Dyondzo 16

Xiboho Xa Wena Xo Tirhela Xikwembu

Xana u fanele ku endla yini leswaku u va munghana wa Xikwembu? (1, 2)

Xana u nga ku endlisa ku yini ku tinyiketela ka wena eka Xikwembu? (1)

Xana u fanele ku khuvuriwa rini? (2)

Xana u nga ma kuma njhani matimba ya ku tshama u tshembekile eka Xikwembu? (3)

1. Leswaku u va munghana wa Xikwembu, u fanele u kuma vutivi lebyinene bya ntiyiso wa Bibele (1 Timotiya 2:3, 4), pfumela eka swilo leswi u swi dyondzeke (Vaheveru 11:6), tisole eswidyohweni swa wena (Mintirho 17:30, 31), naswona u hundzula vutomi bya wena. (Mintirho 3:19) Kutani ku rhandza ka wena Xikwembu ku fanele ku ku susumetela ku tinyiketela eka xona. Leswi swi vula leswaku exikhongelweni xa wena n’wini, u xi byela leswaku u tinyiketela eka xona ni ku endla ku rhandza ka xona.—Matewu 16:24; 22:37.

2. Endzhaku ka loko u ta va u tinyiketerile eka Xikwembu, u fanele u khuvuriwa. (Matewu 28:19, 20) Nkhuvulo i ndlela yo kombisa mani na mani leswaku u tinyiketele eka Yehovha. Hikwalaho nkhuvulo i wa lava kuleke ku ringana leswaku va endla xiboho xo tirhela Xikwembu. Loko munhu a khuvuriwa, miri wa yena hinkwawo wu fanele wu nghenisiwa ematini swa xinkarhana.a—Marka 1:9, 10; Mintirho 8:36.

3. Endzhaku ka loko u tinyiketerile, Yehovha u ta langutela leswaku u hanya hi ku pfumelelana ni xitshembiso xa wena. (Pisalema 50:14; Eklesiasta 5:4, 5) Diyavulosi u ta ringeta ku ku sivela ku tirhela Yehovha. (1 Petro 5:8) Kambe titshinete eka Xikwembu hi xikhongelo. (Vafilipiya 4:6, 7) Dyondza Rito ra xona siku na siku. (Pisalema 1:1-3) Namarhelana ni vandlha. (Vaheveru 13:17) Hi ku endla swilo leswi hinkwaswo, u ta kuma matimba yo tshama u tshembekile eka Xikwembu. Xisweswo u nga endla swilo leswi Xikwembu xi swi languteleke eka wena hilaha ku nga heriki!

[Nhlamuselo ya le hansi]