Ku Tshukatshukisa Miri Ni Ku Languteka Ka Nghohe

VANHU va mindhavuko yin’wana swi va olovela swinene ku tshukatshukisa miri ku tlula vanhu va mindhavuko yin’wana. Kambe, vanhu hinkwavo va vulavula hi ku cinca ku languteka ka nghohe ya vona kumbe ku tshukatshukisa miri hi ndlela yo karhi. Leswi swi tano hambi munhu a ri eku buleni kumbe a vulavula emahlweni ka vanhu.

Yesu ni vadyondzisiwa vakwe vo sungula a va yi tshukatshukisa miri ya vona loko va vulavula. Eka xiendlakalo xin’wana, ku ni munhu la nga vika eka Yesu leswaku mana wakwe ni vamakwavo va lava ku vulavula na yena. Yesu u hlamule a ku: “I mani mana wa mina, naswona i vamani vamakwerhu?” Kutani Bibele ya engetela yi ku: “A tshambulutela voko eka vadyondzisiwa vakwe, a ku: ‘Maswivo! Mana wa mina ni vamakwerhu hi lava!’” (Mat. 12:48, 49) Nakambe, eka tindzimana tin’wana to fana na Mintirho 12:17 na 13:16, Bibele yi kombisa leswaku Muapostola Petro na Pawulo na vona va tshukatshukise miri hi ndlela ya ntumbuluko loko va vulavula.

Timhaka ni mintlhaveko a swi vuriwi hi rito ntsena kambe swi vuriwa na hi ku tshukatshukisa miri ni ku languteka ka nghohe. Loko leswi swi nga tirhisiwi kahle swi nga ha endla vanhu va anakanya leswaku a wu swi tsakeli leswi u swi vulaka. Kambe loko tindlela leti ta ku vulavula ti tirhisiwa kahle hinkwato, mhaka yi twisiseka ku antswa. Hambiloko u vulavula hi riqingho, loko u tshukatshukisa miri naswona nghohe ya wena yi languteka hi mfanelo, rito ra wena ri ta kombisa leswaku mhaka leyi u yi vulaka i ya nkoka wo tanihi kwihi swin’we ni ndlela leyi u titwaka ha yona hi leswi u swi vulaka. Xisweswo, hambi u le ku vulavuleni kumbe u le ku hlayeni, hambi vayingiseri va ku langutile kumbe va langute tikopi ta vona ta Bibele, ku tshukatshukisa miri ni ku tirhisa nghohe i swa nkoka.

Ndlela leyi u wu tshukatshukisaka ha yona miri ni ndlela leyi u tirhisaka nghohe ha yona yi fanele yi va ya ntumbuluko hayi yo yi hlaya ebukwini yo karhi. A wu dyondzisiwanga hi munhu ku hleka kumbe ku hlundzuka. Swi tano ni hi ku tshukatshukisa miri, ku fanele ku kombisa mintlhaveko ya wena n’wini. Loko u ya u titoloveta ku tshukatshukisa miri hi ndlela ya ntumbuluko, swi ta ya swi ku olovela swinene.

Ku ni mixaka mimbirhi ya ku tshukatshukisa miri: ko hlamusela ni ko kandziyisa. Ku tshukatshukisa miri loku hlamuselaka, ku kombisa xiendlo xo karhi kumbe ku kombisa mpimo ni ndhawu. Exikolweni, loko u tirhela eka yinhla yo tshukatshukisa miri, wu tshukatshukise hi tindlela to tala, hayi hi ndlela yin’we kumbe timbirhi ntsena. Eka nkulumo ya wena hinkwayo, ringeta ku tshukatshukisa miri hi ndlela ya ntumbuluko. Loko swi ku tikela ku tshukatshukisa miri, lava marito lama kombisaka tlhelo ro karhi, mpfhuka, mpimo kumbe ndhawu. Kambe, hi xitalo, leswi lavekaka i ku tiva nkulumo ya wena kahle, u nga karhateki leswaku u langutekisa ku yini, kambe vula ni ku endla swilo hi ndlela leyi u endlaka ha yona siku ni siku. Loko munhu a ntshunxekile, a nga chuhanga, miri wu tshukatshuka hi ndlela ya ntumbuluko.

