Dyondzo 7

Ku Tshinelela Xikwembu Hi Xikhongelo

Ha yini swi ri swa nkoka ku khongela nkarhi na nkarhi? (1)

Xana u fanele ku khongela eka mani, naswona njhani? (2, 3)

Hi tihi timhaka leti ku faneleke ku khongeriwa ha tona? (4)

Xana u fanele ku khongela nkarhi muni? (5, 6)

Xana Xikwembu xi yingisela swikhongelo hinkwaswo? (7)

1. Xikhongelo i ku vulavula ni Xikwembu hi ku titsongahata. U fanele ku khongela eka Xikwembu nkarhi na nkarhi. Hi ndlela yoleyo u nga titwa u ri kusuhi na xona tanihi munghana la rhandzekaka. Yehovha hi lonkulu naswona u ni matimba, kambe wa swi yingisela swikhongelo swa hina! Xana u khongela eka Xikwembu nkarhi na nkarhi?—Pisalema 65:2; 1 Vatesalonika 5:17.

2. Xikhongelo i xiphemu xa vugandzeri bya hina. Xisweswo hi fanele ku khongela eka Yehovha Xikwembu ntsena. Loko Yesu a ri emisaveni, nkarhi na nkarhi a khongela eka Tata wa yena, ku nga ri eka munhu un’wana. Na hina hi fanele ku endla tano. (Matewu 4:10; 6:9) Hambiswiritano, swikhongelo swa hina hinkwaswo swi fanele ku hundzisiwa hi vito ra Yesu. Leswi swi vula leswaku hi xixima xikhundla xa Yesu ni leswaku hi ni ripfumelo egandzelweni rakwe ra nkutsulo.—Yohane 14:6; 1 Yohane 2:1, 2.

3. Loko hi khongela hi fanele ku vulavula ni Xikwembu swi huma embilwini. A hi fanelanga hi vula swikhongelo leswi nhlokohatiweke kumbe leswi tsariweke ebukwini ya swikhongelo. (Matewu 6:7, 8) Hi nga khongela hi ri exiyin’weni xin’wana ni xin’wana lexi xiximekaka, nkarhi wun’wana ni wun’wana ni le ndhawini yin’wana ni yin’wana. Xikwembu xi nga twa ni swikhongelo leswi nga twakaliki leswi vuriwaka hi mbilu. (1 Samuwele 1:12, 13) I swinene ku kuma ndhawu leyi rhuleke ekule ni vanhu van’wana leswaku hi ta khongela hi timhaka ta hina vini kona.—Marka 1:35.

4. Xana i timhaka muni leti u nga khongelaka ha tona? Xin’wana ni xin’wana lexi nga khumbaka vuxaka bya wena na xona. (Vafilipiya 4:6, 7) Xikhongelo xa xikombiso xi dyondzisa leswaku hi fanele ku khongela hi vito ra Yehovha ni xikongomelo xakwe. Hi nga tlhela hi kombela ku nyikiwa swilaveko swa hina swa nyama, ku rivaleriwa swidyoho ni mpfuno wo lwisana ni miringo. (Matewu 6:9-13) Swikhongelo swa hina a swi fanelanga swi va swa vutianakanyi. Hi fanele ku khongelela swilo leswi twananaka ni ku rhandza ka Xikwembu ntsena.—1 Yohane 5:14.

5. U nga ha khongela nkarhi wihi na wihi loko mbilu ya wena yi ku susumetela ku nkhensa kumbe ku dzunisa Xikwembu. (1 Tikronika 29:10-13) U fanele ku khongela loko u ri ni swiphiqo ni loko ripfumelo ra wena ri ringiwa. (Pisalema 55:22; 120:1) Swi fanerile ku khongela u nga si dya swakudya swa wena. (Matewu 14:19) Yehovha u hi rhamba leswaku hi khongela “minkarhi hinkwayo.”—Vaefesa 6:18.

6. Ngopfu-ngopfu hi fanele ku khongela loko hi endle xidyoho lexikulu. Eminkarhini yo tano hi fanele ku kombela musa ni ndzivalelo wa Yehovha. Loko hi phofula swidyoho swa hina eka xona ni ku endla hilaha hi nga kotaka hakona leswaku hi nga ha swi engeti, Xikwembu xi “tiyimisele ku rivalela.”—Pisalema 86:5, NW; Swivuriso 28:13.

7. Yehovha u yingisela swikhongelo swa vanhu lavo lulama ntsena. Leswaku swikhongelo swa wena swi twiwa hi Xikwembu, u fanele ku tikarhatela ku hanya hi ku landza milawu ya xona. (Swivuriso 15:29; 28:9) U fanele ku titsongahata loko u khongela. (Luka 18:9-14) U fanele ku endla leswi pfumelelanaka ni leswi u swi khongelelaka. Xisweswo u ta tikombisa leswaku u ni ripfumelo ni leswaku u tiyisile eka leswi u swi vulaka. Loko u endla sweswo hi kona laha Yehovha a nga ta hlamula swikhongelo swa wena.—Vaheveru 11:6.