lowu taka? (5-7)

1. Loko a ri laha misaveni, Yesu u dyondzise valandzeri vakwe ku khongelela Mfumo wa Xikwembu. Mfumo i hulumendhe leyi rhangeriwaka hi hosi. Mfumo wa Xikwembu i hulumendhe yo hlawuleka. Wu simekiwe etilweni naswona wu ta fuma misava leyi. Wu ta hlawulekisa, kumbe ku kwetsimisa vito ra Xikwembu. Wu ta endla leswaku ku rhandza ka Xikwembu ku endliwa emisaveni tanihi le tilweni.—Matewu 6:9, 10.

2. Xikwembu xi tshembise leswaku Yesu u ta va Hosi ya Mfumo wa xona. (Luka 1:30-33) Loko Yesu a ri emisaveni, u tikombise a ta va Mufumi wa tintswalo, wo lulama ni la hetisekeke. Loko a tlhelela etilweni, a nga vekiwanga ku va Hosi ya Mfumo wa Xikwembu xikan’we-kan’we. (Vaheveru 10:12, 13) Hi 1914, Yehovha u nyike Yesu vuhosi lebyi A n’wi tshembiseke byona. Ku sukela kwalaho, Yesu u fume etilweni a ri Hosi leyi hlawuriweke ya Yehovha.—Daniyele 7:13, 14.

3. Yehovha u tlhele a hlawula vavanuna ni vavasati vo tshembeka emisaveni leswaku va ya etilweni. Va ta fuma na Yesu tanihi tihosi, vaavanyisi ni vaprista ehenhla ka vanhu. (Luka 22:28-30; Nhlavutelo 5:9, 10) Yesu u vitane vafumi-kulobye eMfun’weni wakwe a ku i “ntlhambinyana.” Nhlayo ya vona i 144 000.—Luka 12:32; Nhlavutelo 14:1-3.

4. Hi nkarhi lowu Yesu a veke Hosi ha wona, u cukumete Sathana ni tintsumi takwe leto homboloka va suka etilweni va ta exivandleni xa laha misaveni. Hi yona mhaka leyi swilo swi nga biha ku tlurisa laha misaveni ku sukela hi 1914. (Nhlavutelo 12:9, 12) Tinyimpi, tindlala, mintungu, ku andza ka vuhomboloki—leswi hinkwaswo i xiphemu xa “xikombiso” lexi kombaka leswaku Yesu wa fuma ni leswaku mafambiselo lawa ma le masikwini ya wona ya makumu.—Matewu 24:3, 7, 8, 12; Luka 21:10, 11; 2 Timotiya 3:1-5.

5. Ku nga ri khale, Yesu u ta avanyisa vanhu, a va hlawula tanihi murisi loko a hlawula tinyimpfu eka timbuti. “Tinyimpfu” i vanhu lava tikombiseke tanihi vafumiwa va yena lavo tshembeka. Va ta kuma vutomi lebyi nga heriki emisaveni. “Timbuti” i vanhu lava nga ta va va ale Mfumo wa Xikwembu. (Matewu 25:31-34, 46) Ku nga ri khale, Yesu u ta herisa vanhu hinkwavo lava fanaka ni timbuti. (2 Vatesalonika 1:6-9) Loko u lava ku va un’wana wa “tinyimpfu” ta Yesu, u fanele ku yingisela rungula ra Mfumo ni ku endla hi ku pfumelelana ni leswi u swi dyondzaka.—Matewu 24:14.

6. Sweswi misava yi avanyisiwe hi matiko yo tala swinene. Rin’wana ni rin’wana ri ni hulumendhe ya rona n’wini. Hakanyingi matiko lawa ma lwa hi xiwona. Kambe Mfumo wa Xikwembu wu ta siva tihulumendhe hinkwato ta vanhu. Yi ta va yona ntsena hulumendhe leyi fumaka emisaveni hinkwayo. (Daniyele 2:44) Kutani a ku nga ha vi na nyimpi, vugevenga ni madzolonga. Vanhu hinkwavo va ta tshama swin’we hi ku rhula ni vun’we.—Mikiya 4:3, 4.

7. Hi nkarhi wa ku Fuma ka Yesu ka Gidi ra Malembe, vanhu lavo tshembeka va ta hetiseka, naswona misava hinkwayo yi ta va paradeyisi. Loko malembe ya gidi ma herile, Yesu u ta va a endle hinkwaswo leswi Xikwembu xi n’wi kombeleke ku swi endla. Kutani u ta tlherisela Mfumo eka Tata wa yena. (1 Vakorinto 15:24) Swi nga va njhani loko wo byela vanghana va wena ni varhandziwa va wena malunghana ni leswi Mfumo wa Xikwembu wu nga ta endla swona?

[Xifaniso lexi nga eka tluka 13]

Ehansi ka ku fuma ka Yesu, a ku nge he vi na rivengo kumbe xihlawuhlawu