Ku tshukatshukisa miri ko kandziyisa ku kombisa ntlhaveko ni ku khorwiseka. Ku endla leswaku rungula ri twala kahle, ri hanya ni ku va ni matimba. I swa nkoka ku kandziyisa hi ku tshukatshukisa miri. Kambe tivonele! Swa olova leswaku ku tshukatshukisa miri ko kandziyisa ku hundzuka risimu ra chela. Loko u tshukatshukisa miri hi ndlela leyi fanaka hi ku phindha-phindha, swi nga ha endla leswaku vayingiseri va anakanya ha kona ku ri ni ku yingisa nkulumo. Loko mulanguteri wa xikolo a ku byela leswaku u ni xiphiqo xexo, heta nkarhi wo karhi u tirhisa ku tshukatshukisa miri loku hlamuselaka ntsena. Endzhaku ka nkarhi, tlhela u sungula ku tirhisa ku tshukatshukisa miri loku kandziyisaka.

Leswaku u kuma mpimo wo tirhisa ku tshukatshuka ka miri ko kandziyisa ni muxaka wa ku tshukatshuka lowu faneleke, anakanyela mintlhaveko ya vanhu lava u vulavulaka na vona. Ku kombetela vayingiseri swi nga ha va endla va chuha. Eka mindhavuko yin’wana, loko munhu wa xinuna o tshukatshukisa miri hi ndlela yo karhi, yo fana ni ku pfala nomu wakwe hi voko, ku kombisa ku hlamala, swi nga ha tekiwa ku ri nchumu wo endliwa hi vanhu va xisati. Eka matiko man’wana, a swi kombisi xichavo loko vanhu va xisati va tshukatshukisa mavoko hi ku ntshunxeka loko va vulavula. Xisweswo, etindhawini to tano, swi ta va swinene leswaku vamakwerhu va xisati va tshukatshukisa miri hi ku tirhisa xikandza ngopfu. Naswona ematikweni yo tala, ku tshukatshukisa miri hi ndlela leyi hundzeletiweke emahlweni ka ntlawa lowutsongo swi nga ha tekiwa ku ri xiendlo lexi hlekisaka.

Loko u ya u kuma ntokoto naswona u vulavula hi ku ntshunxeka, ku tshukatshukisa miri kun’wana ni kun’wana ka ku kandziyisa loku u ku endlaka, ku ta phofula mintlhaveko ya wena ya le ndzeni hi ndlela ya ntumbuluko, ku kombisa ku khorwiseka ka wena. Ku ta antswisa mavulavulelo ya wena.

Ku Languteka Ka Xikandza Xa Wena. Xikandza xa wena xi yi kombisa kahle ndlela leyi u titwaka ha yona ku tlula xiphemu xihi ni xihi xa miri wa wena. Mahlo ya wena, xivumbeko xa nomu wa wena, mavoyamelo ya nhloko ya wena, hinkwaswo swi vula swo karhi. Hambi u nga vulanga nchumu, xikandza xa wena xi nga kombisa ku nga tsakeli, ku nyenya, ku pfilunganyeka, ku hlamala kumbe ku tsaka. Loko ku languteka koloko ka nghohe ku fambisana ni marito, ku endla leswaku mhaka yi twisiseka kahle, yi khumba ni mintlhaveko. Muvumbi u endle leswaku ku va ni misiha yo tala exikandzeni xa wena—yi tlula 30 loko yi hlanganile. Kwalomu ka hafu ya misiha leyi ya tirha loko u n’wayitela.

Hambi u le xitejini kumbe u le nsin’wini, u lwela ku avelana ni vanhu rungula leri tsakisaka, leri ri nga endlaka timbilu ta vona ti tsaka. Ku n’wayitela ku kombisa leswaku u tamele timhaka to tsakisa. Hi hala tlhelo, loko xikandza xa wena xi nga kombisi nchumu, vanhu va nga ha swi kanakana leswi u swi vulaka.

Ku tlula kwalaho, ku n’wayitela ku byela van’wana leswaku wa va tsakela. Leswi i swa nkoka swinene masiku lawa tanihi leswi vanhu va chavaka vanhu lava va nga va tiviki. Ku n’wayitela ka wena ku nga endla vanhu va ntshunxeka, va tsakela leswi u swi vulaka.