Ndlela Yo Kuma Vukhongeri Bya Ntiyiso

Loko u lava ku va munghana wa Xikwembu, u fanele u va eka vugandzeri lebyi Xikwembu xi byi amukelaka. Yesu u vule leswaku “vagandzeri va ntiyiso” va ta gandzela Xikwembu hi ku pfumelelana ni “ntiyiso.” (Yohane 4:​23, 24) Ku ni ndlela yin’we ntsena leyi lulameke ya ku gandzela Xikwembu. (Vaefesa 4:​4-⁠6) Vukhongeri bya ntiyiso byi yisa evuton’wini lebyi nga heriki, kasi vukhongeri bya mavunwa byi yisa eku lovisiweni.​—⁠Matewu 7:​13, 14.

U nga kuma vukhongeri bya ntiyiso hi ku xiyisisa vanhu lava nga eka byona. Tanihi leswi Yehovha a nga lonene, lava va nga vagandzeri va yena va ntiyiso va fanele va va vanhu lavanene. Tanihi leswi nsinya lowunene wa malamula wu humesaka malamula lamanene, vukhongeri bya ntiyiso byi humesa vanhu lavanene.​—⁠Matewu 7:​15-⁠20.

Vanghana va Yehovha va yi xixima swinene Bibele. Va swi tiva leswaku Bibele yi huma eka Xikwembu. Va pfumelela leswi yi swi vulaka leswaku swi kongomisa vutomi bya vona, swi va tlhantlhela swiphiqo swa vona ni ku va pfuna ku dyondza hi Xikwembu. (2 Timotiya 3:​16) Va ringeta ku hanya hi ku pfumelelana ni leswi va swi chumayelaka.

Vanghana va Yehovha va rhandzana. Yesu u kombise rirhandzu ra yena eka vanhu hi ku va dyondzisa hi Xikwembu ni hi ku horisa lava vabyaka. Lava va nga evukhongerini bya ntiyiso va tlhela va rhandzana. Ku fana na Yesu, a va va languteli ehansi lava nga swisiwana kumbe lava nga va rixaka rin’wana. Yesu u vule leswaku vadyondzisiwa va yena va ta voniwa hi rirhandzu leri va kombisanaka rona.​—⁠Yohane 13:⁠35.

Vanghana va Xikwembu va xixima vito ra Xikwembu, ku nga Yehovha. Loko munhu wo karhi a ala ku ku vitana hi vito ra wena, xana munhu yoloye a wu ta n’wi endla munghana wa wena lonkulu? Doo! Loko hi ri ni munghana, hi n’wi vitana hi vito ra yena naswona hi vulavula kahle hi munghana yoloye eka van’wana. Kutani lava va lavaka ku va vanghana va Xikwembu va fanele va xi vitana hi vito ra xona naswona va vulavula hi xona eka van’wana. Yehovha u lava leswaku hi endla sweswo.​—⁠Matewu 6:⁠9; Varhoma 10:​13, 14.

Ku fana na Yesu, vanghana va Xikwembu va dyondzisa vanhu hi Mfumo wa Xikwembu. Mfumo wa Xikwembu i hulumendhe ya le tilweni leyi nga ta hundzula misava leyi yi va paradeyisi. Vanghana va Xikwembu va byela vanhu van’wana mahungu lawa lamanene ya Mfumo wa Xikwembu.​—⁠Matewu 24:⁠14.

Timbhoni ta Yehovha ti ringeta ku va vanghana va Xikwembu. Ti xixima Bibele naswona ta rhandzana. Ti tlhela ti tirhisa ni ku xixima vito ra Xikwembu naswona ti dyondzisa van’wana hi Mfumo wa Xikwembu. Timbhoni ta Yehovha ti gandzela hi ndlela ya ntiyiso emisaveni namuntlha.